Dadaste Tröbewi

Diä letschtä drei Täg heimr in Tanger vrbracht. Und die heis in sich gha! Abr dr Reihä na.
Vo Tarifa uf Tanger simr miter Fährä ggangä. I ca. 1h heimr dr Kontinänt Afrika erreicht! Ä chle äs beklemmends Gfüuh heimr gha, womr ab derä Fährä si gstigä... Mir hei sehr viu ghört, dassmr de müessä ufpassä wägä Diebstauh u vorauem, dass mir Frouä üs nid uffäuig söuä benäh u söuä passend kleidet si. Auso simr schnuerstracks zu üsem Hotel, damit mir z' Gepäck chöi deponierä u när liecht wines Vögeli dür d' Gassä chöi schlenderä.
Ahja, dr Alj heimr übrigens z' Tarifa ufem Camping chönnä lah – sehr gäbig gsi!
Item, us ersts simr d' Gass vo üsem Hotel z' druuf bis mir it "Nöistadt" si cho. Dert simr öppis gah ässä, it Tourist-Info u när no paar Sachä gah iichouffä u widr is Hotel. I däm Supermarkt heisi übrigens offeni Teigwarä, womä söfu cha abpackä wiemä bruucht u Papierseck frd Frücht u frs Gmües gha – wo blibt ds ir Schwiz, heimr üs gfragt?
Nachdäm mir z' Iikouftä si is Hotel gah tuä, simr nomau witr. Dismau heimr dr Wäg Richtig Medina, aso Autstadt, iigschlagä. Richtig wit simr nid cho u da isch ä Giu näb üs gstangä, het üs ines Gspräch verwicklet u so tah, aus wär är üse Guide. Mir hei nid gwüsst wie verhautä, äs isch üs sehr unwohl gsi. Mir hei vrsuecht sini Aahgebot abzlehnä, hei Richtig gwächslet u hei ihn nid beachtet. Aber Usduur heter gha! Schlussändlech simer inä Ladä inä u dr Bsitzer het üs erklärt, wie mit denä Lüt umgah u was sägä u het üs dür sis Hingertüürli lah entcho. So simr dä Giu loswordä u mir si itz sicherer gsi, wie umgah mit ihnä. Trotzdäm isch aues sehr frömd gsi, wie d' Händler eim aues wei ahdräihä, wie sie ufdringlech wärdä u wie d' Blickä uf üs si grichtet gsi. Aues i auem ischs ä sehr aahsträngendä Iistig gsi!
Trotzdäm simr witrgloffä dür diä verwinkletä Gässli vor Autstadt u si schlussändlech zum Platz vom 9. Apriu cho. Ds isch ä riiiesigä Kreisu mit paar Bänkli druf u chliinem Park u rundumä Restaurants, Lädeli u Theater. Und im Kreisu isch äs riiiisä Tohuwabohu vo Outos u Fuessgänger. Amplä odr Spuurä kennesi, zmingst uf däm Platz, nid u jedä vrtrout ufä anger.
Mir si auso i sonä Beiz gah üsä erst Marrokanisch Münzätee ha u chle verschnuufä, wüu üs het ds Gewuusel i denä Strassä mächtig dr Chopf gfüllt.
Speter simr no ines angers Restaurant gah Marokkanisch ässä – CousCous, Tajine u Fleischspiessä. Sehr, sehr fein gsi u mega grosszügigi Portionä! So het üsä erst Tag mit vouä Büüch, müedä Ougä, vouä Chöpf u (ah-)gspanntä Härzä ggändet u mir si erschöpft is Bett.
Aber – scho am 5.30 simr widr erwachet! Dr Muezzin het zum erstä Gebät grüeft. Fr üs isch ds ganz äs nöis Grüüsch gsi u so simr gspannt u wach daglägä u hei glost. Sehr imposant wie diä Stimmä so über diä ganz Stadt u übers ganzä Land ertönä.
Mir hei de nomau ä Nuck gno u si am Vormittag los. Hüt heimr wöuä miteme Taxi zur Herkules Grottä fahrä. Bidä Taxis isch üs ahbbotä wordä, grad ä ganzi Tour z' machä, fr aui Touristä-Sachä z' gseh. Mir hei iigwiuigt u si los. Mir hei ä super Chauffeur gha, dr Mohamed u ä auwüssendä Guide, dr Ahmed. S' het mega gfägt u mir hei viu glachet!
Sie si mit üs usdr Stadt usegfahrä, hei üs verschiedeni Ussichtspünkt zeigt, womä übers Meer cha blickä, si zumnä Lüüchtturm u när no gah Kameuritä. Äs mega tolls Erläbnis uf denä schönä u interessantä Tier am Meer entlang z' ritä.
Nach derä tierischä Begägnig simr zur Herkules Grottä. Ä mega schönä Ort!
Nach däm simr zurä Moschee u vo dert us isch dr Ahmed, üsä Guide, mit üs dür d' Medina gloffä u het üs inä Bazar bracht. U dert simr z' erst Mau am Driss begägnet. Ganz härzlech heter üs empfangä u üs i sim Teppich-Riich umägfüehrt. Mir hei chönnä Platz näh, hei äs feins Marokkanischs Münzätee serviert bcho u dr Driss het üs au sini Teppich-Artä zeigt u erklärt. Sehr spannend gsi! Im Ärdgschoss si de ono die traditionellä Chleider gsi, woner üs het iikleidet. Lustig u sehr ungwohnt üs i denä Chleider gseh z' ha! Diä ersti Begägnig mitem "Bazar Naciria" u mitem Driss het üs aunä ä handgmachtä Teppich beschert u äs traditionells Chleid frä Dave u frd Dana. Zfridä simr mitem Ahmed witr u är het üs no ines marokkanischs Restaurant bracht. Hie heimr üs vo ihm verabschidet u hei när mega feins CousCous ggässä. Nach däm feinä Ässä simr üsi Iichöif is Hotel gah tue u si när nomau dür d' Medina gschlenderet u chle gah lädelä. Mitemä Münzätee heimr dä toll u erläbnisriich Tag när beändet.
So, hüt isch auso scho dr letscht Tag i derä ungloublechä Stadt – und am Dave si Geburtstag!
Mir si los u hei eigentlech zumnä spezieuä Märit wöuä, wo uf üsem Stadtplan isch gsi, s' het abr niemer öppis vo däm gwüsst u aui hei gseit, dass ir Medina spezieuä Märit sig. Auso simr da blibä u us ersts grad zumnä erhöhtä Teil vor Medina. Vo dert heimr wöuä ufd Stadt abä luegä, aber irgendwie het ds nid so häräghouä... Trotzdäm isches guet gsi. Dä Teil isch nämlech ungloublech schön gsi, mit ganz viu chliinä, farbigä Gassä. Ds isch ir ganzä Medina ufgfauä: überau hetmä geng widr Gässli gseh, wo Husmuurä, Bodä, Stägätrittä u Bluemächistä bemaut si gsi – absolut bezoubernd!
Item. Nachdäm mir widr dunger si gsi, simr per Zuefau widr am Bazar Naciria dürägloffä u dr Driss isch grad duss si. Mir heinä grüesst u är het üs nomau iigladä ufnes Tee. Nachdäm mir äs Zitli hei zämä gret, ischer mit üs i sini Wäberei/Näherei u het üs sim Neffä übergäh. Dä het aues zeigt, wie was funktioniert u was sie aues härsteuä. Nach lustigä Stundä simr o hie widr mit gueter War u zfridenem Härzä usä – dr Driss isch ä gschicktä Gschäftsmaa!
Zur Feier vo Dave sim Geburi simr no fein gah ässä u hei när aui Sachä zämäpackt u si ufd Fährä.
Tanger het üs ungloublech positiv überrascht u mir hei i denä 3 Täg unändlech viu tolli Erläbnis gha u Gott het üs mega viu härzlechi Lüt gschickt. Trotz däm happigä Iistig, heimr üs jedä Tag wohler gfüuht. Mir hei die härzlechi Kultur chönnä kennälehrä u hei i offenä Gspräch mega viu erfahrä übers Läbä i derä lebändigä Stadt.
Mit viu tollä Iidrück, wunderbarä Erläbnis u ärä Fröid im Härz heimr die wahnsinns Stadt verlah u si widr ufs europäischä Festland, uf Tarifa.Read more