DMZ - demilitarisierte Zone

Hüt isches mit enere gfüerte Tour it DMZ a de Gränze zu Nordkorea gange. Mir händ aso scho biz Respäkt vor dere Tour gha. Zerst hämer binere Brugg und emene Wasserfall, ohni Wasser - haha, en Halt gmacht. Den isches witer anen Friedensplatz gange mit verschiedene Denkmähler.
Nachher hämer d Gränze vo Südkorea i die DMZ passiert, wo au e Passkontrolle gmacht worde isch. Es het allgemein unheimlich viel Stacheldraht, Kameras und Militärsache gha, wo mer alles nöd het derfe fötele. Näbete Strass hets riisigi Wälder gha, die alli vermient sind. Die Miene sind alli us Plastik, sodass en Metalldetektor sie nöd findet. Selbst wenn mer die Gränze irgendwenn emal chan ufhebe, ruume vo de Mienene wird chum einisch möglich si.
In Südkorea het mer au 4 Tunnels vo Nordkorea uf Seoul gfunde. Eine devo hämer chöne go aluege. De isch 73m under de Erde und öpe knapp 2m uf 2m. Es isch aso scho rächt äng gsi und Jeannine isch sehr froh gsi, wo mer wieder use cho sind.
Bim nöchste Stopp hämer uf e Plattform chöne und händ uf Nordkorea übere gse. Es het au diversi Ferngleser gha, wot Dörfli/Stadt aber au Mänsche uf Velos oder uf Fälder am schaffe gse häsch. Mir münd zuegeh, mir sind vo dem chli hinundher grisse sind. Uf de einte site, isches wahnsinnig spannend gsi und het dem "Nordkorea" es Gsicht geh. Es isch eim nomal meh bewusst worde, dass trotz dene verrückte News i de Medie, es Mänsche sind. Uf de andere Site simmer ois scho chli als Gaffers vorcho, wo die Mänsche beobachted hend.
D JSA Area isch leider gschlosse imomänt, da im Summer öpert illegal dete uf Nordkorea inne isch.
Es isch en unheimlich spannende Tag gsi, wo aber au sehr zum nahdänke agregt het.Leer más