Joined August 2019 Message
  • Day3

    Alp Oberfeld - Engelberg

    July 18 in Switzerland ⋅ ☀️ 23 °C

    Wie vermuetet hetts es früechs Erwache gäh. Ir Nacht isches Arschchaut gsi und vo däm här ischs umso schöner gsi am Morge ändlech d Sunne widrmau ds gseh.

    Mir si grad so ufgwachet dassmer dr Sunnäufgang hei chönne luege und ds Wouchemeer vo unger üs isch gsi hei chönne gniesse.

    Zum Zmorge hetts säubrmgachts Yoghurt, Chäs, Miuch u Gonfi gäh. Und me hett ändlech mau widr chönne dussä ässe. Ds hett guet ta nach dene Rägätage...

    Bevor mir los si, hett üs d Rita, d Aupwirtin no Chäs mitgäh womer speter ir Brunnihütte si ga abgäh. Normalerwis müesse si vor Brunnihütte geng ds Fuess cho dr Chäs hole, vo däm här heisi natüerlech dämentsprächend freud gha womer dr Chäs bi ihne hei abgäh.

    Vor Aup Oberfäud us isches aus erschts zimlech Steil dr Bärg ufe gange. Dr Sepp hett zum Abschied nomau Auphorn gspiut und so heimr währendem Ufstieg dank em Echo vo aune Site musilalischi Begleitig gha. Obä acho ischs überne Kretä gange. D Tanja hett ihri Höheangst überwunde und tapfer NID abegluegt.🥳 D Ussicht vo dert Obä isch dr Wahnsinn gsi.

    Nach chlei meh aus ere Stung simer am Walegghüttli vrbi cho. Dr Sepp hett üs scho gseit dassmr dert söue ichehre wüu dert si Kolleg wirtet wo oh Sepp heisst. Wie chönnts oh angers si!?😉

    Dert heimr üs dr 11i Schuss gönnt und mit 5 Type für einisch mau nid Frantic, sondern Hosä abä gspiut. (Isch es Chartespiu😉)

    D Zit isch wie immer bim Gügälä sehr schbäu vrbi gange und drum heimr när mau dr Ufstieg zur Brunnihütte i Agriff gno. Ds Wätter hett widr uf bewöukt u näblig umgschlage abr wenigstens hetts mau nid grägnet.

    Obä acho heimer äs paar Rundine Frantic gspiut und oh da isch d Zit widr sehr schnöu düre gange.

    Drum heimr beschlosse für ds letschte Stück uf Ängubärg ds Sässeli und ds Gondeli ds näh.😊

    Ds Ängubärg acho, heimr ir Skilodge icheckt und üs vode Sache befreit wo nachere Mischig zwüsche Geiss und Schweiss hei gschmöckt und si im Garte vor Lodge ids Apero.

    D Skilodge isch ächt ds empfähle und oh d Drinks si mega fein gsi. Im Winter heisi sogar no Sauna und Hot Pot.🤩

    Aus Abschluss simer im Yucatan ga ässe und ir Gletscherspautä eine ga näh. Womer zrügg zur Lodge si cho, heimer gmerkt dassme nume mitemne Code inechunnt. Dä heimer üs natüerlech nid gmerkt gha.🙈
    Zum Glück si i däm Momänt grad 2 Type usecho und so heimr nomau Glück gha und nid müesse dussä schlafä.😅😂

    Ende gut, alles gut. 😊
    Read more

  • Explore, what other travelers do in:
  • Day2

    Dallenwil - Alp Oberfeld

    July 17 in Switzerland ⋅ ⛅ 6 °C

    Nach emne Gault Millau Zmorge simer mitm Zug uf Oberrickenbach. Vo dert us simer mitm Buirebähnli uf Brändlen.

    Vo dert us isches de oh grad gäbig ds Loch uf zunere mega schöne Füürsteu wome äuä ä mega Ussicht häät, weme de oh mau öppis würd gsi. Abr oh hüt heimr Rägä und dichte Näbu gha.

    Ungrwägs uf Oberrickebach heimr äs paar Chüeh troffe wosech fasch nümm hei chönne erhole vor Freud dassi üs hei gseh.😂 Vilech heisi oh usemne angere Grund Gmuhet. Wär weiss das scho.😉

    Vo Oberrickebach us heimr ds Buirebähnli gno uf Spis, wo üs ä mega nätte Buur hett empfange. Nachem zahle u es paar Fotos, wo är vo üs hett gmacht simer mitem eutischtä und coolstä Bähnli bis uf Sinsgäu.

    Vo dert us simer bis zum Horror Chloster (Bärgrestaurant Urner Staffel) gwanderet. Äs hett iz zwar nümm grägnet aber wäge de Bäch wo dr Wäg ab cho si und em Matsch si d Füess göich Pflotschnass worde.

    Im Bärgrestaurant Horror Chloster heimr mega fein gässe und d Wirtin hett üs sogar grad no die ganzi Beiz la hüete wüu si schnäu zur nächste Gondelstation öppis hett müesse ga hole. Bi däm Wätter si aber keni Gescht cho, vo dämhär heimr üse Fride gha.

    Gstercht simer witer zu üsere Übernachtigsstation. Dr Alp Oberfeld. Ungrwägs heimr zwüschem Näbu u de Wouke zwüschdüre ä Bitz vom Bannalpsee gseh. Muess wahnsinnig schön si, weme öppis würd gseh.

    Uf dr Aup acho simer mega nätt empfange worde. Dr Sepp, ds isch dr Aupwirt hett no Auphorn gspiut und ds Znacht isch mega fein gsi. Morn am haubi 6i wärde d Geisse gmouche, wo unger üsem Masseschlag im Stau übernachte. Wird äuä äs früechs Erwache gäh morn.

    Wemer Glück hei und ds Wätter besser isch, gsehmer vilech sogar dr Sunneufgang...🌞
    Read more

  • Day1

    Engelberg - Dallenwil

    July 16 in Switzerland ⋅ 🌧 15 °C

    Mitm Zug vo Engelberg nach Grafenort heimr öppe 15 Minute gha.

    Nach öppe 20 Minute düre liecht Räge simer scho zum erste Buirebähnli cho.

    Dr Sepp isch dr Bähnlichef vo Bielen. Ihm heimer dungä chönne lüte und är hett üs när mega offe dobe i Empfang gno.

    Är hett üs grad erklärt dassme de ab nächsts Jahr bi ihm cha uf dr Alp Bodmen cho übernachte und dasses dert Lamas und Alpakas hett.

    Nachdem mit ä Schnägg pro Person hei zaut hett är üs no ä Tipp gäh, womer am gschidste düre gö und hett üs grad no ä Charte vo Nünzähhundert Schwarzwiss mitgäh.

    Nach öppe 40 Minute düre Rägä simer bim Bähnli ds Diegisbalm acho. Vo dert us simer uf Oberalp gfahre, hei dobä 6 Franke ids Kässeli ta und si witer.

    Vo dert us ischs öppe 20 Minute rächt steil bärguf gange (die angere meine grad verdammt steil😝). Nach witere 10 Minute simer de bim Bärgrestaurant Gummen acho, wome übrigens oh cha übernachte.

    Nach es paar Bier und Mördertee (so heisst hie ds Fröschli) und äs paar Rundine Frantic simer mitem Bähnli abegfahre. Für das heimer em wirt vom Bärgrestaurant oh widr 6 Franke zaut.

    Eigentlech heimr vo dert wöue d Gondle uf Dallenwil näh, aber hei när spontan entschide no öppe 1.5h abedsloufe. Chlei rütschig gsi.

    Mir übernachte im Gault Millau Restaurant und Hotel zum Kreuz. Top 3-Bett Zimmer. Ässe düemr abr iz grad im Bahnhöfli. So iz chunnt d Suppe...adiiiä
    Read more

  • Day22

    Mission Heireis

    March 21 in Switzerland ⋅ 🌧 10 °C

    Nachdäm üse Diräktflug nach Züri isch gstriche worde, heimr gratis 2 neuii becho. Kapstadt-Münche und Münche-Züri. Leidr isch iz abr dr Flug vo Münche uf Züri oh no gstriche wordä, drum heimr iz e 11 stündige Ufenthaut am Flughafe ds Münche. Nachere Nacht im Hilton geits witer uf Berlin u vo dert us när uf Züri. Äs komisches Gfüeu weme nachemne 11.5h Flug weiss dassme nonid mau d Heufti vor Reis hinger sech hett.😂😝 Apropos komisches Gfüeu...momentan wirdme bös agluegt weme dr Schwizerpass fürepackt. D Schwizer si gd niso beliebt.😝😅

    Nachem Flug uf Berlin ischs richtig losgange mit Mittuauter Feeling. Aso da sisi de ds Südafrika viu moderner. Zersch heimr müesse öppe 20 Minute astah füre Sicherheitscheck. Obwou nume öppe 10 Lüt vor üs si gsi. När ischne i Sinn cho dassme iz plötzlech numeno 1 Handgepäck darf ha. Drbi darfme vor Swiss uf ä Handtäsche und es normaus Handgepäck ha. Aso heimr üses Gepäck haut müesse zämästunggä dasses i eim Platz hett gha. När heisi eim militärisch unfründlech düre Sicherheitscheck gleitet. Mitemne schöne chline Flugi vor Swiss simer när zum Schluss vo üsere Dütschland Tour vo Berlin uf Züri gfloge.

    D Gsundheit isch nie kontrolliert worde, abr Bodyscan und aues heimr iz gseh.🙈
    Read more

Never miss updates of Overnout with our app:

FindPenguins for iOS FindPenguins for Android