Oslo

Hit hemmer wieder einisch äs richtigs Hotel-Zmorgä gnossä. Miär sind fascht ächle uberfordered gsi mit derä riesä Uiswahl. Nachm Zmorgä hemmer de mid eysem
Touri-Programm gstartet. Zerscht simmer d Holmenkollbakken, d Skisprungschanzi vo Oslo go aluägä. Miär sind bis ganz uifä und hend ä herrlichi Uissicht uber diä ganz Stadt gha. Miär sind fascht chle erstuind gsi hemmer absolut neyd miässä zahlä zum det uifä z derfä, vlt. hemmer ai eifach wiedermal äs Schiud uberseh. Fir einisch wärid miär hit sogar motiviärt gsi das Museum det go aluägä. Das isch aber momentan grad im Umbui, drumm hemmer leider vor Ort nid sehr viu uber diä Schanzi chennä erfahrä. Später simmer durnä Skulpturä-Park gloffä, eys hed d Sunnä und diä scheenä Bluämä aber besser gfauä aus d Skulpturä säuber. Ai ä frisch gmäitä Rasä hed eys grad aglached und miär hend ä chleynä Powernap gmacht. Äs paar vo denä kunterbuntä Stadt-Teili hemmer de nu agluägt und eys sehr ab dä Mänschä hiä amüsiärd. Herrlich wasmä i sonrä Stadt aues fir Mänschä atrifft. Äis isch aber klar, sie sind definitiv sehr frindlich. Hit ischs wiedermal richtig warm gsi und eysi Luscht nach Glace dementsprächend gross. Vouer Fräid hemmer eys de äs fäins Gelati gönnt. Äis hemmer aber glehrd, s nächst Mal mechemer ä Möwä-Versicherig! Chuim hed nämmlich d Fabienne ihres Glace agfangä ässä isch ä frächi Möwä vo hinnä cho und hed s ganzä Cornet schneu i aui Himmusrichtigä verteild. Schaad so Sachä. Nachemnä neywä Glace isch de das aber wieder fascht vergässä gsi und miär sind weyter ufnä scheeni Fjordfahrt. Det hemmer Oslo und diä chleynä umligendä Inslä vom Wasser uis beguätachtet. Äs isch so herrlich gsi. So 3 Wuchä sind durä und d Michi und d Fabienne immernu purlimunter. Ez wirds aber Zeyt fir Reisegruppä-Zuäwachs. Einisch luägä wenn dass das Flugi us dä Schweyz hit hiä landed.Read more