Reset search
Yasmin MüngerYasmin Münger
Edit routeSatellite

Yasmin Münger

Reisefödlii 📌🌍
Adrenalinjunkie🎢🎆
Sportsfrönd 🏄🏼‍♀️🤸🏼‍♀️
Tierliebii 🐨🐿
Foodporn🍕🥘
Relax & chill🍷🍹
..ond au söscht för jede Seich z ha✌🏽 Ebikon, Schweiz
Follow Message
  • Exploring Australia
    Day 67

    Bangkok / Ko Samet

    March 3, 2020 in Thailand ⋅ ☀️ 30 °C
    1
    1121

    Zwoi Täg in Bangkok send sehr idrücklech gsi. D Luft esch mega steckig vom ganze Smog & au fast alli sind mit Mundschutz umegloffe wägem Virus. Nach dem mir denn s erste mol i die vollgstopft Metro ine sind, wo mer vor luter Körpernöchi nömm hed chönne omgheie, hend sälbst mer eus sone Schotz kauft! Mir hend aber mega cooli Märt bsuecht, gshopped, en Bootstour gmacht & sälbst am Obig ide Rooftop Sky Bar simmer fast allei gsi, wells momentan kei Chinese ome hed! 😋

    Die letschte 5 Nächt vo eusere Reis semmer denn no zom Abschloss eusi Seele chli uf de Insle Ko Samet loh bambele loh. Vo Bangkok us hemmer es privat Taxi gha, wo eus 2h 30min bis uf Rayong zum Pier abegfahre hed. Vo det us semmer denn mitem Speedboat no 10min uf d Insle öbere gfahre. Mir hend au do weder es mega häzigs Resort becho för die nöchste 5 Nächt & direkt de wunderschöni Ao Prao Beach vor eusere Nase gha. Demets eus aber doch ned zu langwilig worde esch, hemmer denn no am gliche Obe en Roller gmietet & hend schomol die ganz Insle abklapperet (20km vo Süde nach Norde). Somit semmer denn jede Tag ane andere Strand gange & hend au schnell mol eusi Lieblings- Restaurant entdeckt. De Vorteil esch au gsi, das Prise einiges besser gse send osserhalb als im Hotel. D "Banana Bar" hed eus beidi voll verwötscht - mer hed dete för paar wenigi Fränkli die feinste Menüs becho, Curry's, Steak, Fried Rice & die allerliebst & härzigst Bedienig (Big Mama wie mer sie gnennt hend) obedruf. Mir hed sich werkli gfühlt wie im Wohzimmer vode eiget Grossmuetter, wo der jede Wonsch vode Lippe ablest. Denn sälbst d Schueh hemmer mösse vorem Igang abzieh! Glaub das mer 3 mal det send go Ässe innerthalb vo 5 Täg spricht för sich. ☺ Mir hend eus also bestens erholt, ganz vell Sonne tankt , gläse, gschnauset , eus loh massiere & send no go Jetski fahre. S 'ganze Desaster vom Coronavirus esch eus do völlig erspart blobe, mer esch wie inere andere Wält det droff gsi. Jedoch hemmer devo profitiert, dass deshalb die ganze Chinese Scharene ned ome gsi send & hend ei Rueh gha ade Stränd. Mer wörded die Insle also absolut witerempfähle, wemmer vo Bankok schnell as Meer wett go & wunderschöni Traumstränd wett gniesse. Nichts desto trotz freued mer eus etz mega uf's Zrogg cho id Schwiiz. Vorallem uf's feine Ässe, eusi Wohnig, weder eusne Hobbys nochego, eusi Family & Frönde und sälbst s'go schaffe ged eim s Gfühl das mer weder chli bruucht werd 😉 Eifach mol weder chli en greglete Arbetsalltag zha ohni das mer gross muess nochedänke was mer höt mache well. Mir hend wundervolli Erläbnis gha i dene 10 Woche & nämed sovell schöni Erennerige i eusne Härze mit zrogg. Mir schätzt wieder meh was mer hed & esch eifach nor glöcklech met sim Läbe. Und au för eusi Beziehigs heds eus vell brocht & mer hed sech nomol besser kenneglehrt ond anderi Siite entdeckt. 😃

    ♡-liche Dank a alli wo die Brichte stets mitverfolgt hend & en Teil miterlebe hend chönne & sich mit eus gfreut hend. Das esch euse Abschlossfootprint gseh...ämel för die Reis. Jetzt werds es Zitli ruhiger zue und här go, aber wer weiss wie lang dases god, bis mer weder euses nöchste Abentüür zom plane in Agriff nähmed?! 😀👄

    Möchets guet ond bis gli!
    LG
    Yasmin & Fabio    Read more

    See translation
    Marina L.

    hahaha! ischnech ufgfaue wie mängisch die einti ihri Frisur het nöi gmacht?😂😂

    3/3/20Reply
    Traveler

    Danke vielmals für eure tollen Berichte und Fotos. Habe mich immer wieder auf eure neuesten Posts gefreut. Manchmal habt ihr mich mit eurer Ferienstimmung richtig angesteckt. Wir wünschen euch einen guten Rückflug und heissen Euch dann herzlich ♥️Willkommen zu Hause . 😷

    3/3/20Reply
    Traveler

    ♥️😍😘🤩🤗😚🙈🙉🙊♥️

    3/3/20Reply
    4 more comments
     
  • Exploring Australia
    Day 53

    Chiang Mai

    February 18, 2020 in Thailand ⋅ ☀️ 29 °C

    Sawasdee ka & Hello aus dem Land des Lächelns! 🙏🇨🇷

    Mer mälded eus nochere längerer Pause mol weder medemene Update vo eusere Reis.

    Noch Australie hemmer nämmli ned werkli vell Ziit zom döreschnufe gha, om alles Erläbte chli chönne z'ordne. Denn med Chiang Mai esch in Thailand bereits s negste Highlight agstande. Es komplett neus Land med andere Kulture, Brüüch, Ässe, Klima usw.

    Mer send währed 8 Nächt imene härzige, ruhige Resort onderbracht worde, in Mitte vo Riisfälder - öppe genau so wiemer sechs in Thailand vorstelle chan. De Papi vom Fabio wohnt sett guet 8 Johr bereits in Chiang Mai ond de Abstächer noch Thailand hemmer hauptsächlech wäge em gmacht. Chiang Mai esch ganz im Norde vo Thailand ond bekannt för die toll Natur, vell schöni Tämple & nätti Mönsche. Es gilt als "das wahre Thailand." Ganz was Anderes, als wiemers vom Süde här kennt.

    Mer hend eus as neue, sehr heisse Klima schnell dragwöhnt ond au de Food (vell Chicken ond Riiiis) hed eus sehr vell Freud bereitet.
    Zämegfasst chömmer säge, dass die Täg wie im Flog vergange send. Mer hend so vell erläbt, hend onderanderem traditonelli Ässensmärt ond idröcklechi Tämple (vorallem de Wiissi Tämpel in Chiang Rai) bsuecht. Hend so fein ond gönstig gässe, eus i onzählige Massage (1h för 6.-) lo verwöhne lo, hend en Elefantefarm bsuecht ond eus is Nachtläbe gworfe. Das send nor es paar vo vellne andere Highlights. Chiang Mai esch werkli en sehr abwächsligsriichi City ond hed för alli was bote. Medem Papi vom Fabio hemmer natürlich au de ideali, privati Reiseleiter gha, wo eus vell Insider-Tipps ond Erfahrige us sim Läbe in Thailand hed chönne wiitergäh. Osserdem semmer med sim Auto au super mobil gseh ond send schnell vo A noch B cho.
    Mer hend aber au die weniger schöne Siite chli müsse erfahre, Velles dreiht sech au im Norde Obe oms Gäld, Fraue ond d Korruption hed au done d Oberhand. So hemmer zom Bispel einisch en Buess med de Polizei diräkt chönne om 50% abeverhandle. Stelled euch mol so öppis ide Schwiiz vor! Osserdem esch d Loft dorch die velle Abgas vode Töff, Autos etc. chum zom erträge gseh. Wie chan das so nor wiitergo?

    Es send wekli Wälte zo Australie ond scho gar kei Verglich zode Schwiiz. Aber wemmer bi all dem au chli hinter d Fassade chan blicke, verstohd mer wieso velli Mönsche eso ticked. Das en Mehrheit med 300 Franke done muess im Monet uscho, ged eim scho sehr zdänke ond zeigt wie chli de Spalt zwösche Riichtom ond Armut leider esch. Omso schöner z'gseh, wie die Lüüt done trotzdem med sehr bescheidnige Mittel happy send ond eim emmer es Lächle zroggänd. Mer lehrts i dere Ziit vorallem omso meh weder z'schätze, wie guet mer's eigentlech deheime hend! Dass die meiste Problem wo mier hend, vellfach ebe eigentlech gar kei werklechi send. Das werd eim emmer weder bewosst wemmer i so ärmere Länder esch. Velli chöntet sech ächt en Schiibe vo de Läbensistellig vo do abschniide.

    Eus heds uf jedefall sehr guet gfalle, weder so vell neu Idröck, spannendi Erläbnis etc. & send aber glichziitig au froh, hemmer noch 9 Täg chönne wiiterzieh.
    Aktuell semmer in Bangkok, wo mer 2 Nächt verbrenged. Weder en riese Stadt wo mer sech locker au en Woche chönt verwiile. Trotzdem merked mer au, das mer doch au müed wärded ond nömme ganz so vell Energie hend. Morn gots aber zom Glöck wiiters uf Ko Samet, en Insle wo mer eus ide letschte 5 Nächt vo eusere Reis no einisch so rechtig chönt entspanne! Das chömmer bestemmt sehr guet bruche!    Read more

     
  • Exploring Australia
    Day 53

    Melbourne & Skydiving

    February 18, 2020 in Australia ⋅ ☀️ 29 °C
    2
    2

    För die letschte 4 Täg uf eusere AustralieTour esches denn no uf Melbourne gange. Mer hend eus noch 6 Woche Camper-Life sehr druf gfreut weder mol chli amene lebändigere Ort zsi.

    Wie chönts au anderst si hed au s Wätter in Melbourne am Afang nonig so werkli welle medmache. Ide erste beide Täg hed sech d Sonne praktisch nie welle zeige ond es esch es rechtigs Schmudelwätter gseh, so wie mers eigentlech nor ide Schwiiz kennt. Eusi Motivation för Sightseeing hed sech also in Gränze ghalte ond eus hed mer mehrheitlech ide Shopping-Malls gfonde. Grad näb eusem Hotel heds en riese Märt gha wos vo fröschem Fleisch, Fisch, Gmües usw. alles gäh hed. Esch no lostig gseh die "Marktschreier" bi erere tägleche Arbet zbeobachte.

    Am zwoite Tag hätt denn eigentlech euse gross Skydive-Flog sell stattfende. Wägem schlächte Wätter hed mer eus denn aber ufe negsti Tag verschobe. Mer hend im Räge trotzt ond send glich die einte oder andere Sache go aluege - werkli omghaue hed eus aber ehrlechgseid nüd. Im Gägesatz zo Sydney gets au ned so die Sehenswördigkeite wo mer muess gseh ha. Trotzdem hed jedes Stadtviertel so chli sin eiget Charme. De Valentinstag hemmer denn bimene feine sälberkaufte Znacht lo usklinge ond eus Mental scho mol uf de Skydive vorbereitet.

    De Wecker extra früeh gnueg gstellt hemmer eus am Morge scho welle id Startlöcher begäh.Trotz sonnigem Wätter hemmer aber weder es Mail becho, dass euse Flog wäg zu starchem Wind abgseid werd. Na toll! Letschti Chance bietet sech also nome no am Vierte ond letschte Tag - oder wie mer so schön seid, aller guten Dinge sind DREI!
    Mer hend d Ziit gnötzt ond send u.a ufe Eureka Tower (knapp 300m) ufe ond hend eus d City mol us de Vogelperspektive agluegt. S leschte Obigässe hemmer denn imene leckere griechische Restaurant verbrocht wo de Fabio no als Wiehnachtsgschänk zguet gha hed. Er heds denn au ordrdentlech uskostet, dass em nochhäne fast chle schlächt vom velle Ässe gseh esch.

    Am Tag 4 hemmer denn uf die 10.00 pönktlech uscheckt ond euses ganze Gepäck im Hotel deponiert. Do euse Flog uf Thailand erst am 00.30 god, hemmer also no de ganz Tag zor Verfüegig gha. Am Morge hemmer bereits weder en Info becho, dass sie med em Skydive 2h in Verzog send ond mier statt uf die 14.00 erst uf die 16.00 vor Ort iträffe seled. Ächt müehsam das Ganze!
    Nochemene leckere letschte Früehstöck hemmer eus denn au scho ufe Wäg rechtig St. Kilda gmacht - osserem em Skydive gets dete nämmli no en schöne Beach zom verwiile. D Sonne hed sech a dem Tag vo erere beste Siite zeigt ond mer hends so rechtig chönne gniesse.

    Ponkt 16.00 esches denn ändlech losgange. Die ganz Registrierig, Akleide, Ablauf, Sicherheitsvideo etc. hed aber ganzi 1h duured ond sech zemmli id Längi zoge. Nochemene chorze Kennelerne vo eusne Instructors semmer denn zäme med 5 anderne Lüüt a Floghafe gfahre worde wo denn au euse chli Flüger gstande esch. Mer hend eus jeweils diräkt hender euse Instructor müsse is Flogi ireihe. Ab do ah heds also keis Zrogg me gäh. Noch knapp 10min hemmer denn eusi Floghöchi med 12'000 Fuess (ca. 4'000 Meter) erreicht. Spötistens jetzt hed mer allne d Aspannig so rechtig agseh. Wenn so usem Fenster gluegt ond gwösst hesch, dass dete grad wersch abegompe, esch eim scho chle molmig worde! Denn esches schnell gange, d Tör esch uf ond eine nochem andere esch usegomped. Wo mer denn ade Reihe gseh send ond vor dere offnig Tör gsässe esch, esches losgange. 50 Sekonde freie Fall, 8000 Meter med 200 km/h schnell eifach so rechtig Ärde abe. WOW, crazy, Adrenalin Pur, in Wörter nor schwär zbeschriebe. Mer esch wie imene Felm gseh, hed sech wekli wie en Vogel gfühlt ond s Muul hed nor so gflattered bim ufmache. D Erliechterig esch scho gross gseh, wo denn de Fallscherm ufgange esch. Bem rond 7 Minütig Flog ganz abe hed mer denn no en riese Usblick diräkt öber ganz Melbourne gha. Done heil acho hemmer eus denn mol id Arme gnoh ond hends ergendwie gar ned so rechtig realisiert, was mer grad gmacht hend! But we did it!! SKYDIVE ✅
    Stolz ond emmer no chli med zettrige Bei hemmer denn bimene Fish&Chips de letschti Sonneontergang in Australie gnosse bevors denn a Floghafe gange esch.

    Bye bye Australia! 7 Woche i dem wonderschöne, so vellfälltige Land gönd z Änd. Was blibt send onzähligi schöni Momänt, Tier, nätti Mönsche, Natur ond ond ond, Erennerige wo mer bestemmt emmer weder gärn wärded zroggluege!

    Etzt freued mer eus in Thailand no ufne super Abschloss! Er ghöred weder, bis bald!    Read more

    Traveler

    so cooooooooool

    2/17/20Reply
    Traveler

    fast wie ein Vogel

    2/17/20Reply
    Traveler

    Der Kami und die Katze.😸...Kamikaze 🤔😱😵😤😅😀

    3/3/20Reply
    Traveler

    Do chläbsch s Gebiss 😁besser met Sekundelim a. 😱

    3/3/20Reply
     
  • Exploring Australia
    Day 49

    Great Ocean Road 11.2-14.2.20

    February 14, 2020 in Australia ⋅ ⛅ 30 °C
    1

    Nach Ahkunft in Cape Jervis mit de Fähri 20.00Uhr , hemmer denn zerst nomol 8h Fahrt vor eus gha bis zu de Great Ocean Road. Darom hemmer nach 4h Fahrt ufemene Free Camping gschlofe, diräkt ufemene alte Tennisplatz. 🙂 Mir hend euse mega guet igläbt im chline Camper und au emmer super pfused det inne.
    D'Ocean Road esch 243 km & füehrt entlang de australische Südküste. Mir hend 3 Nächt gha för die Route. Zwöschedinne gets emmer weder schöni Lookouts & au die 12 Apostels ghöret dezue. Da s Meiste devo chli im Meer osse esch & mer jede Tag Nebel gha hend - hemmer leider velles devo ned chönne gse 😪 Mir sind no i de grossi Otway Nationalpark go öbernachte & hend mega vell Koalas gse ufem Wäg det hii. Und au ufem Camping hemmer wieder direkt eine näb eus gha bim z'Nachtässe. För eus langsam fast nömm zom glaube, dass anderi Lüt scho zom vierte Mol z Australie send & no nie en freiläbende gse hend. 😲 Am Tag druf simmer nämmlich zom Kennetriver gfahre & hend det nomol ca 6 Koalas chönne beobachte. De Fabio hed det no grad de gueti Empfang gnötzt, zom mit de Fluggsellschaft z telefoniere. Mir hend nämmlich festgstellt dass mir beidi nor 20Kilo Gepäck döfed ha bim nöchste Flug. Es rise Züg esch das, well mer beidi ordentlech meh hend & niemmer hed welle zueständig sie för euses Problem!! Jede hed eus en andere Pris gseid & es Upgrade esch eus au no abotte worde för 400$ als alternative das mer 30Kilo chönnt metnäh 😂😂 Wis usgehts werd etz de Fabio au no en chline Handgepäck Koffer müsse chaufe.
    Well das aber noni glängt hed - esch euse Charre denn au nömm ahgsprunge und mer send rechtig im Scheiss gsi. Noch jenste Arüef i eusere Kontaknummere, heds denn gheisse mer müessid selber die Batterie öberbröcke. 🤪 En cheibe Chnorz esches gsi bes mer die gfonde hend onderem Biifahrersitz & öberhaupt det onde dezue cho send.. zwei nätti Franzose hend eus denn Gottseidank chönne hälfe, mir hötted nämmlich beidi kei blasse Schemmer gha, wie mer so öppis macht. D Fahrt nach Melbourne hed chönne witergo & höt hemmer euse Camper noch 1680 gfahrene Kilometer mit schwärem Härze abgä.😪Bid bald mit News us Melbourne 😘❤    Read more

    See translation
    Traveler

    👍 Schöööön.

    3/3/20Reply
     
  • Exploring Australia
    Day 45

    Kangaroo Island

    February 10, 2020 in Australia ⋅ ☀️ 30 °C
    2

    Do eus s Flogchaos zemmli a Energie kostet hed ond mer 2h spöter als geplant de Camper hend chönne öbernäh, hemmer eusi Fähri noch Kangaroo Island om en Tag verschobe.

    De Obe hemmer medemene leckere BBQ bi Sonneondergang lo usklinge ond hend en super Freecampplatz grad ide Nöchi vom Hafe gfonde. Zwar hemmer im neue Camper nömme ganz so vell Comfort ond Stauruum förs Gepäck - dennoch lod sechs au done sehr gmüetlech denne läbe.

    Am negste Morge esches denn weder früeh losgange ond bereits am 9.00 semmer denn inkl. Eusem Camper med de Fähri losgfahre. Mer hend natürlech ned so rächt gwösst was eus erwarte werd, wöll Kangaroo Island sehr heftig vo dene Buschbränd betroffe gseh send - de ganzi Weste vode Insle esch praktisch abbrönnt ond nicht befahrbar.
    Trotzdem hends eus gseid dases no velli anderi tolli Spots zom erkonde ged ond en Bsuech sech lohne werd.
    So esches noch 45min Fahrt diräkt losgange ganz in Norde ufe a Emu Bay. Dete hemmer medem eigete Auto diräkt chönne am Beach entlang fahre ond bade wo mer Lost dezue gha hed, was seehr es cools Erläbnis gseh esch! Nochhäne semmer wiiters ade Köste entlang ade super schön Stokes Beach wele mer nor via Walk dör es Steilabyrinth erreicht hed. Dete hemmer denn au mol einigi Stond ordentlech Sonne tankt! Aschliessend esches denn a euse Campground ganz i Süde uf Vivienne Bay gange. D Fahrt uf dene sehr holprige Strosse hed sehr vell Gedold ond Närve brucht, do mer jedes mol Angst gha hed, de Camper brecht zäme. Heil acho semmer denn au scho vo eusem "huuseigete" Koala empfange worde wo diräkt vor eus ufem Baum gsässe esch. Emmer weder es Highlight so eine ide frei Natur dörfe zerläbe! Bimene guete Täller Pasta esch en ereignisriiche Tag z Änd gange. Am negste Morge semmer weder früeh uf ond send zerst uf Seal Bay gfahere. Dete hed mer ufemene Boardwalk d Möglechkeit gha Seelöwene diräkt am Strand zbeobachte. Do mer praktisch die Einzige gseh send, hemmer au ordentlech Platz för Fotis zmache gha. Aschliessend esches wiiter i Wildlife Park gange - primär om de grossi Wonsch vode Yasmin ändlech es knuffigs Wombat zhebe zerfölle. Wie sehr Freud sie gha hed, dröcked d Bilder glaubs zemmli guet us. Jedoch hed sech de Bsuech au so glohnt ond mier hend no paar anderi exotischi Tier gseh so mer uf eusere Reis nonig attoffe hend - u.a es Albino Kängeru.

    De Räst vom Tag hemmer denn in Pennington Bay verbrocht, mol ned am Beach sondern i eusem Camper diräkt med Meersicht. Pönktlech am halbi 8ti am Obe esches denn bimene tolle Sonneondergang med de Fähri zrogggange.

    Alles in allem hed sech de Usflog uf Kangaroo Island trotz vellne verbrönnte Abschnitt uf de Insle glich sehr glohnt ond mer send froh, hemmer s Programm dörezoge. Trotzdem hättet mer eus natürlech chle me Kängerus erhofft wobi mier ja medem Koala förstlech entschädiget worde send. Eusi Reis god etzt wiiter rechtig Great Ocean Road abe wo mier denn die negschte 3 Nächt rechtig Melbourne fahre wärded.    Read more

    Traveler

    Fabio zersch frogsch denn schono mech bevor du Ehre en Atrag machsch. 🤵👰? 👴

    3/3/20Reply
    Traveler

    Ah esch das nonig bereits klar? 🙄😜

    3/4/20Reply
     
  • Exploring Australia
    Day 43

    Flugchaos Pur!

    February 8, 2020 in Australia ⋅ ⛅ 34 °C

    Dommerwiis hemmer no euse Sack med de Dräckswösch vo eusere Outback-Tour im Bus enne vergässe. Zom Glöck hends de aber ufd Siite do ond mer hend en chönne vorem Flog uf Adelaide weder abhole.

    Erliechtered ond relaxed hemmer eus a Floghafe in Alice Springs gmacht wo euse Flog gmäss eusere Kenntnis ond au Buechig am 09.50 starte hätt selle. De Fabio hed sech no am Obe vorhäne gwondered, wieso mer ned hed chönne Online ichecke. Nichts ahnend semmer denn gnueg früeh acho. De Taxichauffeur hed no glached, mer seged secher die Erste ond Einzige om die Ziit...bi dem chline Floghafe gäbs ja eh nüd zmache.
    Mer hend eus wiiter nüd debi dänkt ond send denn au tatsächlech die Erste ond Einzige vor Ort gseh. Als Ersts hemmer denn mol "euse Flog" uf de Abflogtafle gsuecht...vo dem aber wiit ond breit nüd zfende gseh esch. Schock Pur! Hemmer was falsch bueched? Semmer am falsche Floghafe? What the hell?!
    Eusi Buechig ond s Bestätigonsmails hed aber tatsächlech gstomme, a eus esches also nes gläge. Do alli Schalter no gar ned offe gha hend, hed eus vor Ort mol gar niemmer chönne hälfe. I einere Panik hemmer mol de Floggsellschaft aglüte wo noch 10min Warteschlange en verpennti Stimm doch no abgnoh hed. Die hed eusi Buechig noch X Versüech aber gar ned gfonde, mer seled eus a Abieter wände wo mer de Flog bueches hend. Na toll! Weder noch X Minute i de Warteschlange hed mer eus denn gseid, dass de Flog cancled worde esch ond mer eus das letscht Johr no via Mail mitteilt hed. Das Mail werd wohl im Spam-Ordner glanded si ond ergendwenn automatisch useglöscht. För en Röckerstattig ond en neue Flog seled mer eus doch diräkr vor Ort med de Floggsellschaft luege. Au en anderi Lösig med andere Airlines hed mer eus ned welle wiiterhälfe. De absoluti Supergau! So rechtig ufgschmisse ond veraescht hemmer eus gfühlt.

    Mer hend eus denn im Internet chorz schlaugmacht ond hend denn gseh, dases 2h spöter en Maschine uf Adelaide wörd gäh. Zom Glöck heds no Platz gha ond mer hend zwoi Tickets chönne bueche. Phuu, das esch en Erliechterig gseh! Hemmer eig scho dänkt es ged gar kei Flog me ond mer chönd erst am negste Tag flüge, semmer froh gseh, heds doch no klapped. Eusi Närve send aber ordentlech strapaziert worde. Vorallem hättet mer au alles müsse omorganisiere medem Camper, Fähri uf Kangaroo Island etc. Dennoch hed mer mol weder gseh wie ufgschmisse mer eig. esch med so Sache ond nüd gross mache chan.

    Jäno, es esch ja etzt glich no alles guet gange ond mier chönd eusi Reis im neue Camper fortfahre! :-)    Read more

    Traveler

    wir hatten auch einmal so ein Drama nach den Karibik Ferien und niemand fühlte sich zuständig dann hat Gregi alles selbst organisiert zum Glück habt ihr es überstanden phuuu

    2/9/20Reply
     
  • Exploring Australia
    Day 40

    Outback Safari Red Centre

    February 5, 2020 in Australia ⋅ ⛅ 31 °C
    1

    HELLO AGAIN - we are back in the Civilization! 😁

    Vom DI 4.2.20- FR 6.2.20 simmer z'mitzt im Outback inne gsi. Am 3:00 Uhr Morge vom Hotel losgange & am 5:15 de Flug nach Sydney gha ( 3h) & denn nomol 3h nach Ayers Rock. Det hemmer no 2h Ufenthalt gha, bis mer abgholt worde sind. Euse Tagesrocksack hemmer scho clever packt gha mit de wechtigste Sache, för die nöchste 3 Nächt im Outback. Zum grosse Gepäck hed mer nämmli nor jewils am Obig Zuegang gha & es wär müehsam worde das emmer weder mösse ufmache & ompacke 😂 Noch dem eus de 1. Camping zeigt worde esch & mer eusi Leintüecher & Kössiazög entgägegnoh hend, eschs denn scho losgange i Uluru Nationalpark. De risig Red Rock us Sandstei z mitzt ide Wüesti esch werkli es speziells Phänomen. Sehr vell hemmer öber die Aboriginals erfahre wie sie det früehner gläbt hend. Leider hed mer denn doch ned ganz alles gschichtliche verstande uf englisch, söscht wärs vermuetlich no vell spannender gsi. Am Obig hemmer denn de schöni Sonneuntergang mit paar Snacks & Champagner chönne bestune. Jedoch hemmer abartig Honger gha, bis uf Snacks im Flugi hemmer nämmli no nüt rechtigs i Mage becho. Sälbst am Flughafe heds nüt gä zom chaufe! Drom hemmer denn bim z Nacht rechtig zuegschlage - Penne mit Hackfleisch ond Gmües. Chorz nach dem d Yasmin sech Gedanke zom Gschmack vom Fleisch gmacht hed, esch s Gheimnis glöftet worde dases Känguru esch 😣 Nachher semmer denn no uf das riise Solarlichtfeld, wo en Könstler erstellt hed. En lange Tag esch z Änd gange & mer send todmüed gsi. Zom pfuse hed mer chönne wähle ob mer im heisse Zält imene Klapperbett - oder im ne super coole Swag (Schlofsack ond Mätteli i Eim) unterem freie Stärnehimmel. Mir hend eus för s zweite entschiede & es esch de Hammer gsi , jedoch aber au rächt chalt, för das mer am Tag 35°C gha hend😍

    Die nöchste Täg esch au emmer zwösche 4.30 & 5.30 Tagwach gsi- also nüt met usschlofe! Sobald d Sonne ufgange esch, wärs sowiso sauheiss worde, vo dem här halb so tragisch. Euse Guide "Duffmann" esch mega lostig gsi, hed es riese Wösse gha und hed au die lange Autofahrte zwösched einzelne Stopps chli erträglicher gmacht. De Morge-Walk im Kings Canyon med dene riese Felswänd ond dere onglaubleche Ussicht esch eis vo eusne Highlights gsi. Zom Glöck semmer bereits früeh los, denn send die 3.5h wandere i dere Hitz einigermasse erträglech gseh. Au die coole Waterholes hend ehre Charme, wo mer zwösched de Felse inne go bade chan. De ganzi Tag hemmer emmer es Netz öberem Chopf gha, wie er uf de Bilder gsähnd, denn die Flügeplag esch ned zum ushalte gsi. Somit eschs au bim Ässe mängisch chli grüselig gsi om die Viecher ome & au d Hygiene im Camp esch en chline Minusponkt gsi. 20 Täller hemmer mösse ide glich Soppe enne abwäsche - ohni Vorspüele & au s Bsteck hed schwarzi Finger hinterloh 🤔 Leider hend vo 15 Teilnähmer au alli en anderi Tour gha & jede Tag esch Groppe chliner worde, so dass mer am Tag 4 nor no 3 Nase gsi send 😂 Deför hemmer chönne mache was mer hend welle, sälber es Füür gmacht am Obig ond eusi Näster verusegnoh zom pfuse 😂

    Im Grosse & Ganze heds eus aber mega gfalle & es esch en cooli Erfahrig gsi. Mer send noch 3 Nächt im Busch froh gseh, hemmer 1 Nacht in Alice Springs weder mol imene komfortable Hotel dörfe schlofe.
    Nun stoht am 8.2 schoweder de nöchsti Flug ah nach Adelaide wo mer denn au euse Camper wärded öbernäh. ✈    Read more

    Traveler

    Heds ke chrabelndi tier gha?

    2/8/20Reply
    Traveler

    Zom Glöck ned, deför öppe 2 Millione Flüge 😅🙈

    2/8/20Reply
    Traveler

    Mein Lieblingsbild. Würdi grad als Poster ide Stube ufhänke.😍

    3/3/20Reply
     
  • Exploring Australia
    Day 38

    Letzter Stopp Cairns

    February 3, 2020 in Australia ⋅ ☀️ 32 °C

    ...mer mälded eus doch no chorz medemene letschte Footprint us Cairns bevor, mer denn ändgöltig is Outback verschwindet - so au chle als schöne Abschloss vode Ostköste.

    Noch dem mer de Wäg usem Jungle gfonde hend, hemmer euse Camper ohni Problem in Cairns chönne bide Mietstation abgäh - okey bis ufd Parkbuesse, die wärded eus öppe eifach vode Kreditkarte belastet.

    Komisch noch so vellne Täg im Camper oder im Schiff weder imene Hotel izchecke. Do mer no so vell wie möglech vom Tag hend welle ha in Cairns, semmer denn au scho rechtig Zentrum inegloffe. S Wätter esch för einisch mol weder bombastico gseh ond mer hend eus nochere schnelle Abschüehlig gsehnt. Dos in Cairns leider kei rechtige Beach zom bade ged, bietets ade Strandpromenade en super Pool als Alternative wo deno GRATIS esch!

    Mer hend eus gfreut, weder mol so rechtig Sonne ztanke ond send doch einigi Stond verwiiled. Nochhäne semmer denn no chle dör d Strosse go schlendere ond hend s einte oder andere no gshopped. Am Obe hemmer bem Nightmarket en riese Uswahl a Ässensständ gha, de Fabio hed sech osserdem no en Fuessmassage gönnt ond onder de Argusauge vode Yasmin en neue Hoorschnitt verpasst becho. Bem heilaufe is Hotel hemmer denn no ordentlech Onderhaltig vode X Tuusige Floghönd ide Bäum bote becho.

    Wör säge mer hend i dem halbe Tag Cairns trotz chorzer Ziit en guete Öberblick becho. En cooli, peppigi Stadt wo veles zbiete hed. Mer send definitiv froh hemmer eus das no chle chönne inezieh.

    Etzt gets en chorzi Nacht ond scho bald gots los im Outback! Bis gli!    Read more

     
  • Exploring Australia
    Day 36

    Daintree Rainforest & Cape Tribulation

    February 1, 2020 in Australia ⋅ ⛅ 30 °C
    12

    Nochere wiitere verrägnete Nacht esches denn am negste Morge zode Wasserfäll gange. Mer hed medem Auto sone Rondgang chönne fahre ond alli vo dene 10 verschednige Wasserfäll besechtige. S Wätter hätt zwar zom Glöck guet medgmacht ond mer send jeweils au fast die Einzige vor Ort gseh, aber so werkli spektakulär send die etzt au ned gseh wie mer eus das erhofft hend. So hemmer nochem Zwoite beschlosse, dass mer eusi Reis diräkt i Rägewald wiitermöched.

    Guet 2h oberhalb vo Cairns hed eim denn en chlini Auto-Fähri i 5min diräkt i Daintree öberebrocht. Wow, chum acho hed mer sech werkli wie ine andere Wält gfühlt. S Klima esch bi fast 100% Loftfüechtigkeit sehr tropisch ond erdröckend gseh. Wo mer no hüfig a graue Fälder oder abebrönnte Wälder verbigfahre send, hed mer done wiit ond breit nor Grüen gseh - wie im tüüfste Jungle enne - NATUR-PUR. Gflasht vo dere idröckleche Omgäbig esches zo eusem Campground, ebeso zmitzt drinne gange. Osser med no 2 andere Campers semmer done praktisch elleige med de Tier ond de Natur gseh.

    Leider heds denn gäge Obe zue weder afo seiche. Doch s Feeling med Räge im Rägewald esch demn doch no ergendwie geil gseh. Kaputt ond med vellne neue Idröck semmer denn aber schnell igschlofe.
    Am negste Morge esches denn ufne Flossfahrt gange wo mer ghofft hend Krokodil zgseh. Einisch me heds so heftig afo rägne, dass mer osser emene chline Kroki nüd vor d Linse becho hend. Osserdem segs ide Sommer-Ziit sehr schwär Krokodil zgseh, wölls dene eh zheiss esch ond sie mehrheitlech onder Wasser, als a Land send. Trotzdem, wenigstens eis Grosses Ding wär uffregend gseh.
    De Räst vom Tag hemmer no gnötzt om de Nationalpark wiiter zerkonde. Es ged velli härzigi Boardwalks zmitzt döre Rägewald döre. Eine defo hed eim zom Cape Tribulation gfüehrt, vo dete hed mer en tolli Ussecht ufe Ponkt wo de Rägewald ufs Great Barrier Reef trifft. Mer hend eus das aber ehrlichsgeid chli interessanter vorgstellt...me so chli en Touriattraktion.

    Uf de Röckfahrt zo eusem Camping hemmer no en Zwöschestopp för en chorzi Abfröschig bimene Swimming Hole igleid. En tolle Spot wo mer zmitzt im Wald innere Rägequelle hed chönne bade. Ond chorz vor de Akonft esch eus doch glatt no en Cassowarie (so en lostige, farbige Struss) öber d Stross gsecklet.

    Am letschte Tag esches no ufne halbtägigi Schnorchel-Tour im Great Barrier Reef gange. Nochere actionriiche Fahrt medem Speedboot semmer bereits i 25min im Reef dosse gseh. Je 1h a 2 verschednige Spots send ufem Programm gstande. S absolute Highlight send die riese Meeresschildkröt gseh wo diräkt näbe dier medgschwomme send. Sie hend öberhaupt kei Angst gha womet mer super Fotis hends chönne mache. Trotz allem, hemmer eus d Koralleme doch es bezzeli farbefroher vorgstellt. Hättet mer die Schildkröt ned gseh, währed mer doch glaubs scho chle enttüscht zroggange. Aber mer send uf jedefall froh hemmer die Tour gmacht, wöll wer weiss wie langs das bekannte Great Barrier Reef öberhaupt werd gäh?!

    Am Obe esches denn as packe gange. Denn morn gämmer noch 28 Täg ond rond 4000 gfahreni Kilometer d Ostköste deruf euse Camper in Cairns zrogg. Onglaublech wie schnell die Ziit etzt glich döre esch. Gäge Schloss esches scho chle hektisch worde med de Ziit. Mer send entweder am Auto fahre, am ichaufe, choche, ässe oder am die negste Täg plane gseh. Glaube ei oder zwoi Woche me ond mer hättets chle gmüetlecher chönne agoh.
    Nichts destos trotz hemmer i dere Ziit so vell tolli Sache erläbt wo eus no lang lang werd in Erennerig blibe.

    Mer gniessed etzt no die letschti Nacht, bevors denn morn ide Nacht medem Flog noch Ayers Rock wiitergod. Dete erwartet eus denn en 4 tägigi Tour zmitzt im Outback, wo bestemmt weder sehr abentüürrich werd. Wenns nor scho mol chle weniger Räge ond me Sonne ged, semmer scho mol happy.

    Gmäss Infos seged mer dete werkli abseits wo jeglecher Zivilisation - es chan also si, dass mer au kei Internet hend ond leider au kei Zwöschebricht chönd döregäh. Hoffe er chönd d Ziit glich chle döreschloh. Omso me chönder euch ja denn also uf en usfüehrlechere Review noch de Tour freue. :-)

    Bis bald!    Read more

    Traveler

    Keini Krokodil ome🐊

    2/3/20Reply
    Traveler

    Wonderschöne Krebs😍

    2/3/20Reply
    Traveler

    De gseht obedöre us wie ne Hamburger🤪

    2/3/20Reply
     
  • Exploring Australia
    Day 35

    Magnetic Island

    January 31, 2020 in Australia ⋅ 🌧 25 °C
    1
    1111

    Am 15.00 simmer vo Airlie Beach abgfahre. 3h hemmer gha bis zum Townsville Parking, wo mer denn am 17.30 scho weder uf de Fähri gsi send nach Magnetic Island. 🤣 Euse Tagesrucksack hemmer also nor chorz knapp chönne ompacke 🙈 2'107 Iwohner hed die Insle & es Fahrt en Bus det droff, dä hed eus direkt i üses Hostel gfahre. S' Base Camp esch mega bekannt, vorallem för d Backpackers. Somit send au Prise för s Ässe det fast scho es Schnäppli gsi för eus 😊 Mir hend es härzigs Höttli gha för 1 Nacht, mit eigenem Bad & Meersicht. Am Obig esch denn en riise Party gsi, met Speli & früehner oder spöter send alli stockbsoffe gsii 🍻

    Am 7.00 esch aber för eus bereits Tagwach gsi & euses Näst hemmer schoweder döffe abzieh & uschecke 🕖 Nach dem mer s Gepäck deponiert hend bim Fähreterminal & rund weder 1h uf die nöchst Busverbendig gwartet hend- hemmer euse Fortswalk ändlich chönne starte. Es hed gheisse dä sig sehr öberloffe & bekannt. Bis uf 2-3 Nase, simmer aber alleige gsi 😅 Keis Wonder denn es hed au weder abegrägnet wie us Chöble !! 320 Sonne Täg gets uf Magnetic Island im Jahr, vo dem hemmer natürlich nüt z gspüre becho🌧 Öppe 2h ade Küste semmer gloffe, mit schöne Ussichtspönkt & zwei schnüseligi Koalas hemmer chönne gse 😍 De ganz Tag hemmer no anderi Wäge bezwonge, eus verloffe & send nach 5h wandere todkabutt & pflotschnass gse. Luut Handy hemmer 30'000 Schritt gmacht a dem Tag 😵 Nachhere chorze Vepflegig simmer denn in Arcadia no die zockersüesse Rock-Wallabies go aluege & hend sie chönne füettere. 2ii hend sogar no Babys im Bütel inne gha 😍😍 Spöter simmer denn zrugg mit de Fähri,hend euse Camper abgholt & nomal 3h Autogfahre rechtig Atherton Tablelands. Pfused hämmer gratis ufere Raststätte- demit mir am Morge grad hend chönne ufbräche zu de Wasserfäll.    Read more

    See translation
    Traveler

    🤩🤩

    2/1/20Reply
    Traveler

    mega schön

    2/1/20Reply
    Traveler

    wunderbar

    2/1/20Reply
    2 more comments
     

Join us:

FindPenguins for iOSFindPenguins for Android

  • 2023© FindPenguins
  • Home
  • About Us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English