Tag 1 - Aakunft in Bangkok
January 30, 2025 in Thailand ⋅ ☀️ 31 °C
Aakunft in Bangkok: Abzockt? Aber nume fascht!
Am 6i am morge simmer in Bangkok glandet.
Da mer beidi nöd würkli hend chöne schlafe während em Flug, simmer dementsprechend müed gsi.
De Janis wird hüt 30 🥳🤗
Richtig Energie zum fiire hemmer aber beidi nöd würkli gha nach dem Flug 😅
Vom Flughafe hemmer zerscht mal es Taxi richtig Hotel gno. Im Hotel hemmer eusi Backpacks deponiert und hend es Kafi für de Zmorge gsuecht. Nachher hemmer wele z Fuess d Stadt erkunde.
Nöd lang isch es gange, het eus en fründliche Thailänder ahgsproche und in es Gspröch verwicklet. Mir beidi nüt ahnend, hend eus gfreut über die Fründlichkeit und hend sini Tipps zum d Stadt erkunde gern ahgno.
Er het eus es paar Tempel ahgeh zum ahluege und debi au gseit mir söled unbedingt zum T.i.T. (anschienend es Touri Info Center).
Er het eus grad in es Tuk Tuk gsetzt und am Fahrer gseit wo er eus söll hi bringe. Für die ganz Tour hete mer nur 120 Baht sölle zahle (ca. 3 Franke).
Da mer beidi immer na sehr müed gsi sind, hemmer eus druf ihlah.
Bim erschte Tempel ahcho, isch eus das ganze scho chli komisch vorcho.. de Tempel isch ziemli chli gsi und scho het en neue fründliche Thai mit eus gredet und verzellt was mer unbedingt hüt alles müssed bueche suscht segs denn usbuechet..
Zrugg im Tuk Tuk hemmer euse Fahrer namal gfrögt, was denn das T.i.T. wo er eus als nächschts het wele hibringe würkli isch.
Er het gmeint es seg zur Info, mir müssed aber überhaupt nüt chaufe. Aber mer würed det für ihn en Guetschii für Benzin übercho.
Während de Fahrt hemmer denn churz googlet und schnell gmerkt, dass das ziemli sicher en Scam (Abzockig) isch.
De Janis het nöd lang gmacht und em Fahrer gseit er söll ahhalte und mir sind usgstiege.
So simmer namal guet devo cho.
Das wird eus so schnell nüme passiere!
Vo det simmer denn zerscht mal is Hotel go ihchecke und nur na go hereliege.
So müed bini (Tanja) scho lang nüme gsi! 😴
Spöter simmer denn na e Sim Charte für de Janis go organisiere. Da hemmer en super Tipp vom Timon übercho!
Imene Tattoo Studio hends günstigi lokali Sim Charte verchauft. Perfekt für de Janis!
Nacher simmer na go znacht esse (s erschte Pad Thai da in Thailand) und hend so denn glich na am Janis sin Geburi chli chöne fiire 🥳
Was für en erschte Tag!Read more