Tauchen in Taganga

Di ganzi Zit in Taganga isch sehr streng gsi für mich. Mis Ziel isch klar gsi: I han wölle de Open Water Course bestoh.✅Mit dere weltwite Lizenz chani überall bis zu 18m tauche. De Stijn het d Basiclizenz scho gmacht gha. So het er den di nägst grösser gmacht.

Grundsätzlich isch de Rhytmus für die 3 Täg immer glich gsi: (18.-20.10.2021) ➿
06:35 ufstoh, 10 min Meditiere, 07:00 zmorge im Hostel, 07:30 Tauchkurs bis 15:00, Zmittag esse, fürs Brevet lerne, 15min Duolingo Spanisch lerne, 23:00 pfuse. I bi würkli jede Tag komplett gschluchet gsi, aber es isch hammer s Tauche!🎉🎁🌈

Aber au do hani e paar Storys zum vazelle. Womer acho sind am Sunntig obig, isch s Hostel überbuechet gsi. So het üs d Hostelcheffin abote ufde Couch z schlofe for free. Da hemer den au gmacht. 😝Am drü ide Nacht segi den auno ufgwacht und ha am Stijn gseit i 15min sötter parat si... I ha nix devo gwüsst am nächste morge und er findets im Nochhinein au lustiger als ide Nacht haha. Isch halt e unbequemi und unruigi Nacht gsi. Vilicht hani zuvor chli z vil Tauchvideos glueget (obligatorischi. Über die sind naher d Frogene gsi im Abschlusstest).🙈

D Cheffin vom Hostel Divanga isch au absolut Lobenswert gsi. Si isch e Mami gsi us Frankrich, wo alles gmacht het, dasmer üs wohl gfühlt hend. Allgemein sind vil Lüt im Hostel gsi, wo alli zfride mitm Service gsi sind. Au ihres selber gmachte Esse isch spizze gsi! Chicken Thai Curry! 🤩
Lustiger wis isch s Hotel gfüllt gsi mit Schwizer: 1ni us Soloturn, es Päärli us Fribourg und eine us Basel. Bis doane hani fäge 2/3 Schwizer i ganz Kolumbie gse, und do plötzli sovil haha.🇨🇭

Jetzt no zum wichtigste Teil vo dem Foodprint: s Tauche!🧜🏼‍♂️🐬🐙🐡🐠
Mer hend Glück im Unglück gha. De Tyrona Nationalpark isch leider gnau i üsere Zit döte gschlosse worde für 20 Täg, wel d Uriwohner e Ritual döt dürefüehred. Eigentli mueni sege, dassis mega cool find, dases respektiert werdet. Leider isch chli schad, dass mer ned ie hend chöne, wels ase schön sött si. (Quelle: Pascal Berger) Aber gnau am erste Tauchtag isches no offe gsi. So hemmer di erste 2 Tauchgäng glich chöne im Tyronapark mache. Es isch mega mega mega schön.🌸🏵️💮🌺💐

Und wie de einti Tauchlehrer gseit het: Unterwasser hesch eifoh 45min für dich. Jede haltet sini klappe und gnüssts s Naturspektakel. Leider hani ned chöne Fötele. Aber wie d Lizzy (Cheffin vode Tauchschuel Oceanlovers, sehr empfehlenswert!) gseit het: Soöpis muemer ned Fötele. Wamer do unter Wasser gset, chamer uf Fotene gar ned beschribe. Jede Tauchgang isch anderst und die Moment lebet i dim Kopf witer. Für mi s grösste Highligt bis jetzt!🥰🎉🤟🏼Read more