Reset search
Costa Rica
Satellite

Costa Rica
Hojancha

Discover travel destinations of travelers writing a travel journal on FindPenguins.
Travelers at this place
    • TravelerCosta Rica
      1
      Day 45

      De ersti 'Dorfevent'

      February 19, 2023 in Costa Rica ⋅ 🌬 32 °C

      De Morge höt hemmer brucht zom chli entspanne ond eus vom volle Programm vo de letzte paar Täg z erhole. Nochem Mittag hemmer denn abgmacht dass eus e Kolleg vom Pablo abholt ond mer alli zäme uf Monte Alto gönd. Das esch s nöchste Dorf wemmer d Stross do wiiter de Berg doruf fahrt. Det esch das Wochenend nämli e chlini 'WM' gsi. Alli verschednige Dörfli ond Quartier vo de Omgäbig hend eres eigete Fuessballteam zämegstellt ond send gägenand atrette. Ond all die wo ned ufem Spielfeld azträffe gsi send send am Spielfeldrand gsi ond hend zuegluegt. Do hend mer natürli ned döffe fähle. Met eus hed öbrigens au e chline Hond zuegluegt. Kei normale Hond, sondern eine met gfärbte Ohre, das hemmer alli ez au zom erste Mol gseh! Insgesammt hemmer zwöi Speli gluegt. Bim zwöite hed de Pablo sogar spontan no metgspellt. Leider heds aber ned ganz glänged.. Länger blibe hemmer de aber nocher nömme welle. Sobald d Sonne onter gange esch esches nämli super chalt worde. Wel mer i de grösste Nomittagshetz gange send hemmer au alli natürli nüd warms debi gha. Aber ned schlemm, es chond secher weder einisch e Glägeheit wo mer bim ne Dorfevent chönd debi sii.Read more

      See translation
    • TravelerCosta Rica
      Day 60

      Gfühlt wie z Schwede

      March 6, 2023 in Costa Rica ⋅ ☁️ 32 °C

      S Highlight vom hötige Tag esch definitiv gsi das d Isabel ond ech e grossi Portion Zimtschnägge bached hend. Vorbereitet hemmer sie scho gester Obe, aber es esch de z spot worde zom sie alli no bache (vorallem wel euse Bachofe seeehr schlecht esch ond emmer nor eis Bläch ine mag). Ech ha sie höt Morge i Ofe do ond zom Vormittagskaffi hemmer alli die erst chönne probiere. E chli hemmer eus weder wie z Schwede gfühlt. Mer send eus alli einig, sehr lang wärdeds die Zimtschnägge ned öberläbe ;). Vo höt hani au mol Föteli vo de Hönd wo eus emmer chömed go bueche. Mer gsänd sie eigentli fast jede Tag ond sie verlanged sehr klar, dass sie chli gstreichled mönd werde. Höt sends aber au chli fräch onterwegs gsi ond hend im Philip sine Socke gklaut (dä esch aber au scho lang omegläge). Das chond devo wenn mer sini Sache ned wegrumt...Read more

      See translation
    • TravelerCosta Rica
      Day 51

      El Toledo erwacht zom Läbe

      February 25, 2023 in Costa Rica ⋅ ☀️ 33 °C

      Die letzte zwöi Täg esch grad e chli vell Läbe ufcho in El Toledo. Es esch nämli en Imkerkonferenz do. Gester gäge Obe send die erste acho. De Tag dor hemmer alli vo do us gschaffed ond hend eus drom gfreut wos gheisse hed dass mer met ehne chönd zom Ussechtsponkt fahre. Es esch de glich Ussechtsponkt gsi wo mer au am erste Tag do scho gsi send ond mer send weder före Sonnenontergang gange. Ond natürlech esches au das Mol weder so schön gsi. Nochem Sonnenontergang semmer de sogar vo ehne no zom Znacht iiglade worde. Mer send alli zäme is Dorf gfahre ond det, noch de Meinig vom Pablo, is einzige rechtig guete Restaurant gange. S Esse esch super gsi (traditionnell Costa Ricanisch) ond es esch spannend gsi met dene Imker öber ere Bruef ond öber Costa Rica z rede. Tronke hemmer öbrigens e Drachefruchtsaft. Ech bi ned ganz secher öbi scho mol Drachefrocht gha ha aber de Gschmack esch secher fein gsi. D Konsistenz hingege hani ned soo de Hit gfonde. Es esch rechtig deckflössig ond so chli gomig schleimig gsi.. Naja ;). Aber es hed sech secher gloht das einisch z probiere.
      Höt Morge hani am 5i müesse ufstoh weli es Meeting gha ha. Ech mache am ne Nochhaltigkeitsprogram met met Lüt vo de ganze Welt, drom esches mängisch chli schwer e Termin z gfende ond i Zuekonft werds wahrschindli no es Paar mol vorcho dasi so gli mues uufstoh.. Währedem Meeting esch de au de eigentlech Teil vo de Konferenz vo de Imker los gange. Uf die eint Art esches schön gsi dass e chli Läbe ufcho esch do, wel es esch scho langsam chli sehr ruhig gsi, aber uf die ander Art esches au chli doof gsi wel mer de ganz Gmeinschaftsbereich ned hend chönne bruche. Mer hend versuecht usem Bett e chli produktiv z sii, aber so vell esch höt de au ned passiert.. Aber ab ond zue e so e Tag esch jo au ned schlemm.      Read more

      See translation
    • TravelerCosta Rica
      Day 47

      Ruhigi Täg in El Toledo

      February 21, 2023 in Costa Rica ⋅ ⛅ 32 °C

      Gester esch ned wahnsennig vell passiert, drom hani au ned werkli öpis ufgschrebe. Drü vo desne send is Dorf wel det e Infoverastaltig gsi esch wo för eri Arbet spannend esch. D Marie ond ech send aber dehei blobe ond hend vo do gschaffed. För e chlini Pause am Nomi semmer aber no id Naturpools eus go abchüele. Wo desi am Obe hei cho send hemmer alli zäme öpis gässe ond de Obe ruhig lo uusklinge. De Tag höt esch au relativ ruhig gsi. Ech bi am Morge ufgstande ond ha zerst elei es Kaffi im Gmeinschaftsruum tronke. Es paar vo desne send zwor scho wach gsi, aber sie hend a verschedne Ort in Rueh es Meeting gha ond drom han ech de Gmeinschaftsrum för mech elei gha. D Mörge do cha mer rechtig gniesse. Es esch alles ruhig, mer ghört nor d Tiel usem Wald, d Sonne schiint goldig ad Bäum vorem Huus ond es esch noni so heiss. De Rest vom Tag send mer alli eigentli nor för eus am schaffe gsi, hauptsächlech a de Masterarbet. Vorem Znacht hani mi denn gwogt es ersts Mol do go jogge. Es esch ned ganz e so eifach do wel praktisch die einzig Stross wos hed esch d Hauptstross (zwor nor en Schotterstross aber trotzdem met regelmässigem Verkehr ond natürli ohni Trottoir). Ond wie wenn das ned gnueg wär gods i die eint Rechtig steil dorab ond i desi steil doruf. Abgseh vo dere Stross heds no e chlini wo rechtig Naturschotzgebiet god. Ech ha mi för die entschede. Sie esch zwor relativ chorz aber met de ganze Höger wos ufem Weg hed chond mer trotzdem is Schwetze. Zom Znacht hani Spagetthi (vegi-)Bolognese för alli gmacht ond nochem Znacht hemmer alli no es chorzes Speli zäme gspellt. Alles in allem esches en onspektakuläre aber trotzdem schöne Tag gsi.Read more

      See translation
    • TravelerCosta Rica
      Day 42

      De Tag esch cho, es god uf Hojancha!

      February 16, 2023 in Costa Rica ⋅ ☀️ 28 °C

      De Tag esch cho wo mer endlech uf Hojancha wiitergfahre send. Fast es Johr hemmer ez stets vo Hojancha ghört, met Lüt vo det telefoniert ond eus Gedanke gmacht was mer det genau wettid ontersueche i eusere Masterarbet. Am Morge beni scho chli ufgregt worde. Vor allem hani eigentli ghofft dases mer de au werkli gfallt wenn mer acho send, wel do wärdemer die längsti Ziit verbrenge. Als ersts semmer metem Taxi ad Uni. Vo det hend eus zwöi Professore, je met eim Auto, begleitet. Die ganz Fahr esch öpe 5 Stond gange. Zwöschedenne hemmer recht beidrockendi Ussechte gha, ab ond zue semmer aber au fast chli iignickt. Om d Mettagsziit hemmer imne chline Restaurant halt gmacht ond öpis gässe. E zwöite Stop hemmer no am Fluss gmacht wo d Halbinsle vo Guanacaste (de Kanton wo Hojancha denne esch) vom Rest vo Costa Rica trennt. Mer send mehrmols druf hegwese worde ned z nöch as Wasser z goh wells scho möglech wär das det enne es Krokodil uf ne Snack wartet. Eis gseh hemmer aber zom Glöck ned. Je nöcher das mer zo Guanacaste ond zo Hojancha cho send, desto trochner esch d Omgäbig ond desto wärmer esch d Loft worde. Ech ha scho die chli Vermuetig dass mer s 'chüele' San José scho gli werded vermesse. Lang esches nömme gange bis mer z Hojancha acho send. S Zentrum esch relativ chli ond öbersechtlech. Es gsed ned wahnsennig spektakulär us, aber trotzdem ganz härzig. Im Zentrum semmer aber noni ganz i eusem Dehei gsi. För das hemmer no öpe 4 Kilometer ufere Schotterstross de Hoger doruf müesse. De semmer z El Toledo acho. Das esch es chlises Hostel zmetzt ide Natur. Det hed de Emel scho uf eus gwartet. Er esch glaub so chli en Dorfberüemtheit wo öberall emmer debi esch. Onter anderem ghört ehm au El Toledo. Ond sis guete Netzwerk werd eus secher au bi de Recherche för d Masterarbet helfe. Chli spöter hemmer au de Pablo kenneglehrt. Er wohnt fix z El Toledo (soscht wohnt niemer do fix), sini Familie esch ursprönglech vo do ond er esch au scho ganz engagiert im Dorf. Aber er esch öpe i eusem Alter ond esch drom wie e rechtige Kolleg i eusere Groppe. Mer hend e chlini Tour do öbercho. Alles z erkläre esch glaub chli z lang, ech mache de einisch es chlises Video metere Tour. Aber es esch alles i allem sehr schön. D Isabel, d Marie ond ech hend zäme es Zimmer ond d Jungs hend eres eigete. Am Obe semmer no zom ne Ussechtsponkt. Det hed eus de Emel chli verzellt was mer alles öber d Gägend setted wösse. Ond mer hend de wonderschöni Sonneontergang agluegt. Am Horizont hed mer sogar s Meer gseh. Ech hoffe mer gönd no ab ond zue det ufe!Read more

      See translation
    • TravelerCosta Rica
      Day 70

      Debi bimne Community Meeting z Hojancha

      March 16, 2023 in Costa Rica

      Höt esch weder einisch eine vo dene Täg gsi wo ganz anders verlaufe send als ech bim Ufstoh no erwartet hät. Zom Zmorge heds zerst mol e grossi Portion Gallo Pinto (Riis met Bohne) gäh. Denn heds plötzli gheisse das mer zomne Meeting iglade send. Das Meeting esch vo de Peace University (San José) gsi. Es esch om es Projekt gange wo vo de Amerikanische Botschaft in Costa Rica finanziert esch ond om d Entwecklig z Hojancha god. Am Meeting send ganz vell lokali Akteur debi gsi (verschednigi Organisatione, Firmene ond vom Kanton). För drü vo eus eschs relevant för d Masterarbet gsi ond drom semmer gange. Stattgfonde heds in Monte Alto, dem Naturschotzgebiet wo ech i minere Arbet ontersueche. Wel mer so spontan devo ghört hend semmer e chli z spot cho. Zerst hemmer zwöi Vorträg dröber glost, wie de Klimawandel Hojancha betrefft ond was das för d Lüt ond d Firmene do bedütet. Nochere chorze Kaffipause heds denn en Workshop gäh. Alli Lüt hend sech i zwöi Groppe onterteilt: eini för Wassermanagement, e anderi för Produktwirtschaft. Ech be ha mech zo de zwöite gstellt ond det de Diskussion zueglost. S Thema vo beidne Groppene esch gsi z diskutiere wo dass es z Hojancha Problem ged ond wo dass mer muess Brogge baue zom die Problem löse. Es esch rächt spannend gsi zom zuelose ond z gseh wie alli liideschaftlech debi gsi send. Verstande hani zwor ned alles, aber ech ha trotzdem neus dezue glehrt. Nochdem Workshop heds no es Zmittag för alli gäh. Ufem Weg det he hani no probiert es paar Lüt azspräche ond z froge öb sie mine Frogeboge chönd usfölle. Aber alli woni gfrogt ha hend gseid sie heiged scho vo mer ghört ond de Link scho öbercho. Uf die eint Siite hani mi mega gfreut, es hed sech aber au chli komisch agfühlt, dass ez plötzlech so vell do vo mer wössed. Es hend sech aber au es paar spannendi Gspröch ergäh ond ech glaube ech ha zwöi Interviewpartner gfonde för d Vertüfigsinterviews woni nöchst Woche no wet mache. Weder zrog dehei acho hani zerst mol e chlini Pause brucht ond mech de nomol a mini Arbet gsetzt. Zwöschestand send ez 52 Antworte uf mine Frogeboge :). Öpe am 4i send d Isabel ond ech no zäme go jogge. Mer send grad no rächtziitig gange. Ufem ganze Wäg hemmer die raabeschwarz Wolke am Himmel beobachtet ond uf de letzte 10 Meter heds afo rägne. Au höt heds weder rächt möge rägne.. Mol luege öb das ab jetzt werkli jede Tag so wiiter god.Read more

      See translation
    • TravelerCosta Rica
      Day 62

      D Masterarbet chond langsam in Fahrt

      March 8, 2023 in Costa Rica ⋅ ☁️ 29 °C

      Nochdem gester weder e relativ onspektakuläre Tag gsi esch wo mer nor vo dehei us gschaffed hend esch höt weder e Tag gsi wo chli meh Öberraschige met sech brocht hed. Als ersts hätti am Morge es Meeting met mim Masterarbet-Betreuer vo Schwede gha. Er hed mer aber am Afang vom Meeting gseid, das er de Frogeboge woni ehm gscheckt ha ned hed chönne ufdue ond drom kei Feedback för mech hed. Das Feedback wär eigentli wechtig gsi för mech wel ech de Frogeboge ezde glii wet useschecke. Euses Meeting esch drom noch ere Viertelstond scho weder fertig gsi. De Rest vom Täg wär eigentli denkt gsi zom dehei schaffe. Ech ha aber chorzfrestig es SMS öbercho öb ech e Mitarbeiter vo Monte Alto wet am 10.15 interviewe. Wel das au obe uf minere Prioritätsliste för die Woche gstande esch hani zuegseid ond mech no ganz schnell druf vorbereitet. Es esch spannend gsi z ghöre was er öber d Uswerkige vo Monte Alto uf d Gsellschaft z säge gha hed. Er hed es sehr positivs Bild (was au verständlech esch wenn er jede Tag för das schaffed), aber ech be gspannt öb d Lüt wo mini Omfrog usfölled s gliche Bild hend. Ech ha secher ersts Material öbercho woni i de Arbet cha bruche. De Rest vom Tag esch de aber so ruhig wie erwartet wiitergloffe.
      Ah ond Happy Internationale Frauetag!      Read more

      See translation
    • TravelerCosta Rica
      Day 49

      Vo Brüllaffe ond Naturschotzgebiet

      February 23, 2023 in Costa Rica ⋅ ☀️ 33 °C

      Gester Morge hani de Tag metemne Meeting met Schwede agfange. Ech ha met mim Betreuer för d Masterarbet gredt ond ha zom erste Mol chli Feedback zo mim Thema öbercho. Ech glaub das hed mer chli asporn gäh zom wiiterschaffe ond ech weiss ez chli besser was dasi wet mache. Ech wet die soziale Uswerkige vom Naturschotzgebiet Monte Alto ontersueche. Mer wohnid meh oder weniger direkt a de Grenze vo dem Gebiet ond hend scho vell spannends vo dem Gebiet ghört.
      Höt hani de entli Ziit gha zom erste Mol i das Gebiet z goh. Es esch zwor ursprönglech ned so denkt gsi, aber am Mittag esch mim Laptop d Hetz z vell worde ond er hed nömme reagiert. Drom hani das als guete Grond gno zom e Pause z mache ond Monte Alto go aluege. Z Fuess esches öpe 1 Kilometer zom Igang ond denne heds öpe 5 verschednigi Trails. Ech ha mech för zwöi entschede wo ned soo lang send ond be chli omespaziert. De Wald esch schön chüel gsi ond ech ha d Natur so rechtig chönne gniesse. Bim Bsuecherzentrum hani sogar no Flädermüüs atroffe wo im Dach gschlofe hend. Ech glaube die send sech soscht Bsuech ned so gwöhnt. Ah ond fast vergässe, scho am Morge hani ufregendi Tier chönne beobachte. Es send eus nämli es paar Brüllaffe cho bsueche. Die hend ganz ruhig im Baum vor eusere Unterkonft Blüete gässe. Esch rechtig schön gsi die es Wiili so us de Nöchi z gseh.      Read more

      See translation
    • TravelerCosta Rica
      Day 55

      Onerwarteti Post ond Märlistemmig

      March 1, 2023 in Costa Rica ⋅ ⛅ 32 °C

      Höt Vormittag hemmer en gmüetleche Masterarbet-Vormittag dehei gha. Ond de Saad esch währeddem go euses neue Auto abhole!!! Ech ha zwöschedenne frösches Brot bache wos denn au zom Zmittag gäh hed. Scho sed Afang ah ben ech do eigentli verantwortlech för die allgemein Brotversorgig. Das usem Supermarkt esch nämli ned so fein. Wemmers scho vom Supermarkt hend, am Nomi ben ech weder einisch metgange för e Grossichauf im Dorf. Es esch dütlech eifacher gange met eusem eigete Auto. Uf de Prioritätsliste send ned nor Läbensmittel gstande, sondern ech ha au no uf de Post verbi müesse wel det es Päckli us de Schwiz hät selle för mech si. Es esch es neus Ladekabel wel mis kaputt gange esch onds do s gliche ned ged. S einzige Problem dra esch gsi das e Teil vo de Adresse ufem Päckli vergässe gange esch. Aber entgäge allne Erwartige hed das Päckli tatsächlech de Weg zo mer gfonde ond ech cha ez weder ganz onabhängig vo mine Kollege mine Laptop lade. Am Obe hemmer grad no einisch Gebruch vom Auto gmacht ond send ufne Ussechtsponkt uf eine vo de höchste Högel do gfahre ond hend det de Sonneontergang gnosse. Das esch definitiv eine vo de schönste Öbe gsi woni bes jetzt do gha ha, so rechtig wie imne Märli. Abgrondet hemmer de Obe de no metere bstellte Pizza ond emne Speli.Read more

      See translation

    You might also know this place by the following names:

    Hojancha

    Join us:

    FindPenguins for iOSFindPenguins for Android

    • 2024© FindPenguins
    • Home
    • About us
    • Blog
    • Group Tracking
    • Press
    • Terms
    • Privacy Policy & Cookies
    • Support
    • Legal notice
    • English