Reinicializar a pesquisa
You&Me - Exploring the World
  • Corinne Wiederkehr
  • Andrin Vock
  • Corinne Wiederkehr
  • Andrin Vock

You&Me - Exploring the World

Living OUR dream, finally! Leia mais
+6
SeguirResumoResumoCalendárioCalendárioFotosFotosCompartilharCompartilharLista de metas
ResumoCalendárioFotos
  • You&Me - Exploring the World
    Desierto Rojo (Cuzco)
    Unglaublichi Forme & heiss 🌡Z'4te am bruzzle 😅Desierto gris (Los Hoyos)Imposanti Strukture 🏜Wüeste-Bewohner 🦎

    Desierto Tatacoa 🌵🏜

    23 de dezembro de 2021, Colômbia ⋅ ⛅ 31 °C

    Nachem Bsuech ide Hauptstadt hemmer eus uf es abglegnigs Naturerlebnis gfreut! De Weg ed Wüesti esch zwar laaaaang xii, aber hett sich meh als glohnt! 🤩

    Sowohl die roti, als au die graui Wüesti hend eus met bizarre Forme & riiiiesige Kaktee 🌵 beidruckt. Au wenns extrem heiss xii esch, hemmers gnosse tagsüber dur d‘Formatione z‘wandere. Ebefalls idrücklich esch de Sternehimmel xii. 💫 Metem Bsuech ide Sternwarte hemmer ned nome d’Sternbilder ond d’Planete chönne beobachte, sondern hend dezue ane au no euses Wüsse drüber ufgfrüscht.

    Gschlofe hemmer denn ide Hängematte - au das esch es Erlebnis xii. Nome so vell: Ned alli hend glich guet gschlofe 😅.

    Höt Obiig gohts metem Nachtbus wiiter nach Cali, wo mer denn au d’Festtäg werdet verbringe. Feliz navidad! 🎄    Leia mais

    Ver tradução
  • You&Me - Exploring the World
    1Salsa Parade 💃🏻💃🏻
    Fast wie Fasnacht 🎡🎭🦠🤣San Antonio 💕FavelaRuta Turistica 🤔Christo Rey Statue 🗽

    Cali 💃🏻🎶

    25 de dezembro de 2021, Colômbia ⋅ ⛅ 26 °C

    Cali esch die 3. grössti Stadt in Kolumbie. Wenns nach eus goht fehlt de Stadt chli de Charme (usgno send einzelni Quartier, wie zom Bispel San Antonio) ond au d‘Kriminalität ond d‘Armuet send relativ höch: Met de Gondelbahn hemmer d‘Favelas „bsuecht“ - mer het ned dörfe usstige, sondern nome vo obe beobachte ond das het sich ergendwie ned ganz rechtig agfühlt…

    Aaaaaaber, s’esch au d’Stadt vom „Salsa“ 💃🏻 ond die Usglasseheit ond Lebensfreud hemmer am Stadtfest „La Feria“ mega z‘gspüre becho. Mer hend d’Eröffnigsparade bsuecht: Of erere 1km lange Strecki werd eifach tanzt, tanzt ond no meh tanzt! 🥳 Dezue lauft luuti Musig ond mer isst Streetfood & trinkt Cervezas. 🍻

    So mol Wiehnachte fiire esch definitiv es Erlebnis xii, jetzt aber freued mer eus of bitz meh Natur! Salento, we‘re coming! 🌿    Leia mais

    Ver tradução
  • You&Me - Exploring the World
    Wachspalme 🌴
    Die Palme werdet bis zu 60m höch!Zerst eschs en wissi Blüete, spöter entstoht drus en Kafifrucht4Bim Pflücke mit Poncho & Strohhuet 🤣2Kafi & Banane ergänzed sich super ond werdet oft nebenand abaut👌🏼Bim Mahle entfaltet sich s'ganze Aroma 🤗Yummie! ☕️

    Salento 🌴☕️

    28 de dezembro de 2021, Colômbia ⋅ ☀️ 19 °C

    Salento liit uf 1895 M.ü.M., het chlii meh als 7‘000 Iwohner ond ghört zom „Eje Cafetero“ - d‘Kafiabauregion vo Kolumbie. Nebst em Kafi esch Salento bekannt förs Cocora Valley ond die det wachsende „Wachspalme“. Wahnsinnig idrücklich, au bi ned soo guetem Wetter! 🌴

    D‘Erwartige an Kafi send natürli höch xii… ond leider nome teilwiis erfüllt worde 😅. De Kafi us de Region esch nämli oftmals „liecht süürlich“, was eus allne ned sooo zueseit. Zom Usefinde, wieso dass das so esch, hemmer en Kafi-Plantage bsuecht ond ganz vell öber de Prozess glernt: Die rote Kafifrücht ernte, entkerne, wäsche, tröchne, röste & denn gnüsse ☕️. Ahh, ond de Grund för d‘Süüri hemmer au usegfonde: D‘Kafibohne nimmt de Gschmack vode umliegende Pflanze aa ond das send e dere Umgebig unter anderem Zitrusfrücht 🍋🍊.

    Next stop: Medellin 🚌    Leia mais

    Ver tradução
  • You&Me - Exploring the World
    1D'Ussicht vom El Peñol 🤩
    2El Peñol - 649 Stegetritt 😅1Guatapé - en Künstler bide Arbet 👏🏼1Comuna 132Comuna 13 - schön farbig 🌈Medellín - en Teil vode Wiehnachtsbelüchtig 🎄HAPPY NEW YEAR! 🥳

    Medellín 🌸

    1 de janeiro de 2022, Colômbia ⋅ ⛅ 16 °C

    Medellin - eifach e lässigi Stadt ond mer hend eus uf Ahieb wohl gfühlt do!! 💕

    D’ Vergangeheit vo Medellín esch relativ dunkel ond au höt esch no lang ned alles guet (Drogehandel, Korruption, Armuet, etc) - ABER es send momentan vell positivi Veränderige im Gange. D’Mensche send extrem herzlich ond sie sprühed vor Lebensfreud! Es hed riesig Spass gmacht dur die farbige Quartier z’schlendere.

    Metem Bus zwei Stund vo Medellín entfernt findt mer Guatapé, s’bekanntlich farbigsti Dorf vo Kolumbie. Nebst em Dörfli bsuecht mer de Felse “El Peñol” im Nochbersdorf La Piedra: Nach 649 Stegetritt chan mer en super schöni Ussicht über ein vo de schönste Stausee gnüsse. 🤩

    För eus gohts jetzt wiiter nach Cartagena ond mer freued eus riesig, die super schöni Stadt nomol dörfe z’bsueche, das Mol zäme met de Irina ond em Dario. 🥰    Leia mais

    Ver tradução
  • You&Me - Exploring the World
    Getsemaní 💕
    2☂️☂️☂️Plaza de la Trinidad ☀️🌸🌿2Bazurto Mercado 🦀🦐🦞Schön wars! 🥰

    Cartagena ✨

    3 de janeiro de 2022, Colômbia ⋅ ☀️ 32 °C

    Scho bem erste Mol hets eus extrem gfalle e dere Stadt & au das Mol semmer ned enttüscht worde: Cartagena sprüeht vor Charme ond Farbe, d’Sonne schiint de ganzi Tag, d’Lüüt send extrem nett ond s’Esse & au de Kafi send meeeega lecker! 🤩

    Jetzt gohts wiiter nach Santa Marta, wo de “Ciudad Perdida Trek” of eus wartet:
    4 Täg Natur pur! ☀️

    Mer meldet eus weder, wenn mer zrogg send. 👋🏼    Leia mais

    Ver tradução
  • You&Me - Exploring the World
    La Ciudad Perdida ✨
    1Up, up, up 💪🏼Steiplattforme & Terrasse 🪨Es Dorf vode indigene Urbevölkerig, de Wiwas 🛖1De Schaman vo de Wiwas 🪴D'Mulas leistet Schwerstarbet! 💪🏼Schön xii met euch! 💕

    La Ciudad Perdida 🪶🪨

    7 de janeiro de 2022, Colômbia ⋅ ☀️ 23 °C

    Die verloreni Stadt treit de Name Teyuna ond esch zirka 800 Johr nach Christus erbaut worde. Entdeckt aber het mer sie erst im Johr 1972, das esch also no gar ned so lang her. D‘Stadt befindet sich tüüf im Sierra Nevada Gebiet ond s‘git lediglich ein Wanderweg det ine. Also hemmer eus of de langi Weg gmacht… 🥾

    Am Morge vom 3. Tag nach 1200 Stegetritt hemmer denn euses Ziel erreicht: La Ciudad Perdida. Met chli Fantasie het mer d‘Stadt no vor sich xeh - eifach magisch 🧚.

    Total semmer 4 Täg, 44 Kilometer ond 2700 Höhemeter gwanderet ond hend en rechtig gueti Ziit gha zäme!    Leia mais

    Ver tradução
  • You&Me - Exploring the World
    Sierra Nevada ✨
    Sonneufgang ☀️De Wanderweg zom Cerro Kennedy 🥾1El Museo de Cacao 🍫D'Pralinés am mache... 😋Gmüetlich am käfele 🧋☕️

    Minca & Cerro Kennedy ☀️

    11 de janeiro de 2022, Colômbia ⋅ ⛅ 23 °C

    Nach 4 Täg Wandere hemmers chli gmüetlich welle ond hend s’verschlofne Dörfli Minca bsuecht. S’Dorf esch super chli, het herzigi Kafis ond mega feini Restaurants, wo mers sich so rechtig chan loh guet goh. 🥰

    Bi eme Spaziergang hemmer s’Museo de Cacao entdeckt. S’Esch zimmli abglege xii ond of de ersti Blick hets au gar ned wie es Museum usxeh… aber mer hend extrem vell Neus öber die 5C’s in Kolumbie (Café, Coca, Cannabis, Chocolate & Cerveza) glernt, hend selber Schoggipralinés gmacht & en wörklich lustige Nomitag gha. 👌🏼

    Am Tag druf hemmer eus denn scho is nächsti Abentüür gstürzt. Metem Mototaxi semmer nach El Campano, ab dete 15km gwanderet bis uf öppe 2800 M.ü.M. Of dere Höchi hemmer öbernachtet ond send denn am nächste Morge am 3:30h ufgstande ond nomol 1.5h berguuf gloffe. Ufem Spitz vom Cerro Kennedy hemmer en suuuuper schöne Sonneuntergang dörfe gnüsse - die ganzi Sierra Nevada het sich zeigt ond mer hend die zwei höchste Berge (Bolívar & Colón, beidi knapp 6000m) chönne bestuune. Sehr iidrücklich!! 🌄    Leia mais

    Ver tradução
  • You&Me - Exploring the World
    Cabo San Juan 🏝
    🥾🥾🥾Eifach schön ☀️Paparazzi 😁2Playa La Piscina 🌴1Obigstimmig 🌅

    Tayrona National Park 🏕

    14 de janeiro de 2022, Colômbia ⋅ ☀️ 27 °C

    Siit chli meh als 3 Woche semmer jetzt met de Irina ond em Dario onterwegs ond hend e dere Ziit extrem vell Tolls zäme erlebt. Als Abschluss hemmer die letzte 3 Täg im Tayrona Nationalpark verbrocht. De Park liit ade nördliche Küste vo Kolumbie ond öberzügt met wörkli schöne Sandstränd. Perfeeeekt zom chille 🤣.
    Mer send alli vier zimmli gschluuchet xii ond hends eifach gnosse, endlich nochli fuul am Strand z’legge, im türkise Meer z’bade ond veeell Sonne z’tanke.

    << Liebi Irina, liebe Dario: S’Esch super schön xii met euch, danke vell mol för de Bsuech! Mer wönsched euch no zwei ganz tolli Täg in Bogotá ond denn en guuete Flug zrogg ed Schwiiz! >>

    Ab höt semmer weder z’zweite onterwegs ond freued eus, uf alles was no chonnt! Wie genau eusi wiiteri Reis usxeht, wössed mer nonig - aber mer werdet eus ede nächste Täg demet usenand setze & halted euch ufem Laufende. 😘    Leia mais

    Ver tradução
  • You&Me - Exploring the World
    Cabo de la Vela 💕
    Euses Strandhüttli 🏝Sunsets on point 👌🏼D'Ziit ganz fest am gnüsse 🥰De Andrin bim Kitesurfe - whooop! 👏🏼4D'Corinne bim Kite 🙃

    Cabo de la Vela 🪂

    19 de janeiro de 2022, Colômbia ⋅ ☀️ 28 °C

    Siit es paar Täg jetzt gnüssed mer d‘Ziit do in Cabo de la Vela, in La Guajira. Mer wohned imne Strandhüttli direkt am Meer ond hend jede Tag super schön Wetter ☀️. Dezue chonnt, dass alles no ide Afangsschueh steckt, so dass nome wenigi Touriste vor Ort send ond mer jede Morge 20 Minute is Dorf vöre müend/dörfed laufe zom Wasser chaufe. Alles no ganz simpel!
    De Ort eignet sich also perfekt zom „Eifach mol nüt tue“ ond wenns einem denn doch langwiilig esch, chan mer sich bi perfekte Bedingige bim Kitesurfe uspowere! 💪🏼
    Mer werdet no es paar Täg do bliibe, bevors denn för eus nochli wiiter id Wüesti goht.    Leia mais

    Ver tradução
  • You&Me - Exploring the World
    Metem Jeep dor d'Wüesti - do wett mer eich kei Panne ha 🙈
    1Faro - Mer zwei am nördlichste Ponkt!Faro - natüüürli hemmer a euch alli denkt 😘Statt Schuel...Dunas Taroa - d'Sanddüne 🐪Au en chlini Salzwüesti hemmer gfonde 🤩1Chinchorros - extra breiti Hängematte: Euse Schlofplatz för d'Nacht 😄

    Punta Gallinas 🧭

    23 de janeiro de 2022, Colômbia ⋅ ☀️ 27 °C

    Nach Cabo de la Vela semmer unter anderem meteme Jeep (inklusive Panne!) nochli nördlicher gfahre ond hend die zweiti Wüesteregion vo Kolumbie bsuecht.

    Punta Gallinas esch ned nome de nördlichsti Ponkt vo Kolumbie, sondern au vo ganz Latinamerika. Ond mer hend natürli abgwartet, bis alli andere vo eusere Gruppe ofem Weg zrogg zom Auto xii send, bevor mer es Selfie gschosse hend: „Die zwei nördlichste Mensche vo ganz Südamerika“ - es lässigs Gfühl! 🥳

    Ofem Weg id Wüesti ond natürli denn au weder ofem Rückweg stönd ganz velli Chind ond teilwiis au erwachseni Persone met erere selberbastlete Strossesperri. Dass du dörfsch durefahre, muesch du ihne Süessigkeite gäh… 🙈 die indigene Chind stönd also de ganzi Tag för Süesses am Strosserand anstatt dass sie id Schuel gönd. Das „Konzept“ esch för eus völlige Nonsense, aber s‘esch halt wies do lauft. Mer chönd nome hoffe, dass sich das ergendwenn werd ändere…

    Die nächste Täg werdet mer nomol in Santa Marta verbringe, sodass mer gnueg Ziit hend, euse nächsti Reisemonet z’plane.
    Stay tuned! ☺️    Leia mais

    Ver tradução
  • You&Me - Exploring the World
    Piiiiiiicks! 💉
    2Oh ohhh... next 😬😅Punto de Vacunación 🦠

    Booster Time 🦠💉

    24 de janeiro de 2022, Colômbia ⋅ ☀️ 29 °C

    Au wenn Covid do ned öberall glich ernst gno werd, brucht mer s‘Zertifikat doch emmer weder - vor allem denn, wenn mer s‘Land wett wechsle. Drum eschs höt sowiit xii: Mer hend ganz Santa Marta nachme Booster abgsuecht. Nach 4 offizielle „Puntos de Vacunación“, wo kei Impfig meh gha hend, semmer bi de 5. Station denn glich no fündig worde. 🥳

    Jetzt heissts Duume drucke, dass eus morn ned allzu schlecht goht… 🤒    Leia mais

    Ver tradução
  • You&Me - Exploring the World
    2Kolumbie... atemberaubendi Natur 🌵
    ...Lebensfreud met vellne Farbe! 🌈... indigen & magisch ✨2... Korruption & Armuet 😔... spektakulär! ☀️Off we go 🛫

    Adiós Colombia 👋🏼

    27 de janeiro de 2022, Colômbia ⋅ ⛅ 18 °C

    …mer sitzed grad am Flughafe z‘Bogotá ond lönd eusi Ziit in Kolumbie Revue passiere. Mer hend sooo vell Schöns dörfe erlebe & send beidruckt vo de Herzlichkeit wo d‘KolumbianerInne an Tag legged. Muchísimas gracias!! 🥰

    Die letzte Täg hemmer einersiits gnutzt zom weder fit werde - s‘het eus doch beidi recht wegghaue nach de Impfig 🤒 - ond anderersiits hemmer ganz vell glese öber eusi nächsti Destination. Do es paar „fun facts“, velecht findet ehr jo selber use, wo dass es als nächsts here goht.

    1.
    Sowohl de tüüfsti als au de höchsti Punkt of de Südhalbchugele befindet sich e dem Land.

    2.
    2001 hets e dem Land wege Unruhe während 10 Täg (!!) 5 verschiedni Präsidente gäh.

    3.
    97% vo de Iwohner hend europäischi Wurzle ond sie fühled sich met Europa sehr verbunde.

    4.
    Sie chönd sowohl Fuessball spiele als au Tanze.

    5.
    Speziell eis Gricht vode iheimische Chuchi esch weltwiit bekannt ond passt hervorragend zomne guete, ebefalls us dem Land stammende Glas Rotwii.

    …ond, wer weiss es? 😉    Leia mais

  • You&Me - Exploring the World
    Yummie Steaks & Rotwii 😋
    D'Hafepromenade ⚓️Casa Rosada del Presidente 👑Tango Time everywhere🕺🏻D'Architektur - impressive👌🏼...ond glich ganz vell Grüen 🍃🌿

    Happy Arrival 🇦🇷

    28 de janeiro de 2022, Argentina ⋅ ☀️ 22 °C

    Buenos Aires - Uf Ahieb hemmer eus grad extrem wohl ond au sicher gfühlt e dere Stadt! 🤩 Ergendwie schiint im Verhältnis alles en Schritt, zwei wiiter zsii, au wenns de Wirtschaft momentan ned wörkli guet goht… finanziell secher düütlich Budget-fründlicher als „normal“. Do säged mer natürli ned nei. 💸🤣

    Scho bide Ireis semmer trotz veeeeelle Dokument, wo mer hend müesse zeige, met offne Arme empfange worde. Höt het de ganzi Tag d‘Sonne glacht, mer hend ganz vell chönne organisiere/plane/ufgleise ond mer hend bereits es Glas Rotwii zumne saftige Steak dörfe gnüsse.

    „Living the good life“! ☺️    Leia mais

    Ver tradução
  • You&Me - Exploring the World
    Tango Show im El Querandi 💃🏻🕺🏻
    StreetArt ⚽️La Boca - de farbigsti Stadtteil 💕El Congreso Nacional 👑1San Telmo Mercado - super herzig & mega fein!Yummie Empanadas!! 😋 Euse Favorit: Tomate, Mozzarella & Basilikum 🍅🌿Eini vode viele Parkalage 🍃☀️

    Buenos Aires 💃🏻🕺🏻

    2 de fevereiro de 2022, Argentina ⋅ ☀️ 29 °C

    Fast e ganzi Woche hemmer in Buenos Aires verbrocht. D‘Stadt schiint sehr fortschrittlich ond d‘Mensche erlebed mer als reservierter, aber deför au vell korrekter. Mer versuecht d‘Touriste do definitiv bitz weniger z’abzocke. 🤣 Super schön esch au, dass d‘Stadt wörkli grüen wirkt mit all dene Parks ond Bäum öberall - perfekt zom spörtle - OND momentan schiint eifach jede Tag d‘Sonne do! ☀️

    Es Highlight esch sicher d‘Tango-Show xii, mer hend euch do en chline Usschnitt aghänkt. De Tanz werd do glebt ond s‘git immer weder sogenannti „Milongas“: Irgendwo imne Kafi oder uf de Stross trifft mer sich, tanzt Tango & het en gueti Ziit zäme. Natürli het au Fuessball en riese grosse Stellewert ond mer xeht emmer weder s‘Nummere 10 dur d‘Strosse laufe. ⚽️

    Morn gönd mer ganz früeh am Morge los uf Bariloche, wo mer euses Patagonie-Abentüür startet. 🥳    Leia mais

    Ver tradução
  • You&Me - Exploring the World
    D'Ussicht vom Cerro Campanario 🤩
    Mirador Castaño Overá1Mit Wanderstock & eusem Ziel im Hintergrund 🥾Gschafft! 💪🏼De Gletscher ede Obigstimmig ✨Albergue Pampa Linda 😴

    Rund um Bariloche 🗻🌲🥾

    7 de fevereiro de 2022, Argentina ⋅ ☀️ 24 °C

    San Carlos de Bariloche liit am Nahuel Huapi Gletschersee ond esch vo Berge umgeh. Mer seit, dass im Schwiizerstil erbaut worde esch - tatsächlich findet mer einigi Chalets - ond s’esch bekannt för Schoggi. Im Stadtchern fendet mer drum au ein Schoggilade am andere 😋. D’Lag am See esch paradiesisch schön ond s’esch de perfekti Usgangsort för grösseri Wanderige.

    Gstartet hemmer metem Cerro Campanario. S’Esch zwar steil berguuf gange, aber innert 30 Minute semmer scho z’oberst xii ond hend luut National Geographics eini vo de 5 schönste Ussichte dörfe gnüsse, eifach WOW! 🤩

    Es anders Highlight esch eusi 2-Tagestour xii. Gschlofe hemmer inere Herberge in Pampa Linda (siehe Foto). Am erste Tag semmer zum Refugio Otto Meiling gwanderet ond send dete im Tronador Gletscher ganz nöch xii, am zweite Tag hemmer d’Laguna Ilón bsuecht. S’Schönst a Patagonie sowiit esch, dass egal wie höch mer esch ond egal wie wiit mer chan luege, mer xeht eifach nome NATUR! S’Esch no sooo schön unverbaut & mer freued eus of alles was no chonnt! 🥰    Leia mais

    Ver tradução
  • You&Me - Exploring the World
    Laguna Toncek / Emilio Frey Refugio
    E churzi Pause, wiiter gohts 🙌🏼De Andrin am ufestägere 🥾...ond no bitz wiiter ufe 😅 im Hintergrund xeht mer no d'Laguna SchmollEusi Belohnig: Was för en Ussicht 🤩1Laguna Negra / Refugio Italia

    Bariloche Part II ✌🏼

    11 de fevereiro de 2022, Argentina ⋅ ☀️ 14 °C

    Do es paar Impressione vo euse zwei letzte Wanderige rund um Bariloche. Mer hend die ganzi Woche super schön Wetter gha ond hend so jede Schritt chönne gnüsse. ☀️

    Am beste gfalle het eus d‘Rundwanderig vo Villa Catedral us. Mer send zerst zum Emilio Frey Refugio gloffe ond send denn via Laguna Schmoll is Schiigebiet Catedral gwanderet. D‘Ussicht vom Cerro Catedral esch unbezahlbar xii ond au de Weg ufe met all dene Stei het eus extrem guet gfalle. 🤩

    …ond wie gohts jetzt wiiter? Ehrlich xeit, wössed mer das selber nonig so gnau. 😅

    Euse Plan esches in Los Antiguos über d‘Landesgrenze (eine vo nome 4 Grenzübergäng wo momentan göffnet send) nach Chile ii z’reise. Chile aber esch wege Covid suuuper strikt ond s‘esch nochli ungwüss, eb sie eus werdet ineloh. Mer hend uf all Fäll alli Dokument wo verlangt werdet zäme (inklusive Boosterimpfig ond negativem PCR) ond wördet eus freue, wenn mer de Abschnitt vo Patagonie au uf de Siite vo Chile dörfted go bewandere.

    Daumen drücken! 🍀    Leia mais

    Ver tradução
  • You&Me - Exploring the World
    Happy faces 🥳
    Wiit ond breit alleige onterwegs......mer chömed eusem Ziel langsam nöcher 😅Lago General Carrera ☀️3Euses Plätzli för d'Nacht ✨

    Geschafft! 🙌🏼

    13 de fevereiro de 2022, Chile ⋅ ☀️ 21 °C

    Juhuu, mer hends gschafft! 🥳 Mer send gester Nomitag im seeeehr verschlofne, aber süesse Dörfli „Chile Chico“ in Chile acho. D‘Grenzüberquerig esch es rechts Erlebnis xii & mer send froh, dass mers probiert hend! Do en chlini Zämefassig:

    Am Morge am 8i semmer meteme Remis (en Art Taxi, aber vell günstiger, will privat) bis zum argentinische Grenzposte gfahre. Vor luuter Formular för d‘Ireis in Chile hemmer prompt s‘Usreiseformular för Argentinie vergesse uszfülle ond natürli het s‘Internet ned funktioniert… sie wo gschaffet het esch aber ganz en Liebi xii ond het eus denn eres Natel zur Verfüegig gstellt. Metem Usreisestempel im Sack ond eusem Gepäck ofem Rugge semmer denn 6km de Stross entlang bis zum chilenische Grenzposte gloffe - während dere Stond laufe esch eus kein Mensch begegnet, nome 3 wildi Hase hemmer atroffe. 🐰

    Ade chilenische Grenze acho hemmer zerst alli Covid-Unterlage (inklusive PCR) müesse vorwiese, denn nomol en Antigen-Schnelltest mache ond erst wo de negativ xii esch, hemmer wiiter ad Grenzkontrolle dörfe. Dete hemmer denn de Stempel öbercho, deför hends eus eusi Wanderstöck (Holz met öber Grenze neh esch verbote 🙈) ond zwei Pack Nüss weggno…

    …ABER, mer hends öber d‘Grenze gschafft ond nach wiitere 6km z‘Fuess semmer denn in Chile Chico acho & hend nebst vell Google au nochli de See ond d‘Sonne chönne gnüsse. ☺️    Leia mais

    Ver tradução
  • You&Me - Exploring the World
    1No words needed ✨
    Laguna Cerro Castillo 🧗‍♀️De Gletscher ❄️9E Gletscherlagune ✨ - eis vo eusne Highlights ond die chältischt Duschi onterwegs 🥶Views 🤩5Guete Mooorge usem Zelt 😴😊

    Cerro Castillo Trek ☀️

    19 de fevereiro de 2022, Chile ⋅ ⛅ 10 °C

    Vo Chile Chico semmer zerst met de Fähri ond nachher metem Bus nach Coyhaique gfahre - eini vode grössere Städt ide Umgebig. Ein Tag lang semmer vo Lade zu Lade grennt, hend eus e Campingusrüstig zämegsuecht & de Mehrtagestrek vorbereitet. Am Mittwoch Morge eschs denn endli losgange 🥳

    Schwer bepackt met Zelt, Mätteli, Schlofsäck, warme Chleider ond Esse för die nächste vier Täg semmer vo Las Horquetas nach Villa Cerro Castillo gwanderet. Mer send jede Tag rund 6-7 Stund unterwegs xii ond d’Wanderig esch extrem vielsiitig xii: Mol eschs steil berguuf, denn weder uf rutschigem Gröll bergab oder vo Stei zu Stei hüpfend öber de Fluss. Mer send onterwegs a mehrere iidrückliche Gletscher ond wunderschöne, verschiedefarbige Lagune verbii cho. Jede Obiig hemmer euses Zelt ufgstellt ond hend so d’Natur rund um d’Uhr chönne gnüsse. Zom Glöck het au s’Wetter perfekt passt: Tagsüber hemmer emmer Sonneschii gha ond erst gege Obiig ond ide Nacht eschs denn chälter worde - iigmummlet im Schlofsack het mer das aber (fast) gar ned gmerkt . ☺️

    Morn gohts met Autostopp wiiters uf Puerto Rio Tranquillo. Mol luege, was eus dete erwartet. 🤗    Leia mais

    Ver tradução
  • You&Me - Exploring the World
    2
    2Euses Esse för die nächste 5-6 Täg 😋

    Las Capillas de Mármol

    22 de fevereiro de 2022, Chile ⋅ ☀️ 16 °C

    Vo Villa Cerro Castillo nach Puerto Río Tranquilo hemmer autogstöpplet ond mega Glöck gha. Innert 5 Minute semmer zäme meteme chilenische Päärli vonere ältere Frau ond erere Tochter ufgablet worde. S‘Auto esch zimmli chlii xii: Mer hend z‘4te of de Rückbank müesse sitze ond em Andrin sin grosse Rucksack hemmer au no uf de Chnüü gha. So semmer die erste knapp 100km über Schotterstrosse gfahre - ond s‘ältere Fraueli het ALLI öberholt! 🤣 För die letzte 24km hemmer nomol zirka 10 Minute müesse de Duume usehebe, denn het scho en grosse Van aghalte ond alli 4 hend en eigene Sitz gha, rechtig Luxus! Es tolls Erlebnis met schöne Begegnige. 💕

    Gester Morge semmer denn früeh los go d‘Capillas de Mármol aluege. Mer send metem Boot zo de verschiedne Höhlene gfahre worde ond zäme metem Sonneschii ond em extrem schöne Wasser vom Lago General Carrera hets unglaublichi Fotis geh. 🤩

    Jetzt semmer zrogg in Chile Chico, wo mer eus en Tag Ziit gno hend, die nächsti gross Wanderig z‘plane & z‘organisiere. Mer freued eus druf, de Parque Nacional Patagonia kennezlerne & meldet eus denn weder, wenn mer zrogg send. 😘    Leia mais

    Ver tradução
  • You&Me - Exploring the World
    1Klari Nächt - chalt, aber schön 🥶🤩
    1Zähputze mit Ussicht 👌🏼Metem Gepäck ufem Rugge - eifach ned omgheie, bitte 😅#nofilter for REAL! - Laguna Verde🥦🥦Guanacos 🦙2Die schön Siite vom Rege 🌈

    Parque Nacional Patagonia

    27 de fevereiro de 2022, Chile ⋅ ☁️ 5 °C

    Die letzte 5 Täg ond 4 Nächt hemmer im Patagonia Nationalpark verbrocht. Mer hend in Jeinimeni gstartet ond send denn via Valle Chacabuco nach Tamango gwanderet. Das send total 112km ond 3000 Höhemeter - ond jede einzelni Kilometer het mer sich wööörkli müesse verdiene! 😅

    Im erste Sektor hemmer unzähligi Flüss müesse durchquere. Vo harmlos knöcheltüüf bis stark strömend ond bis Mitti Oberschenkel hemmer alles erlebt. Es echt kuuls Erlebnis, au wenn mer eus zwöschedure en eifachi Brugg gwönscht hätted. 🤣

    Au eher schwerig send d‘Wanderweg xii. Einersiits het mer d‘Markierige wörkli guet müesse sueche (wenns denn öberhaupt markiert esch xii) ond anderersiits esch alles so verwilderet xii, dass mer teilwiis chuum meh durs Gebüsch cho esch, vor allem met de grosse Rucksäck! Ond - ergendwie passend zu dere Tour - hets am Schluss denn au no gregnet! ☔️

    Unterwegs het mer nome ganz wenigi Lüüt atroffe ond oftmals hemmer ganz alleige amne Ort öbernachtet. Eifach zu zweit hemmer so das atemberaubende Bergpanorama, die idrückliche Lagune, d‘Stimmig am Morge früeh oder au am Obiig vorem is Bett goh dörfe gnüsse! ☺️

    Alles in allem eschs en extrem tolli, aber au useforderndi Erfahrig xii & för eus beidi es rechtigs Abentüür!    Leia mais

    Ver tradução
  • You&Me - Exploring the World
    3Laguna Torre: Vom Winde verweht 🌪
    ...wohl zimmli chalt 🥶Cerro Torre im Nebel versteckt ☁️Kultur - ALLI trinked Mate 🧉Yummie 😋3Planning time: What's next? 🤩

    Rainy days in El Chaltén ☔️

    4 de março de 2022, Argentina ⋅ ⛅ 10 °C

    Nach eusere Ziit ide Aysén Region in Chile semmer weder öber d‘Grenze zrogg nach Los Antiguos ond hend dete de Nachtbus nach El Chaltén gno. El Chaltén esch es beliebts Ziel för Wanderlustigi ond hätti einiges z‘biete…

    …mer schriibed „hätti“ wells ide letzte paar Täg vell gregnet ond teils sehr stark gwindet het. Gester aber hemmer de Nomitag chönne usnütze, hend de Cerro & d’Laguna Torre bsuecht ond hend (nebst vell Wind - siehe Video) sogar es paar Sonnestrahle verwötscht. ☀️

    Wenns regnet, nutzed mer d‘Ziit för Kafi & Kultur (zB. Mate🧉), feins Esse ond mer setzed eus met de Frog „Wie wiiter nach Patagonie?“ usenand. Ergendwelchi Vorschläg? ☺️😉    Leia mais

    Ver tradução
  • You&Me - Exploring the World
    Laguna de los Tres Wanderig
    The Famous Fitz Roy ✨ ond Cerro Poincenot!Mirador las Piedras Blancas 🤩Gletscher-Close-Up ❄️1Loma del Pliegue Tumbado Wanderig 💕Euses nächsti Ziel: de Cerro Huemul 😍

    Rund um Cerro Fitz Roy 🏔

    8 de março de 2022, Argentina ⋅ ❄️ 1 °C

    S‘Wetter esch leider wiiterhin wechselhaft, aber mer hend zom Glöck die schönste Täg för Tageswanderige chönne nütze. Im Mittelpunkt esch bi beidne Wanderige de „Monte Fitz Roy“ gstande: 3405 Meter hoch ond zimmli beiidruckend, vor allem zmittst ide relativ lange ond mega zackige Bergchetti. 🤩

    Höt started mer e euse vermuetli letzti Mehrtages-Trek in Patagonie. Mitem Cerro Huemul warted es usefordernds, aber wohl atemberaubends Abentüür of eus! Mer freued eus riesig, hoffed no es letzts Mol of chli Wetterglück & meldet eus weder, wenn mer zrogg send. 😘    Leia mais

    Ver tradução
  • You&Me - Exploring the World
    Viedma-Gletscher ✨
    El Campo de Hielo Patagónico Sur - just WOW! 🤩2Zipline-Action ✌🏼1Glaciar Route - entlang ond teilwiis ofem Gletscher ❄️Au d'Abstieg hends in sich gha 💪🏼1...ond zwöschedure hemmer au chli müesse chlättere 🧗‍♀️3D'Morgestimmig nach de letzte Übernachtig - do lohnt sichs früeh ufstoh! ☺️

    Vuelta Huemul Trek 🦊

    12 de março de 2022, Argentina ⋅ ☁️ 2 °C

    D‘Rundwanderig um de Cerro Huemul werd als technisch sehr aspruchsvoll beschribe, drum muess mer sich au registriere ond sich weder zroggmelde, soscht chömeds einem metem Helikopter cho sueche. Ond jo, s‘het also au Stelle dinne gha, wo eus bitz usegforderet hend (vor allem euses Schuehwerk 😅) - aber schlussendli eschs eifach en wunderschöni Wanderig met traumhafte Ussichte xii!

    D‘Route het eus a diverse Gletscher verbii - teilwiis au churz druuf - gfüehrt ond mer hend d’Gletscherspalte vo ganz nöch chönne betrachte. Au hemmer nachem Paso del Viento, wo‘s wies de Name scho seit zimmli heftig gwindet het, en hammermässigi Ussicht gha of de „Campo de Hielo Patagónico Sur“ - s’2. grössti Isfeld of de Südhalbchugele (nach de Antarktis). En Ablick, wo eus beidi - ond mer send wörkli nome zu zweit dete xii - extrem is Stuune brocht het! 🤩 Au lässig send die zwei „zipline-artige“ Flussüberquerige xii. Leider eschs ned bergab gsaust (mer het sich selber müesse zieh), aber so öber e Schlucht met rissendem Fluss het glich sin Reiz. 🥳

    Au wenns teilwiis zimmli chalt worde esch (vor allem ide Nacht), super fest gwindet oder au mol churz ghaglet het - het glich au emmer weder d‘Sonne vöregluegt ond mer hend nachem Wandere zum chöcherle, Kafi trinke oder au d’Tierwelt bestuune die schönste Stimmige dörfe erlebe!

    Mer hend die 4 Täg ede Natur nomol ganz fest gnosse & freued eus höt of d‘Witerreis nach El Calafate, wo en wiitere Gletscher uf eus warted. Mer send gspannt! ☺️    Leia mais

    Ver tradução
  • You&Me - Exploring the World
    1...wenn en grosse Brocke abbricht 😅
    130km lang, 5km breit & 170m tüüf 😳1The Wall ❄️1E einzelni Iisscholle - jetzt fehled nome no d'Pinguine 🐧

    Glaciar Perito Moreno

    13 de março de 2022, Argentina ⋅ ☀️ 6 °C

    Jaja, mer wösseds, scho weder en Gletscher 😅 aber zo eusere Verteidigung: Es het halt au wörkli velli do im Nationalpark Los Glaciares (knapp 250 Gletscher nämli). 🤣

    Vo allne Gletscher in Patagonie esch de Perito Moreno vermuetli de bekanntisti Gletscher ond drum au es „must-see“. Speziell esch, dass er eine vo de wenige Gletscher esch, wo momentan trotz Erderwärmig ned (nonig?) chliner werd, sondern stabil bliibt. Er produziert also jede Tag no glich vell Iis/Masse, wie er au verlüürt. Oberhalb vom Wasser xeht mer rund 40-60 Meter vom Gletscher, unterhalb gohts no vell tüüfer. ❄️

    Met dem Usflug esch eusi Ziit in El Calafate schoweder verbii ond mer fahred no höt Nacht wiiter nach Ushuaia, also a „s‘Endi vo de Welt“.    Leia mais

    Ver tradução
  • You&Me - Exploring the World
    Tollpatschigkeit in Perfektion 😍
    En Magellan-Pinguin 🐧En Gentoo-Pinguin zum gnüsse.. ☺️Riiiesigi Seeleue 🦭🦭🦊3Ushuaia am Morge früeh 🤩De Baum esch so gformt, will er ständig im starke Wind usgsetzt esch 🌬

    Tierra del Fuego 🔥

    19 de março de 2022, Argentina ⋅ ☀️ 7 °C

    Z‘Magglinge im „End der Welt“ (Sportplatz) hemmer eus kenneglernt & send jetzt zäme am „Endi vo de Welt“ (Ushuaia) acho. ☺️

    S‘Füürland het sich eus vo all sine Siite präsentiert. Mehrheitlich hets gregnet, fest gwindet oder gschneit, zwöschedure het zom Glöck aber au d’Sonne immer mol weder vöregüxlet. Eusi Wanderige im Nationalpark send aber wegem velle Rege/Schnee seeeehr matschig xii - mer müend drum säge, dass mer wandertechnisch in Patagonie scho schöneri Toure ond Ussichte erlebt hend. 😅

    Trotzdem het sich de laaaangi Weg do abe glohnt. Ergendwie eschs eifach speziell, de Antarktis so nöch z‘sii & mer hend vor allem met de velle Pinguine es uuuh tolls Erlebnis gha. 🤩

    Höt Obiig flüged mer zrogg uf Buenos Aires, womit euses Patagonie-Abentüür nach 25 Wandertäg, rund 500 Kilometer ond 17’000 Höhemeter z’End goht. Eusi Schueh send jetzt definitiv düre & mer werdet eus es paar Neui müesse chaufe. 🤣

    Mer hend eusi Ziit in Patagonie extrem gnosse & werdet de Fleck in bester Erinnerig bhalte!! 💕    Leia mais

    Ver tradução