Tag 10 - Back in Bangkok

Eigentlich het euse Tag ganz guet ahgfange.
Nacheme churze zMorge hemmer eusi Rucksäck packt und eus vo eusem Gastgeber Pon verabschiedet. Mir chönd das Hotel aso nume empfehle. Mega fründlichi, hilfsbereiti und fröhlichi Familie ☺️

Da d Nachtzüg leider au das mal alli usbuechet sind (mir hends ufgeh), hemmer eus namal zum flüge entschiede.

In Bangkok glandet simmer mit em Bus zu eusem Hotel für ei Nacht gfahre und hend eus eigentlich namal en schöne Abig i de Stadt wele mache.
Ih eusem Zimmer ahcho, wäre mer am liebschte wieder hinderschi usegloffe.
Keis Fenschter, kei Klima und das het gstunke… 😵🤮😵

De Entscheid, dass mer da nöd wennd bliebe het nöd lang brucht. Aso hemmer eus uf d Suechi gmacht für e anderi Übernachtigsmöglichkeit. Am Ahfang simmer na optimistisch gsi und vom einte zum nächschte Hotel/Hostel gloffe zum d Gastgeber direkt go fröge, obs für hüt na en Platz frei hend, leider aber ohni Erfolg..

Schliesslich hemmer eus denn entschiede grad online es Zimmer z bueche wo na frei gsi isch und sind denn erscht nachher det here gloffe. Wo mer det ahcho sind, hemmer gmerkt, dass es würkli genau über de Partystrass isch und im Zimmer het mer s Gfühl gha mer staht im Club selber 😂
S einzige Zimmer wo nämlich na frei gsi isch, isch genau s vorderste direkt obe ah de Strass gsi.
Ja nu, alles isch besser gsi als das Zimmer wo mer vorher gha hend.

Mer sind denn mittlerwile am 10ni am Abig glich na öpis feins go esse und hend e Nacht mit wenig Schlaf i eusem „Partyzimmer“ verbracht.
Übrigens, d Partymusig isch bis am 6i am Morge gange, 5 Minute nachdem oise Wecker gschälet het.

Morn gahts witer mit Bus und Fähre uf Koh Chang 🏝️Read more