Namaste Delhi

Hüt isches gaanz früe wieder losgange und mir sind an Flughafe vo Bangkok. Negst Stopp INDIA😁

Usem Flugzüüg hämer scho d Berge vom Himalaja gse. Eusi Sitznachbarin het gmeint, es segi chalt in Delhi. Mir händ sie chli belächelt, als obs in Indie chalt chan si. Als den alli Lüüt ihri Bomberjaggene füregholt händ, hets eus den glich chli verunsichert. Wo mer den usem Flugi gstige sind, isch eus nöd Wärmi wie erwartet entgegen cho, sondern es isch bitterkalt gsi, häääää???😂😂😂 da het wohl öpert d Klimaalag in Delhi ztüüf igstellt😂😂

Im Hostel hämer den als ersts all eusi warme Sache usem Rucksack füregrabet und eus warm agleit.
S Hostel het eus i de nöchi es Resti empfohle zum Zmittag ässe. Mir sind e richtigi Atracktion dete gsi und all händ mit eus agfange schwätze. Eine het den am Adi sind goldigi Visitecharte it Händ druckt, dass er de Botschafter in Somalie oder so ähnlich isch.

Mir händ den usegfunde, dass mer Tuktuk au mit uber bstelle chan. So muss mer nöd um de Priis handle und mer chunnt sicher au det a wo mer hi wet. Also hämer grad eis müsse bstelle und sind für öpe 90 Rappe zum Lotusdämpel gfahre.
Vor em Lotustämpel isch den so richtig Chaos gsi, aber eifach nume geil😁
Bim Lotustämpel sind alli Mänsche, egal was für e Religion willkomme und all chönd drin uf ihri Art au bäte. So Ört bruchts definitiv meh uf dere Wält😊🥰

Es isch au rächt näblig gsi oder isch das ächt Smoog? Eine het gmeint, es seg e Mischig🤷‍♀️

Wo mer wieder us em Tempel cho sind, hend ganz viel Mänsche mit eus wele Föteli mache. Grad jungi Meitlis händ a de Jeannine bsundrigs freud gha😁

Mir händ grad zunenand gseit, wie fründlich dLüüt sind und au nöd ufdringlich. Paar Sekunde nachher isch e Frau uft Jeannine zuecho und het ihre mit Farb es Zeiche uft d Stirn wele male. Sie het das aber nöd wele und die Frau het eifach nöd ufge. Tja d Jeannine het den en Farbpunkt meh und 50 Rupie weniger gha😂😂😂

Nach dene erste Idrück simer rächt erschöpft is Hotel zrug. Immerno papsatt vom Zmittag simer is Bettli gheit und sind igschlafe....Read more