Reimposta ricerca
Auszeit
  • Alessia Gürber
  • Andy Kiser
apr 2022 – apr 2023

Auszeit

13 Monate unbezahlbare Erinnerungen ❤️☀️ Leggi altro
+15
SeguiPanoramicaCalendarioCondividiCondividiLista dei desideri
Prima i più nuovi
  • Auszeit

    Amsterdam ✖️✖️✖️

    8 luglio 2022, Olanda ⋅ ⛅ 23 °C

    Witer semmer düüset ond zwor uf Amsterdam.
    En tolle Camping hemmer gfonde, sehr stadtnöch ond met guetem Aschloss zo de Tram.
    Bi wonderschönem Wätter hemmer die Stadt chönne erkonde. De Kanäl entlang spaziert öber Brogge ond Brogge. Mol es Käfeli..mol es Aperöli, was hald so dezue ghört.
    Gäge spöteri Obe hemmer emmer meh gmerkt, dass d Loft näblig werd onds au emmer meh hed afo schmöcke noch ergend öppis Verbrönntem🔥. Ned vöu dänkt debi semmer nochli wiiter spaziert, no go Ichaufe ond de langsam zrog zom Tram. Schnöu esch gange ond mer hend en Gfohremäldig uf üsi Handys becho📱🔊.
    En Grossbrang binnere Recyclingalag metere extreme Rauchentwecklig seg de Grond vör dä plötzlechi "Näbel".
    Ergendwie speziell..wemmer de so merkt wie fest dasmer öberwacht werd..aber ergendwo döre jo au guet 🤷‍♀️.
    Zom Glöck esch de Rauch ned so rechtig bis zo eusem Camping cho ond i eusem Wohnmobil schmöckts no guet🙌.    Leggi altro

    Guarda la traduzione
  • Auszeit

    Hamburg - 🦁👑

    13 luglio 2022, Germania ⋅ ⛅ 26 °C

    Mer send acho ide Hafen-City, wo täglech tuusigi vo Container be/-entlade wärded..wens ned am Streicke wärid.
    Bi Sonneschiin ond warme Temperature geds en Stadtbesechtigong metem Bus 🚌.
    S Highlight am Obe esch s Lion King Musical, am Stage Theater an der Elbe, gseh. Wöumer uf de Bustour erfahre hend, dass de alti Elbtunnel no för Velo ond Fuessgänger offe esch, semmer nochem Musical nömm metem Schiffshuttle zrog, sondern z Fuess. I 23 Meter tüüfi semmer knapp 400m onder de Elbe spaziert🚶‍♀️🚶‍♂️. En Schwänker öber d Reeperbahn hed üs denn zo üsem perfekt glägne Stellplatz näbem Fischmarkt zrog brocht.
    Am zwöite Tag semmer z Fuess onderwägs gseh ond hend d Fuessgängerzone no erkondet.    Leggi altro

  • Auszeit

    København - Tag 100

    16 luglio 2022, Danimarca ⋅ ⛅ 16 °C

    Woow..100 Täg semmer scho onderwägs. Gester semmer öber d Gränze uf Dänemark. Höt morge semmer amene idyllische Plätzli verwacht ond rechtig Kopenhagen gfahre.
    Well do anschiinend fast jede metem Velo onderwägs esch..hemmer dänkt, dassmer vom Camping bes id Innestadt au met de Velo gönd. Fast en Veloautobahn esch das do😲.
    Bi schönem Wätter semmer dör d Altstadt gschländeret. Eusi Velos hemmer bi tuusig Anderne abgstellt ond abgschlosse gha.
    Nocheme schöne Tag hemmer de no metbecho wo d Polizeistation esch am HBF ond send de metem Bus zrog gfahre zom Camping.    Leggi altro

  • Auszeit

    Schweden🇸🇪

    19 luglio 2022, Svezia ⋅ ☀️ 24 °C

    Schwede dient grad eher us Dorchfahrtsort, esch aber au sehr schön. Mer hend super Wätter ond bis etz tolli Öbernachtigsplätz im Freie gha☀️. Mer merkid weder jede Kilometer womer meh nördlech Fahrid..d Sonne god spöter abe ond so rechtig donkel werds gar nömme znacht.
    Mer gniessed no die letschte Stonde womer in Schwede send, bevor mer rechtig Oslo fahrid ond üs uf Norwege fröied🤗.    Leggi altro

    Guarda la traduzione
  • Auszeit

    Oslo 🇸🇯

    22 luglio 2022, Norvegia ⋅ 🌧 16 °C

    Mer hend s schöne Schwede hender üs glo ond send vor paar Täg in Norwege acho.
    Well üs es Paar womer troffe hend verzellt hed, dassmer in Norwege en Nolltoleranz hed bim metfüehere vo Alkohol, hemmer üs scho fast de Chopf zerbroche🙈. Au sii hends nor vom ghöre Säge "gwösst"🤷‍♀️. Das hät bedüütet dasmer no s eint oder andere Wyli ond Schnäpsli häted mösse trenke. (Au de Whisky vom Jonas🤭)
    Mer hend üs de chli schlau gmacht ond gli usegfonde, dass d Norweger doch ned ganz soo sträng send. Womer de uf d Gränze zuegfahre send, hends üs ledeglech meteme nätte Lächle döregwenkt🤗.
    Bi Sonneschiin semmer denn üsi erste Kilometer uf norwegische Strosse gfahre. Sehr zvergliche met dene ide Schwiiz.
    Mer hend super schöni Plätzli gfonde zom Freicampe, schöni Sonneondergäng gnosse ond im Femsjøen (en See) bädelet.
    Höt semmer denn chli osserhalb vo Oslo bide IKEA go z mörgele ond denn vo det us metem Gratisbus id Innestadt gfahre. Super Agebot vode IKEA🙌. S Parkiere ide Stadt wär nämli sacketeuer😬.
    Au s Wätter hed sech denn nochem Mettag vonnere bessere Siite zeigt ond mer hend Oslo ned nor bi Räge gseh.    Leggi altro

    Guarda la traduzione
  • Auszeit
    12

    Stavanger - Preikestolen

    28 luglio 2022, Norvegia ⋅ ⛅ 10 °C

    Noch 3 Täg Rääge schiint weder d Sonne☀️🙌.
    Ganz so schlemm eschs ned gseh. Mer hends chli ruhiger gno ond send au noni grad witer wellmer ebe uf bessers Wätter ghofft hend. Stavanger esch en schöni chlini Stadt met vöu Chrüzfahrtscheff⛴️. Plötzlech esch d Stadt volle gseh.
    I de Region Stavanger hemmer auno welle en Wanderig mache zom Preikestolen⛰️. Dank de Wätterbesserig hemmer das uf höt planet ond top Bedengige gha☀️.
    Mer send früeh am Morge gstartet wöumer ned id Rushhour hend welle cho ond das hed sech definitiv glohnt🙌. Mer hend d Plattform dobe met paar Anderne teilt. Womer de abegloffe send, sends üs Carwiis entgägecho🙈.
    S Ufstoh hed sech ned nor wäg de wenige Lüüt glohnt sondern au wäg de tolle Ussecht öber s Lysefjord🤩.    Leggi altro

  • Auszeit

    Rund ums Hardangerfjord

    30 luglio 2022, Norvegia ⋅ ☁️ 17 °C

    S Wätterglück hed sech nochli wiiterzoge ond mer hend au noch de Wanderig zom Preikestolen no 2 Sonnetäg gha☀️.
    Noch dem mer vo Stavanger us id Preikestolenregion zerst fast 15km dörne Onderwassertunnel gfahre send, send noch de Region oms Hardangerfjord Bärgtunnel cho. Vo Tunnel zo Tunnel, mol öberne Brogg för is nöchste Tunnel 😅. Sogar Chreisel heds gha i dene Tunnel😲.
    D Region oms Hardangerfjord esch wonderschön! All paar Meter en Wasserfall..söst Wasser esch eigentli emmer ome. Wenn ned grad s Fjord denn secher en Bach, Floss oder en See.    Leggi altro

  • Auszeit

    Bergen

    1 agosto 2022, Norvegia ⋅ ☀️ 15 °C

    Au i de zwöite norwegische Stadt hemmer s IKEA-Agebot gnötzt ond send ned säuber id Stadt ie gfahre.
    Bi Sonneschiin ond agnähme Temperature hemmer Bergen z Fuess erkondet. Farbigi Hüsli ond vöu Stäge esch das, womer am meiste gseh hend🤗.
    2 Bier a de Sonne seled verdient sii..för 23 Franke😅. De gniesst mers uf jede Fau bewosster.    Leggi altro

    Guarda la traduzione
  • Auszeit

    Trollstigen

    5 agosto 2022, Norvegia ⋅ ⛅ 10 °C

    Nochem Wätterglöck in Bergen, heds weder us Chöble gschöttet🌧. Was devör no iidröcklecher esch als söst scho, send d Wasserfäll. Onglaublech was do alles a Wasser zämechond.
    Mer send voller Vorfreud rechtig Trollstigen gfahre. Es sehr korveriichi Stross, wo sozäge zmetzt dör döre en Wasserfall sin Wäg nemmt. Omso nöcher mer aber det he cho send, esch de Näbel emmer dechter worde😏. Bimene Shop no oberhalb hemmer es Päuseli gmacht ond ghofft dases de doch no uftuet. S Nohfroge bi de Verkäufer hed das aber ned bestätigt. Säuber chli verwonderet wos noh gluegt hend, hends üs aber gseid, dass morn besser sell si. Auso hemmer üs entschede d Nacht eifach det z bliibe ond am nöchste Morge abe z Fahre. Wiener a de Föteli ah chönd entnä, hed sech das au glohnt🤗. Bereits am spötere Obe scho (22.30) hedsech de Näbel mol för knappi 30 Minute chli ufglöst ond mer hend no paar schöni Föteli vo obe chönne Knipse📸.
    Nochdem mer de am folgende Morge bi 8°C🥶 abegfahre send, hemmer de nöchst Halt im Dorf Åndalsnes gmacht. Vo det us hemmer bi guete Wätterverhältnis e chlini Wanderig zom Romsdalseggen gmacht ond s wonderschöne Panorama chönne gniesse🤗.    Leggi altro

    Guarda la traduzione
  • Auszeit
    2

    Via Atlantikstrasse nach Trondheim

    7 agosto 2022, Norvegia ⋅ ⛅ 17 °C

    Bi Räge semmer ufem Wäg rechtig Atlantikstross onderwägs gseh. Wöumer d Hoffnig gha hend, dass gäge Obe weder chli uftuet (wies öfters esch noch so Rägetäg), hemmer chli tämpelet.
    Ufeme Rastplatz hemmer es norwegischs Päärli beobachtet, wo chli müehsam bi Räge ehri Chestene imene VW Golf verstaut hend. Chli Mettleid hemmer gha ond die Beide drom agsproche ond gfrogt, öbsi es warms Kaffi wetid. Ned lang esch gange ond mer send z vierte i eusem Womo ghöcklet, hend Kafi tronke ond plöiderlet. Wie emmer eschs sehr spannend gseh, met Iheimische z rede.
    Etz esch üs zB klar, werom dass do soo vell e-Autos ome hed -> die mönd kei Strossestüre zahle (werd etzde aber igfüehrt), bim Autochauf hedmer d Mehrwärtstür zrogg becho ond mer cha ah vellne Orte gratis Lade.
    Au hemmer etz bestätiget becho, dass en Arbetswoche in Norwege max. 36h hed...das send doch Paar weniger als bi üs.
    Noch dem Kafiklatsch heds denn sogar wörkli weder ufto ond mer hend no paar Sonnestrahle abbecho uf de Atlantikstross.
    Nocheme Rast semmer denn am nöchste Tag uf Trondheim gfahre. De Wohnort vo üsne Kafigäst😁. En feine Pizza hemmer gnosse ade Sonne ond send dör s Städtli gschländeret.    Leggi altro

    Guarda la traduzione
  • Auszeit

    Über dem Polarkreis

    11 agosto 2022, Norvegia ⋅ ☁️ 7 °C

    Noch 3 Täg Rägewätter hemmer a eusem 125igste Tag de Polarkreis öberquert. En eifachi aber wonderschöni Landschaft, bezzli blaue Hemmel ond e Rägeboge send om üs ome gseh🌈.
    Devor hemmer bim Arctic Cercle Center no en Halt gmacht ond en schöne Dokumentarfelm öber d Landschaft met sinne Bsonderheite chönne luege.
    Witer semmer dör onglaublech vöu Tunnel gfahre. Ned so guet belüchtet ond au ned wahnsennig breiti Strosse. Üsi Röckspiegel send zom Glöck no ganz..do hemmer nämlech au scho vöu Anders gseh🙈.
    Morn stüremer d Lofoten ah ond hoffed, dass sech etz alli Rägewolke förne Momänt gnueg entlärt hend😁.    Leggi altro

    Guarda la traduzione
  • Auszeit
    1

    Lofoten & Senja

    13 agosto 2022, Norvegia ⋅ 🌧 12 °C

    Met de Fähri semmer vo Skutvik noch Svolvær (Lofoten). Die ersti Fähri do z Norwege wo ned durend Fahrt, sondern nor 3x am Tag. Zom Glöck semmer ned e Halbstond noch de erste Abfahrt acho, hend aber glich e Momänt mösse warte, bis denn die nöchsti Fähri gfahre esch. Meteme Spaziergang dör Skutvik ond paar Rondene Skipbo esch das aber au schnöu verbi. Begrüesst worde semmer uf de Lofoten met paar Sonnestrahle, bevors de aber leider chorz drufabe weder esch cho Rägne.
    Trotz vellne Wolke ond emmerweder Rägegöss hemmer wonderschöni Landschafte chönne bestune.
    Noch de Lofoten semmer metere wiitere Fähri uf d Nochbersinsle Senja. Do uf Senja esch mol de grösti Troll (18 Meter höch) vo de Wält gstande. Dä esch aber leider im März 2019 abebrönnt ond mer gsehd nüd me devo.
    Au bi vöu Wolke aber aktuell keim Duurräge tuckerled mer dör Senja.    Leggi altro

    Guarda la traduzione
  • Auszeit

    Unterwegs auf der E6 🛣

    14 agosto 2022, Norvegia ⋅ ☁️ 13 °C

    Noch de Insle hed sech s Wätter scho gli weder vonnere bessere Site zeigt. E chorze Check was s Wätter die nöchste Täg so sell mache, hed üs dezue gfüehrt es Ziel z ha. Ond zwor sell am 16. August de schönsti Tag sii ond dä wettemer am Nordkapp verbrenge. Well das wahrschindli ned es oft wederholts Reiseziel esch, dafs doch scho schön si wemmer det esch.
    Trotz de vele Kilometer wo eus imene chorze Ziitrum bevorgstande send, hemmer au d Landschaft gnosse ond vöu Päuseli gmacht🤩.
    Mer hend jo doch 2 Täg ziit för ca. 480 Km 😁.    Leggi altro

  • Auszeit

    📍 Nordkapp 🎊

    16 agosto 2022, Norvegia ⋅ ⛅ 11 °C

    Mer hends gschafft ond send a üsem Färnziel vo de Womo-Reis acho. 14'480 Kilometer hemmer bis do he zroggleid ond send met super Wätterverhältnis belohnt worde.
    Noch dem mer gester bereits 256 Km gfahre send, hed de Andy nochem z Nacht plötzlech s Gfühl gha; etz sends jo norno 215 Km, das ziehnemer grad döre. Auso semmer witer de E6 gfolgt ond wo de s Nordkapp agäh gseh esch, ufd E69 abboge.
    Dör relativ kargi ond denn no sehr schöni Landschafte heds üs ganz i Norde ue gfüehrt.
    Onderwägs hemmer die erste Renntier krüzt, en verirrte, junge Fuchs weder zomne Tunnel usgleitet ond send fast vomene grosse Bussardähnleche Vogel abgschosse worde🦌🦊🦅. Dä hed de aber zom Glöck em letschte Momänt no d Korve zoge ond sech doch för d Muus entschede.
    Chorz noch Metternacht semmer am Ziel acho ond uf de grossi Parkplatz gfahre. Bi chüele 13°C, wo sech dör de Nordwend öppe no chälter agfühlt hend, hemmer die erste Fotis vo de bekannte Meridianchogle gmacht. E Hand vou Lüüt send no ome gseh. Die letschte Cär wo wäggfahre send hemmer no krüzt chorz vor de Akonft ond chli noch eus send no 2 acho, wo de Wäg metem Velo zroggleit hend💪.
    Nochere erholsame Nacht semmer das ganze no bi rechtigem Tagesliecht go aluege. Das zom Glöck no bevor die erste Cär weder zuegfahre send.
    Wäg de vele Mönsche wo sech plötzlech versammlet hend, send mer no chli go Spaziere ond ane Renntierhärde hegloffe, wo fredlech am Grase gseh esch.

    [18:00]
    Ide nöchste Stonde wärdemer d Röckfahrt aträtte, wo üs dör Finnland ond zemmlech secher dör s Baltikum, met ca. 4'316 Km zrog id Zentralschwiiz füehrt.    Leggi altro

  • Auszeit

    Lappland 🇫🇮🌲🌳

    18 agosto 2022, Finlandia ⋅ ⛅ 13 °C

    Mer hend üs vom schöne Norwege verabschedet. Ech glaub Norwege esch au chli trurig gseh semmer gange..s hed nämmli weder einisch rechtig fest grägnet die Nacht. S erste Mol aber met Bletz ond Donner.
    Am Morge heds aber weder schön ufto ond mer hend die letschte Idröck vo Norwege bi Sonneschiin gsammlet. Noch Karasjok semmer öber d Gränze uf Lappland - Finnland.
    Was üs sehr schnell uffallt; es hed Wald! Vorwiegend Wald. Zwösche döre schlänglet sech en Stross. Mol chli ufe, mol chli abe ond rächts ond lenks heds Wald. Emmer mol weder chond es Seeli oder en Bach. Ond söst Wald.
    Noch ca. 120 Kilometer nochem Gränzöbergang esch s erste Dörfli met Ichaufsmöglichkeite uftaucht.
    D Nacht verbrengemer amene See. Omgäbe vo Wald😅. Ond wemmer sech die Wälder chli aluegt, merkt mer dass de Herbst scho vor de Töre stoht🍂🍁.
    🌲🌳🌲🌳🌲    Leggi altro

    Guarda la traduzione
  • Auszeit
    2

    Santa's Village🎅

    22 agosto 2022, Finlandia ⋅ ⛅ 18 °C

    Mer hend die letschte paar Täg bi Sonneschin ond agnähme Temperature in Lappland verbrocht. Jede Tag hemmer Renntier troffe. Entweder semmer üs zmetzt imene Dorf begägnet, uf de Strosse oder sie send üs bim z Nacht cho bsueche🙃.
    Au hemmer eusi ersti finnischi Sauna gha! Rechtig guet heds do🤗. Osser denn wenn d Finne ie cho send ond ufgosse hend🥵..aber för dä Fall heds en chüehle Floss grad vor de Sauna gha.
    Höt semmer in Rovaniemi bim Wiehnachtsmaadorf🎅 verbi cho ond somet de Polarchreis weder öberquert.
    Im Wiehnachtsmaadorf heds onzähligi Souveniers gäh, Wiehnachtsmusig ond feine Lachs imene Tippi wo grad ufem offne Füür zuebereitet worde esch🔥.    Leggi altro

  • Auszeit
    11

    Tauvon Uimaranta

    24 agosto 2022, Finlandia ⋅ ⛅ 16 °C

    S Wätterglöck blibt uf üsere Siite. Mer gniessed Finnland bi strahlend blauem Hemmel, Sonneschiin ond agnähme Temperature.
    Wonderschöni Rastplätz am See oder am Meer met traumhafte Landschafte ond Sonneondergäng🤩.
    D Plätz send zom Teil super usgstattet met Grillstelle ond Holz, Tesch ond Bänk ond zom Teil sogar WC's.
    Bi eim Platz häts sogar Sauna's gha..aber leider sends die grad am Renoviere.
    D Strosse in Finnland send zom grösste Teil ähndlech wie ide Schwiiz. Wemmer aber en "Hauptstross" verloht gods nor no uf Schotter wiiter. Das esch normal ond die Holpperstreckene lohned sech aber definitiv zom a die schöne Plätz äne z cho.
    Emmer weder hemmer nätti Bekanntschafte met Iheimische ond anderne Reisende gmacht ond spannendi Gspröch chönne füehre. Näbe Tipps womer becho hend, hemmer no glehrt, dass sie do ade Wetsküste vo Finnland gar ned finnisch redid sondern schwedisch..🤔😅. Finnisch lehred sie zwor ide Schuel aber die Sproch seg z schwerig hends gmeint😄.
    Mer gniessed die schöne Landschafte 🌅🌲🌾 ond d Mogge gniessed üs🥴.    Leggi altro

    Guarda la traduzione
  • Auszeit

    Turku

    30 agosto 2022, Finlandia ⋅ ⛅ 18 °C

    Noch paar Täg ide Natur, heds üs höt wedermol ine Stadt zoge. Bi vöu Sonneschiin hemmer de Tag in Turku verbrocht.
    Send am Floss Aurajoki entlang is Zentrom gloffe ond det ane Märt hegloffe. Vorwiegend Fröcht ond Gmües send verchauft worde. För üs esch ufem Märtplatz no es Kaffi ade Sonne dennegläge. Dör d Stadt döre zrog zom Parkplatz ond denn rechtig eusem hötige Stellplatz gfahre. Keni 2 Minute semmer denne gseh ond die erste grosse Rägetropfe hend eus wedermol d Schiibe chli potzt🙃.Leggi altro

    Guarda la traduzione
  • Auszeit

    Helsinki

    2 settembre 2022, Finlandia ⋅ ⛅ 12 °C

    Mer send i üsere letschte Destination vo Finnland acho ond 2 Täg in Helsinki verbrocht.
    En Wiitläufigi Stadt met vell Grüen, alte Boute ond gliichziitig en jugendliche Stil. Vo Foodmärt zo Flohmärt esch alles verträtte.
    Emmer weder ghört mer en Strossemusiker🪗 ond wenn d Sonne langsam ondergod chond d Musig zo allne Gasse us.
    Metere Fähri chammer sech uf eini vo de velle Inseli vor Helsinki zrog zieh oder z metzt ide Stadt im Freibad go Schwimme.
    Au zom Shoppe oder fein Ässe esch för jede Gschmack öppis ome.
    Vör üs en schöne Abschloss vo üsere Reis dör Finnland🥰🇫🇮.    Leggi altro

    Guarda la traduzione
  • Auszeit
    1

    Tallinn 🇪🇪

    4 settembre 2022, Estonia ⋅ ☁️ 13 °C

    Noch 2.5 Stond Fahrt, semmer met de Viking Line am Samstigobe in Tallinn acho. Bi de Abfahrt z Helsinki hemmer no en schöne Sonneondergang us Absched chönne gniesse. Z Tallinn acho semmer öppe 1.5Km gfahre ond hend det d Nacht verbrocht.
    En super glägne Standort ond mer hend am Sonntig z Fuess d Altstadt chönne besechtig. Ufem Rothusplatz hemmer üs a de Sonne es Apero gönnt ond spöter witeri Sehenswördigkeite wie d Burg vo Tallinn, d Alexander-Newski-Kathedrale oder de Dompark bsuecht.
    Gäg de Obe semmer is Telliskivi-Quartier. Es moderns Viertel met verschedne Bar's ond Restaurant/Streetfoodständ.
    Det hemmer au onglaublech vell Essensleferante gseh uf Velos. Aber ned nor das! Es ged in Tallinn Roboter wo zo de Restaurant fahrid (ellei natürli), sech det lönd no befölle ond denn zom Chond fahrid😅. Hemmer scho chli blöd gluegt wo eus so Eine ufem Trottoir entgäge cho esch.
    De Balti jaama turg hed scho zue gha, drom semmer am Mäntigvormittag nomol det he. En grossi Märthalle öber 3 Stöck womer alles bechond. Wörklech alles! Ässware, Kosmetikartekel, Chleider, Huushaltswar, Spellsache etc.
    Es Mettagässe heds no gä am Märt ond denn hemmer d Stadt bereits weder verloh. Sehr en schöni Altstadt bhaltemer in Erennerig ond fahrid id Natur vo Estland.    Leggi altro

    Guarda la traduzione
  • Auszeit

    Lahemaa-Nationalpark

    6 settembre 2022, Estonia ⋅ ☁️ 15 °C

    Noch de Stadt Tallinn, semmer wie gseid id Natur vo Estland gfahre. Es hed üs i nördlech Lahemaa-Nationalpark zoge.
    De Lahemaa-Nationalpark esch s erste Gebiet gseh wo vode ehemalige Sowjetunion als Nationalpark erklärt worde esch. Binnere Flächi vo 747 km², hemmer natürli ned alles devo gseh.
    De Estländer, bi ehm womer en Nacht im "Garte" hend chönne stoh, hed üs s "Viru Raba Gebiet" empfohle. Das esch en Lehrpfad dör s Hochmoorgebiet.
    E schöne Rondspaziergang hemmer det chönne mache. D Natur esch völlig onberüehrt ond werd ned vom Mönsch manipuliert. De Teil dör d Moorlandschaft chammer öberne Holzsteg go. Au geds zemmlech ide Metti vo de Moorlandschaft en Ussechtstorm, womer das Ganze vo obe no cha bestuune.
    Au bi Vögelbeobachter esch dä Park sehr es beliebts Usflogsziel.    Leggi altro

    Guarda la traduzione
  • Auszeit

    Pärnu

    7 settembre 2022, Estonia ⋅ ⛅ 12 °C

    Noch Naturpur im Lahemaa-Nationalpark ond bim einisch quer dör Estland Fahre, semmer in Pärnu acho.
    Verhältnismässig en chlini Stadt, met doch vell Grüenflächene.
    Mer hend es ruhigs Plätzli am Meer gfonde. Am Obe no en schöne Spaziergang bi Sonneondergang gmacht ond am nöchste Tag en Spaziergang is Zentrum. En chliini aber härzigi Fuessgängerzone met Cafe's ond allerlei Gschäfter.
    Vo de Hüser här ond au de Iheimische womer gseh hend, esch die Gägend secher weder chli wohlhabender. Oder secher moderner :)    Leggi altro

    Guarda la traduzione
  • Auszeit

    Gauja & Sigulda

    9 settembre 2022, Lettonia ⋅ ☀️ 16 °C

    Mer send scho im nöchste Land acho do im Baltikum ond erkondet etz Lettland.
    Bevors rechtig Küste god semmer i Gauja Nationalpark gfahre, hend det d Landschafte ond s Dorf Sigulda erkondet ond gnosse.
    Wasmer gsänd, esch vorwiegend Wald ond Fälder🌳🌾. Au emmer mol weder en wonderschöne Sonneondergang, wöu s Wätter total uf üsere Site esch🤗. Zwor scho chüehler aber es esch jo schliesslech Herbst. Ond dä esch do scho zönftig z gspöre ond z gseh🍁🍂.
    Au hemmer üsi Gasfläsche weder chönne befölle loh ond mönd ned Angst ha dass plötzlech norno chalti Chochi ged🙃.    Leggi altro

    Guarda la traduzione
  • Auszeit

    Riga

    10 settembre 2022, Lettonia ⋅ ☀️ 14 °C

    Noch vöu Wald ond Fäuder geds höt weder Stadtfeeling.
    In Riga acho stellemer euses Womo secher bimene Hafestellplatz ab.
    Do mer jo kei Velo meh hend hemmer eus z Fuess ufe Wäg gmacht. Chum a de Stross acho send Iheimischi zomne Auto gloffe ond igstege. Mer hend üs chorz bemerkbar gmacht👋, gfrogt öbs per Zuefall id Zentrum fahrid & zack hemmer en Mettfahrglägeheit gha🤗.
    Ide Altstadt acho, semmer dör d Fuessgängerzone gschländeret & hend d Sonne gnosse.
    Am Wasser entlang semmer zom zentral Markt glauffe. Einisch meh en grosse Märt met Osseständ wo vo Gschirr öber Chleider zo Elektroartikel alles verchaufed. Witer heds 3 grossi Märthallene. Det bechond mer so zemmlech alles a frösche Läbensmettel.
    Nochem zentral Markt semmer imene Tip gfolgt ond send zo de national Bibliothek. Es sehr idröcklechs Gebäude! Met onglaublech vöu Büecher natürlech😅📚 ond emene herrleche Usbleck uf d Altstadt vo Riga🤩.
    Am Obe chömmer uf d Liechter vo Riga ond de Vollmond blecke🌕.    Leggi altro

    Guarda la traduzione
  • Auszeit
    1

    Slītere Nationalpark

    12 settembre 2022, Lettonia ⋅ ☀️ 14 °C

    Üsi Route hed üs zwösche Fälder ond Wälder i Slītere Nationalpark gfüehrt.
    Am össerste Spetz vo de Küste esch s Kap Kolken. En chorze Wäg dör sandige Wald füehrt üs ad Küste. Sehr speziell zom beobachte, wie d Wälle vom Meer vo verschedne Siite uf d Küste zue chömed. Vo grad obe ond vo links, well d Küste wie gseid det en Spetz hed.
    Au sehr idröcklech send d Infotafele, womer ahand vo Belder gsehd wie vell Land sech s Meer schoweder zrog gholt hed ide letschte Johre! Ned nor uf de Infotafele hedmer das gseh, sondern au a de Küste sälber. Idröcklech wie de Sand emmer meh wäggschwemmt worde esch ond dementsprächend d Böim z Bode cho send.
    Met liechter Nervosität semmer denn spöter weder witergfahre. S Wohnmobil hed anschiinend chorz vorhär chli Party gha ond Liechtli lo Ufblenke🚨. Die Party esch de aber zo üsem Glöck weder verbi gseh😁.    Leggi altro

    Guarda la traduzione