Reset search
OvernoutOvernout
Satellite

Overnout

Joined August 2019 Message
  • Südafrika 2o2o
    Day12

    Cape Agulhas

     March 11 in South Africa ⋅ ☁️ 27 °C

    Nachdäm mir üse grusig Charre, wo mittlerwile ä ca. 40cm grosse Spaut, vomene Steischlag ir Windschutzschibe hett gha, ds Durban hei abgäh, simer mit Kulula uf Kapstadt gfloge. Dert heimer när no ä hässlechere Schrottcharre namens Datsun Go entgägä gno. Me cha nidemau ds Stürrad versteue und wes chlei fescht luftet dusse, de gsehtme bir zuenige Tür obe use. Die hei äuä bir Dichtig gspart.😂🙈 Müesse vilech bimene nächste Roadtrip mau drüber nachedänke e Charre inere bessere Kategorie ds bueche.😅😝

    Uf jedefau heimr ir Nöchi vom südlechste Punkt vo Afrika übernachtet u dert im 55 Knots Restaurant Znacht gässe. Sehr ds empfähle.😊

    Hie d Südafrika wird phasewis dr Strom abgsteut wüu d Regierig s irgendwie vrgäh hett Gäud für d Wartig vom Stromnetz uf ds Site ds tue, wenis richtig vrstange ha. Wärs interessiert cha süsch mau "load shedding" google. Uf jedefau chame mitem App "EskomSePush" luege a welem Ort zu welere Zit u für wie lang dr Strom abgsteut wird. Gester zum Bispiu ischs am 10i am abe so wit gsi. Aber ds 55 Knots hett e Geni hinger dr Hütte u wägä däm heimr dert witerhin chönne Bier und mega feine Wy us dr Region trinke. 🍺🍷Drzue heimer flissig Butzeret (Jass Spiu namens Butzer. Chame oh google, wemes nid kennt.😝). Im Momänt steits 22 zu 13 für Marco.😒

    Hüt am Morgä simer zum Lüchtturm vom Cape Agulhas gfahre u hei dert parkiert. Äs hett ä mega gmüetleche Wäg, so wine Stäg us Houz, wome druff cha zum südlechste Punkt vo Afrika loufe. Dert träffe sech übrigens oh dr indisch Ozean u dr Atlantik. Mir si när über Stock u Stei no witer bis zum Meisho Maru Shipwreck zum no es paar Poserfotos ga mache. Dr Rückwäg isch fasch e chlei asträngend gsi, wüumer mega Gägäwind hei gha.😅

    Die Nacht verbringe mir ds Wilderness imne airbnb direkt am Strand.😎 U dir so?😝    Read more

    Map
  • Südafrika 2o2o
    Day10

    Hluhluwe - St Lucia - Durban

     March 9 in South Africa ⋅ ⛅ 27 °C

    Am 07.03. isches de ume witer vo Hluhluwe nach St Lucia. Ds Hluhluwe heimer am Morge no churz e Katzepark bsuecht, wo unerwünschti odr gfährdeti Tierli ufzieht u när wieder ir Wildnis ussetzt. Näbem afrikanische Luchs, am Serval (sehr schöns Kätzli 😉) u am Gepard gits dört ou die afrikanischi Wildkatz. Bi dere heimer müesse merke, dass mer ds Bellmund ja ou eine hei (Pablo 😂). Nach es paar Poser-Fotos mit de Geparde simer de witer nach St Lucia.

    In St. Lucia heimer es Luxury Zeltcamp bezoge, womers üs am Pool hei lo guet ga. Nachemne guete ds Nacht ure ufregende Nacht im "Dschungu', isches de witer richtig Durban.
    Unterwägs heimer no es chlises Sightseeing am Ballito Beach gmacht. Da drbi heimer hie ds erste mau ds Meer dörfe gniesse.

    In Durban heimer de es super edels Airbnb ire Villa bezoge u am Abe simer id Stadt ines empählenswerts Steakhouse. Ufem Wäg id Stadt heimer üs es paar Idrück vo Durban chönne mache.
    Schlussändlech heimer de dr Abe mitem "Host Dad" lo usklinge, wo doch sehr lustig u intressant isch gsi!😁🍷🍷    Read more

    See translation
    2
    12
    Map
  • Südafrika 2o2o
    Day8

    Hluhluwe

     March 7 in South Africa ⋅ ☀️ 28 °C

    Wie chönnts oh angers si heimer hüt e Safari gmacht. Chunnt überraschend, i weiss.😝

    Im Gägäsatz zum Kruger NP isches hie vor Landschaft här chlei spannender, drfür chöisech oh d Tier besser verstecke.

    Übrigens heimr hüt am Morge widrmau Seeland Wätter gha. Da hettme sech grad gfüeut wie dahei i däm Näbu inne.

    Drfür hocki iz gd vor üsere Buschhütte mit Strohdach und wirde vodr afrikanische Sunne brätlet. Im Gring nid ganz bache, drfür usse "well done", hett dr Marco vorher gmeint. 😝

    Aso viu schlauers chunnt äuä hüt nümm vo minere Site, lömer gschidr d Fotos la rede. 😉    Read more

    See translation
    +2
    Map
  • Südafrika 2o2o
    Day6

    Swaziland / Eswatini

     March 5 in Swaziland ⋅ ☀️ 31 °C

    Nach de diverse ufregende Safaris im Kruger NP simer am 05.03. losgfahre in Richtig Swaziland. Ou uf dere Strecki heimer wieder super schöni Gägende u Landschafte chönne gniesse.

    Dr Gränzübertritt nach Swaziland isch de ou no ganz interessant verlofe. Nid ganz so eifach wie im Schengerum, jedoch nach paar A- u Abmäudige u je 50 Rand (ca. CHF 3.00) pro Person simer de ou inecho. Jedoch isches no einisch bränzlig worde, da mer beidi dürne Gsundheitscheck hei müesse u i no Fieber ha gha (äuä wägemne Sunnestich😅🙈). Doch ou die Hürde heimer no gmeisteret.

    In Swaziland heimer de im Mlilwane Wildlife Sanctuary im Camp übernachtet. Das isch sicher bis jetzt die Unterkunft gsi, womer am ehste ir wildnis übernachtet hei. Bim Jasse vor üsere Afrikanische Hütte, si üs doch suber u glatt cho d Zebras ud Wildsöi begrüsse.

    Am 06.03. simer de ou scho wieder witer nach Hluhluwe zrug uf Südafrika. Do bini doch tatsächlech vo mine Bruefskollege 🚓🚔 aghaute worde, dai im 60er mit 105 gradaret bi worde. Si hei gmeint es chosti 120 Rand, heissech de aber ou mit 100 (ca. CHF 6.00) ds fride gä😅
    Da bini de schono froh gsi simer nid ir Schwiiz gsi, süsch hätte mer die Reis mitem Zug müesse beände😉    Read more

    See translation
    +2
    Map
  • Südafrika 2o2o
    Day5

    Sunset Safari im Kruger NP

     March 4 in South Africa ⋅ 🌙 19 °C

    So, iz längts de langsam mit üsne Safari Footprints vom Kruger NP.

    Aber e chlini Zuegab muess no drinnlige.
    Hei nämlech vorher grad no hurti schnäu dr Cheeta (Gepard, für die wo im Änglisch nid so starch si😝) gseh. Dä Cheib isch gd gmüetlech am znächtle gsi, hettsech abr nätterwis hurti chönne überwinde, chlei ds posiere fürnes Foto.😊

    När simer witer und hei - aus wärs ganz normau - ä Wild dog gseh wo grad e chli am strite isch gsi mitere Hyäne.

    Dr Guide hett üs am Afang no gseit, dr Cheeta und dr Wild dog uf eire Tour odr überhoupt ds gseh isch mega säute wüus vo dene nume ca. es paar 100 git im Park. Ds tönt iz nach viu aber weme überleit dass d Flächi vom Kruger Nationau Park öppe glich gross isch wie Israel (hett ömu dr Guide gseit), de heimr gloub schono chlei Glück gha.😅

    Uf jede Fau söttme binere Sunset Safari druf luege dassme nid vore odr hinge im Egge e Sitz schnappet. Ha nämlech müesse Liechtfrou spile und miteme Schinwärfer (wo grusigi Viecher azieht, wie Fauter u so, woni ja soooo fest gärn ha) dr Busch belüchte und STOPP rüefe weni es Tier ha gseh.

    Bim Elefant wome när no ufm Foto im Ahang gseht hani no STOPP grüeft, abr när heimr nach 3 Stung im Safari Fahrzüg so dringend dr Tank (wie de Guide so schön seit für d Blase) müesse lääre, dassmer richtig froh si gsi we niemer hett gmerkt dassmer nümm STOPP hei grüeft für jedes Chüngeli.🙈 Wär weiss, vilech heis ja die angere oh nümm so ufregend gfunge mit dr Zit.😝

    Nach dene länge Safari Täg heimr üs übrigens, wisechs ghört, no Wiud gönnt. Konkret heisst das mir hei es Kudu Filet gha und äs isch soooo zart gsi dassi nimau ha gmerkt dassi ds Ankä- statt Steakmässer zum schnide ha brucht.😍😅    Read more

    See translation
    Map
  • Südafrika 2o2o
    Day5

    Morning Bush Walk im Kruger NP

     March 4 in South Africa ⋅ ⛅ 25 °C

    Am 3.30 simer ufgstange, i Kruger Nationaupark gfahre und ä Morgespaziergang ga mache.

    Ir Dämmerig heimr de no hurti schnäu es paar Hyäne und ä Leopard gseh. 😊🐆 Für üs es mega Highlight wüume schins muess Glück ha dassme eim begägnet.

    När hetts gheisse usstige, fertig gliiret und ir 1er-Reihe dä 2 bewaffnete Rangers nacheloufe.

    Mir si nidemau 1 Minute vom Safari-Fahrzüg wäg gsi u scho heimer die ersti agspannti Begägnig mitemne Elefantemami inkl. Babyelefant gha. Si hett d Ohre gsteut u mitem Rüssu gfuchtlet. Mir hei üs nümm bewegt bis d Rangers ds Zeiche zum Rückzug hei gäh.
    Dene 2 Elefante simer definitiv ds nöch cho.😅

    Mit chlei meh Abstang simer när no anere ganze Gruppe Elefante vrbi und hei oh süsch no es paar Begägnige gha mit däm graue Riiisetier.🐘

    Ds Gnu und Impala heimer oh no gseh aber die hei scho gluegt, dassmer ihne nid ds Nöch chöme.

    Ufm wäg düre Busch heimr när no dr Gagu vo es paar Nashörner studiert und oh Fuessabdrück vo ihne gfunge. Dr Ranger hett gmeint äs düetet aus drufhärä, dass sie hie nöime si. Aber gseh heimer se leidr nid.

    Uf dr Rückfahrt heimr när no 2 Giraffe am schleglä und es paar Büffle gseh.🦒🐃

    Bim Bush Walk gsehtme zwar viu weniger Tier, aus weme uf somene Safari-Fahrzüg hocket, drfür isches mega äs spezieus Erläbnis ds Fuess ungerwägs ds si.
    Die Rueh und die verschidene Pflanze wo zum Teil mega fein schmöcke und när luegsch ume und gsehsch 100 Meter witer äne ä Elefant am Grüenzüg schnouse; ds Gfüeu zwüsche Spannig und Entspannig muessme säubr erläbä, zums verstah.🥰😊    Read more

    See translation
    1
    Map
  • Südafrika 2o2o
    Day4

    Kruger National Park

     March 3 in South Africa ⋅ ⛅ 27 °C

    Nachere länge Fahrt vo Johannesburg zu üsere Lodge am Rand vom Kruger NP heimer nachem ichecke direkt vom Pooldeck us äs paar Hippos bim bade chönne beobachte. Ds isch für üs ds Highlight vom Tag gsi wüumer üs wägem Wätter gester hei gfüeut wie im Seeland - Räge & dichte Näbu. 😝

    Hüt am morge am 5.30 simer los, uf Safari. Mir hei ds ganze Safari Outo für üs gha. Ds macht ds ganze natüerlech sehr entspannt. Me muess nid glichzitig no ufe Verchehr luege und hett trotzdem sini Rueh vor angerne Touris.😊

    Üsi Highlights bis iz si 2 Löie, wo Jagd mache uf Impalas, ä Hyäne und 2 Giraffe in Love. Aber natüerlech ischs jedemau weme widr es Tier entdeckt äs mega Erläbnis.🤩    Read more

    2+2
    Map
  • Südafrika 2o2o
    Day2

    Johannesburg

     March 1 in South Africa ⋅ ☁️ 18 °C

    Township Tour: Ja odr Nei?

    Mir chöi d Velotour vom Lebo's Soweto Backpackers empfähle.
    Äs wird eim nüt ufgschwätzt und oh nüt vorgspiut. Was üs sichr blibt, isch dass hie Arm und Rich Tür a Tür wohne.
    Leidr heimr die ganz krasse Orte nid chönne fötele aber me chasechs öppe genau so vorsteue wie sones Township imne Fium.

    Trotz auem, hei üs die meiste fründlech empfange und wöue Highfive mache.
    Bim Backpackers hetts e Party vode Iheimische gha wo mir abr guet oh hei chönne si. Natüerlech ischs nid überau so. Am einte Ort isch d Stimmig scho rächt agspannt gsi und dert hätte mir sichr oh nid uf eigeti Fuscht härächönne.    Read more

    2
    Map
Never miss updates of Overnout with our app:

FindPenguins for iOS FindPenguins for Android

  • 2020© FindPenguins
  • Home
  • About Us
  • Blog
  • Press
  • Terms
  • Privacy Policy & Cookies
  • Support
  • Imprint
  • English