Get the app!

Post offline and never miss updates of friends with our free app.

FindPenguins for iOS FindPenguins for Android

New to FindPenguins?

Sign up free

  • Explore, what other travelers do in:
  • Day112

    So, itz si auso die 4 Mönet umägangä u mir hei üs ufä Heiwäg gmacht. Mir si gester öppis nach dä 10ni los u hei grad mit tankä gstartet. Dr Typ wo tanket het isch vo Tanger gsi u mega lustig! Nach derä kuulä Begägnig simr mit frohä Härzä los ufd Outobahn.
    Über Genua, Milano u Como simr it Schwiz gfahrä. Nachem Gotthardtunnu simr baff gsi. Wie schön doch d' Schwiz isch! D' Bärgä mit dä wissä Zipfeli und dr Sunnäungergang – herrlech schön!
    Plötzlech – äs schlaht u chlemmt! Dr Alj het gnue gha. Nach knapp 20'000km stränger Arbeit u tröiem Da-sy heter 100km vo Bärn (Umgäbig Luzärn) nümm mögä. Mit letschter Chraft hetersech ufd Raststätt kämpft, när isch dr Pannädienst cho.
    Üsä Retter ir Not isch ä Kolleg vom Dave gsi. Mit eim Telefon u paar Minutä speter, heimr äs nöis Bössli gha! Mir si mega froh gsi, wüu so heimr üsi Habseligkeitä chönnä umruumä u de doch no bis uf Bärn fahrä.
    Z' Bärn aacho heimr no ä letschti Nacht ufemä Camping verbracht – und zwar im Eichhouz! Per Zuefau bietesi nämlech dises Jahr z' erstä Mau Wintercamping ah. 20.- u Strom inkl. Mega kuul, dass das no klappet het!
    So simr hüt Morgä mit schönstem Sunnäschin, guldigä Böim u näbärä troumhaftä Aarä erwachet. Mir si hin und wäg gsi, wie schön üs d' Schwiz begrüesst het!
    Nach däm mir aues hei zämägruumt simr mitem Bössli uf Friburg, bi Eirä womr z' Tarifa hei kenneglehrt, gah üsi Souveniers holä.
    Nachdäm mir bi Tröhler' s äs feins Zmittag u gueti Gmeinschaft hei gnossä, heimr üs vonang müessä verabschidä. Schono komisch, so nach 4 Mönet Tag u Nacht zämä ungerwägs z' si, plötzlech tschüss z' sägä... Aber zum Glück simr so gueti Fründä – de gsehtmesech sichr no so zwöi, drü Mau... ;)
    Ir Zwüschäzit heimr Pscheid becho, dass dr Alj scho z' Niederwangä ir Garage isch! S' geit auso bärguuf mit üsem Fründ!
    So, itz fröiemr üs, widr aazcho u mit öich aunä z' brichtä u sägä no ganz fest Merci ah öich!
    Merci fr öii Ratschleeg, Tipps u Geduld! Merci fr öii Gedankä, Ungerstützig u Gebät! Äs isch sones Privileg, so kuuli Lüt um sich umä z' ha!
    Dankä! Merci! Gracias! شكرا! Takk! Grazie! Danke! Obrigado!

    PS: Äs wird de no ä Iitrag fougä, womr öich dr Alj no chle gnauer wei zeigä u vorsteuä, schliesslech het är üs überau häräbracht! ;)
    Read more

  • Day110

    Vordr Côte d' Azur simr Carcassone gah aaluegä. Früeh am Morgä simr los zu derä Burgstadt. Passend zu däm ritterlechä Ort isch o z' Wätter ruuch u windig gsi. Drum simr grad us ersts ines Kafi gah zmörgelä. Nach däm feinä Gipfeli u Tee simr losgloffä dür diä härzigä Gassä. Mega hübsch isches gsi! So viu kuuli, chliini Lädeli mit feinstä Läckereiä usdr Umgäbig u süstegi tolli Sachä hei zum Schmökerä iigladä. So simr schlussändlech mit vouä Täschä zrugg zum Alj und uf Nizza gfahrä. Dert aacho isch dr Camping, womr hei usegsuecht, vou gsi u jedä rundumä zue. Glücklecherwiis heimr scho ä Camping nach Monaco gfungä u de heimr dert chönnä aalütä. Sie hei no Platz gha u so simr churzerhand no über Monaco uf Ventimiglia (Italiä) gfahrä.
    Am nächschtä Tag simr mitem Alj uf Nizza. Dert aacho simr dürnä grossä Park u när diräkt ufä Place Masséna. Dä Platz isch umgäh vo schönstä Hüser i warmä Farbä. Vo dert us simr überä Bluemämärit as Meer fürä u vo dert zumnä Ussichtspunkt, ungerhaub vor Burg. Vo dert heimr ä mega Blick über Nizza u über d' Promenade des Anglais gha – sehr lohnenswärt!
    Witer simr nomau bim Platz dürä u si dert grad anä chliini Breakdance-Show härägloffä. Sehr amüsant gsi. Speter simr ir Shoppingstrass öppis gah ässä u de zrugg zum Alj u ufä Camping.
    Hüt simr uf Monaco. Us ersts simr grad zum Chünigspalast ufä u hei dert d' Wachablösig zuegluegt. Schono imposant, mit welerä Disziplin sie ds machä! Vo hie obä hetmä übrigens ä wahnsinns Usblick über Monaco – sehr schön!
    När simr dür hübschi Gassä zur Kathedralä. Sie isch grösser gsi ausmr hei dänkt u trotz ihrerä Schlichtheit mega iiladend.
    Womer widr dunger ir Stadt si gsi, heimr üs äs feins indischs Zmittag ggönnt u si när überä uf Monte Carlo gloffä. Dr Wäg isch über d' Formel 1-Rennstrecki, dür bonzegi Quartier u zwüschä Prada- u Guccilädä gangä. Zwüschinä simr näbä wissä Tannäböim odr dür wissi "Schneepärk" cho. Schono lustig dä Kontrast vo Paumä, Mönschä i T-Shirts u Fake-Schnee.
    Nachemnä churzä Zwüschähaut am Strand simr när widr zrugg uf Monaco u dert no i Decathlon (Sportladä) letschti Bsorgigä gah machä.
    När heimr die Stadt vrlah u si mitem Alj über d' Rennstrecki – schnäu wi dr Schumi – zrugg ufä Camping.
    D' Côte d' Azur het üs sehr guet gfauä! Mega schöni Gassä u sehr bezoubernd die Städt i denä Buchtä! Vorauem aubä am Aabä, wemer si dür d' Dunkuheit gfahrä, hei d' Städt guldig gfunklet!
    So. U itz isches so wit: morn trätämr üsi Heireis ah!
    Read more

  • Day107

    Dr Wäg uf Andorra la Vella het dürnä ganz nöie u wunderschönä Teil vo Spanies Nordä gfüehrt. Hie hets itz richtig afa herbstlä, d' Böim heisech guldig gfärbt u immer widr hei wissi Bärgspitzä füräglüüslet.
    Z' Andorra när aacho, simr ufnä mega tollä Camping zmitts ir Stadt. Sobaud dr letscht Sunnästrauh isch ungergangä, isch d' Cheuti cho. U die hets auso in sich gha! Zu üsem Glück isch z' Bad uf däm Camping gheizt gsi u so heimr üs wenigstens dert chle chönnä gah wermä. Nachem Znacht simr abr schnäu i Alj.
    Hüt simr die Stadt gah gschouä. Äs sehr hübsches Stedtli! Zmitts idä Pyrenäen, d' Bärgchötti hie, und amnä Fluss ligts. Äs het zimlech Ähnlechkeitä zumnä Schwizer Bärgstedtli: viu (tüüri) Lädä, d' Laag zwüschä dä Bärgä, z' Wätter u z' grossä Skigebiet.
    Nachdäm mir dür d' Strassä si gloffä u i paar Lädä si, heimr de oscho dr Rückwäg müessä aagah. Üses nächschtä Ziu isch nämlech Carcassone u ds isch vo hie no paar Stung entfernt.
    So simr auso dr Alj gah holä u si los. Mir si widr uf Spanie u si vo dert dür vili härzegi Dörfer uf Frankriich.
    Itz heimr auso ändgültig Spanie verlah. So lang simr in Spanie greiset u hei ds Land dörfä entdeckä. Mir si überrascht wordä vo derä riesä Viufaut, wo ds Land z' bietä het u hei mega viu tolli Begägnigä dörfä ha! Hasta luego, España!
    Z' Frankriich heimr de o die erstä Schneefläckä aahtroffä – Schwiz (und Winter) mir chömä nööcher!
    Z' Carcassone het du leider dr Camping womr hei usegsuecht zue gha (obschons het gheissä, daser off isch...) u so heimr haut ufemnä Steuplatz übernachtet.
    Morn göhmr Carcassone gah aaluegä u när uf Nizza.
    Read more

  • Day105

    Die letschtä 2 Täg simr in Barcelona gsi. Sonä tolli Stadt!
    Am erstä Tag simr mitem Bös it Stadt u si grad dür die grossi Markthauä. Mega schön wiesi aues zrächtgleit u aagrichtet hei! Mir hei üs ä Saft gönnt u si de dür d' Rambla zum Kolumbus-Dänkmau gloffä. "La Rambla" – ä mega längi Strass mit Märitstäng, Kioske u linggs u rächts Iichoufslädä.
    Bim Kolumbus-Dänkmau aacho, simr miteme Lift ufä u hei so über die ganz Stadt chönnä gseh. Mega schön u viufäutig! Ufdr eintä Sitä z' Meer, dr Hafä u Gondeli, ufdr angerä Sitä dr Fluss us herbstgfärbte Böim vor Rambla, wosech zmitts dür d' Stadt schlänglet. Rächts heimr die markantä Türmli vor "Sagrada Familia" gseh und am Horizont si verschideni Höger i Himmu gragt. Uf eim vo denä steit äs zouberhafts Märlischloss (schiins ä Chiuchä...). Herrlech, dä Uusblick!
    Wider dunger acho heimr üs ufä Wäg zu derä "Sagrada Familia" gmacht – ä riesegi Kathedralä, wo vom Antoni Gaudi plant isch wordä u sit 1882 im Bou isch.
    Nachdäm mr E-Tickets kouft hei, simr inä. Dinn hets üs umghouä! So ä spezieui Chiuchä; komplett angers ausmers bis itz hei gseh. Sie isch sehr häu gsi, mit wunderschönä farbigä Fänster, wo ufdr eintä Sitä i warmä Farbä wie Rot, Orange u Gäub hei glüüchtet u ufdr angerä Sitä i chautä Farbä wie Blau u Grüen. Mir hei die spezieui u moderni Architektur gnossä, hei üs erstuunt a vilnä liebevouä Details ah Fänster u Wänd u hei d' Atmosphärä uf üs lah würkä.
    Nachdäm mir die Chiuchä verlah hei, simr mitem Bös zrugg ufä Camping, hei Znacht gmacht u si i Alj gah Fium luegä. Itz ischs ungloublech chaut sobaud d' Sunnä furt isch u so ischs duss gar nümm gmüetlech.
    Hüt simr nomau mitem Bös uf Barcelona si när miter Metro zumnä Park gfahrä. Dert heimr chle picnicet u dä Papageiä zuegluegt. Krass, wie ruhig die Millionä-Stadt hie isch!
    Itz simr i Güell-Park gloffä u si dür dä Park gloffä, wo vouer Boutä vom Gaudi isch. Wunderschöni Kunst wo dä spanisch Architekt gschaffä het! Farbig u einzigartig heter d' Wohnhüser und Plätz im Uftrag vom Güell bbouä u gstautet.
    Itz simr widr id Stadt u si dert no zum "Casa Batlló" – äs Huus vom Gaudi – u speter simr is "Bracafe" gah ässä. Erschöpft, abr sehr zfridä, simr ufä Camping.
    Morn geits witr uf Andorra la Vella.
    Read more

  • Day103

    Über Almeria, womr 1 Nacht ufemä tollä Camping am Meer hei gschlafä, simr uf Alicante gfahrä. Dert aacho heimr eigendlech diräkt wöuä gah Chinesisch ässä (Dave' s Geburi 2.0), leider heisi no zuegha. So simr ufä Camping gfahrä, hei dert ar Reception fang aues greglet u si de widr it Stadt. Itz hets off gha u so heimr äs megs feins chinesischs Znacht dörfä gniessä.
    Am nächschtä Tag simr de Alicante no gah aaluege. Näbschtem Hafä u dr schönä Strandpromenade hets üs abr nid so packt u so simr witr uf Valencia gfahrä.
    Hüt simr die 3. gröschti Stadt vo Spanie gah entdeckä. Mir si ufä Turm vor Kathedralä ufä u hei so über die ganzi Stadt chönnä gseh. Riesig ischsi, s' het Hüser u Hüser bis ah Horizont! Nachdäm mir die 207 Stägätrittä widr abä si, simr zur San Nicolás Chiuchä. Ganz versteckt imnä schmaalä Sitägässli ischsi gsi. Womer si inä cho, hets üs d' Sprach verschlagä! So wunderschön isch diä! Diä ganzä Wänd u d' Kupplä si farbig bemaut u verziert. Mä cha so viles entdeckä i denä Malereiä u chunnt usem Luegä gar nümm usä – absolut wunderschön! Dr Audioguide womr no hei gno drzue, isch super gsi. Churz u knackig!
    Itz simr no zum Mercado de Colón, ä mega schöni Markthauä mit viu Ständ vo hangmachtä Sachä wie Schmuck, Chleider odr Dekosachä und viunä Kafis. Ganz ä hübschä Platz!
    Nach däm simr widr ufä Zäutplatz u hei no Znacht gmacht.
    Hüt simr uf Peniscola. Dert aacho simr grad los i ds Burgstedtli. Mir si dür d' Gassä gloffä u hei dä Charme vom Stedtli gnossä. Nachemnä feinä Zmittag simr no zum Muschlähuus, wo d' Dana no us Chinderzitä het kennt. Mega kuul, die ganzi Fassadä mit Muschlä bestückt – dä Chinesä hets ömu o gfauä.
    Nach däm simr ab uf Barcelona.
    Read more

  • Day99

    Hüt simr d' Alhambra, ä säubstversorgendi Burgstadt, ga aaluegä. Und die Aalag isch riesig gsi! So viu verschideni Geböide u Pärk zum bestuunä – herrläch! Miteme Audioguide simr dür die verschidenä Rüüm, Geböide u Pärk gfüehrt wordä u hei i 4h die Alhambra chönnä entdeckä.
    I Nasridenpalast heimr nur zurä bestimmtä Zit inä chönnä. Dert isches wahnsinnig schön gsi! D' Wänd vo däm Palast si wunderschön verziert gsi mit arabischä Schnitzereiä u schönstä Mosaik. S' het so guet usgseh mit denä vilä verschidenä Farbä u Muster, mä isch usem Luegä fasch nümm usächo.
    Usserhaub vo däm Palast hetmä no i die verschidenä Türm chönnä, wo die meistä frd Verteidigung si gsi. Vo dert hetmä ä herrlechä Blick über Granada gha u het ufdr eintä Sitä uf Sierra Nevada gseh u ufdr angerä Sitä ufd Albaicin, d' Autstadt vo Granada. Beides het mit wiss brilliert: Sierra Nevada miteme Schneehüetli (dr erst Schnee uf üsere Reis) u d' Albaicin mit dä vilä wissä Hüser.
    D' Pärk vo derä Burgstadt hei mit schön bepflanztä Bluemäbandeli u kunstvouä Brünnä glänzt u hei zum Verwiilä iigladä.
    Aues i auem isches ä aahsträngendä Tag gsi, wüus so viu z' gseh u z' losä git, abr äs unverzichtbars Erläbnis, womäsech fasch chle vorchunnt, wie idä Märli vo Tausendundeiner Nacht.

    PS: d' Billet si beschränkt. Entwäder ganz früeh dert si (so 10i) odr sä im Voruus, wie mir, ufem Camping odr i Ticketsteuä chouffä. Ufpassä im Internet, sie si sehr übertüüret...
    Read more

  • Day98

    Uf Málaga simr mitem Alj inä. Nachdäm mir äs Parking gfungä hei, simr losgloffä grad as Meer fürä u dert ar Promenade nachägloffä bis zum "Centre Pompidou". Ds isch ä riesigä Würfu mit farbigä Schibä. Vor eintä Sitä gsehtmä diä nöii Kunstinstallation u hingerdran dr aut Lüüchtturm u auti Schiff – super Kontrast vo modern u aut! Witr simr zur Stierkampfarena u hei ds imposantä Geböide vo uss beguetachtet u si när übernä schönä Wäg it Autstadt. Dert simr zur Kathedralä. Ds isch ä wunderschöni, häui Chiuchä i goldenem Liecht. Speter simr no dür diä hübschä Gassä gschlenderet u när gägä Aabä uf Córdoba gfahrä.
    Gester am Morgä simr früeh los inä Garage. D' Brämsä vom Alj hei afah chlefelä... Ir Garage heisi d' Teili wosi bruuchä nid gha u drum heimr dr Alj ersch am Tag druf chönnä bringä.
    Nach däm Abstächer simr it Stadt inä u dert d' Moschee-Kathedralä gah luegä – und die het üs umghouä! Vo ussä äs schöns Geböide u vo inn so spezieu, dasmr usem Stuunä chuum si usecho! Dinnä simr dürnä Waud vouer rot-wiss-gstreiftä Bögä gloffä, hei d' Süülä, d' Autär, d' Schnörkeleiä u Verzierigä u z' Gsamtbiud gnossä u si hin u wäg gsi vo derä tollä Atmosphärä. Absout sehenswärt!
    Am Aabä simr när ufnä angerä Camping.
    Hüt simr am 10i i d' Garage u dert blibä bis dr Alj isch nachä gsi. Leider heisi abr äs Speziauwärkzüg nid gha u drum heisi dr Alj nachem Usänangnäh widr zämägsetzt.
    So simr los uf Granada. Dert aacho simr zum Camping womer hei usegsuecht, abr dä het zue gha wägä Bouarbeitä. So simr zumnä nächschtä wos het aazeigt, abr dä isch "se vende" gsi. Schlussändlech heimr bim 3. Aalouf när einä gfungä – u dä isch wunderhübsch gsi! "Alle guten Dinge sind drei", wiemä so schön seit.
    Mir hei no gwöschet, mit üsnä Luzärner Nachbarä gret u si ungerä. Itz isch dr Herbst o hie ganz aacho: sobaud d' Sunnä furt isch, wirds abartig chaut.
    Morn göhmr gah d' Alhambra luegä.
    Read more

  • Day95

    Vorgester simr in Gibraltar acho. Schono lustig wiemä i wenigä Meter vo Spaniä uf Ängland chunnt...
    Z' Gibraltar heimr üs uf d' Suechi gmacht nachemä Steuplatz, wos schiins hie am Hafä git. Leider heimr dä nienä gfungä. So simr bis zum "Europa Point" cho, dsch sonä üsserstä Zipfu vo Gibraltar u dert isch ä Lüchtturm, ä Moschee u ä Kanonä. Dr Lüchtturm het mega guet usgseh mit sim rot-wissä Chleid im blau-grau vom Himmu – dramatischä u majestätischä Aablick! Ufdr angerä Sitä vom Platz isch ganz chöniglich d' Moschee gstangä. Äs prächtigs Geböide!
    Nach däm mir ds aues hei agluegt, simr abä it Autstadt. Dert simr grad us ersts it Info u när dür d' Strassä gschlenderet. Krass, wie zmitts in Spaniä äs Mini-Ängland mitemä chliinä London cha bestah. D' Lüt redä aui änglisch, mä zauht mit Pounds (odr Euros) und i praktisch aunä Restaurants chamä Fish&Chips ha. Nur dr Vrcheer isch normau; sie fahrä o rächts.
    Wüumr dä Steuplatz geng no nienä hei gfungä, heimr üs entschidä, bi däm "Europa Point" ufem Parkplatz gah z' nächtigä. Währendem Znacht hets du plötzlech afah tropfä u Blitzä hei dr Himmu lah erhäuä. No heimrs gschafft aues inä z' ruumä, da hets scho aagfangä schiffä. Üsä erst Rägä sit ämnä Zitli! Mir hei üs de schnäu i Alj vrchrochä u hei no ä Fium gluegt.
    Gester heimr eich vorgha, früeh ufzstah fr ufä Bärg ufä. Z' Weckerlütä isch aber vomnä Platzrägä begleitet gsi u so heimr spontan entschidä, nomau ä Rundi witrzschlafä. So het üsä Tag när o usgseh. Nachdäm d' Sunnä dür d' Wulchä het mögä, simr losgfahrä. Abr chuum im Alj, hets widr afah schiffä. Bir Gondelistation heisi üs när o gseit, dass d' Gondeli momentan nid fahrä u so heimr üs entschidä, usserhaub ufnä Camping z' gah u dr Usflug ufä Bärg z' vrschiebä. Womr dr Camping hei gfungä u üs hei iigrichtet, heimr ä Fium im Alj-Chino gnossä u hei üs ä gmüetlechä Tag gmacht. Z' Wätter isch o widr schön gsi, abr nid so sichr. Drum simr bim Entschluss blibe, dr Usflug z' verschiebä. Am Aabä heimr CousCous à la Dana gmacht, hei nomau ä Fium gluegt u si gah schlafä.
    So, itz hüt hets klappet. Mit Sunneschiin simr erwachet u dä hetsech dr ganz Tag mögä ha.
    In the morning we met our camping-neighbours, Marie and Henning. They're norwegian people and nearly the same age as we are. After a long time of talking, we went to Gibraltar together.
    In Gibraltar we went up to the hill called "upper rock" with de cable car. On the hill it was a very nice view! We saw to Gibraltar, to Ceuta (Africa), to the Straight of Gibraltar and to Spain. Amazing and very stunning!
    As we went out of the cable car, we saw the first apes. Such cute animals! We made a roundcourse about 4km long and then went downhill with the cable car. After a good lunch with our new friends we said goodbye.
    Next stop: Málaga
    Read more

  • Day92

    Diä letschtä drei Täg heimr in Tanger vrbracht. Und die heis in sich gha! Abr dr Reihä na.
    Vo Tarifa uf Tanger simr miter Fährä ggangä. I ca. 1h heimr dr Kontinänt Afrika erreicht! Ä chle äs beklemmends Gfüuh heimr gha, womr ab derä Fährä si gstigä... Mir hei sehr viu ghört, dassmr de müessä ufpassä wägä Diebstauh u vorauem, dass mir Frouä üs nid uffäuig söuä benäh u söuä passend kleidet si. Auso simr schnuerstracks zu üsem Hotel, damit mir z' Gepäck chöi deponierä u när liecht wines Vögeli dür d' Gassä chöi schlenderä.
    Ahja, dr Alj heimr übrigens z' Tarifa ufem Camping chönnä lah – sehr gäbig gsi!
    Item, us ersts simr d' Gass vo üsem Hotel z' druuf bis mir it "Nöistadt" si cho. Dert simr öppis gah ässä, it Tourist-Info u när no paar Sachä gah iichouffä u widr is Hotel. I däm Supermarkt heisi übrigens offeni Teigwarä, womä söfu cha abpackä wiemä bruucht u Papierseck frd Frücht u frs Gmües gha – wo blibt ds ir Schwiz, heimr üs gfragt?
    Nachdäm mir z' Iikouftä si is Hotel gah tuä, simr nomau witr. Dismau heimr dr Wäg Richtig Medina, aso Autstadt, iigschlagä. Richtig wit simr nid cho u da isch ä Giu näb üs gstangä, het üs ines Gspräch verwicklet u so tah, aus wär är üse Guide. Mir hei nid gwüsst wie verhautä, äs isch üs sehr unwohl gsi. Mir hei vrsuecht sini Aahgebot abzlehnä, hei Richtig gwächslet u hei ihn nid beachtet. Aber Usduur heter gha! Schlussändlech simer inä Ladä inä u dr Bsitzer het üs erklärt, wie mit denä Lüt umgah u was sägä u het üs dür sis Hingertüürli lah entcho. So simr dä Giu loswordä u mir si itz sicherer gsi, wie umgah mit ihnä. Trotzdäm isch aues sehr frömd gsi, wie d' Händler eim aues wei ahdräihä, wie sie ufdringlech wärdä u wie d' Blickä uf üs si grichtet gsi. Aues i auem ischs ä sehr aahsträngendä Iistig gsi!
    Trotzdäm simr witrgloffä dür diä verwinkletä Gässli vor Autstadt u si schlussändlech zum Platz vom 9. Apriu cho. Ds isch ä riiiesigä Kreisu mit paar Bänkli druf u chliinem Park u rundumä Restaurants, Lädeli u Theater. Und im Kreisu isch äs riiiisä Tohuwabohu vo Outos u Fuessgänger. Amplä odr Spuurä kennesi, zmingst uf däm Platz, nid u jedä vrtrout ufä anger.
    Mir si auso i sonä Beiz gah üsä erst Marrokanisch Münzätee ha u chle verschnuufä, wüu üs het ds Gewuusel i denä Strassä mächtig dr Chopf gfüllt.
    Speter simr no ines angers Restaurant gah Marokkanisch ässä – CousCous, Tajine u Fleischspiessä. Sehr, sehr fein gsi u mega grosszügigi Portionä! So het üsä erst Tag mit vouä Büüch, müedä Ougä, vouä Chöpf u (ah-)gspanntä Härzä ggändet u mir si erschöpft is Bett.
    Aber – scho am 5.30 simr widr erwachet! Dr Muezzin het zum erstä Gebät grüeft. Fr üs isch ds ganz äs nöis Grüüsch gsi u so simr gspannt u wach daglägä u hei glost. Sehr imposant wie diä Stimmä so über diä ganz Stadt u übers ganzä Land ertönä.
    Mir hei de nomau ä Nuck gno u si am Vormittag los. Hüt heimr wöuä miteme Taxi zur Herkules Grottä fahrä. Bidä Taxis isch üs ahbbotä wordä, grad ä ganzi Tour z' machä, fr aui Touristä-Sachä z' gseh. Mir hei iigwiuigt u si los. Mir hei ä super Chauffeur gha, dr Mohamed u ä auwüssendä Guide, dr Ahmed. S' het mega gfägt u mir hei viu glachet!
    Sie si mit üs usdr Stadt usegfahrä, hei üs verschiedeni Ussichtspünkt zeigt, womä übers Meer cha blickä, si zumnä Lüüchtturm u när no gah Kameuritä. Äs mega tolls Erläbnis uf denä schönä u interessantä Tier am Meer entlang z' ritä.
    Nach derä tierischä Begägnig simr zur Herkules Grottä. Ä mega schönä Ort!
    Nach däm simr zurä Moschee u vo dert us isch dr Ahmed, üsä Guide, mit üs dür d' Medina gloffä u het üs inä Bazar bracht. U dert simr z' erst Mau am Driss begägnet. Ganz härzlech heter üs empfangä u üs i sim Teppich-Riich umägfüehrt. Mir hei chönnä Platz näh, hei äs feins Marokkanischs Münzätee serviert bcho u dr Driss het üs au sini Teppich-Artä zeigt u erklärt. Sehr spannend gsi! Im Ärdgschoss si de ono die traditionellä Chleider gsi, woner üs het iikleidet. Lustig u sehr ungwohnt üs i denä Chleider gseh z' ha! Diä ersti Begägnig mitem "Bazar Naciria" u mitem Driss het üs aunä ä handgmachtä Teppich beschert u äs traditionells Chleid frä Dave u frd Dana. Zfridä simr mitem Ahmed witr u är het üs no ines marokkanischs Restaurant bracht. Hie heimr üs vo ihm verabschidet u hei när mega feins CousCous ggässä. Nach däm feinä Ässä simr üsi Iichöif is Hotel gah tue u si när nomau dür d' Medina gschlenderet u chle gah lädelä. Mitemä Münzätee heimr dä toll u erläbnisriich Tag när beändet.
    So, hüt isch auso scho dr letscht Tag i derä ungloublechä Stadt – und am Dave si Geburtstag!
    Mir si los u hei eigentlech zumnä spezieuä Märit wöuä, wo uf üsem Stadtplan isch gsi, s' het abr niemer öppis vo däm gwüsst u aui hei gseit, dass ir Medina spezieuä Märit sig. Auso simr da blibä u us ersts grad zumnä erhöhtä Teil vor Medina. Vo dert heimr wöuä ufd Stadt abä luegä, aber irgendwie het ds nid so häräghouä... Trotzdäm isches guet gsi. Dä Teil isch nämlech ungloublech schön gsi, mit ganz viu chliinä, farbigä Gassä. Ds isch ir ganzä Medina ufgfauä: überau hetmä geng widr Gässli gseh, wo Husmuurä, Bodä, Stägätrittä u Bluemächistä bemaut si gsi – absolut bezoubernd!
    Item. Nachdäm mir widr dunger si gsi, simr per Zuefau widr am Bazar Naciria dürägloffä u dr Driss isch grad duss si. Mir heinä grüesst u är het üs nomau iigladä ufnes Tee. Nachdäm mir äs Zitli hei zämä gret, ischer mit üs i sini Wäberei/Näherei u het üs sim Neffä übergäh. Dä het aues zeigt, wie was funktioniert u was sie aues härsteuä. Nach lustigä Stundä simr o hie widr mit gueter War u zfridenem Härzä usä – dr Driss isch ä gschicktä Gschäftsmaa!
    Zur Feier vo Dave sim Geburi simr no fein gah ässä u hei när aui Sachä zämäpackt u si ufd Fährä.
    Tanger het üs ungloublech positiv überrascht u mir hei i denä 3 Täg unändlech viu tolli Erläbnis gha u Gott het üs mega viu härzlechi Lüt gschickt. Trotz däm happigä Iistig, heimr üs jedä Tag wohler gfüuht. Mir hei die härzlechi Kultur chönnä kennälehrä u hei i offenä Gspräch mega viu erfahrä übers Läbä i derä lebändigä Stadt.
    Mit viu tollä Iidrück, wunderbarä Erläbnis u ärä Fröid im Härz heimr die wahnsinns Stadt verlah u si widr ufs europäischä Festland, uf Tarifa.
    Read more

  • Day89

    Z' Tarifa simr ufemä mega tollä Camping glandet! So viu kuuli Nachbarä heimr um üs umä gha: näbädran 2 jungi Friburgerinnä, vis-á-vis Solothurner u Bärner u fasch näbä üs ä änglischi Familiä. Dr Alj isch hiä absolut im Rampäliecht gstangä, mega viu Lüt sinä cho besichtigä, bestuunä u bemalä – extrem tolli Gspräch si drbi entstangä u mir si sofort daheimä gsi! Und vo üsem Platz us heimr grad ufs 15km entferntä Afrika gseh. Schono iidrücklech, wes ufsmau so nööch isch.
    Am 1. Tag Tarifa simr is Stedtli u hei dert bi firmm (foundation for information and research on marine mammals, gründet vor Schwizerin Katharina Heyer) wöuä äs Whale Watching machä. Leider ischs z' luftig gsi u so sisi nid usegfahrä. Aber mir hei fre nächscht Tag chönnä reservierä.
    So simr us ersts fürä zumnä Lüüchtturm. Äs het so fest kuttet, dasses üs d' Sandchörner richtig is Gsicht het peitscht! Keh Wunger isch hie z' Paradies frd Kitesurfer: 300 Tag im Jahr perfektä Wind heimr ghöörä munklä. Zum Lüüchtturm heimr leider nid chönnä, dert isch abgsperrt gsi, abr drfür heimr no äs Wiili denä Kitesurfer zuegluegt. Sehr faszinierend! Widr vorä ir Stadt, simr dür d' Gassä gspaziert, hei hie und da ä Abstächer i tolli Ladä gmacht u si schlussändlech ines kuuls Restaurant Paella gah ässä. Hie heimr über d' Strass üsnä Solothurner-Nachbarä gwunkä – mir hei üs gfüuht, wie daheimä.
    Itz simr zrugg ufä Camping. Dert heimr no lang mit dä Ängländer vo näbädran gret, d' Dana isch vo ihrem Meitschi im Manga-Style porträtiert wordä u dr Alj het nöii Tattoos bcho. Speter heimr no mit dä Solothurner brichtet u hei dr Aabä gnossä.
    Hüt simr früeh ufgstangä u hei is firmm-Büro aaglütä, zum fragä, ob z' Whale Watching stattfindet. Und mir hei guetä Pscheid bcho! Ds het üs mega gfröit u so simr ufdi 15.00 it Stadt fürä. Zersch heimr ä Vortrag über die Walä u Deufinä, wo hie vorchömä, becho u när simr ufs Schiff. Mir si it Meeresängi vo Gibraltar tuckerlet u da – urplötzlech – sisi uftoucht! Überau heimr übermüetigi Deufinä gseh usem Wasser gumpä, ungerem Boot dürä schwümmä oder ufdä Wäuä surfe. Die Meistä si "Gemeine Delfine" gsi, die chliinsti Art vo hie, gäub-, grau- wiss- u schwarzfarbig. Ä richtigi Show heisi bbotä u mir heis wahnsinnig gnossä! Mitem Sunneungergang simr widr zrügg i Hafä vo Tarifa u när ufä Camping. Äs wunderbars Erläbnis gsi!
    Morn geits uf Marokko nach Tanger – u mir si sehr, sehr gspannt!
    Read more

  • Day87

    Da mir ja Vrlustä vo üsem Chuchi-Hab und Guet hei müessä iisteckä, simr us ersts nöis Gschirr u Bsteck gah chouffä. Ganz z' fridä heimr würdigä Ersatz imnä Chinesä Basar gfungä.
    So simr uf Cádiz inä.
    Da Cádiz ä Haubinslä isch, chamä diräkt vor Stadt a mehreri Stränd. Gseht wunderhübsch us!
    Ir Stadt simr dür diä chliinä hübschä Gässli gschlenderet u si no übernä tollä Märit.
    Nachem Besichtigä vo däm schmuckä Stedtli, simr dr Alj gah holä u si mitem usdr Stadt gfahrä. Huch, gar nid mau so eifach dert widr usezfingä; die Strassä si eis Labyrinth... Irgendeinisch heimr ä grossi Strass zwüschä dä Hüser gseh düräglüüslä u heis de so doch no gschafft!
    Gfahrä simr bis uf Tarifa u dert ufnä Camping.
    Read more