Gili meno

Hüt het unsere Coral Restoration Teil vom Kurs ahgfange. Da mir am morgä im Tauchcenter Theorie plant hän und für das unseri Rueh hän welle hämmr uns hüt erst uf die 9.30 troffe (da denn s Tauchboot abfahrt). Durch das hanni gmüetlich Ziit gha zum go Jogge, eh Workout im "Strandgym" mache und eh feine Kaffi drinkä. D Theorie isch denn öbbe 2 Stund gange und zimli spannend aber au zimli viel gsi. Da mir jetzt sone gmüetliche Ziitplan hän will mr uf keini Chundä müen luege, bini denn in de Mittags mit minere Instruktorin am Strand gone Saft drinkä und ha eh Olah Olah Tempeh ins Tauchcenter bstellt, woni denn spöter no gässe ha. Am 2i simmr denn ändlich ufs Boot zum go tauche , es isch hüt verdammt heiss und düppig gsi,drum hämmr uns jz alli ufs Wasser gfreut. De Tauchgang isch zimli schnäll verbi gange da mir uns komplett nur ufd Koralleidentifizierig fokussiert hän, sogar wo mir denn plötzlich gmerkt hän dass mir eigentlich grad vo öbbe 5 schildchrote umchreist wärde hämmr uns nit vo de Koralle loh ablänke. Hüt zobe dörfi scho wieder bi mine liebe Instruktore (oder mittlerwiile 2 guete Fründe) go Znacht ässe, wos das mol Penne mit Mangocurrysauce mit Broccoli, Pilz und ganz viel Chnobli git. Weiss io nit wenn ich s letzt mol Broccoli gha ha🤩, wiedermol fühli mi fast wie dehäi während em ässe und lauf denoch z friede im gröschte Räge wieder zrugg zu mim Bungalow. Und do liggi jetzt im Bett und hol mini Bricht vo de letzt Täg für euch noche willi si chli vernochlässigt ha. Ich ha hüt mit 3 lüt vo dehäi dörfe telefoniere und wart jz no ufe Telefon vo Mami und Papi, es isch schono schön wenn meh ab und zue mol wieder öbbis vo dehäi hört und vorallem mol wieder in sinere eigene Sproch cha schwätze.Leia mais