Heissluftballon Fahrt und Silercliff

Dusse isch na stockdunkel gsie wommer us em nest hend müsse. Am 5.50 simmer vomene tuktuk abgolt worde für e heissluftballon fahrt. Im tuktuk hemmer e schwiizer familie troffe, wo sich es jahr lang e usziit gno hend zum reise. Uf eusere reis bis jetzt sind schwiizer e rarität😂😂. Mir hend de ballon mit dene schwiizer undere familie us thailand teilt.

Tstimmig isch grandios gsie am morgä. Es isch sehr idrücklich zgseht, wie verschiedeni heissluftballön mitenand stieged. De flug isch los gange. De ersti moment wemmer vom bode abhebt isch echli komiach gsie, aber i so moment dörf mer nöd zvill denke 😅😅. Mir hend e wunderbari ussicht ka vom heissluftballon us! T berge und die umliegede wälder hend fast echli magisch usgshe mit em morgätau, wo alles echli verschumme gmacht het. Mir sind uf e höchi vo 550 meter über em bode.

Nach em flug simmer is hostel zrugg in pool go bade und echli schlaff go nahole😂😂.

Am spötere namitag simmer uf de ussichtspunkt silvercliff gloffä. Mir hend rund 1.5 stunde vo eusem hostel bis an ussichts punkt ufe ka. Zum glück hemmer gueti schueh debi ka. Mer muss über villi sehr scharfi stei stiege. De ufstieg isch scho na streng gsie. Alli strapaze lohned sich aber, will mer mitere sehr schöne ussicht belohnt wird. Tsunnde isch churz vor em underga gsie und mer het es ganz intesivs rot am horizont gseh. Als super schwiizer simmer vorbereited gsie und hend eusi stirnlampene debi ka für de heiweg😉.Les mer