Gili meno

Hüt hämmr ändlich ahgfange mit koralle pflanze und das mit wunderschöner sichr ufe rinjani. Ganz vergässe wie sehr ichs vermisst ha in soneme projäkt z schaffe. Ufem erste Tauchgang hämmr abbrocheni koralle gsuecht denn an land brocht, dört denn verchliineret und chranki teili abbroche und denoch denn an de sogennante "reefstars" ahgmacht. Das muess alles zimli schnäll go da d koralle nit meh als 30 minute sötte userhalb vo ihre gwohnte umgäbig si (mir hän si natürlich die ganz ziit in chessel mit wasser gha). Denn simmr ufe zweite tauchgang zum die Metallstrukture denn zu unserem projäkt bringe und dört positioniere. Denoch hämmr denn no eh schöne, gmüetliche erkundigstauchgang gmacht zum unseri rästlichi luft no chli ufbruche. Gester znacht bini no uf Schildchrote suechi gange und ha eini worschinli nur um wenigi minute verpasst bim eier legge. D spur im sand isch ganz früsch gsi und meh het genau gseh wo si ihri eier vergrabe het. Scho nur mol im stockdunklä ohni jeglichs liecht elläi über eh komplett verlassene strand laufe isch eigentlich scho gnueg schön gsi und denn au no eh spur z findä und z wüsse dass vor wenige minute eini vo dene schildchrote, woni worschinli scho gseh ha ummeschwümme, grad die ahsträngensti und wichtigsti ufgob vo ihrem läbe hinter sich brocht het isch denn no s highlight vo mim obe gsi. Us däm grund gangi hüt grad nomol ufd suechi nach dene schöne läbewäse. Vorhär hanni mol wieder eh sunneuntergangs joggrundi gmacht und da grad sehr starki ebbe gsi isch, hanni denn no chli nach kreature usschau ghalte in de "tidepools" und ha tatsächlich ohni gross sueche eh blauringoktopus gfundä🤩. Jetzt sitzi grad in mim lieblingswarung und iss ändlich mol wieder eh nasi goreng ayam nachdämi siit sicher scho übere eh wuche jede tag sag dassi wiedermol eins bruch. Ich has "pedas" bstellt und es isch tatsächlich mol zimli scharf, vellicht kenne si mi mittlerwiile und maches jz "localspicy" und nit touristescharf, ha also grad zimli müeh s früschgmachte sambal ,wos immer no dezue git, ufzbruchä😂.Læs mere