Last Day Okinawa🇯🇵 + Flight to🇹🇷via🇨🇳

Vorab: hüt schriebt dr Erol, do Darinka z‘Müed isch und sitzend ischloft am Flughafe in Shanghai.

Gester hemmer üsa letzti Tag in Okinawa mitera Gym-Session gstartet. Mitma Pump im Oberkörper simmer nochem z‘Morga a letzt‘s mol an de wunderschöni Strand. Bim Strandspaziergang hemmer sogar as paar Meerestier entdeckt. Im Verlauf vom Nomittag isch‘s denn wieder liecht go regne koh. D‘Japaner hend wieder Panik gschobe und alles dicht gmacht. Sprich Schirme zämmeklappt und alli Gäst inne befördert. Denn simmer halt scho is Zimmer üsi Koffere go packe. Darinka het wieder Coiffeur gspielt und mini Glatze poliert. De Bart hani au mol wieder bits kürzer gmacht (au wenn’s de Darinka länger besser gfallt). Fresh gsehni us. Aschlüssend simmer no in‘d Stadt go z Nacht essa. Fast Food vom Feinsten.

Hüt hemmer bis vorig Zit kha, will üse Flug erst uf die 16:30 timed gsi isch. Checkout isch am 11i gsi. Rein theoretisch hettemer also „usschlofa“ könne bis em halb 9ni, was Darinka au gmacht het. Ich bin am 5i hellwach gsi. Wie so oft do in Japan. Spötischtens 7ni het mich mini inneri Uhr immer gweckt. Aber Zit ummebringe kanni 😉. 4h vor Abflug hemmer üses Mietauto scho abgeh kah und sind scho am Flughafe gsi. Zum denn erfahre, dass de Flug erst am 20:20 losflügt. Halb so schlimm, will mr eh 8h Ufenthalt an üsem Zwüschestopp in Shanghai hend. Und au halb so schlimm, will mr s‘erste mol Business flügend. Somit Lounge-Zuegang am Flughafe, mit Esse, Trinke und was das Herz begehrt ima separierte (viel ruhigere) Bereich. Do kann mr sich schnell dra gwöhne. Ufts mol het‘s gheisse em 18:30 s‘Boarding segi glich etze gad will de Flüger in 20min starti. Airline: China Eastern. So ruppelig wie mich das Ganze dunkt het, het mich au de Flug dunkt. 1 Stund Flugzit vu Okinawa uf Shanghai. Het recht grüttelt. Isch aber vermuetlich em ankündete Taifun gschuldet. Also so unberechtigt sind die Vorsichtsmassnahme nid vu da Japaner. Das Voll isch halt vermuetlich eifach ein „gebrandtes Kind“. Mir sind Froh, simmer vorem Ischlag vum Taifun, wo bis zu 10m hohi Welle bringt und teilwies bis zu 600mm rege, usser Riechwieti. Krass wie gfasst das d’Japaner das Ganze nehmend, will sie sichs unterdesse gwöhnt sind. Erdbebe, Taifuns, … Das kört do zwar ned gad zum Alltag, aber kunnt Jöhrlich mehrmols vor. Wobi de kommendi Taifun anschienend gewaltig ischloh wird. Früehner hegi mr das nur ein Tag vorus sege könne. Unterdesse ischs bis zu 5 Täg vorher möglich. Au mir hend das täglich verfolgt. Uf Google Maps gits sogar a Karte vu dr erwartete Route.

Während mir do etze in de Business Class Launch in Shanghai die letzte Stunde vor üsem Abflug noch Istanbul verbringe dörfend, hoffemer sehr für das Volk, dass de Taifun nur halb so schlimm wird, wie erwartet. Üs hend Japaner im vielerlei Hinsicht fasziniert. Strukturiert, präzise, fründlich und der englischen Sprache nicht mächtig.Read more