Bye Jamaika 🇯🇲 und Holà Costa Rica🇨🇷

Vorgeschter simmer vo Kingston uf Montego Bay cruist. Mier hend halt gmacht binere Vogelstation womer ganz vill Kolibris hend dörfä gseh. Mier hend si mit Zuckerwasser ahglockt und si hend us so Gläsli trunkä. Mier hend das meeega cool gfunde, d Mila hed ei Rueh mit sich und de Vögeli gha, hed schön ruhig d Hand aneghebt und ei Kolibri nachm andere isch ahzflügä cho.
Denn simmer is Hotel go abcheggä und den ih Pool und hend am Abig fein Znacht gässe. S erschtä Buffet vo üsnä Ferie, mega fein.

Geschter hemmer de Tag ide Doctors Cove verbracht. Am Nami hani mier dörfe go Zöpfli machä und de Dani hed mit de Chind chli bädeled und Glace gässe. 🍦
Am Abig hemmer packt und de Dani und Ich sind nuchli ufe Balkon ghöckled und hend es Bierli zämä trunke. 🫶🏽

Es sind sooo schöni zwei Wuchä gsi, mier sind faziniert vo dem Land, vo dene fründliche, liebenswärte Lüüt, vo dene Stränd, vode Natur… Es isch perfekt gsi. 🇯🇲

Mitlerwiile simmer vo Jamaika über Panama in Costa Rica ahcho. Alles isch wie am Schnüerli gloffä, d Chind hend das widermal soooo super gmacht, d Flüg ohni jeglichi Problem und etz gömmer de go pfuuse damit mer morn Morgä früeh ufmöged.. Will de gads wiiter uf Tortoguero. 🇨🇷

Mier freued üs etz fescht es nüüs schöns Land z erkundä und mier somit es nüs Abentür chönd startä.
Take Care und Grüess id Schwiiz
Family HudideiRead more