Reset search
Mittelamerika
  • Lord Globi

Mittelamerika

Meine erste Reise Read more
FollowInsightsCalendarShareShareBucket list
Newest first
  • Lord GlobiMittelamerikaTraveler

    Chillerlebe Valladolid

    September 22, 2021 in Mexico ⋅ 🌧 24 °C

    Wie gseit hemer üs z Virte (mit de beide Belgier) e AirBNB gönnt. E eiges Huus mit Pool.
    Eigentli hemer plant gha chli go Party mache ide Stadt. Wels aber chli gschiffet hät, hemer entschide dehai z Chille. Es het echt brutal gschiffet u d wels ide Innestädt kei Kanalsystem hend, versickerets s Wasser halt sehr langsam...ja was d Folge sind gset mer uf de Bilder😂😂

    Wa machet 4 Manne en ganze obig lang?
    Richtig, esse. 😂🥞🍔🍟🍕🧀🥪🌮🥑🍑🍨
    Am erste obig simmer 5h ide Chuchi gstande. Mit 5 Röstisgäng, 2 Nachogäng und als Desser Pfirsich us de Büxe hemmer üs völlig überfresse. Aber i mues scho säge au wenns am Köbi sine Röstis med anechömed, si sind scho sauguet gsi!

    Zweite Tag isch gnau glich gsi. Zersch richtig Geili Nachos, Rösti, spezielli Bruscettas, Pancakes, vil Glace für mii (😍🍨) und Küechli sind au ali nurno am Ligge gsi😂

    Eigentli hemer plant gha mit em erste Ikauf für beidi Täg gnueg z ha. Wel mer aber so vil gesse hend hets 2 Rechnige ge:
    1300 Pesos + 900 Pesos = 2200 Pesos
    Also umgrechnet (:20) sinds 110 CHF gsi😂🤑    Read more

    See translation
  • Lord GlobiMittelamerikaTraveler

    Party Playa del Carmen

    September 24, 2021 in Mexico ⋅ ☁️ 24 °C

    Playa del Carmen isch würkli s amerikanische Mekka für Partyferie. Die Stadt isch glich wie Tulum ufbaue nur türer&krässer. Für s Bier zahlt mer so 85 Pesos (:20=4 CHF). Partys sind aber de hammer! So isch öpe de Ablauf gsi:
    18:00 znachtesse
    20:00 erdt Club biser schlüsst
    01:00 ersti Clubs schlüsset und mer got in nächste. Bi dene zahlt mer meistens so 200-500 Pesos.
    03:00 jetzt gönd au di nächste zue und ali gönd witer.
    D Afterparty isch unterschiedlich. Am Donnstig hends bis am 4ri offd gha, am Fritig wärs bis am 7ni gange. Polizei isch aber cho und het si ufglöst.👮🏽‍♂️ Je länger d Partys gönd desto me Techno wird gspilt. 🎉
    Mer sind amel froh, wemer den am 7bni im Bett liget und pfuse chönd.
    12:00 startet scho wieder Dayraveparty vom Hostel wo i voller Lutstärki Techno pumpt😂
    Ei Wuchenend langet für mi do föhrig. Vil z tüür do!🤑

    Wamer speziell mues druf achte sind Polizistene. Am obig chömeds eifoh grundlos öpis go sueche und mugget dir so s Geld. Mer hends au eimol 1000 USD wölle weli an Strosserand anepisst söt ha, obwohl is nöd gsi bin... Han zum Glück nur 400 Pesos debi gha. Leider ned wie ide Schwiz: Freund und Helfer👮🏽‍♂️

    Aber Viva Mexico🇲🇽    Read more

    See translation
  • Lord GlobiMittelamerikaTraveler

    One day Cozumel

    September 26, 2021 in Mexico ⋅ ⛅ 29 °C

    Ein Nacht siner nach Cozumel wege de Belgier. Wer aumol in Playa del Carmen isch, dem würis ned empfehle. Völlig übertürt, touristisch, nix zum gse. Zum tauche segs nice, git aber besseri und billigeri Plätz.
    D Fähre isch au witus di türsti gsi bis jetzt & au vil z gross. Bim zruckwäg hemer 2.5 anstat 1 h brucht. Das isch aber wel gad en Ironman döte gsi isch.🔥🚴🏽‍♂️🏊🏽‍♂️🏃🏼‍♀️
    Eis Restaurant chani döt empfehle. Italienisches Resti vomene Tessiner gführt. 🇨🇭

    Leider isch es au de letzi Obig für mini berüchtigte Schue gsi...😪👟
    Nach Cozumel hemer no ei Nacht in Playa del Carmen bevors nach Medellin, Columbia gat.
    🎉🔥🎉🔥🎉🔥

    Leider verlohnt mich hüt au de Claude.
    Besti Reisefüehrer für Europa&Mittelamerika.
    - TripAdvisor 10/10 ✅    Read more

    See translation
  • Lord GlobiMittelamerikaTraveler

    Flug nach Medellin

    September 28, 2021 in Mexico ⋅ ⛅ 27 °C

    De Weg nach Kolumbie het gstartet!
    Mer sind am Vorobig no schüch in Usgang und wies echt het möse cho, het no en scheiss möse passiere bevor d Gruppe usenand got. De Matteo (de Belgier wo hei got) het s Handy verlore im Klub. Besser gseit d Agstellte hends em nüme wölle ge. Playa del Carmen isch böses Mafiosiviertel - leider chamer nödemol zude Polizei go, wel die Zemeschaffet.😕

    Wie au immer bini den mitem Stjin nach 4 h schlof am morge am 6i uf de weg gange. De Transit het erstunlich guet funktioniert. 🔥
    Zmittag simmer wieder in Subway😂 isch s prisgünstigste am Flughafe gsi.

    Eigentlich wür en Flug vo Cancun (Mexiko) nach Medellin (Kolumbie) nur 1.5 h go. Wel mer aber in Mexiko-City hend möse umstige simmer erst am 23:30 glanded. (inkl. Zitverschiebig). Zudem Flügi den no noch Brüssel immene Monet. 😜 Aber das au nur welt e Flugticket bruchsch zum Ireise. Wie vo vilne empfohle hemer üs aber nur e Faketicket kauft für 12 Euro, wos nahaer automatisch wieder stornieret. 👌 Sind ebe schono schlaui Füx🐿️(ha kei bessere Fux😜)

    I will aber no AeroMexiko lobe. Sind zei super Flüg gsi, prislich guet & het sogar gratis WiFi im Flugzüg!😅 D Sässel sind au di beste gsi bis jetzt. Meega vil Beifreiheit!    Read more

    See translation
  • Lord GlobiMittelamerikaTraveler

    Erste Eindrücke Medellin

    September 29, 2021 in Colombia ⋅ ⛅ 21 °C

    Zmitzt ide Nacht simmer acho. Als Schnäpplijäger hani natürli s zweit billigste Hostel gno. Leider isches voll im Getto gsi & gad womer acho sind, hets 3 komischi Gstalte gha wo ihri vereiterete Bei zeiget hend... 🤮Nachere unbequeme aber romantische Nacht mitm Stjino imene Doppelbett bini frührend am 07:30 ufgwacht. Glicher Meining hemer churzentschlosse e neus Hostel im touristische Teil buecht.
    Nachher simer döte nochli durch d Stadt am Morge umegloffe. Mer hend mega Glück gha wel mer en mega geile Beck gfunde hend, wo für 5000 Pesos 5 Bagels und 2 Kaffis ergatteret hend. Umgrechnet 1.70 CHF. 😁
    Znacht chamer i dem Viertel ned umelaufe. Da hend di Iheimische, de Taxifahrer und di andere Reisende gseit.

    S nächste Hostel isch viil besser gsi. 😁🎉    Read more

    See translation
  • Lord GlobiMittelamerikaTraveler

    Medellin Tag 2

    September 29, 2021 in Colombia ⋅ 🌧 15 °C

    Acho im Hostel Los Patrios hemer gad im Zimmer üsi erst Kollegin troffe. Izzy vo London, chli strange aber suoer eifachi Zimmernochburin. S Hostel het en super Rooftop und zmitzt im Zentrum vode Touriste. Allgemein isches eine vode beste Hostels do in Medellin. Zwor isches mega tür im Verhältnis, für Schwizer aber immerno billig haha.

    De Nomi hani den gnutzt zum chli Telefoniere und zum erfahre was wichtig isch ide Schwiz.😉Nochdem mer üsi Kleider gholt hend ide Laundry (Wäscherei) hemmer üs Argentinisch gönnt. Isch das geil gsi!

    Nachher hets Beerpong-Tunier agfange. Leider simer gad am Afang usekeit drum simer naher as Pubcrawling. I ha no nie so hössliche Alk gha wie döte! Billige Sambucca und so. Am zwei am morge hemer aber kei Lust me gha und sind ham go Pfüsele. Es het am Obig eimol me gschiffet.
    😴    Read more

    See translation
  • Lord GlobiMittelamerikaTraveler

    Medellin Tag 3

    September 30, 2021 in Colombia ⋅ 🌧 15 °C

    De Tag het früeh für mi Agfange. Bim Beerpong hani versproche dasi au am Hoteleigene Joga mitmach. Di andere jend ned usemöge, drum bini elei döt ane. I ha Muskle brucht woni gar ned gwüsst han, dasi die han... Aber isch e geili Erfahrig gsi.

    Aschlüssend simer go Zmorge Postet und hend fein gspise. Zopf, Nutella, Honig, exotischi Frücht, Fleischufschnitt und Müesli (mit Passionsfucht😍). Pitaya: kennt öpert die Frucht? Mer seit dere au Durchfallsfrucht. Wemer me als 1/3 devo esst, isch mer nach 10 min ufem WC. De Tip hemer vode Roberta becho. So untypisch e Awältin, wo i Hostels umereist und vo Malta chunt. Mer sind mit ere chli is Gspröch cho und hend den e Tagestour mut ere düregführt.

    Für öpe 2 CHF simmer am 14:00 öpe uf de Zug öpe 15 min i Richtig Santo Domingo. Im Ticket sind zwei Gobdelbahne inbegriffe, wo über d Stadt führt. Wiemer aber bemerkt hend simer di einzige Touris gsi. Die Bahne isch also au gratis ÖV für di Iheimische. Womer obe acho sind, isch mer zersch chli murmlig gsi. Es hend üs ali aglueget. 😅 Mer hend üs aber ned beidrucke lo und sind spontan obedra im Viertel vode Iheimische Arbeiter go erkundige. 🛤️🚡

    Medellin isch riesig und WUNDERSCHÖN!

    Womer e Stäge zmitztdrin uegloffe sind, het üs e alts Omeli abegwunke. Obwohl. Er nix verstande hend, hemer fründlich chli probiert z schnöre und churzerhand isch au ihres Grosschind (i üsem alter) uecho. Gad direkt het si üs offeriert, üsi Wasserfläschene ufzfülle, wamer aber us Höfflichkeit abglenmhnt hend. Sicher e Stund lang simer a sebem schöne Ussichtspunkt gsi. Si het vazellt, dass sit de Pandemie kei Touris me döt uecho sind und ere dementsprechend langwilig isch. Mer hend beidi iglade zum Glace esse. De Bryan (fast Ryan) het üs zersch aber no schöni Ussichtspünkt zeige vo döt obe. Si isch den de chürzer und bequemeri Weg abecho. Mit 80gi isch si trotzdem mega zwäg gsi! Anstatt e Glace simer aber ine Kaffi ieghoget und hend Käffelet, Chueche und Brot gesse... Für 5 Kaffis, 3 Desserts und 3 ganzi Bröter hani 25'000 Pesos zahlt, inkl. Trinkgeld. Da sind öpe 6 Fr. 😅😅
    Wamer z vil gha hend, hend 3 Obdachlosi herzlich entgegegno. Zum Abschluss het si agfange brüelle vor Freud und gseit da seg eine vode Schönste Täg i ihrem Lebe. Mer seget gsannti Gottes. 🌻🌼Do gset mer wieder wie stark d Gsellschaft do gläubisch isch.
    Aber mit de Nona isch e unvergesslichs und wunderschöns Erlebnis gsi. Es zeigt wieder mit wie wenig mer glücklich cha si.

    Am obig simmer den an Hosteleigene Sambatanzkurs gange. 💃🕺Innerhalb vo 2 Stunde hemer so chli d Basics gha. S schwirigste für mich isch immer die Pausene gsi. I tanze ja gern Discofox, döt het mer immer: Rück, Platz, 1 und 2, 3 und 4.
    Im Samba het mer immer 2 Pausene: 1,2,3 Pause, 5, 6, 7, Pause. Es isch aber mega läss zum chli usprobiere und i will au no pasr Privatlektione mache do. Mol luege obs Zit zueloht. Sarah dörfsch di schomol vorbereite.😘🎉😂
    Aschlüssend wür no Tanznight gsi, womer wie im Pubcrawl i 3 Clubs got mit Tanzmusik. Wel mer aber gseit hend lieber chillige Obig, simer dasmol ned in Usgang.
    Mer mönd fit si für de nächsti Tag... 😉🕊️

    Het no me Fotene im 2. Teil    Read more

    See translation
  • Lord GlobiMittelamerikaTraveler

    Medellin Tag 4

    October 1, 2021 in Colombia ⋅ ☁️ 19 °C

    De Fritig isch speziell für mi gsi. Wie immer bini früehner ufgstande als di andere und han nochem Morgesport de Zmorge für alli grichtet. Plant wär gsi uf di 08:30 go Gleitschirmflüge (Paragliding)! 🕊️
    De Flug het pro Person 180'000 Pesos kostet (also 45 CHF). Wels am Morge aber ned s beste Wetter gha het, simer 1.5 Stunde spöter ue. Leider hani mis T-Shirt vergesse gha und ha drum chli möse frühre. Gfloge selber simmer aber nur 15min vodem her hani de harti Schwizer möse zeige, wo as chalte Wetter gwöhnt isch. De Stjino het d Go-Pro gmietet, sodass mer chli Föteli us de Luft het. S geilte und glichzitig unagnemste Gfühl isch immer denn gsi, wenns di so richtig in Sitz iedruckt het. Leider het min Guide aber kein Salto wölle mache haha.😛

    Am nomi hemmers den chli gmüetlicher gno. Es isch sozege d Vorbereitig für de Fritigobig gsi. Zersch hemmer üs no en Coiffeur gönnd und es feins Glace (Mochi Mochi). 🍡Mer sind vollgas in Usgang. Zersch simer e stündli im Hosteleigene Rooftop obe gsi zum vorglüehe. Naher simmer den aber inen Technoschuppe gange. Anders Level...🎉🎉🎉Aber meeega geil gsi. Han so richtig mini Shufflekünst chöne zeige und au es Duell gegen Amerikaner gmacht. am 04:30 simmer den no ad Afterparty gange go witertanze. Für mi hets eigentli scho vorher glanget, isch aber trotzdem no glatt gsi. Schlussendli bini nudelfertig am sibni am Morge im Bett gläge.😴    Read more

    See translation
  • Lord GlobiMittelamerikaTraveler

    Medellin Tag 5

    October 2, 2021 in Colombia ⋅ 🌧 20 °C

    Nach 4 Stunde schlof bini den verwachet und hani chli de Kontakt id Schwiz pflägt. Dehai sind alli wieder im Usgang ahah. Nacheme gmüetliche Zmorge hemer d Planig für di nägste Täg gmacht. Es git einem relativ vil Sicherheit wemmer en Leitfade het, aber trotzdem völlig Flexibel isch.

    Am Nomi hani und de Stjin no e halbstündigi Massage gönnt für 65'000 Pesos. ( 16 CHF). Laggo mio die het druckt wie si mer Pickel het wölle usdrucke. Die Erholigsphase isch aber ganz wichtig gsi, weli immerno schwäri Bei vom Vorobet gha han.🎉

    De Obig hemer gstartet miteme superbekannte Restaurant: Mamasita.🥑
    nachem Znacht simmer zruck is Hostel. Döt isch en Tanzevent am Laufe gsi und vo ganz Medellin sind Profis cho. Es het huere krass usgse. Mer hend au e bizeli tanzt, hend üs aber wie Affene nebet dene gfühlt.💃🕺🏼

    Aschlüssend simmer naher id Stadt go witertanze. Durch di Iheimische wo an Tanzevent cho sind, hemer chöne mit dene id Stadt ine. Mer sind di einzige Usländer gsi und es isch e bösi huere Party döte gsi. Uf Empfehlig vom Loris hemer den son hässliche Rum drunke, womer mit Is und Wasser verdünnt hend. 🥃Aber isch eigentli gad guet gsi, han fast nix drunke gha vom Rum. Öpe am drü simer vode Viesta heicho. Mer mönd fit si für de Gameday!⚽    Read more

    See translation
  • Lord GlobiMittelamerikaTraveler

    Medellin Tag 6

    October 3, 2021 in Colombia ⋅ ⛅ 25 °C

    Hüt hemer nedesovil gmacht. Chli gschloffe, informiert für di nächste Reisedestinatione und chli chillt. Am Nomi 14:00 hemmer üs uf de Weg gmacht zude Metrostation. Ich han im erste Hostel vo Medellin leider mini Fläsche vergesse gha, han aber mitm Mitarbeiter d Nummere duscht und drum chöne irichte daser si mer bringt geg di halb 3... jaa d Pünklichkeit isch ned d Stärki vode Latinamerikaner. Geg di 4ri sinds den öpe acho. Wel mer an Match wölle hend, hani die Chance gad gnützt und gseit öbs d Fläsche as Hostel chönd bringe, defür zahli ene 25'000 Pesos (6 CHF). Natürli hends agno und mer hend endli an Fuessballmatch chöne go.🍶

     Bevor mer aber is Stadion sind, hemer no guet gässe. Da isch de besti Salotteller gsi, woni je becho han. En Brotteig wo warm gsi isch und inedra hohl, gfüllt mit grüenem Salot. D Sauce isch e warmi Gmües- und Früchtemix gsi! Het genial usgse und no besser gschmeckt. Han defür aber au 32'000 Pesos zahl (8 CHF). Mit dem chönt e Famili go Zmittag esse do. Dezue hemer üs au e Fläsche Rotwii gönt, wel de Stjin ase gern Wii het. 🍷

    Mit vollem Mage simmer den an Fuessballmatch gange. ⚽⚽Gad nebet de Fankurve hani, de Sjino, d Izzy und de Bryan (Iheimische) s Fuessballspektakel chöne gnüse. Mer sind natürli für Independiente Medellín gsi (wel de Bryan da ufd Brust tatowiert het). Nice to know: s grösst Derby isch Medellin gege National (grüe Wiis).🎉🎃🧨🎇 Drum het mer immer wieder ghört "puutaa vertte". Schlussendli hends den au ide 93. Minute no s 1:0 gschosse. Nachem Match het üs den de Bryan no uf 2 Bierli iglade. 🍻Super spannend gsi und natürli hanni auno es Adenke kauft. S Libli hani extra im M gno.

     Naher simmer no uf en Schlummertrunk d Cindy go bsueche. Ganz am Afang vom Trip in Leon, Nicaragua isch si d Mitarbeiterin vom Hostel gsi. Jetzt isch si miteme Kolleg und ihrem Brüeder am umereise gsi. Vo ihrere Vergangeheit hani aber nix gwüsst gha, da het si üs am Obig vazellt und het üs umghaue. Si wär mehrmols fast ums Lebe cho wege Überdosis a Droge. I ihrere Chindheit isch si ade Quelle vo Belgie ufgwachse und drum zvil gno und zwenig überleit. Nur dank ihrem Brüeder lebt si no, het si gseit. Het mi mega zum Nachdenke agregt.
    Sänd & Päsc bin froh dasi eu han!😘🙌🏼    Read more

    See translation
  • Lord GlobiMittelamerikaTraveler

    Medellin Tag 7

    October 4, 2021 in Colombia ⋅ ⛅ 20 °C

    Hüt hemmer am 09:00 d Commun-13-Tour gmacht. Ich han mi riesig druf gfreut. Da isch langi Zit di gfährlichst Gegend uf dere Welt gsi.⚔️🏹💊 Vili Bandene wo sich bechriegt hend und vili Mensche (drunder au unschuldigi Fraue und Kinder) ums Lebe cho sind. Nach mehrere gwaltsame Protest gege s Militär, hend si sich endli chöne akzeptiere und hend us dem Distrikt (en Stadtteil vo Medellin) e meeega geili Gegend gmacht. Kunst& Kultur do isch prägt vo farbefrohe und tüfgründige Graffitis. 🎭Jedes einzelne vo dene vazellt e eigeni Gschicht. Zuedem isch Hiphop und Breakdance au en Teil vo dere Szene. Würkli en Bsuech wert.
    Schad isch nur dasmer nedeso en guete Guide gha hend. Er isch do ned ufgwachse het aber e perfekts Englsich gha. Sis Fachwüsse isch leider unbefridigend gsi für üsi Frogene. Zudem heter gmeint das de Pablo Escobar (Drogebaron wo z Medellin de Hauptsitz gha het) kei Macht über de Distrikt gha het... Zwar schwer vorstellbar, aber evtl. chamer das mol bimene andere Zitpunkt anderi Locals froge. 🤔

    Am Nomi simer den nomel zruck uf Santo Domingo (de Ort mit de Oma) zum si go bsueche. Si het e choge Freud gha und si het üs uf en Tinto iglade (schwarze Kaffi mit zvil Zucker). 😝S Hus isch typisch für d Kolumbianer: schlicht, paar Familibilder, 3-4 Gläser, Tisch, Stüehl und e huere grossi Musikalag! I weiss nöd wiso aber i wär scho lang Taub mit däre Lutstärki... 💢Mer sind naher no durch d Städli zum chli go Pöstele. Natürli dörf au mis obligatorische Glace nöd fähle, aber wie chamer nur Chäääs ines super feins und grosses Glace inetue. 😰Obwohl i quälend probiert han alles ufzässe, hani en Teil vom Glace stoh lo. Da heisst öpis... Am obig simmer nomel in Usgang mit de Locals. Paar gemütlichi Bierli zische isch s Ziel gsi. und 2 sind biz me worde und sind den no in Klub s letzte Mol go tanze mit ene. Han paar neui Dancemoves glernt vom Kevin. Döt ine hemer au s türste Bier gfunde vo Medellin: 20'000 Pesos (5 CHF) pro Bier!🙈    Read more

    See translation
  • Lord GlobiMittelamerikaTraveler

    Reise nach Guatape

    October 5, 2021 in Colombia ⋅ ⛅ 21 °C

    am 08:00 bini wieder uf de Bei gsi und han d Kleider us de Laundry gholt und aschlüssend go zmorge poste. Wel de Stjin und d Izzy nedeso fit gsi gsind hemer im Zimmer ine zmörgelet und i ha dezue packt. Bin wieder sehr effizient gsi haha. Nachem Zmorge hemer üs den vode Izzy verabschide, di lustig Lesbe us London. 🙆🏻

    Mer hend möse es Uber ne um zum Busterminal Nord z cho. Döte hemer au en DunkinDonut Stand gse. Für 3 Franke hetsch döt 12 Donuts chöne chaufe. Mer sind aber chli im Stress gsi. Womer den de richtig Schalter gfunde hend, hemer 3 min gha zum Ticket löse und zum richtige Bus sekle🏃🏼‍♂️. Mer sind zwor pünktlich im Bus ine gsi, de Bus het aber 10 min verspötig gha. Insgesamt isch de Wäg 2 Stunde gange und mer hend denkt, dass mer chli pfüsele chönd im Bus ine. Nach öpe 10 min Busfahrt sind aber zwei komischi Vögel igstige und die sind nebet üs aneghoget.

    Zum Glück! 🔥Sind zwei super Type gsi: de Marc, 22, Student, us Barcelona und de Tim, 23, Plättlilegger, us Nesslau. Mit ene simer den au go Zmittagesse und ha öpis neus ganz wichtigs glernt uf minere Reis: el menu del diaz (Tagesmenue). Für 12'000 Pesos (3 CHF) hemer Supe, Hauptgang und es Getränk gha.🤩🤩 Ab jetzt machi das immer so haha.🤩🤩 Nachdem mer d Bags im Hostel abglade hend, simmer s Städli go besichtige Guatape isch unter anderem bekannt für sin farbefrohe Charakter. 🌈Au Wandverzierige wo 3D sind, also usestönd, gset mer mega vil. 🔥

    Nachem verdiente Käffeli simmer go zNacht poste. Mer hend im Hostel selber kochet. Eigentli hemer möglichst vegetarische Wraps mache. Gmüess hemer mega vil gha und isch au fein gsi. Leider het üs de Metzger aber anstatt 250g Hackfleisch 850g ge.😂 Wiemer mi kennt hemmer auno Glace als Dessert kauft. Für 3 CHF hemer üs 1.3kg MacadamiaCaramel- und Cookiesglace gönnt. 😍So chamer entspannt go pfüsele.    Read more

    See translation
  • Lord GlobiMittelamerikaTraveler

    La Piedra del Penol

    October 6, 2021 in Colombia ⋅ ☁️ 17 °C

    Am Mittwoch morge simer de grossi Ussichtspunkt go aluege in Guatape. Wege dem isch das Städtli so bekannt. Itrit isch 20'000 Pesos gsi. Mer sind z Fuess döt ane gloffe. 1 Stund ane, 600 Stufene ue, und s gliche wieder heiwägs. Ufem Wäg döt ane hemer au über es Brüggli möse, wo nüme stabil isch wie au scho. Ide Schwiz wär die nüme tauglich gsi... 😅Mol en sportliche Tag. De Rest vom Tag stot im nächste Footprint drin.😉Read more

    See translation
  • Lord GlobiMittelamerikaTraveler

    Reise nach Salento

    October 6, 2021 in Colombia ⋅ ☁️ 19 °C

    Eigentli hemer wölle am 06:00 uhstoh und go jogge. Wel aber ali tüüf und fest pfuset hend, is biz spöter worde. Zum Zmorge hets de Rest vo Gester ge und Müesli mit Milchpulver und Wasser. Da mömer au umbedingt kaufe. ‼️Dönt huere grusig s Milchpulver, isch aber gschmacklich no oke und haltbar. Also super zum umereise.

    Naher simmer zude Hauptatraktion vo dem) Dorf cho. Für de hets en eigene Footprint.

    Zruck im Hostel isches schlag uf schlag gange. Sache Packe Witeri Iträg do schribe und scho is witer gange

    . Ufem Weg zude Busstation hani no was speziells gse. Die hend d Stützene an Bode anegschweisst. ide Schwiz nimt mer immer Schrubene und Dübel weld Montage schneller got und dementsprechend s Material billiger isch als d Arbeitskraft. Do isches gad umbekehrt. 🔄

    Acho ade Bushaltestell hemer d Izzy nomel troffe. Riese Zuefall si het en Tagesttipp do ane gmacht und so simmer zeme zruck uf Medellin gfahre. 🚌I ha aber grössteteils Wieder Haus des Geldes glueget. Nach 2 Stund simer au döte anecho. Leider aber im Nordterminal. So hemmer no möse mitm Uber abe. Zum Glück hani de Stjino chöne überrede 20 min früehner z go. Wel am Schluss hemer nurno 10min spazzig gha...🍀Vo döte us hemer den en supergmüetliche Nachtbus gha wo 8 h lang düregfahre isch.    Read more

    See translation
  • Lord GlobiMittelamerikaTraveler

    Valle de Cocora

    October 7, 2021 in Colombia ⋅ ⛅ 16 °C

    Mit em Nachtbus simmer am 06:00 in Salento acho. Mer sind is Coffetree Boutique Hostel. Mer hend Kleider gwächslet, Zmorge gesse, Informiert und mit 1 Stund schlof (im Nachbus) simmer direkt witer zum Valle de Cocora (Palmental). 🌴🏃🏼‍♂️

    Am 08:00 simer abgloffe und 09:30 öpe abgloffe wel mer chli hend möse warte und mitme Jeep döt angefahre worde sind. De ganzi Tag hemer mit 2 Päärli verbrocht. Eis isch us de USA cho und scho öpe 7 Jahr verhürotet. Beidi sind Ärtzt gsi und sind aber scho vil umegreisst. S andere Päärli isch vo Israel gsi (wie chönts au anderst si) und het sozege "Honeymoon-Reis" in Südamerika. Immer wieder hends Witzlis gmacht das eigentli d Sarah bi mer sött si, anstatt de Stjin... Sarah dir hets do sicher au gfalle. 🙂😘

    Bim Afang hetsch chöne meine, dass z Appezell bisch, eifoh nur mit Palmene. Da isch do aber au s spezielle. Die Palmene sind di grösste vode Welt und nirgends anders gits söttigi Palmene. Sie sind Wachspalmene und sind normalerwis 30-50 Meter höch. Si chönd aber bis zu 70 Meter hoch werde. 🌴

    Zmittag hemer dobe im Berg verbrocht. Zmittag isch aber eigentlich en falsche Begriff. 🤨Für 5000 Pesos hemer 4 Crackers übercho und dezue e Vanilletee (oder so öpis ändlichs). Zum Glück hend di andere chli Snacks debi gha und so hemmer üse Hunger glich e bizli chöne stille. Es het e chlini und e grossi Wanderig gha. Mer hend di gross gno und sind drum so geg di 17:00 dune acho. Aschlüssend simmer direkt mit dene is Restaurant gange und mit e Paar Bierlis isch Zit im Flug düregange. 🍻

    21:30 simer den todmüed im Hostel acho. Nachem Dusche, Zähputze simmer direkt ipfuset. Mer hend huere Glück gha, dasmer di einzige im 8er Dorm gsi sind und drum ohni Problem hend chöne au am Obig no go dusche. Isch au Zit worde nach 2 Täg...😅    Read more

    See translation
  • Lord GlobiMittelamerikaTraveler

    Coffee Tasting

    October 8, 2021 in Colombia ⋅ ⛅ 20 °C

    Usgschlofe sind mer am 08:00 ufgstande und alles agfange Packe. Nachem Zmorge und Check-Out hemer s nächste Hostel buechet und drum Zit bizli vergesse. Wel mer knapp dra gsi sind hemer üs anstatt 1.5 Stunde laufe en Jeep gönnt zude Kaffi-Plantage. ☕

    Kaffifarm het Buenos Aires gheisse, aber ned wege de Stadt in Argentinie, sondern wels au sovil luftet wie döte. D Tour hemer mit em amerianische Päärli gmacht. Es isch e super spannendi Füehrlig gsi, woni mega vil ha chöne verbinde mitm Biologieunterricht vode ISME. D Johanna (Biolehrerin) wär stolz uf mi gsi. 💁🏼‍♂️De Kaffi chamer s ganze Jahr düre ernte, aber 2mol im Jahr isch Saison wos mega vil git. Den hends amel biszu 20 Stundelöhner agstellt. Nebet de Saison schaffet nebet em Chef nur ein andere.

    Es git 3 Klassene vo Kaffi. D Premiumklass oder 1. Klass zahlsch bis zu 900 US Dollar für 70 kg vom Kaffi. 2. Klass isch so de Standard. Di 3. Klass isch eig mega schlecht, aber Starbucks (‼️) und so oder de berüemti "Tinto-Kaffi" in Kolumbie verwendet immer die wels so billig sind. 💢Je süesser de Kaffi isch, desto schlechter ischer als Fustregle.💢 Starbucks spart also im Kaffi, süesst em aber umso me.

    Auno en coole Funfact isch das de Kaffi verschiedini Arome animmt, jenochdem was für Pflantzene nebetzue wachset (z.B. Banane, Paprika, Zwible). Die gönd ebe zeme e Symbiose i... Uf de Farm hemer au Ananasgstrücker gse oder Maracujaböm und no viles me. 🍌🍈🥭

    Aschlüssend hemer es Coffee-Tasting gmacht. De Witz debi: mer hend nur 1 Kaffi gratis becho. Di beide andere Sorte hemer extra möse zahle. Isch aber mega cool gsi und ha vil über Kaffi und was dezue ghört glernt!☕    Read more

    See translation
  • Lord GlobiMittelamerikaTraveler

    Reise nach Cali

    October 8, 2021 in Colombia ⋅ 🌧 20 °C

    S amerikanische Päärli het d Kamera im Taxifahrer und drum hends de glich Taxifahrer bstellt zum ad Plantage z bringe. Zu üsem Glück isch de vo Armenie gsi (nöd s Land, sondern e Stadt in Kolumbie). Über die Stadt hend mer au möse umstige zum uf Cali cho. So simer mit em Bis vor d Stadt ane und döte hemmer möse umstige, wel mer e Lizenz brucht zum id Stadt inecho. Anschienend hends sovil Problem gha mit Taxiraub und Überfäll. Au Iheimischi sind devo betroffe gsi. Und ab do isches den nurno Bergab gange...⛰️

    Mer hend en absolut beschissene Bus gha vo Armenie nach Cali. Am 16:00 het di 3 stündig Fahrt sölle starte...De Bus isch e halb Stund z spot abgfahre und het e Stund länger brucht als plant. Zuedem sind d Sitz undbequem und chunsch vorne mit de Knü ah. Wahrschindli het de Tubel vor mer provokativ de Sitz hineabeloh, dass mer d Knü nome weh tönd.🖕🏽 Nach öpe 5 Tritt i sin Rugge heters den nach 2 Stunde aumol begriffe...Zuedem simmer im Stau gsi und grössteteils kei Internet ufem weg gha. Wenni mol Internet gha han hani nur d Snaps vode Kollege becho, wie jede ade OLMA am gnüsse isch und i die absolut s...törend Musik vil z lut erträge mues. 😷He vilicht sind die Kolumbianer scho liebi Cheibe, aber jede zweit mues zwingend en Tinitus ha so wie die Musik loset. Wenigstens chani mich chli vertüfe mitm "Casa del Papel" (Haus des Geldes, Netflixserie). So chani wenigstens mini schmerzende Knü und mini druckend Blase beruhige...🙄

    Acho im Cali hemer direkt en Uber gno und sind i üses Hostel gfahre. Viajero Hostel chani absolut empfehle. Hend vil neui Lüt kenne glernt und sind mit dene aschlüssend go Tanze. Cali isch nebst de villne Überfäll fürs Salsa bekannt. Wenns lerne wilsch, muesch gnau do häre go. Mer sind di einzige gsi wos nöd chöne hend.... Jadu Cali fangt ja guet ah.💁🏼‍♂️    Read more

    See translation
  • Lord GlobiMittelamerikaTraveler

    Cali

    October 9, 2021 in Colombia ⋅ ☁️ 22 °C

    Wiener wüsset isch Cali bekannt fürs Salsa. Da isch au mis grosse Ziel do gsi und drum hemmer z zweite 5 Salsalektione gno (1h + 1.5h für beidi). AM zweite Tag hets au brutal gschiffet. Drum hemer den auno Mr. Bean macht Ferie glueget. Üses Hostel het au en Pool gha. Mer sind döte aber nöd eimol drin gsi. Tanzt hemer Salsa, Batchata und Reggaton. Au Clubs sind druf usgleit. Mer hend nur i eim Club 1 Floor gfunde wos Techno gha het, restlich isch Tanzmusik gsi.💃🏾🕺🏼

    Mer hend do au Mega glatti Lüt kenne glernt. Vili Iheimischi sind im Hostel gsi. Vor allem Calianas (also Frauene vo Cali) sind geg di Obig do anecho zum "itanze". Also eigentli het de Animator halt vil kennt und so iglade. I gschlossner Gruppe isch mer den witer zude Tanzclubs. En anderi Legende woni kenne glernt han isch de Nikolaj us Dänemark. Er het letzt Summer anere Datingshow mitgmacht und mega vil devo vazellt, was würkli no spannend isch. Also ned d Show selber, sondern was für Analysene mit em gmacht hend, Entwickling vode Klicks und Verhaltensanalyse etc... Üse Insider isch gsi: "For the boys!" .🎉🍻🍻🎉

    Bezüglich de Sicherheit simer beidi mega paranoid gsi. Mer hend niemertem wölle traue, ned uf d Strass etc. Mer hend au mega vil Storys vorher und in Cali ghört. 2 Dütschi sind am helle Tag (13:30) uf de Strass überfalle worde, 1 100m nebet üsem Hostel, 1 isch vo 2 Fraue usgno worde, de Nic hends im Club ine de Code gse und de Securitas het enere Bande gholfe zum en usne. Da sind nur einigi vo vilne Storys gsi. Mer sind aber keini devo gsi und hend würkli glück gha, wels Cali somit mega geil gmacht het für mi. Us minere Sicht chamer aber scho viles vornbüge: Nie z vil Geld debi, verschide s Geld versorge, ned zvil Schmuck umelaufe uf de Stross, immer i grossi Gruppe ide Stadt unterwegs und s wichtigste...Immer en Notfallbaze debi han, falls di überfallet.🔫🗡️

    Wie gseit sind mer aber problemlos dürecho. Es isch immer es abwege: Salsa lerne vs. Sicherheit🤷🏼‍♂️

    Am Mentig obig simer aber den mitm Flugi witer nach Cartagena. Vamos ala Playa🏝️    Read more

    See translation
  • Lord GlobiMittelamerikaTraveler

    Cartagena Tag 1

    October 12, 2021 in Colombia ⋅ ⛅ 29 °C

    Üses Hostel Casa del Puerto in Cartagena isch mega schön. Gueti Better, AC im Zimmer, grossi Duschene, Pool, Zmorge inbegriffe (Toast, Pancakes, Omlette, etc...)🎉 Leider sind do nur Familie i dem Hostel und isch usserhalb vom Zentrum.💁🏼‍♂️

    Am erste Morge hemer denkt mer wönd go surfe, wels eifachi Wälle do sött ha. Es het aber gar kei Welle gha und drum hemer beschlosse mer gönd an Strand eifoh go chille. Chille isch aber s falsche Wort, wel andauernd vo Strandverkäufer belästigt wirsch. Würkli die gönd nöd, verstönd kei Nei. Ehrlich gseit hend die mer de ganz Tag versaut gha, weli mich so ufgregt han. Und mer kennts, wenns mol ned lauft, den laufts nöd. Aschlüssend hani es Uber bstellt is Hostel...Leider hani s falsche Hostel usgwählt und den simmer dopplet so lang gfahre mit 2 Ubers...🤐

    Uf e Empfehlig simmer ine Rooftopbar go Znachtesse. Leider isch au de Tipp en Müll gsi. S Resti isch zwar super schön gsi, guets Ambiente, aber leider völlig übertürt und nur als Coctailbar geignet. Zuedem het de Rooftop nedemol offe gha. Mer hend pro Coctail 28'000 Pesos zahlt. (Zum Verglich: mer hend scho für 11'000 gesse). Mi Salot für 20'000 Pesos het us 5 Salotblätter mit chli Füllig bestande. 🤐Schlussendli simer den z Fuess heigloffe und hend üs en Mitternachtssnack imene Supermarkt gönnt.

    De Tag het für mi nur di schlechti Site zeigt vo Cartagena für mich...Ich hoffe das änderet sich no🙃    Read more

    See translation
  • Lord GlobiMittelamerikaTraveler

    Cartagena Tag 2

    October 13, 2021 in Colombia ⋅ 🌧 28 °C

    Wie seit mer so schön neue Tag neues Glück.🍀
    In Cali hemer eine kenneglernt wo üs e Tour in Cartagena empfohle het. "Rosario Inslene" Isch eini vo Paar Inslene rechts vo Cartagena. Mer Mues mitm Boot döt ane und es chan Traumhaft si. Mit de Reisegsellschaft "Global experiences Tour" hemer das gmacht. I seg de Name nur, dass niemert anderst de glichi Fehler macht. ☠️Absoluti Müllgsellschaft. Am liebste heti dene en Chlapf an Grind ge.🖕🏽 Zersch aber begründig:

    0. Petrus hets nödes guet gmeint mit üs. Es het Blitzt, gschiffet udn dunkle Himmel. Wels für da aber nix defür chönd, isch das Punkt 0.
    1. Mer hend kei würklichi Kontaktperson gha. Nach 45min sueche het den am Stjin öpert aglüte, dass üs hetet chöne abhole, jetzt aber scho ide nöchi sind und drum chönd laufe. 🤷🏼‍♂️
    2. Niemert het englisch chöne. I verstohs mer isch i Kolumbie, aber bizeli für e Reisegsellschaft dörf mer scho erwarte.🙁
    2.1 au erklärt isch nur uf Spanisch worde. Mer sind also döte gstande hend ned gwüsst was abgoht, und hend Zitlimite gha zum wieder am Treffpunkt si.
    3. Unfründlich. Eifoh nur schad. Kei Lache, kei Danke, kei Bitte.😓
    4. Mer hend 70'000 Pesos zahlt pro Person. Im Verlauf hemer 2 Gruppe kenneglernt wo englisch chöne hend. Di einte zahlet 60k, 50k und di meiste 35'000 Pesos. D hälfti! Und de wo üs de schrott empfohle het, het gseit er chan nix am Pris mache, mer seget scho am Limit.😠
    5. Mer hend s "Premiumpaket" gha! Leider isch aber kein Unterschied gsi nur e anders Restaurant (mitm Tupfgliche esse). Aber mer sind ja d Gringos, drum dörf mer das ja mache...🤡
    6. Während em Esse chömed die stohdumme Strandverkäufer und wönd dir ihre Schrott atrülle.
    7. Wend am Strand go tauche gosch, gsesch anstatt Fisch nur Plastik und Abfall.🤮
    8. Mer sind döt anegange zum Schnorchle. Du hesch möse entscheide wilsch go schnorchle oder es Meeresmuseum go aluege (Sealife eifoh ohni Platz für Tier). Mer hend natürli s Schnorchle gno. De Stjin het au d Schnorchelusrüstig debi gha. Zum aber go schnorchle go muesch 30'000 Pesos extra zahle...AU WEMER DI EIGE USRÜSTIG MITNIMT! 🤬🤬
    Leider het das de Tag komplett versaut. Mer sind 10 Stunde unterwegs gsi für 45min Schnorchle. D Fisch döte sind farbig und schön gsi das scho, aber es isch en reine Massetourismus gsi. Mer het gse, wie Koralle absterbet. De Guide het sogar gseit wemers alanget veränderet sie sich d Farb...Überall anderst uf de Welt lernt mer, dass Koralle absterbet wemers berührt...
    Absolut entüschet!

    Am Obig hemer den e (Dominos) Pizza gönnt über de kolumbianische Lieferservice "Rappi". Leider hani 3min nach de Bstellig gmerkt, dass de Standort no Cali drin gsi isch und so 20 CHF für nix usge han. 🤦🏼‍♂️Mer chan sich vorstelle, dassi chli Nerve brucht han und nach e paar spanische Minute am Telefon hets üse Receptioinist chöne halbwegst storniere.

    Am Obig hemer üs no mit eme Kolleg vom Stjin sin Götti verabredet für es Bierli und 2 ältere Fraue wo üs am Nomi chli übersetzt het ufem Boot. Mit em hemers glatte gha, d Fraue sind horror gsi. Beidi so 40gi 50gi, Alkoholikerin wiemer naher usegfunde hend und isch do nur ide Ferie zum recht chöne trinke. Wo die Fraue öpis esse wölle hend, sind mer gflüchtet! 🏃🏼‍♂️🏃🏼‍♂️Zum Schluss simer den ine Rooftopbar. Aber welt Prise au döte übertürt gsi sind, hemer es Wässerli und es Sprite trunke. Sportlich wiemer sind, simer z Fuess den hei. Jua weni Cartagena ghör, werdi leider ned warm. Für mich isch sogar Cali witus besser gsi!😓    Read more

    See translation
  • Lord GlobiMittelamerikaTraveler

    Weg nach Barraquilla

    October 14, 2021 in Colombia ⋅ ⛅ 29 °C

    Wel de Stjino usgschlofe het am Morge, hani chli zit für mich gha. Nachem Packe hemer üs aber au uf de Weg gmacht nach Barraquilla. Plant wär gsi das mer in "El Totumo" e Pause machet. Döt hetet mer chöne inen ehemolige Vulkan go es Schlammbad ne. Wel mer aber d Backpackts debi gha hend und schlussendli s Uber über 300'000 Pesos kostet het, hemer beschlosse mitm normale Bus für 70'000 Pesos witer z Reise.😬 Nach 2 Stunde fahrt simer döte au acho. Im Bus hemer e Famili kenneglernt us de USA wo de Vater aber vo do chunt und drum sich uskennt.🇺🇸🎉

    Acho i üsem Hostel hemer d Backpacks abge und sind direkt witer. 30 min später het ebe gad de Match Kolumbie vs. Equador agfange und de Match isch ebe au z Barraquilla ustreit worde. Drum hemer beschlosse, nebet s Stadion de Match go luege.⚽ Döt isch au di ganzi Party gloffe. Für 2000 Pesos (50 Rappe) hemer üs amel d Dosebier nebet em Grossbildschirm gönnt. 🍻Lustigerwis simer do di grösste. Das bedütet mer hend ganz hine chöne stoh und hend nie Problem gha zum alles z gse. Schlussendli hends 0:0 gmacht. Ide 98zigste Minute (ja extrem langi Nachspilzit, het sich aber glohnt) het Kolumbie no en Glückstreffer gmacht. Wel sich ali gfreut hend, hemer 3ne nebet üs no gad s Bier zahlt. Leider isch s Goal aber mit em VAR aberkannt worde...⚽🎊

    Die zwei nebet üs (womer s Bier zahlt hend), hend üs den au igladet zum zu ene heicho und döte go witer fire. Mer hends den au gmacht und es isch en legendäre Obig gsi. Mer hend e Chiste Bier zahlt und mit de ganze Familie hemer döte gfiret. De Alberto het mer döte au no en traditionelle Tanz zeiget. Lustigerwiis het jedi Stadt sin eigene Tanzstil. Salsa ist nicht gleich Salsa!💃🏾🕺🏼    Read more

    See translation
  • Lord GlobiMittelamerikaTraveler

    Barraquilla

    October 15, 2021 in Colombia ⋅ ⛅ 28 °C

    Am nächste Tag hemer mit de Lüt im Hostel chli gredet. Si sind ali chli älter gsi und i seg jetzt mol "speziell". De eint isch en schwarze Ami gsi.🇺🇸👨🏾‍💼 Er het Amerika wiemers kenn guet vertrette, mit de Nase ade Decki. Mer mues aber sege daser e grosses Fachwüsse het, speziell über Mafias, Pablo Escobar, amerikanischi Kultur und weltwiti Kartell. 👮🏽‍♂️🤵🏾🔫De Bsitzer isch us Italie und isch sit 5 Jahre in Kolumbie. Er het es Restaurant gha, bis d italienisch Mafia en Koffer voll Geld für sis Grundstück abote het. Sit döt ischer am reise. Den hets no 3 Venezuelaner gha. Si machet "Ferie" sit 7 Jahre. Mer mues wüsse das Venezuela ned es Vorzeigeland isch und drum vili het wo nüme zruck wönd. So chömeds aber kei Arbeitserlaubnis über und schaffet meistens schwarz.🤷🏼‍♂️

    Für üs aber spannender isch gsi, wos verzellt hend wie de Pablo Escobar s Geld agleit het: in Imobilie. 🏙️Überall ade Küste Kolumnbies stönd ase krassi Hotels wo brutal id höchi baue sind, mega guet usgsend, aber znacht praktisch kei Liecht hend, wels ned bewohnt sind. Da chunt vo em. Bevor mer das gwüsst hend, hani und de Stjino no drüber gwerweislet vowo das chunt und obs echt dreckigs Geld isch. Und genau da isches haha. Verwaltet wirds meistens vo Familieaghörige, Verwandte oder Fründe vom Pablo.👨‍👩‍👧

    Am obig simer den no döte in Usgang go tanze. Womer noch Empfehlige vom Hostel gfroget hend, het d Putzfrau vo döte gseit das ihri Tochter au gad go will und 2 min spöter het si üs mitgno inen relativ coole Klub in Barraquilla. Wamer nöd gwüsst hend, isch das si e professionelli Tänzerin isch. 🤸🏽‍♀️💃🏾Mer hend schön blöd glueget wo si zmol abgange isch wied Führwehr haha. Für üs isches aber mega glatt gsi, wel üs ali gfiret hend, mer si aber erst sitem Obig kennt hend. Am gliche Obig sind üs plötzli au bekannti Gsichter vord Auge cho. D Amis usem Bus! Womer den vereint gsi sind, het üsi Party den erst recht agfange.🎉 Mer sind zwor ned di beste Tänzer gsi im Klub, defür hemer gwüsst wiemer recht Stimmig uf de Tanzflächi macht!
    Salut!😂

    Am nächste Tag hemer den, uf Wunsch vo mer, en Shopping Tag gmacht. Da is grösste Ichaufszenter gsi woni je gse han. 🏙️4 Blöck, jedes einzelne 7 Stöckig, wo jede Stock öpe e Shopping arena gsi isch... Mer hend sozege de ganz Tag brucht für 1 Turm. I han mer im Vorus e Liste gschribe, weli paar sache ligge lo han oder klaut worde isch und so hani öpe 7 Sache wölle poste. Im erste Lade hani 4 Sache kauft und leider isch mer döte au scho s ganze Geld usgange.🤑 Au Kolumbie isch tür wemer sich orginali Kleider chaufe wil (Adidas Tschuttihose 55 CHF). Janu für mis Glace hets glich no glanget.    Read more

    See translation
  • Lord GlobiMittelamerikaTraveler

    Ab nach Santa Marta

    October 16, 2021 in Colombia ⋅ 🌧 28 °C

    De letzti Tag in Barraquilla hemer chilliger gno. Sprich i han de Tag gnutzt zum Sache mache, wo vorher chli untergange isch. Mer sind nöd direkt nach Santa Marta gange, wel de Stjin no en Kolleg kennt het wo in Kolumbie schaffet. Er arbeitet amel so 2 Mönet ufem Schiff und het nur 1 Tag pro Wuche frei. 🚢So hemer zeme beschlosse, dass mer zeme nach Santa Marta gönd. Weler aber am Samstig no gschaffet het, hemer bis am obig möse warte daser chunt.

    Aber nomel zruck bevor er cho isch. I han d Reis nach Brasilie plant, min Rucksack gflickt (für 15'000 Pesos / 4 CHF),hend selber kochet und i het wölle am Nomi chli pfuse... Wie immer isch de Schlof wieder vergesse gange. Woni 19:00 han wölle en Powernap mache isch gad de Matteu cho. 😅Als Vorbereitig fürd Tauchprüefig hani wölle d Videos während em Autofahre luege. De Matteu het aber 2 Kollegine mitgno woner das Weekend kenneglernt het und so isch nix mit Videos luege defür me mit mitenand lache & Disskussione über Venezuela und ihri Politik worde.🤷🏼‍♂️

    S Auto isch üebr sini Bude gmiete gsi und so simmer entspannt im Dunkle 3 Stunde lang durch d Nacht gfahre. Wel en Firtig gsi sich in Kolumbie sind alli Hostel usbeuchet gsi und mer hend nach 4 umbuechige ufem Weg eis gfunde. Viajero Hostel.🙈🙉

    Wels au do so usbuechet gsi isch hemer ali i verschidene Zimmer möse ufteilt werde. I bin elei iteilt im Zimmer gsi. So bini is Zimmer gange, hade Bag verstaut und wer lauft bi mer is Zimmer ine? Yes IZZY!! 🎁🎉haahhah D Kollegin womer scho in Medellin etc immer wieder gse hend. Naher simmer direkt ufs Hosteleigene Rooftop gange und hend agfange fire. Es sind immer me Lüt dezue cho und sind so den witer gange durch d Nacht. Zum Abschluss simmer den no de Promenade entlang torklet. 🤸🏽‍♀️Am nöchste Morge hemmer den nüme dörfe im Hostel verlängere, wel d Wand chli dräkig worde isch, womi de Stjino ueglupft het....😇🙈    Read more

    See translation
  • Lord GlobiMittelamerikaTraveler

    Beachday Santa Marta

    October 17, 2021 in Colombia ⋅ 🌧 27 °C

    Für de Sunntig hemer en Strandtrag planet gha. Well de Matteu nur ein Tag frei gha het, isch er mit de zwei andere Dame den am Obig wieder hei. Do si aber in Barraquilla lebet, hend sie sich relativ guet uskennt und so hemer en mega schöne Strand mit fast nur Locals gha. Zersch simmer in Supermarkt zum chli go Snacks poste und den simmer de ganzi Tag am Strand gsi.🏖️

    Zwischet düre hets au gregnet aber das het nur wenigi vertribe.🌦️ Am Nomi simmer den auno go Jetski fahre, was au mega geil gsi isch. 🎉Mit de zwei Belgier hani den auno de Backflip am Bode glernt. De Matteu het mich abgstosse und so isches nach 3 Versüech relativ guet gange. 🤟🏼17:00 hemer den d Sache packt und sind wider zruck zum Hostel gange.

    Am 6i am Obig hemer den üs verabschidet vode Truppe und ich bin mitm Stjino witer gange nach Taganga: Tauche isch agseit!🧜🏽‍♂️    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice