Skårungen

Hit hemmer eys im Bett schneu wieder träid womer gherd hend dases richtig fescht rägned und winded. Später hemmer de miderä Tasse Tee ufm Sofa am stirmischä Wätter undm wiudä Meeresruischä zuägluägt. Wos ums Tagesprogramm gangä isch hemmer a diä fäin Pizza z Henningsvær miässä dänkä. Eysi Entscheidig isch nachhär sehr schneu gfauä, sonä Pizza memmer nueinisch ha! Auso simmer nu einisch i das farbäfrohä Derfli gfahrä und hend ä fantastischi Pizza gnossä. So herrlich we unkompliziärd hiä aues ghandhabt wird. S Wasser isch uberau gratis, jedä nimmt seys Bsteck säuber & jedä Tisch, Stuähl und Täuer gsehd andersch uis. Eifach gmiätlich! Womer nu durs Derfli gschländered sind hed äs Aito pletzlich d Scheybä abäglah. Ja loda diä beidä Australier vo dä Sauna hend eys grad wieder erkennt! Scheen wemä sich immer wieder trifft. Apropos wieder träffä, megider eych nu a Thurgaier Lars erinnerä wo ez ganz älläi weyter gräist isch? Mittlerweylä ischer nimmä älläi sondern wird vo seym Kolleg Bryce fir 2 Wuchä begleitet. Diä beidä sind eys hit uf dä Brugg richtig Henningsvær nateyrlich ai nu begägned & nach paar Liächthupenä heds de ai mit ihnä nu ä churzä Schwatz gäh. Diä beidä hend ab hit ä riesigi Villa fir sich. Wiä sie zu derä cho sind? Ja Kontäkt settmä ha. Diä beidä sind so flott gsi und hend eys ihri Villa diräkt am Meer uisfiährlich zeigt & miär hend sogar ä wunderbari Sauna derfä gniässä. Aus Gägäläischtig hemmer de fir sie Znacht koched. Äs isch ä sehr sehr luschtigä Abig gsi.

Ja hit chemmer nur Foteli vo derä unglaiblich scheenä Villa biätä, upsi!Read more