Robbed in Weligama

Nachdem mer geschter Abig Curry mitere spezielle Art Crèpe-Bowl gesse hend ("Hoppa") und denn Znacht chli befürchtet hend, as de Rege sDach vum Guesthouse idrückt, simmer hüt Morge nacheme usgezeichnete Zmorge vu Galle uf Weligama gfahre. SZiel isch klar gsi: surfe! Während de Fredi und Martina es sich i dr 5* Marriott Bar gmüetlich gmacht hend, sind Sämy und Wiggi zum Surf Shack am Resort-Rand zum sich Bretter zmiete. De Sämy het sich extra hüt morge als vermeitlich clevere Reise-Trick 6'000 Rupie (ca. 35 CHF) under d Schuehsole gleit. Nachere churze Surf-Session heter denn mit dem Geld welle zahle - doch da isch nix meh gsi! D Betriber vum Surf Shack hend zwar hoch und heilig gschwore si heigeds nid gno, über-zuvorkommend nu ihri leere Portmonnaies und Kasse zeigt... aber da wit und breit niemert anderscht am Strand isch gsi, isch klar gsi as sis mend gno ha. So hemmer etz i euser 5. Reisewuche eusi erschti schlechti Erfahrig mit Kriminalität gmacht... im Marriott sinds zwar betroffe aber nid überrascht gsi, die Beach Boys siged wohl als Schlitzohre bekannt... De Sämy het chli später denn au es halbpatzigs Geständnis erschnurrt... aber s Geld isch de halt trotzdem weg.
Nach dem Erlebnis isch dStimmig verständlicherwis mal churz im Cheller gsi. Au isches fürd Martina nid immer ganz eifach, etz plötzlich z4tä underwegs zsi. Nach dem Zwüschetüf sind de Fredi, Sämy und Martina denn aber wiiter in Udawalawe NP, während de Wiggi zrugg uf Colombo isch, zum uf Japan zur Verlobte zflüge, wo negscht Wuche Geburtstag het.
Mit eusem Fahrer Madhu hemmer uf dr drüstundig Fahrt über Religion, Korruption und Lebensplän diskutiert - und eus druf geeinigt as sin Vater eus die ganz negscht Wuche als Fahrer begleitet. Etz simmer imene eifache Hostel in Udawalawe und freued eus uf die morgig Safari.Okumaya devam et