Chimurria Arriba

Los ischs gange am morge am 6i. Da am sunntig en neui studentin i mis zimmer chund hani scho alles packt und bi minere hostmom chönne understelle. Sie hed mer zum abschluss nomal ws zmorge gmacht, bevor ich id schuel zum büsli ben.

Mer sind mit einere churze pause, 3 stund direkt zum parque nacional volcán tenorio, zum igang vom rio celeste gfahre.

S wetter isch bewölkt gsie wo mer mit de chline wanderig zu de verschidene pünkt gstartet sind.
Mer hend extrem glück gha, de fluss isch extrem blau gsie. Sogar euse guide isch extrem begeistert gsie und hed immer weder fötteli gmacht. Bim einte punkt heds dur en lava strom s wasser zum blubere bracht, hed debi au extrem nach schwefel gschmöckt. De fluss isch ufgrund vo mineralie so extrem blau. De wald isch ebefalls extrem idrücklich gsie, sehr füecht mit liane und vell moos.

Bim hinderste punkt, wo s normale wasser zum blaue wird, isch de grossi uftritt vo eusem überraschigs gast cho.
Es hed afe krache und trample uf de andere fluss siite. Uf einisch isch es tapir durs unterholz broche und in fluss ine ghüpft. De cheib isch grösser als mir gsie und meh als doppled so schwer. Im fluss hed er churz sich churz entleert, eus en blick zuegworfe und isch weder verschwunde.
Anschinend sind tapir sehr selte z gseh, da ned mal all parkwächter oder guids eine gseh hend. Am meiste freud hed glaub sogar euse guid gha. Er hed s video voller stolz allne zeigt.

Bim zruglaufe simmer de wasserfall go aluege und hend vor em usgang denn de überraschigsgast nummer zwoi troffe. En chlini schlange wo am wegrand posiert hed.

Vo det simmer über en eher kriminelli, ned suva-komformi strass zu de finca (burehof/hotel) gfahre wo mer übernachted. As erst heds grad mal meh as gnueg zmittag geh. En churzi, sehr idrücklichi führig dur de bluemegarte, de gmüesgarte, en mit für-beheizbare-pool hed üs en guete idruck geh. Die finca isch meh oder weniger selbstversorgend. Denn heds en usritt bi rege dur d finca geh. Aschlüssend simmer in chalti fluss und in sehr warmi pool ghüpft. Jetzt heds gad es mega leckers costa rica znacht geh. Somit chund eine vo de idrückiste täg vo dere reis langsam zumene end.

Am sunntig heds no en massag mit flussrusche geh und de simmer zrug uf samara gfahreRead more