Salaam Baalak Trust

Hüt isch e Delhi walking Tour mit ehemalige Strassechinde ufem Plan gstande. Salaam Baalak isch e NGO wo Strassechinde en Ort gebet, wo sie öpis Ässe und Hilf bechömed. Sie schaffet au mit Kinderheim zäme und händ so e Art Tagesstätte, wo sie chönd spiele.
Euse Guide isch de Faruk (20i) und d Kaial (17i) gsi. Sie hend eus vieles übers Läbe vo Strassechinde verzellt und hend eus bim Bahnhof zunere Uffangstation bracht. Da vieli Chind vo dihei weglaufet und mit em Zug uf Delhi gönd zum Bollywood Star zwerde, chönds dete Hilf hole. Wo mer ine sind, sind öpe 12 Kinde dete gsi zwüsche 6i und 12i. Sie händ rächt verwuschlet usgse und händ alli kei Schue agha. Das Bild het sich sehr bi eus ibrännt. De Faruk het au verzellt, dass die einte nöd is Heim wänd, will sie scho süchtig nach öpisem sind.
Den het er eus e Gass zeiget, wo d Chind die gesammelte Pet Flaschen chönd abge und es paar Rupie defür bechömed.
Imene nögste Gebäude isch wie en Hort gsi. Dete händ es paar Chinde gespielt und Ufzgi gmacht. Mir händs eus nöd zweimal säge la und händ mit de Kinde agfange spiele. Mir hätted die am liebste grad mithei gno, so herzig sinds gsi.
D Kaial het no ihri Gschicht mit eus teilt. D Muetter isch mit ihre und de Gschwüsterte vom Vater abghaue und uf Delhi gflüchted. Dete isch sie so arm gsi, dass sie d Kaial is Heim ge het, dass sie öpis zässe bechunnt. Mittlerwile wohnt sie wieder bi de Muetter und het de Traum Künstlerin zwerde. Dank de NGO chan sie ez at Kunst und Schauspielschuel. De Faruk het sich chönne selbstständig mache und macht ez 3D Animatione. Wie bewundernswert muetig die zwei und au die andere Chinde sind, wird eus immer in Erinnerig bliebe❤️.
Nach dere Tour hämer zerstmal e Pause brucht und sind öpis go Ässe.

Nach de Tour simer in Old Delhi inen chline Tempel. Mir händ d Schue und d Söcke müsse abzie, uff isch das chalt gsi.
Nachher simer im red Forth go umelaufe und sind i die grösst Moschee vo Indie.

Da mer nonig gnueg gha händ, simer witer zum India Gate und es händ verschiedene Lüüt Föteli mit eus gmacht😂😂😂

Nach dem hämer für de Momänt gnueg gha und sind is Hotel. Mit es paar Zimtstern Guetsli (Danke Rebi & Frank!) im Muul hämmer de Film Slumdog Millionär glueget.Read more