Anderdalen Nasjonalpark

Hit hemmer eys im Bett schneu wieder träid, womer gseh hend dass s Wätter nid guäd isch. Später simmer de trotzdem uifgstandä, hend nachemnä gmiätlichä Zmorgä eyses Airbnb gruimed und sind uf Finnsnes, dä Haiptort vo Senja gfahrä. Währenddem d Fabienne äntlich wiedereinisch ä guätä Cappuccino am trinkä gsi isch, isch äs Telefon vo dä bekanntä Gsichter vodä letschtä Täg (Thurgaier) cho, dass sie Sunnä gsichted hend. Schneu simmer ihnä nachä greist und hend Fräidegimp gmacht womer hend chennä d Sunnäbriuä aleggä. Zämmä mit dä Thurgaier simmer nah tiäf i Anderdalen Nationalpark gloffä. Elchä oder Renntiär hemmer leider keini gseh, defir hemmer ä wunderscheeni Landschaft mit viu Heidelbeeri derfä bestuinä. D Thurgaier hend sich ä richtig scheeni Unterkunft gönnt, diä hemmer nateyrlich ai nu gnaischtens beguätachtet (sogar mit Whirlpool). Am späterä Abig hemmer eys ufä Wäg gmacht zu eysem neywä Airbnb und hend ä wunderscheenä Sunnäundergang derfä bestuinä. Glicklich sind d Michi und d Fabienne is Bett gheyd.Read more