Sunne, Strand, Meer - Goa😎

Vom 28.01.-05.02. simer im wunderschöne Goa gsi am Agonda Beach.

🚝Am 28.01. isch am Morge um 05.50uf de Zug in Mumbai-9h bis nach Goa. Da mer 1 Klass gfahre sind, simer bedient worde wie imne Flugi, Esse, Trinke, Ziitig. Die 9 Stund sind den überraschenderwiis wie im Flug au verbi. Mir hend all sehr sehr viel gschlafe.

Imne chline Resort grad am Stramd hemers eus richtig gued gah lah. Und nöd nur mir hend eus d Sunne uf de Buuchschiine lah, nei au da hets Chühe und Hünd wo gern de Sunne undergang gnüssed.🐮🐕

S Personal isch eigendli alles vo Nepal gsi und sie hend die ganze Wuche de Adi sehr gued be Essensentscheidige unterstützt und berate. Cheibe guedi Sache het de Bueb amigs probiert. Viel Lassi, Limonade und Momos hets die ganz Wuche geh😎 mir sind zwüsche de Chühe am Strand eigendli nüm so ufgfalle..

Im Resort hets au wunderbari Massage geh wo sich Jeannine und Marion chli verwöhne lah hend. 💆‍♀️💆🏼‍♀️Sie hend au am Adi sini Füess chli graffled, dass er wieder zärtlichi Prinzessine Füess het. Er tänzled ez nur na so dur Gegend die Prima Ballerina.💃

Wemer grad nöd am Starnd am lese oder bädele gsi sind hemer en huufe SkipoBo gspielt. Und Jeannine und Adi hend nomal es neus Spieli glernt: Shit Head, au das het viel Fun bracht.

A gwüsse Morgene het mer sich au zu Yoga oder en Spaziergang chöne motiviere, da sind aber Adi und Jeannine recht viel Aktiver gsi wies Fuultier Marion, wo den gern usgschlafe het.

Die Wuche isch wie im Flug vergange, au wemer euse Ufenthalt sogar no vom 3. Bis zum 05.02. verlängered kah hend.

Schweren Herzens hemer euses chline Paradies den verlah....Am 05.02. isch den am Abig mitem Flugi vo Goa nach Kochi.Read more