Reset search
Nordspanien 2025
  • Annina Anderhalden
  • Annina Anderhalden

Nordspanien 2025

A 16-day adventure by Annina Read more
FollowInsightsInsightsCalendarCalendarPhotosPhotosShareShareBucket list
Newest first
  • Trip start
    July 5, 2025
    Annina AnderhaldenNordspanien 2025Traveler
    1

    Isle-sur-Tarne

    Jul 5–6 in France ⋅ ☁️ 30 °C

    Am Morge het dr Wecker am haubi drü glütet. Liecht vrpennt und scho vrschwitzt hei mr aues nötige id Aurelia glade und si mitemene fätzige Banger ide Lutsprecher losdüset.
    Während ig Navigatorin gspiut ha, het dr Raphi aus Chauffeur beschti Leistig gleistet. Am haubi sibni hets denn ds erschte “Uason” und es Kaffi gä, nere si mr ume witrdüset.
    D Mittagspouse (am haubi zehni) hei mr im Nüt usse gfüehrt, absits vo aune Franzoggle (wo wie Joggle fahre).
    Nachdem mr de uuultra lang die französische Schneustrasse (odr Outobahne) befahre het, isch dr Chauffeur berächtigterwiis müed worde und ig ha für die letschte zwe Stund d Aurelia übrno.
    Müed, vrschwitzt und liecht druschtig si mr denn ds Isle-sur-Trane acho, hei abr no nid is Apartment dörfe, wiu sis no het müesse putze. Irgendwie isch die Zit abr denn ou vrbi gange und mir hei de krönend Outofahrttag mit F1, Baguette und emene Schuum abgschlosse.    Read more

    See translation
  • Annina AnderhaldenNordspanien 2025Traveler

    San Sebastián y Bilbao

    Jul 6–8 in Spain ⋅ ⛅ 25 °C

    O wes e heissi Nacht isch gsi, hets guet ta endlech mau lang chönne ds schlafe. Nach geschter si mr scho recht erschöpft gsi! Zum Zmorge hets ume es feins “Uason” und es Kaffi ge, bevor mr ds Airbnb vrlah und üs ufe Weg nach Spanie gmacht hei.
    Im Vrglich zu geschter isch d Reis sehr schneu vrbi gange, und plötzlech hei mr die spanischi Grenze überfahre. Erkennt hei mrs vor auem a de viu günstigere Tankpriise. Viu besser fahre d Spanier ou nid aus d Franzose, abr üse Fahrer hets super gmeisteret und üs sicher uf San Sebastián gfüehrt.
    Mit brochnigem Spanisch hei mr nere ds geilschte Zmittag (dr Raphi Kabeljau, ig Muschle - früsch usem Meer) gmampfet und dr langersehnt Meersduft gnosse.
    D Strecki vo dert bis Bilbao het üs scho dür die erschte Vorläufer vo dere Pico de Europa gfüert, wo ize scho sehr schön hei usgseh.
    Ds Airbnb in Bilbao isch o dr Abriss – leider hets o dert kes HDMI-Kabu gha, drum hei mrs F1-Race (absolut ds geilschte i dem Jahr) mit ere provisorische Installation gluegt.
    Zum Znacht hets feins Fleeesch gä (obwou mr no es bessers hette chönne nä, abr ds wer gd fei türer und ds viu füre Raphi elei gsi). Mit emene feine Aperol Spritz hei mr nere dr Abe la usklinge – scho ize gspannt fr morn!    Read more

    See translation
  • Annina AnderhaldenNordspanien 2025Traveler
    112

    Bilbao & Guggenheim

    Jul 7–8 in Spain ⋅ ☁️ 20 °C

    Ou hüt hei mr e ereignisvoue Tag gha. Nachdem dr Wecker am zehni – und nid am nüni het glüte – hei mr nis ufe Weg id Stadt Bilbao gmacht, fr nes feins Zmorge mit ere Açai-Bowl, jewils zwe Kaffi und je es Bananebrot (respektive fr e Raphi angerhaub, fr mi es haubs). Ds Wetter isch viu weniger toll gsi aus geschter, abr dr Wechsu vo Räge zu Sunne het aues gd viu toller gmacht!
    Gstärkt hei mr üs denn ufe Wäg zum Guggenheim Museum gmacht – ig chli weniger übrzügt. Zum Glück hani ufe Raphi glost, denn mir hei meh aus drü Stund dinne vrbracht und ultra tolli Fotos mit üsere Kamera gschosse.
    Nere hani Sehnsucht nachem Meer gha, drum hei mr nis entschide, die eint Attraktion, wo mr eher fr morn denkt hei, glich scho hüt ds mache.
    Denkste! Die cheibe Spanoggle si ou Joggle, und me mues Tickets fr die Attraktion reserviere. Ds nechschte freie Datum weri am 18. Juli gsi…
    Drfür si mir übere Zuun gklätteret und hei glich no es cools Foto drvo gmacht.
    Bim Zrüggfahre hei mr de langsam afa merke, ds es glich scho füfi isch und mir sit em Zmorge nüt me hei gesse. Liecht hangry si mr nere im riisigschte Carrefour glandet und hei e grossi Uswau a allerlei Stuff gfunde fr nes feins Znacht im Airbnb. Leider nid ganz vrglichbar wie we mr deheime choche, abr fr ds mr nume Salz u Pfeffer hei gha, trotzdem ganz fein.
    Dr Abe hei mr mitemene feine Gläci la usklinge.    Read more

    See translation
  • Annina AnderhaldenNordspanien 2025Traveler

    Playas, Faro de Ajo y Santander

    July 8 in Spain ⋅ ☀️ 22 °C

    Nach emene leckere Zmorge in Bilbao hei mr üsi Sibesache packet und si los düset i Richtig Santander mit einige Zwüschehauts.
    Zum Glück hani dr Raphi nid fescht müesse übrzüge fr ane Strand ds fahre, um endlech chönne ga ds bade. Uf Google Maps hei d Playas de San Julián entdeckt – e chliini Bucht, wo me zwar mues abeloufe, abr fern ab vo de Touriste isch. Nume es paar nackti Spanier hets gha, wos ir Sunne odr im Wasser chillt hei. Ungermene grosse Feus hei mr Zueflucht vor Sunne gfunde, und si sofort is Badzüg ghüpft. Während dr Raphi d Tüechli ud Kamera bewacht het, hani ds lauwarm Atlantik gnosse – und bi mit Sand zimlech überau zrügg zu ihm cho.
    Nachemene chliine Picknick si mr nere zrügg zur Aurelia und witr richtig Weste ar Küste entlang. Wo üsi Hostess gschribe het, ds mr ersch am füfi chönne cho, hei mr üs entschide, no e Abstecher zum Faro de Ajo – e coole Lüchtturm – ds mache. Und wius immr no nid füfi isch gsi, hei mr nere no e 4.9 Stärne Heladería gfunde und zwe riise Chugle a Glace gmampfet.
    Im Airbnb si mr uf Spanisch vor Hostess begrüesst worde, woni mi uf haub Spanisch, haub Englisch ha chönne vrständige. Mir hei emu aues mitbecho, wo mr bruuche – sogar ds manuelle Garage.
    Znacht hei mr wie die echte Spanier am Nüni ire chliine Beiz ir Aglo vo Santander gno, wius dert Tacos und Ceviche het ge – aues ultra geil, guet hani mr nid vorgno, vegetarisch ds esse!
    Mit em Mond und ere tolle Abestimmig si mr nere hei zrügg is Apartment.    Read more

    See translation
  • Annina AnderhaldenNordspanien 2025Traveler
    1

    Arnía Beach y Faro de Cabo Mayor

    July 9 in Spain ⋅ ☀️ 25 °C

    Hüt het nis ds Bett chli lenger fescht ghaute, abr da mr Ferie hei, macht ds gar nüt. Gmüetlech hei mr nere Zmörgelet und üs ufe Weg zur Playa de Arnía gmacht.
    Was üs sehr überrascht het, si d Tanktpriise, wo nume e Bruchteil choschtet im Vrgliich zu Frankriich u dr Schwiz. Drum hei mr d Aurelia ganz günstig gfueret, bevor mr zum Strand si cho.
    Dismau isch dr Raphi am Land bliibe, ufem chliine Hügu, wo mr gfunde hei. Ig ha drfür ds Meer mau ume usgnützt und bi mit de Spanier chli ga schwümme. Nachdem mr es Zitli ds Meer, d Sunne und dr Sand gnosse hei, si mr witr zum Lüchtturm Faro de Cabo Mayor düset und hei es lecker Kaffi trunke.
    Üse Usflug zum Palacio de Magdalena isch leider is Wasser gheit, wiu d Spanier aui gfunde hei, ds ize dr perfekt Zitpunkt fr ds isch. Nid ganz enttüscht si mr drum witr zum Carrefour für Snacks u Znacht – und si extrem froh gsi, schneu ume usedscho.
    Nachdem Erlebnis si mr froh gsi, im Apartment zrüggdscho und e ruhige Abe ds vrbringe.    Read more

    See translation
  • Annina AnderhaldenNordspanien 2025Traveler
    14

    Roadtrip to Gijón

    July 10 in Spain ⋅ ☀️ 25 °C

    Hüt Morge si mr verhäutnismässig früeh uf und hei fein zmörgelet, bevor mr üs ufe Weg nach Gijón hei gmacht – natürlech mit nes paarne Unterbrüch und Zwüschehäuters.
    Dr erscht isch in Santilla del Mar gsi, ere mega schöne Mittuauterstadt, wos dementsprechend vili Touris het gha. Nere hets nis witrtribe zumne Mirador, wo me abe id Kliffs het chönne chlättere und Füess im Meer bade. Richtig is Meer si mr speter ga bade, bimne Strand, wo mer per Zuefau gfunde hei. Es feins Picknick mit emene guete Spanierbrot hets ou ge dert!
    Witr si mr nere zum Bufones de Pría, wo üs ds Google zwar het vrarscht, aber mir hei glich es schöns Plätzli gfunde.
    Wiu mr üs aus abentürlech hei empfunde, hei mr nis es moderns Zeut ufem Camping reserviert – cooler in Theorie aus ir Praxis. Ligt vilech ou chli dranne, ds mr müed si gsi, abr nachere duschi und emene feine Ramen zmitzt in Gijón hei mr de glich Fröid dranne gha.    Read more

    See translation
  • Annina AnderhaldenNordspanien 2025Traveler

    D Spanier und iri Barriere

    July 11 in Spain ⋅ ☁️ 24 °C

    Hüt hei mr dr Wecker extra früeh gsteut, wiu e tolli Wanderig uf üsem Plan wär gstande. Betonig ligt uf “wär”…
    Nachemene feine Zmorge hei mr nis ufe Weg zu de Picos de Europa gmacht, wos es Seene-Trio “Lagos de Covadonga” het. Mit ere Wanderig, wo eppe 3h30 isch, vou machbar hei mr gfunde.
    Doch d Rechnig hei mr nid mit de Spanier und irem Drang, aues ga ds kommerzialisiere, gmacht. 12km zu de Seene hei mr here dörfe fahre, nere hets e Barriere gha und gheisse: “Kes Outo, nume mit de Busse dörfet dr ufe.” Eigentlich vou in Ordnig, we d Busse und die ganze Parkplätz um üs nid pumpet vou mit Touris gsi wäre. Puri Übrladig und Enttüschig vo dene Spanier, wo d Natur finanziell usnütze wei.
    Nach einigem Hin u Her und grossem Frust hei mr nere gfunde, ds mr ds lö la si und stattdesse süsch wo luege, ob mr nid doch eppis schöns zum Loufe und Ussicht luege finge. D Berge si jedoch so übrwucheret und steil gsi, ds mr nis mit emene chliine Fluss hei zfride ge und dert hurti es Pöiseli hei gmacht.
    Nachdem nis d Charte überne fasch kriminelle Pass – d Löcher het üse talentiert Fahrer gekonnt umfahre – gfüert hei, hei mr üses Nüme-Wander-Picknick bire Outoraststätt gesse und si kaputt vo dere lange Fahrt zrügg zu üsem Zeut fürne Nami-Schlaf.
    Chli gnappet füeht sech ds Lebe scho viu besser a. Mir hei üsi Kamerafotos mau widr sortiert und nere hurti mit em begrenzte Internet gluegt, wo mr üse Abe guet chöi vrbringe. Zu üsere Fröid hei mr es Aquarium in Gijón gfunde, grad ir Nöchi vom Restaurant, wo dr Raphi usegsuecht het. Isch nid ds krassischte Aquarium übrhoupt gsi, abr ganz nett.
    Ds Znacht hingege isch dr Abriss gsi – abr dementsprechend tür.    Read more

    See translation
  • Annina AnderhaldenNordspanien 2025Traveler
    2

    Cudillero, Strand und Land

    July 12 in Spain ⋅ ☁️ 27 °C

    Ds letschte Mau im Zeut übrnachte und es het toll gwitteret ir Nacht. Nachemene churze Düschi hei mr uscheckt und si i nechscht Supermercado für nes Zmorge/Zmittag – Mercadona isch bis ize dr bescht übrhoupt gsi!
    Feini Brötli, chli Frücht und es Kaffi und scho si mr ume ufem Weg zumne Fischerdörfli gsi. Parkiere hei mr dert nid dörfe, wie üs e Polizistin liecht aggressiv mitteilt het, abr schöns ischs trotzdem sehr gsi. Vor auem dr Lüchtturm ds oberscht.
    Nere hets mi no einisch ane Strand zoge, bevor üsi Tour is Landesinnere gfüehrt het. Dr Wile het dr Raphi brav uf üsi Sache ufpasset, ds si ja nid gklauet werde.
    D Reis uf Ponferrada het üs fasch id Nöchi vo Santiago di Compostela gfüert, vili Pilgerer hei mr abr uf dr Outobahn nid gseh. Da sisi bi früechere Etappene meh ungerwegs gsi.
    Churz vor üsem Ziu si mr no einisch ine Regeschauer cho, drfür isch ize d Auerlia widr suber. Nachdem mir ds komplizierte Hotel tschegget hei, hei mrs sehr gnosse, im ne normale Zimmer mit eigeter Toilette und Duschi ds chille – mit funktionierendem WLAN natürlech!
    Zum Znacht het üs Ponferrada nid so viu ds biete gha, ussert ere Pizzeria, wo “La Mafia se sienta a la mesa” het gheisse – d Mafia sitzt am Tisch. Nid nume het dr Raphi si aues gliebt Provolone becho, es het e mega feini Pizza ge und für mi sogar in vegetarisch.
    Richtig glücklich vo dem Znacht si mr nere zrügg is Hotel und gspannt füre nechscht Tag!    Read more

    See translation
  • Annina AnderhaldenNordspanien 2025Traveler
    1
    22

    Las Médulas

    July 13 in Spain ⋅ ⛅ 24 °C

    Nachemene churze Zmorge im Hotel hei mr scho üse erscht “Outoschade” gha, abr Entwarnig, nüt gravierends – e Tube odr eue mehreri hei d Aurelia vou vrschisse. Zum Glück hei mr no wenig geils französischs Wasser gha und mit dem se grad gwäsche, dr nachvougend Räge het ou si Biitrag gleistet.
    Ufem Weg zude Médulas het dr Raphi chli am Wetter zwiiflet, abr nach de Wort vor Mam “es lüpft sech” hani ne chönne motiviere.
    Und tatsächlech: Ufem höchschte Punkt vor Wanderig – sage und schreibe 1020 MüM. – het sech doch d Sunne zeigt und üs uf dr Wanderig begleitet. Recht erschöpft und übrhitzt si mr nach guet 3h und 500 Höhemeter bir Aurelia zrügg cho, so mittuparat für die zwöistündigi Fahrt zum Airbnb im Nüt. Nachere Magnum bire Outoraststätt het ds Lebe abr scho gd besser usgseh.
    Begrüesst si mr herzlech worde vor Azucena, wo in Spanisch aues erklärt het und üs grad no irne Friends vorgsteut het. Die hei üs in knappem Schueufranz begrüesst. Es mega herzigs und schön irgrichtets Apartment, wo mr ire chum hei chönne sege, wiu mis Spanisch nid glengt het fr ds. D Fröid het si üs emu agseh.
    Nachere chaute Duschi hei mr ds troute Deheime gnosse und e gmüetleche Abe vrbracht.    Read more

    See translation
  • Annina AnderhaldenNordspanien 2025Traveler
    2111

    Riaño

    July 14 in Spain ⋅ ☀️ 26 °C

    Am Morge si mr vom Güggu gweckt worde, sehr passend zu üsem Hüsli. Fern ab vor Stadt hei mr super gschlafe und dank dr Azucena super zmörgelet. Gnosse hei mr vor auem die feine Frücht und die seuber gmachti Gonfi vo ire.
    Nere si mr los Richtig Riaño, wos super schöni Bärge und Ussichte zum Luege het gha. Plus hei mr no die gröschti Schoukle vo Spanie gfunde und natürlech es paar Fotos müesse mache.
    Die planeti Bootstour hei mr leider nid chönne mache, wiu si zue hei gha. Drum hei mr nis nachem Mirador ufe Weg gmacht, i nächscht Supermercado ds ga, um eppis für ufe Grill für hinech ds choufe.
    D Reis dert here het nis 40 Minute lang dür eini vo de schönschte Streckine vo Spanie gfüert, begleitet vomne spannende Podcast – wo ig dr Raphi mau ha chönne übrzüge, ne ds lose.
    Vegetarischs hets im Supermercado leider nüt überzügends gha, drfür umso meh Chäs und Fleisch. Dank de Grillkünst vom Raphi und üsne feine Gmüesli, isch dr Grillabe ou es vou erfolgriichs Erlebnis worde.    Read more

    See translation
  • Annina AnderhaldenNordspanien 2025Traveler

    Fahrtag nach Logroño

    July 15 in Spain ⋅ ☀️ 28 °C

    Ersch am eufi hei mr hüt uf möge – geschter ischs nachem Grille und emene coole Fiumabe chli spät worde. Drfür hei mr denn lecker zmörgelet und denn üsi Sibesache packet, bevor mir üs vor Azucena vrabschidet hei. Trotz Sprachbarriere ischs e sehr schöne Ufenthalt gsi und fasch chli wehmüetig fahre mr witr Richtig Oste.
    Ds Google füehrt üs quer über ds Land, müglechscht kei Outobahn, vo dere mr üs nid mau sicher si, obs im Nüt vo Spanie eini gid. Für 11km si mr nemlech uf eire gfahre, abr die isch schneu ume fertig gsi.
    Uf dr Heufti vor Strecki hei mr e See gfunde, wo mr hurti es Bad hei gno. Schneu si mr abr witrgfahre, wiu üs dr See nid ganz so gfaue het.
    Mit emene Formel 1 Podcast i de Lutsprecher si mr quer übrs Land gfahre, bis sech vor üs Logroño het eröffnet. Aus erschts abr si mr ga tanke und eppis Zmittag (odr Zvieri) ga choufe.
    Nachdem mr ds Fiasko bim Hotel (was absolut mi Bock isch gsi) hei chönne löse, si mr im Hotel acho. Nachemene churze Pöisli si mr d Stadt ga aluege, abr abgseh vom feine Kaffi hets nid so vili Attraktione gha. Drfür hei mr e feini Noodle-Bar gfunde, wo mr guet japanisch dr Tag hei la usklinge.    Read more

    See translation
  • Annina AnderhaldenNordspanien 2025Traveler
    1

    E witere Fahrtag

    July 16 in Spain ⋅ ☀️ 33 °C

    Ds Zmorgebuffet in Logroño isch nid gsi, wie me vomne Vier-Stärne Hotel würd erwarte, abr satt si mr trotzdem worde. Da ig weg dr Cheuti dinne und dr Hitzi dusse chli vrcheutet bi, hei mr beschlosse, die hütigi Etappe ohni grosse Haut ds fahre, ds mr ds Barbastro e Chill-Nami chöi vrbringe.
    D Fahrt het üs witr dür die Einöde vo Spanie gfüehrt, ab und zue dürbroche vore Burg uf de Hügle mit dr witischte Ussicht. O hie si d Spanier gfahre wie d Löle, abr dr Raphi – dr bescht Fahrer – het üs sicher uf Barbastro gfüehrt.    Read more

    See translation
  • Annina AnderhaldenNordspanien 2025Traveler
    11

    Portaventura Tag 1

    July 17 in Spain ⋅ ☀️ 26 °C

    Dr Wecker het hüt morge viu ds früeh glütet. Meh schlafend aus wach hei mr eppis gesse, bevor mr üs ufe Weg nach Les Irles und nere zum Portaventura hei gmacht. D Outofahrt het üs dür ume e sehr schöne Teil vo Spanie gfüehrt, abr da die Mönsche hie teils wie die letschte fahre, hei mr nis viu me ufd Strass müesse fokussiere.
    In Les Irles hei mr nid wie planet chönne ichecke, wiu d Frou nid da isch gsi. Drum si mr gd witr zum Portaventura.
    Wie nid planet si mr nid die erschte gsi, und hei bim Astah no hurti üsi Sandwiches esse, wiu me weder Esse no Trinke darf mit ne. Nere si mr uf d Bahne, wo üs recht gflashet hei.
    Nachemene eher mittu feine Hot Dog (bir Vegi Option hets nume “No” geheisse, drum hets ou fr mi Fleisch gä), hei mr nis es Gläci und nere dr Red Force im Ferrari Land gönnt – 180h/km in 5 Sekunde. E krassi Bahn und es krasses Erlebnis.
    Znacht hets nid gä im Portaventura, weil teuer, drfür hei mr üs im Mercadona fein gönnt.
    Zfride, heiss und chlebrig si mr nere im Hotel acho, wo üs zersch zwe Chatze und nere e netti Abuela üs empfange hei.    Read more

    See translation
  • Annina AnderhaldenNordspanien 2025Traveler
    1

    Portaventura Tag 2

    July 18 in Spain ⋅ ☀️ 31 °C

    O hüt hets üs zum Portaventura zoge, um einiges weniger gspannt aus gester – vrschuldet vor auem am Bedürfnis, no meh ds schlafe, aus mrs ta hei. Gstärkt vomne chüele u feine Zmorge si mr losgfahre, acho und hei direkt e Barriere troffe bim Iigang.
    Die Spanier si mega langsam, wes schneu setti ga, und schneu, we süsch niemer mues pressiere. Nachdem mr gmerkt hei, ds si eif nid wüsse, wie astah, si mr chli entspannter gsi und hei direkt widr e Parkplatz fürd Aurelia bim Ferrari Land gfunde.
    Ds es meh Lüt aus geschter het gha, hei mr gmerkt, wiu mr sogar frs Inega hei müesse astah. Dr Weg zum Dragon’s Khan si mr ou komplett fausch gloffe und si drum scho vou vrschwitzt ume bir Bahn acho. Drfür hei mr “nume” 20 Min müesse astah, für ne Bahn, wo scho recht het gflasht. Es Pöisli hets churz bi de Cowboys ge, witeri Bahne ebeso.
    Mit emene chüele Getränk hei mr nere nach vierne Bahn gfunde, chli ds Chaut ga gniesse und si drum no einisch uf die Indoor-Bahn vo geschter gange.
    Drna hets nis ufne Wasserbahn zoge, nachdem mr eppis gesse hei. Bi dere und o nächschte Bahn hets denn plötzlech weniger Lüt gha, drum hei mr hüt viu weniger Zit mit astah vrplämperlet.
    Dür d Hitz, Sunne, Lärm u Lüt si mr hüt abr glich früecher kaputt gsi und hei drum gfunde, am vieri Firabe ds mache und no i Mercadona, und nere im gmüetleche Hotel dr Abe entspannt la usklinge – schliesslech geids morn scho ad Heireis.    Read more

    See translation
  • Annina AnderhaldenNordspanien 2025Traveler
    21

    Auf nach Frankreich

    July 19 in France ⋅ ☀️ 29 °C

    Hüt Morge hei mr e chli usgschlafe, nere fein Zmörgelet, bevor mr Spanie ufemene chline Umweg – e Metzg für Serrano und Ibérico und emene Kaffi – adiós hei gseit.
    Odr so hei mr denkt.
    Nachere Stund problemlosem Fahre si mr bi Barcelona i Stou cho und hei mau über e Stund Fahrzit verlore. Churz vor dr Grenze si mr fasch vrhungeret und hei drum e Abstecher ine Shopping Mall gmacht, e heftigschti Feuentscheidig. Nid nume hets vili Lüt gha, es het huere vili Lüt gha. Und aui so im Chillermodus, ds si nume im Weg gstande si. Drfür hei mr nid nume feins Brot, sondern ou dr fein Wii gfunde, wo mr no hei weue choufe. Und sogar es Kaffi hets no gä. Nachdem mr hurti Zmittagnet hei, si mr witrs, ize haut uf dr Outobahn und nid wie planet ohni Zoll – d Fahrt hetti sech süsch no meh vrlängeret.
    Dr Raphi het die französische, die belgische und die spanische Fahrer souverän gmeisteret und üs – natürlich mit dr Aurelia sicher i üses Hotel gfüehrt.
    Nachere churze Pouse si mr ds Znacht ga sueche und hei e henne herzige Foodcourt imne französische Vorort gfunde – und üsi Pizza isch dr Abriss gsi, no besser aus die vom Mafia.
    Ir schöne Abestimmig si mr denn zrügg zur letschte Nacht vo üsne Ferie.    Read more

    See translation
  • Annina AnderhaldenNordspanien 2025Traveler

    Zrügg ds Bärn

    July 20 in Switzerland ⋅ ☁️ 27 °C

    Ds erschte Mau i dene Ferie, wo mr vorem Wecker ufgstande si. Wiu mr gschid mitdenke, hei mr entschide, im Hotel ds zmörgele, statt chli vrlore im Vorort ufere Suechi nach eppisem ds Foode ungerwegs ds si. Krass ischs nid gsi, abr gsättigt hets emu.
    Nachem Tanke si mr nere los, Richtig Schwiz. D Fahrt, so unspektakulär wie erwartet, isch gmüetlech und guet gange, dank em Raphi – u dr Aurelia – si mr super vorwärts cho. Churz nach dr Schwizer Grenze hei mr müesse ahaute, wiu dr Tank nid meh glengt het. Vo dert us ischs nere witr nach Bern und hei i die vrtroute vier Wänd.
    Nach dene tolle Ferie isch ize heftigschtens Chille agseit, bevors morn ume los geid mit em Läbe B.    Read more

    See translation
    Trip end
    July 20, 2025
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice