Mit Rucksack um die Welt

Mit Bootstoure heimer bis iz gueti Erfahrige gmacht gha, drum buechemer e 4 tägigi Überfahrt vo Lombok nach Flores.
Es söu zum End vo üsere Reis nomau es schöns Highlight gäh. Es het aber nid nur schöni Sitene a dere Tour .
So verbringemer z.B. di 4 Täg und 3 Nächt mit 39 Passagiere (dervo 26 ufem Schlafdeck) uf engstem Ruum und schlafe uf sehr dünne Mätteli.
Dasmer uf Komfort müesse verzichte isch üs bewusst gsi, auerdings ischs mit dr Suberkeit vom Schlafdeck und dr Hygiene ufem WC nach de erste 2 Täg rapide derab gange, was eus de glich ned ganz so lässig het dunkt😅

Am erste Tag wird aues Administrative erledigt, mitemne Böss zum Hafe gfahre und de fang am 4i am nami abgleit. Mir si im Zytplan hingedri und chöme ersch nachem Sunneuntergang uf dr chline Kenawa Island ah. Dur dNacht fahremer witer.

Am zwöite Tag geits am morge früeh (5.30) mit Schnorchu u Toucherbrüue is Wasser. Inere Bucht wo Fischer ihri Netz ufezieh hets regumässig Wahlheiä.
Vo Glück rede chame aber eigentlech nid, da dr Wahlhei vom Fischerboot gfüeteret wird, damit er dert blibt und Touriste ihn chöi ahluege. Trotzdem esches es sehr idrücklechs Erläbnis mitem gröste Fisch vor Wäut döffe zschwimme. 😊
Dr rest vom Tag verbringemer ufem Deck, es wird viu gredet und umeplegeret. Dur dNacht fahremer düre bis zum Komodo Nationalpark.

Am dritte Tag chöimer am Morge bim Mantapoint ga Schnorchle. Trotz gueter Sicht gsemer leider ke Mantaroche. Es geit witer a Pink Beach, wo dür roti Korallestückli dr Strand pink färbt. Das isch o e usgezeichneti Bucht zum schnorchle. Es isch sehr dicht mit Koralle bewachse und het vili Fische.

Am letschde Tag geits am morge wider früeh los. Am 5i bringt üs dCrew ufd Padar Island. Dert loufemer ca. 30min dr Hogger deruf und hei e wahnsinnig schöni Ussicht über drü Buchte vor Insle, während d Sunne langsam d Bärge imne orange rot Ton ihfärbt. Es isch Samsti und es het drum enorm viu lüt, was das eigentlech schöne Erläbnis abschwecht. Vorem Mittag gömer no uf dRinca Island zum di gröst Echse uf dr Wäut ga besichtige, dKomodowarane. Bevormer de am späte Nami in Labuan Bajo uf dr Insle Flores ahchöme chöimer no einisch ga schnorchle.Okumaya devam et