Arrivederci Elba e benvenuti a casa 🥰

Guugguug i meld mi nomol zum Abschluss vu dene Ferie uf Elba 😇
Underem Strich hemmer viel Höchs und Tüfs gha und sWetter hets üs würkli au nöd eifach gmacht, aber mier hends gschafft zum als Team us jedere schwierige Phase wieder useko und so doch sBeste vu dene Ferie mitneh ☺️ Elba isch trotz em Wetter e wunderschöni Insle und i ka absolut vestoh dass de Papa da als sis zweite Dihei aluegt ❤️
Ier froged eu etz aber sicher wa mier di letschte Täg no so gmacht hend 😇
Will sWetter immer durchzoge gsi isch hemmer ufs Bade vezichtet und hend stattdesse am Sunntig nomol en Usflug uf Capoliveri gmacht ☺️ es isch meega gmüetlich gsi und mier hend i de bottega delle meraviglie sogar no mega cooli Spielsache vö mi kauft 🤩 i freu mi etz scho druf zum die Teste 🥰 Nocheme feine zNacht simmer denn wieder zrugg in Camping und i bi ufem Weg ipfuuset ☺️
Am Mentig hemmer denn de Tag gnutzt zum zemmerumme, will mier am Tsistig de Heiweg atrete hend. Es isch üs trotz wechselhaftem Wetter glunge, zum alles troche ilade, so dass mier dehei nüt me mönd useneh zum tröchne 🥳 All da hend sMami und de Papi aber nu gschafft, will dLana und de Quirin, zwei neui Fründe vu mier, so guet uf mi ufpasst hend 🥰 Danke eu ❤️
Am Tsistig Morge hets denn wie akündigt richtig krass gstürmt...zum Glück hemmer vö die letschte Handgriff gad e Fenster ohni grosse Rege vewütscht, so dass mier pünktlich hend könne losfahre zum Hafe 😇
Döt ako isch denn leider e bösi Überraschig uf üs zuecho, dFähre sind nöd gfahre...me sind denn an Schalter go froge wies usgseht..dAntwort isch gsi dass mer üs nöd könn sege öb und vor allem wenn di nögst Fähre fahrt, also hets vö üs gheisse warte und Zit überbrücke 🫣 Bim warte hend mier denn doch tatsächlich no Bekannti us Thal troffe, da het de Tag denn doch no einigermasse kurzwilig gmacht ☺️
Wo mier denn so geg di 3, natürlich noch mehrmoligem vorherigem Erkunde, zuefällig zrugg an Hafe abekömmed, bemerked mier plötzlich dass öppis passier...und tatsächlich sie hend agfange die erst Fähre belade....und mier hend mit Glück denn sogar no eine vu de letschte Plätz uf dem Schiff ergatteret 🤩
Am 16:30 simmer denn losgfahre und nochere doch au ziemlich schauklige Stund simmer zfriede und voller Tatedrang in Piombino ako ☺️ Vu döt a hets üs nurno heiwärts zoge ☺️
De Papa isch mega guet gfahre und mier sind super vorwärts ko, will aber de San Bernadino-Tunnel zue gsi isch, hemmer döt vorem Portal no eimol möde pfuse und sind denn am Mittwoch geg de Mittag dehei gsi ☺️
De Nommitag hemmer denn gnutzt zum alles verrume und natürlich scho die erst Wösch mache, bevor mier denn am Obed alli müed und zfriede go pfuuse sind 🥰
Hüt hemmer denn zum Abschluss vu dene Ferie no en Usflug is Appezellerbad in Heide gmacht. Es isch eifach nu wunderschö gsi ❤️
Ier gsehnd alles i allem sind au da superschöni Ferie gsi wo jetzt leider zEnd gönd.
I bi gspannt öbs da vör das Johr gsie isch oder nöd, und wünsch eu bis zum nögste Mol, alles Gueti 🥰
Euen Nevio 😘Les mer