Buarbreen

Eysi Wander-Plän hemmer wägm Wätter leider ai hit nid chennä umsetzä. Nachm Zmorgä hedmä aber de trotzdem bi aunä ä scheychä Bewegigsdrang gmerkt. Auso hemmer eys guäd ipackt zum
am Wätter z trotzä. Hit hed sogar d Michi d Rägähosä firä gnu. Eyses Ziel isch ä Uissichtspunkt ufä Gletscher Buarbreen gsi. Scho bim Uifäwäg hed dä Wäg zum Teil eher amnä Bach glichä und miär sind ordli verrägned wordä. Dobä acho hed eys de dä Gletscher gleych chle zum Stuinä
brungä. S Meer und dä Gletscher so nooch binenand. Imnä chleynä Hittli hemmer de churz ä Paisä gmacht und ä Dichtigkeits-Check vo eysnä Rägächleider gmacht. Ufm
Zruggwäg sind de d Wäg zum Teil wirklich scho Bäch gsi. Aber das hed eys neyd gmacht und miär sind dä abenteyrlich Wäg mit Hängebrugg, Chettenä und rutschigä Stäi abä gloffä. Da miär vor paar Täg aui Folgä vodä SRF Dok Abenteuer Wildnis gluägt hend isch das fir eys nateyrlich käs Problem gsi. Nass simmer hit scho wordä drumm hemmer später beschlossä diä gleych Sauna vo gester nueinisch z buächä. Det hemmer immer wieder ä Gump i Fjord gmacht wo s Gletscherwasser vom Gletscher Buarbreen inä fliässt. Äs isch ä Wohltat gsi. Zrugg i eysem super Airbnb hed d Fabienne und d Michi nueinisch diä super Chuchi bruicht und äs guäds Thai zaibered. Da dä Dampfabzug ai hit nuni funktioniärd hemmer de idä Wohnig grad nueinisch chle s Gfihl vo Sauna gha. Zum Abschluss vom
Tag gids ez wieder paar Rundenä Brändi Dog.Read more