Exploring Australia

December 2019 - March 2020
Ab 28.12 startet unsere grosse Australien-Reise! Für Alle die gerne unser Abenteuer mitverfolgen möchten, teilen wir hier mit euch immer mal wieder ein kurzes Update mit einigen Fotos. Stay tuned und bis bald,
Fabio & Yasmin
  • 33footprints
  • 4countries
  • 69days
  • 235photos
  • 30videos
  • 45.2kkilometers
  • 28.1kkilometers
  • Day 8

    SYDNEY

    January 4, 2020 in Australia ⋅ ☀️ 31 °C

    Nach emene turbulänte Nachtflug send mer am Samschtig Morge guet in Sydney ahcho. ✈ Churz nach dem hemmer eus scho uf de Wäg gmacht zum "Opera House ", send öber die bekannti Harbour Bridge gloffe & nachher am Lunapark glandet. 🎡🎢🎠
    Zrogg simmer denn mit de Fähri & hend de Obig mit emene Gelati 🍦 und ehre wetzige Strasseshow am Hafe loh usklinge. Zum z Mittag & zum z Nacht heds 2x Vapiano gä- diräkt näb eusem Hotel, Penne & Gnocchi. 🙈

    Höt semmer s erste mol a Bondi Beach go bädele, sönnele & Küste abgloffe, wunderschön 😍
    Nach eusem erste Sunnebrand glaubet jetzt au mer,dass es besser esch sich met 50+ iicreme 🤣🙄 Ufem Heiwäg hed mich höt de Fabio s' erste mal mösse betrüge mit fremd Haarschniide 💇🏻‍♂️😯
    Read more

  • Day 10

    Shoppingwahn & Watsons Bay

    January 6, 2020 in Australia ⋅ ☁️ 22 °C

    Bereits esch die erst Woche vo eusere Reis verbi...d Ziit vergod bi dene vellne Idröck onglaublech schnell.

    Sydney hed sech schnell als rechtigs Shoppingparadies usegstellt. Einersiits heds done Läde wo eher i eusem Budget entsprächet ond anderersiits hauet alli eri Sache noch Wiehnacht ond Neujohr zo onglaubleche Schnäpplis use! Eusi Chleiderschränk ond Gottechinder werds freue. Esch nor zhoffe, dass mer ned scho bald en zuesätzlechi Koffere för all die neu War bruched. Tag 3 esch wie im Flog verbi ond vollumfänglech förs Shoppe drufgange.

    Im Gägesatz zo Singapur gots done einiges ruhiger zue ond här. Es läbt sech vell entspannter, d Lüüt send super relaxed, emmer sehr fröndlech ond hilfsbereit. Das chillige "Surfer-Gen" bi de Aussies esch also ned nor en Mythos sondern dröckt bi allne emmer weder spürbar döre.

    Am Vierte ond letschte Tag hemmer en Usflog uf Watsons Bay, öppe en Stond osserhalb vo Sydney gmacht. Es chlises Örtli wo mer en chlini Wanderig ade Köste entlang hend chönne laufe wo am Ändi no en härzige Lüchttorm gseh esch. Bevors denn med de Fähri zrogg gange esch semmer denn vomene chorze aber heftige Rägegoss öberrascht ond ordentlech verschiffed worde. Dene heisse Temperature hed das aber sehr guet do ond esch halb so schlemm gseh.

    Mer gniessed no de letschti Obig in Sydney bevor mer denn morn euse Camper abholet ond d Ostköste ufefahred. Noch öber ei Woche Hotel-Life freued mer eus etzt doch au uf euses Camper-Abentüür! Esch natürlech zhoffe, dass mer vo all dene Buschbränd in Australie ned all zu vell wärded gspöre.

    Mer mälded eus also weder medemene erste Update usem Camper. 😊
    Read more

  • Day 12

    Starting the Camperlife

    January 8, 2020 in Australia ⋅ ⛅ 23 °C

    Hello from the bush 🌳🚐

    Am Zischtig Morge hemmer eus in Sydney direkt loh abhole vom Taxi, wo eus zode Abholstation vom Camper brocht hed. Vo eusem Chauffeur hemmer au grad no Tipps becho, unter anderem au wo euse erste Stopp zom campe sell sie. Mer hend euses rise Monster vo Maui mit vell Vorfreud entgäge gno & send relativ chorz ond knapp igfüehrt worde. Wo mer denn no s'Gstell mit Proviant vo vorhärige Camperfrönde entdeckt hend, hemmer eus sofort medemene erste Grondprovinant wie Salz-Pfeffer-Öl-Lömpe-Abwäschmittl usw. ideckt. 😍
    Nach 3 1/2h Wäg rechtig Newcastle simmer denn am schöne Örtli Forster ahcho. Met hongrige Büch semmer denn grad mal euse ersti Grossikauf go mache & send dör die riise Regal gschlenderet. Da die erste 3 Campings denn schomol usbuechet gsi send, hemmer för ne chorze Momänt scho Sorge gha, dass mir keis Schlofplätzli fended för die ersti Nacht 😅 Doch denn send mer zom guete Glöck im Twin Dolphins Caravan Park no ufgno worde. Do hemmer euses Könne grad mol mösse bewiise. Iparkiere? Strom ahschliesse? Wo föllt mer denn das frösche Wasser uf? 🤔 För eus alls Camper-Laie alles Neuland wo mer aber me oder weniger med Bravur gmeistered hend. 👏
    Todkabutt hemmer nachher entschlosse grad 2 Täg do z bliibe, dass mir eus zerst mol iiläbe chönd und eus dra gwöhne. Zom z Nacht hemmer denn üse Gashärd igweiht & Tomatespaghetti gmacht 🍲

    1 Tag spöter..
    Super entspannt ufgstande, gmüetlich gfrüehstückt. Ond denn ab a de schöni Strand go erhole 🏊🏻‍♀️🏖 Au det eschs relativ lustig worde en Parkplatz z gfinde för euse riese Camper 😅 De Obig hemmer ufem Camping mit emne feine BBQ loh usklinge 🍽🍗 , erste Moggesteck Plage & Vorbereitige för s' nöchste Ziel ➡️ Port Macquarie 🐨🌿

    Ps: Momentan eschs a dem Ort no keis Problem wäg de Buschbränd oder besser gseid nömme. Mir hend aber vell verbrönnte Wald gse uf de Hifahrt & sälbst uf eusem Camping heds no blibendi Idröck hinterloh was vor 2-3 Mönet gwüetet hed. 😞
    Read more

  • Day 13

    Port Macquarie

    January 9, 2020 in Australia ⋅ ⛅ 23 °C

    Rond 1h wiiter nördlech entlang ade Köste hemmer en wiitere Stopp in Port Macquarie gmacht - de Ort esch vorallem bekannt för sine uf de Wält eimolige Koala-Hospital. Was mier als Tierfrönde eus natürli ned hend welle lo entgo. Ufem Wäg semmer weder a einige verbrönnti Gebiet döregfahre was eus scho chle zdänke gäh hed...

    Dasmol hed au alles super klapped medem reserviere vom Campingplatz - en chorze Aruef sm Morge hed glänged. Acho amene härzige Camping diräkt am River semmer einisch me sehr härzlech empfange worde! Nochemene usgebige Früehstöck inkl. Spiegelei ond allem drom ond drah semmer denn au scho gli los rechtig Koala Hospital. Es hed mol weder us Chöble gschiffet, was secher ide omgäbende Gebiet ned gschadet hed.

    D Bsuech vom Koala-Hospital esch ächt en tolli Sach gseh. Zirka 200 freiwelligi Mitarbeiter kömmeret sech Tag för Tag liebevoll om die verletzte Koalas. Pro Johr wärded öppe 200 bis 250 Tier behandlet om aschliessend weder i die Wildbahn freigloh. Jede Koala bechond ere eiget Name wases no persönlecher macht. Dör d Buschbränd ide letschte Woche hends natürlech no bsonders vell ztue becho. Mer hed au d Möglechkeit gha Gratis en Rondgang ond Füehrig med wiitere Infos zmache. Wemmer bedänkt, dass d Population wiiter stetig abnemmt - chammer dene Lüüt dete werkli nor es es riese Lob usspräche! En chline Wehrmuettropfe ond zor Enttüschig vode Yasmin hed mer leider kei sone härzige Koala chönne sälber hebe.

    De Obe hemmer de weder bimene gmüetleche BBQ diräkt am River lo usklinge.

    Nachtrag: D Yasmin hed au am neue Ort wiiterhin z kämpfe med de Mogge:

    Australische Mosquitos 2
    Yasmin 0
    Read more

  • Day 15

    Bushcamp @Crescent Head & Red Rock

    January 11, 2020 in Australia ⋅ ☁️ 27 °C

    Eigentlech hättet mer no en wiiteri Nacht in Port Marcquarie uf eusem schöne Campground welle verbrenge. Dos aber nor no en Platz näbemene luute Generator gha hed, hemmer denn euse Tag zwar no am River in Forster verbrocht, eusi Sägel denn aber gstreche ond send wiiters rechtig Crescent Head gange. Nochere erläbnisriiche Fahrt uf teils sehr holprigem Gländ (s. Video) semmer denn aber doch no me oder weniger - d Hälfti vo eusem Campingiventar heds omegrüert - heil uf eusem negste Plätzli acho. Es idylischs Örtli fernab vo jeglecher Zivilisation zmitzt imene Nationalpark enne. Mer send werkli zmetzt im Busch enne gseh - ohni grossem Handy-Empfang. Am Obe acho hemmer denn no leckeri sälbergmachti Burgers gmacht ond sennr bald mol is Näst. Bevor mer denn is Bett hend welle go, hemmer denn no en nätti Begägnig medere Rieseheuschrecke gmacht wo me wie en kastrierte Frosch tönt hed - usgseh heder gmäss Yasmins Beschriebig au wie en Frosch med Flögel - äähhhähh...

    Am zwoite Tag hemmer eus denn eigentlech ufne gmüetleche Tag am Strand igstellt. Leider esch us dem denn ned vell worde wöll de Wind der alle Sand om d Ohre blosed hed. D Ziit hemmer denn dennoch förne chorzi Fotisession ond schöstigem Geblödel gnötzt. De Fabio hed sett langem mol weder en Ball am Fuess gha. Am Obe bem Znacht choche hemmer denn en spannendi Bekanntschaft no medere rossische Family inkl. 2 chline Kids gmacht wo sett em 2015 uf de ganz Wält am omereise esch. Das sech au med wenig ond ohni jegleche Komfort chan zfrede gäh, hend sie eus idröcklech bewese - nor medemene Mietauto ond emene chline Zält för 4 Persone send sie etzt scho fast Mönet die ganz Ostköste am erkonde. Hemmer eus de med eusem Monster-Camper ehrlechgseid scho fast chle schlächt gfühlt...

    Noch eusere zwoite Nacht im "Busch" - wos weder ordentlech grägnet hed - semmer denn am Morge früeh los ond wiiter uf Red Rock - rond 1h vorem bekannte Ort Byron Bay entfärnt. Mer gniessed wiiterhin s gmüetleche Camperlife, eifach chle i Tag useläbe - wo doch au schnell mole Ziit ond de Wochetag vergässe god. :-)

    Übrigens: Yasmin konnte sich dank Antibrumm, Tigerpads und Kampf doch noch gegen die Mücken durchsetzen.
    Read more

  • Day 20

    Ballina & Byron Bay

    January 16, 2020 in Australia ⋅ ☁️ 23 °C

    Da eus gseid worde esch Ballina hed sehr schöni Stränd, hemmer det en nöchsti Nacht verbrocht. Es hed aber so grägnet, das mer denn de Tag met ikaufe (was öbrigens jede 2.Tag de Fall esch) 😂, omehänge & läse verbrocht & keis einzigs Mal de Strand gse hend 🙈. D Yasmin mutiert langsam zonere Läseratte 🐀, sie hed etz doch scho ehres 4tte Buech verschlonge sit Akonft. 🤓 Gäge Obe hemmer denn no gwäsche & alles schön verosse ufghänkt. Chorz drufabe heds gscheffet wie us Chöble & das die ganz Nacht döre.💧 Gott sei Dank heds au no en Tumbler gha, so dass mer ned mit nasse Kleider nach Byron Bay hend mösse witers go 🤣

    Byron Bay esch glaub för eus beidi Liebi uf de ersti Blick gsi. Obwohls bide Akonft grägnet hed, semmer grad go shoppe am erste Tag 😍 Es härzigs, friedlechs Surfer-Dörfli 🏄🏼‍♀️, super cooli Läde, feini Restaurants mit trendige Acai-Bowle🍇🍓🍌-Gelati-Avocadobrötli🥑-Fish&Chips usw. D Lüt send mega locker und fröndlech droffe. Höt semmer am Strand zom Lüchtturm gloffe, en mega schöne Wäg & nachher erschöpft am Strand go bädele & sönnele. Mir hend relativ en gönstige Camping gfonde, wo sehr zentral esch & blibed au för 3 Täg do. 😀 Am Obig düemmer oft zäme euse nöchst Halt bespräche, eus informiere was mer wo wennd mache det & Zitplän erstelle wie lang mer a wellem Ort chönd/ wennd blibe 🤗⏳

    Morn möched mer s erste Mal en Tour nach Nimbin. Mitem Partybüssli fahred mir i das beliebte Hippie- Kifferdorf & det werds BBQ gä. 🍗🥓 Er wärded ghöre vo eus wie de Tag gloffe esch ✌🏽😜
    Read more

  • Day 20

    NIMBIN - little Amsterdam in Australia

    January 16, 2020 in Australia ⋅ ⛅ 28 °C

    För de hötig Tagesusflog noch Nimbin hemmer eus bereits am 10am müsse ready halte. De Ort esch chli osserhalb vo Byron Bay ond werd oft au als Hippie ond Kifferparadies vo Australie bezeichnet. Mer send also sehr gspannt gseh was eus erwartet.
    Noch 30min Verspötig - was för done eig. ned typisch wär - esch eus de Bus doch no cho abhole. En bont bemolte alte Chlapf, wo sini beste Johr bestemmt scho hender sech gha hed ond be eus secher nömme als Fahrtauglech döregange wär. Trotz allem heder ergendwie glich Charme gha ond passt secher guet det häre.

    Fahreri ond Guide "Princess Fiona", wie sie sech sälber nennt, hed eus nätt empfange ond med passendem Reggae-Sound esches denn los gange. Noch rond 1h 30min Fahrt ohni Klima ond dör jensti korvige Strosse, semmer denn ändlech acho. Es chlises Dörfli zemmli abgläge ergendwo im Nirgendwo. Usem Bus usgstege esch eus denn au scho s'erst mol en gueti huere Gras-Fahne id Nase gstege ond öberall send crazy Lüüt uf de Strosse gseh. Eus esch schnell klar worde, das do chli eigeti Gsetz gältet. Mer esch wie inere eigete Wält gseh, a jedem Egge es Lädeli wo mer sech med allerlei farbige Chleider, spirituelle Acessoires, div. Naturmedizin ond ebe au Gras idecke hed chönne. Obwohls in Australie illegal esch, nemmt mer's done schiins ned so gnau med Kontrollene. Eus esches vorcho als währed mer im chline Amsterdam. Alli Lüüt send zwar sehr nätt gseh, aber hend doch nömme so werkli gsond usgseh. Nochere Stond hed mer denn aber au scho alles gseh gha. Eusi Princess Fiona hed eus en leckere Burger zuebereitet. Als Dessert hemmer vode Locals, passend dezue, leckeri sälberbachnigi Cookies abote becho. Bereits am 15.00 esches denn weder zroggange. Die Meiste send so guet "droffe" gseh, dass die ganz Röckfahrt pennt hend.
    Am 16.30 semmer alli meh oder weniger heil in Byron Bay acho.

    Alles in allem secher en lostige Tag, med vellne spannende Idröck in Nimbin. Ergendwie onvorstellbar, dass mer eifach noch so chorzer Fahrt komplett ine anderi Wält chan itauche, wo alles chli anderst zue ond här god. Aber au das passt denn ergendwie uf Australie.
    Read more

  • Day 22

    Auf dem Weg zur Gold Coast

    January 18, 2020 in Australia ⋅ ⛅ 27 °C

    Bevor mer am Fritig rechtig Gold Coast gfahre send vo Byron Bay us, hemmer no en chline Abstächer gmacht uf Lennox Head. Det get's nämmlich en verpemte Teebaumölsee, wo guet för d Huut söll sie. Glaub hätted mer ned gwösst dass es det enne werklech erlaubt esch z bade, hät niemmer traut als ersts en Fuess det drii z' setze. De See esch ned salzig & mer gseht werklech gar nüt wo mer histoht 🦎😂🐊

    Am Nomi semmer denn ade Gold Coast acho & blibed 2 Nächt do. Mer hend natürlech sofort welle de bekannti Surfers Paradise Strand go aluege & hend det au direkt en Surflektion 10.00Uhr för de SA buechet. De Räst vom Nomitag Fish & Chips hinderepotzt 🍟🐡 (ein Muss, laut Princessin Fiona!) & am Strand omegläge.

    Der etwas unglückliche Samstag: Die ganz Nacht ond am nöchste Morge heds mol weder gscheffet ohni Unterbruch. Am 8ii hemmer 📞 zom de bereits bezahlti Surfkurs absäge, i dem hässliche Wätter & denn nomol fredlech witerpfuset. Jedoch heds am 9ii denn de Röckruef gä: "d' Surflektion cha ned abgseid wärde, sie füehred die glich döre & es ged kei Gäld zrogg för eus!" Schlussendlich simmer denn doch go surfe - was werklich trotz allem de Hammer gsi esch. Inere Groppe mit 15 Lüt, mehreitlech, wie chas au anderst si, Asiate. -.- Zrogg bim Auto hemmer denn eusi erst, respektiv au grad no zweiti Buess ihgfange. 80$ för en z chline Parkplatz för euses Camper-Monster +80$ för z lang parkiere👏🏽 JACKPOT!🤣

    Am Nomi hemmer am 15.15 es Ticket gha för de Currumbin Wildlife Park- wo mer chan go Koalas streichle und hebe. D Yasmin hed sech gfreut wie es chlises Chind & deshalb esch d Enttüschig 4x so gross gsi, wo mer vorem verschlossne Park gstande send. ( Wägem Räge) ! Mir versuechet euses Glöck Morn nomol ond hoffed das alles noch Plan ablauft! 🙄🐨🌿
    Read more

  • Day 23

    Surfers Paradise & Currumbin Sanctuary

    January 19, 2020 in Australia ⋅ ☀️ 30 °C

    Höt Morge hemmer grad nomol es Surfbrett gmietet & uf eigeti Fust probiert s Erlernte vo gester omzsetze 😁🏄🏼‍♂️🌊 Da mer scho uscheckt hend, hämmer zwongenermasse z'mitzt in Surfersparadise en Parkplatz brucht zom nomol a Beach chönne z go. Esch weder ned ganz eifach gsi & mer hend denn weder mösse bibere dases kei erneuti Buess ged , wägem z chline Parkfäld😟

    Am 15.15 semmer erneut im Currumbin Wildlife Park itroffe & es hed alles klappet met üsere VIP Koala Experience Tour. Mir hend döffe zo dene süesse Schnügel Koalas is Chäfig ine, jensti schöni Fotis schiesse & Frage stelle. S' jöngste esch 15 Mönet alt gsi. S' Highlight esch denn nochhär cho, wo mer de Koala hend döffe uf de Arm näh, de Duft vo Eukalyptus iiatme, s flauschige Fell streichle & alles bildlich festhalte! 🌿🐨 Itrett för de Park hemmer zwar keine zahlt ( mer gönd denn no i Australia Zoo) Well mir aber nach dem Ganze scho im Park enne gsi send, hemmer die Chance glich no schnell gnötzt und no paar anderi Tierlis chönne gse. Tasmanische Teufel, Wombats, Kängurus, Echse, Schlange, Flädermüüs usw. 🦇🦎🐍 Super härzig esch au de Momänt gsi, wo s Babykänguru emmer weder usem Bütel gheit esch & sofort weder inegompet esch 😍

    Jetzt semmer ufem Wäg ad Sunshine Coast, ca 2h Fahrt. 🚐🌅
    Read more

  • Day 24

    Besuch Australia Zoo

    January 20, 2020 in Australia ⋅ ☀️ 31 °C

    Noch dem onvergässleche Koala-Erläbnis esch höt medem Bsuech im Australia Zoo bereits s negste Highlight agstande. Mer hend zwar gester au scho die eine oder andere Tierlis chönne aluege aber de Australia Zoo hed done no vell me a Uswahl zbiete gha!

    S Wätter esch med strahlender Sonne ond gfühlte 35 Grad mol weder rechtig Australie-Like gseh ond chorz noch Parköffnig semmer denn au scho vor Ort gseh. Uf de Parkmap hed mer guet gseh wie en riesigi Vielfalt a verschednigi Tier mer alles zgseh bechond, bsonders hemmer eus natürli uf die wilde Kängerus gfreut!

    Bereits chorz noch Start hed mer denn sin Muet, en Schlange zhebe, scho s erst mol chönne onder Bewies stelle. Ämel före Fabio esches Premiere gseh ond hed debi no schwetzigeri Händ becho. De negsti Höheponkt hed denn au ned lang uf sech gwartet. Uf einisch gsesch vor dier onzähligi Kängerus wod chasch streichle, füettere oder eifach nor bestuhne wie sie omenand hoppsed. Mer esch sech chle vorcho wie im Tierpark Goldau, nor med Kängerus anstelle Rehlis. Die Tier hends eus ächt atoh ond mier hend müsse luege, dass mer no anders zgseh bechömed. De Park esch werkli riesig gseh, öber jensti iheimischi Vögel, jensti Krokodilarte, Tiger, Schlange usw. ond Tier (z.B Echidnas, Kasuar, Binturong) wo mer no nie ghört hend aber voll faszinierend gseh send esch mer ächtvoll uf sini Chöste cho. Im Afrika-Teil med de Giraffe, Zebras, Meerkats ond Nashörnern send eus denn die onzählige Safaris in Südafrika weder döre Chopf.

    D Krokdodil ond Tigershow send sehr spannend ond onderhaltsam gseh. D Ziit esch wie im Flog vergange ond mier hend eus ned chönne satt luege. Mer hed osserdemm emmer müsse luege, dass mer keini vo dene lostige Echsene öbertrampled hed wo vor de Bei döregsecklet send. Chorz vor Ändi hend mer (aso vorallem d Yasmin..) eus denn no einisch d Kängerus inezoge ond diversi Fotis gmacht. Ond als währed mer nonig gnueg vo neue Idröck gsättiged gseh, hemmer denn no en chorze Bsuech is Tier-Hospital gmacht wo grad näbedrah gseh esch. Dete hed mer döffe de Ärzt ond Pfleger be ere Arbet öber d Scholtere luege wies Koalas, Vögel etc. Am verarzte send. Das esch denn au de krönnend Abschloss vomene werkli sehr erläbnisriiche ond idröckleche Tag i die faszinierend Tierwält vo Australie gseh.

    PS. Mer hättet locker Fotimaterial för es ganzes Albom gha aber hend eus leider done uf 10 Fotis müsse beschränke. :-)
    Read more