Sevilla Don Bosco

Mini Nacht isch super gsi, s'Ufwache weniger wil ich ghöre Rege. Also umdreihe, wiiterdöse. Und es hilft, wil bisi denn würkli wach bin und zmörgeled han, isches troche. Ich packe mini Sache und mache mi uf de Weg zum Busterminal. Dete buechi en Bus uf Cuenca, wo entgege mine Erwartige über Nacht fahrt. Denn spazieri abe zum Río Upano ide Hoffnig zum es gmüetlichs ruhigs Plätzli zum lese finde. Dune acho zeigt sich, dass i dem gigantisch breite Flussbeet (wo währed de Regeziit au tatsächlich nötig isch) haufenweise Bagger und Lastwäge unterwegs sind. Wieso genau weissi ned, vilicht sinds vode letste Überschwemmige am ufruume oder sich uf di negste am vorbereite oder sus irgendwas... Ufem Abeweg hani en chlie Hügel mitere Statue gseh, vilicht ischs ja dete schön zum chille? Ja, isches tatsächlich aber chum hani fertig gesse, chömed Regewulche bedrohlich nöch und ich mache mi uf de Zruggweg. Erst im Dorf fangts würklich a regne - guets Timing also :) Ich entscheide zum zrugg is Zimmer go und en Film luege. S'einzig Museum vom Dorf hät nämlich im Verbilaufe zimli gschlosse usgseh... Nach dem beschäftigi mi bitz mit minere Wiiterreis und wils denn ufhört regne, gangi e Rundi go jogge. Stellt sich uf dere Meereshöchi als wider sehr agnehm use und en schöne Usblick uf s'Flussbeet findi au na :)
De Rest vom Obig verbringi mit chille, lese, choche und Vulkan beobachte. Endli ziehnd mitem Sunneuntergang d'Wulche gnueg uf zum uf de Sangay gseh. De Vulkan isch sit immer es bitz aktiv, was sich au iidrücklich mit Lava zeigt 😍

Au am zweite Morge regnets wider. Ich chönnt mitgo is Yoga, denn würi aber mit packe in Seich cho und promt hörts uf regnen woni parat bi, so dasi mis hütige Ziel, de Ussichtspunkt Kilamo chan in Agriff neh. Us gester hani glernt, dass langi Hose definitiv au bi bitz Wolke überbewerted werded und das bestätigt sich hüt. Es isch schwüel-heiss und ich wirde de ganz Tag am schwitze si, au wenn sich d'Astrengige in Grenze halted. Ich folge immer am chürziste Weg, was mer es paar verwundereti Blick vo Iiheimische und ein verärgerete Hofhund iibringt... Do ischmer sich anschiinened ned a Touriste gwöhnt 🙈 Nach zwei Stund chumi ufem Hügel bim Monumento a La Virgen Purísima de Macas a und wirde mitere tolle Sicht über d'Stadt und di umeliegende Hügel belohnt. Für Berge häts na z'viel Gewölk aber wett mi ned beklage. Und de Kiosk zum es chalts Getränk chaufe wetti au ned misse... Am Fuess vode Statue machi Zmittag- und Lesepause und gnüsse d'Sunne, wo recht brutzled. Wie sich usestellt, langed mini zweit Schicht Sunnecreme ned ganz, zum ohni Sunnebrand durecho. Isch wohl z'schnell wider weggschwitzt 😅 Wo rund um s'Dorf Regezelle in Sicht sind, machi mi uf de Abeweg, woni denn am Hofhund uswiiche und wils bi mir ned regnet, gnüssi im Dorfbach e Abchüehlig für d'Füess :) Lustigerwiis gits eimal dur s'Dorf dure e Landepiste für Chlifligzüg, woni wider mues umrunde zum zrugg id Unterkunft cho. Bim erstbeste Lädeli gits es wohlverdients Glace! Ja und de Rest vo dem erst grad aabrochne Namittag isch schnell verzellt: lese, Unterkünft uf Galapagos bueche, es bitz Bolivie plane, snacke, iichaufe, choche, lese, Apresoleil iischmiere, relaxe un de Sangay beobachte, wo hüt defintiv aktiver isch als gester aber leider erst nach Sunneuntergang sichtbar isch . Es fangt erstuunlicherwiis gar nüm a regne, aber mini Huut hät scho gnueg Sunne gseh für hüt, also wettli glich de ganz Namittag nüme gross usego... Schliessli bringt mi am halbi elfi es Taxi zum Busterminal, woni jetz höckle und uf min Bus in Richtig Cuenca warte :)

Macas isch es friedlichs Örtli, wo defintiv ned für viel Tourismus usgleit isch. Sus wär z.B. en Weg zum Ussichtspunkt beschildered oder s'Museum offe. Di meiste Touris chömed anschiinend nur do here, zum de Sangay beobachte, seit mini Gastmuetter. Und denn gits na mich, wo ned mal gwüsst hät, dases de git und denn devo überrascht wird - isch definitiv s'Highlight vo dene zwei Täg do 🌋Read more