Uyuni und die Salzwüsten

Bir Grenzüberquerig nach Bolivie hed d Linda Bluet und Wasser gschwitzt, us Angscht das sie ihres Leder mus abgeh. Aber de Inhalt vom Auto hed die a de Bolivianische Grenze herzlich wenig interessiert. Nach ca. 2 stund Chaos, wo mier nid gwüsst hend i welles vo denne 100 Offices mier als nöchschts münd goh, und die nid gwüsst hend welli Dokument si jetzt vo eus bruched, hemmers denn über d Grenze nach Bolivie gschafft.
Und denn isches wieder losgange:
-Bolivianos (Geld) organisiere und sich an en neui Währig gwöhne (mer hend ennere Verchäuferin sicher öbbe en halbe Monetslohn Trinkgeld geh will mer eus no Argenrinisches (wertloses) Geld gwöhnt gsi sind).
- Simcharte organisiere (usnahmswiis mal eifach gsi)
- Poulet vom Güggelispiess esse (extrem wichtig)
- und denn los uf di Bolivianische Strasse.

Nacheme churze Tankstopp (so churz denn au wieder nid, will di erschte paar Tankstelle eus kei Diesel hend welle verchaufe, wills nur für di Iheimische sig) in Tupiza (tolle Markt und 10'000 TucTuc uf de Strasse) simmer wietergfahre uf Uyuni.
Nacheme Wander-/Baschteltag bim Traincementery hemmer s erschte Mal sit afang Reis entschide, das mer immene Hotel pfused. Und au das nur, damit euse Janosch nacher 3 Tägli dörf i de Hotelgarage igstellt si, während mier en 3 Tägigi Tour dur d Salzwüeschtene und de Süde vo Bolivie buecht hend.

Zur Tour dur d Salzwüeschti segi nix, d Bilder spreche für sich.

Leider hemmer denn aber d Tour nach em erschte Tag ufgrund vonnere Lebensmittelvergiftig müsse abbreche.
Aktuell höcklemer immene sehr rüttelige Bus, zurgg uf Uyuni, damit mer de Janosch chönd go hole. Jetzt möchemer de Süde vo Boliviä wie gewohnt uf eigeni Fuscht und ohni Tour.Read more