Tuol Sleng & Killing Fields

Was lauft eigentlich mit eus Mänsche falsch?

Mir händ ez scho es paar Länder bereist und öpe jedes devo het e brutali Gschicht mit unglaublich viel Leid - gwüsses wo bis hüt no aduret.
So au Kambotscha. Die roti Khmer het zwischen 1975-1979 en Drittel vo de ganze Landbevölkerig ermordet, will sie en Burestaat hend wele mache, wo alli nur Riis pflanzet (churz zämegfasst).
In Phnom Phen gits das Tuol Sleng Genocide Museum, wo imene frühere Foltergfängnis isch. Dete wird eim zeiget, wie die roti Khmer i dere Ziit unzähligi Mänsche uf brutalsti Art ispert, entmänschlicht, folteret und umbracht händ. S Ziel vo dere Folter isch gsi, dass die Mänsche irgendwelchi abstrusi Gständnis zu Zueghörigkeite vo Gheimdienst zuegebät. Die wo nöd scho während de Folter gestorben sind und das "Gständnis" abgeh händ, sind woanderst hi bracht worde - nämlich nach Choeung Ek, zu de Killing Fields, wo sie den umbracht worde sind.

Nachdem mir das Gfängnis agluegt hend, simer witer zu de Killing Fields.
Det acho, simer den vor mehrnere Massegräber gstande, wo biespielswis i eim 350 Mänsche begrabe gsi sind.

Und wieder chunnt d Frag uf, was lauft mit eus Mänsche eigentlich falsch?

Wie chan ein Ma mit enere komische Idee es paar Anderi um sich scharre, und den es ganzes Land besetzte und so es Leid übers ganze Volk bringe?
Chönnti das au bi eus passiere? I eusem Nachbarland isches scho passiert. Und bi eus? Wämer uf die aktuelli Welt luegt, isches grad wieder am passiere, meh als eimal.

Was lauft mit eus Mänsche eigentlich falsch?

Lernemer den nüt drus? Muss sich so es Leid immer und immer wiederhole?
Chan mer das stoppe oder gar zuekünftig verhindere?

Umso wichtiger erschint, dass mer eusere wertvolle Demokratie, so wie eus immer wieder vor Auge gfüert wird, nöd selbstverständlich oder gottgegeben ist, münd unheimlich sorg geh und a eusne Mänscherächt mit aller Kraft münd festhebe.

- Es paar Gedanke ussem Tuktuk uf em Rückweg is Hostel -Read more