Naturspektakel Bolivien - Tag 2

Laguna Colorada - Volcán y Geisers Sol de Mañana - Desierto de Dali - Termas - Laguna verde - Laguna blanca

Tagwach esch am 6i am Morge gsi. Zor Verchöstigong heds Brot ond sogar Rüehrei gä. 🍳 Sobald de Jeep fertig glade gsi esch, hemmer üs weder ufe Wäg gmacht öber die weniger befahreni Route zode Laguna Colorado. Mir hend üs scho gfrogt, wieso mir ohni Stopp om die ganz Lagune omefahret, aber de agstüüreti Ussichtsponkt esches definitiv wärt gsi. 😍 Das muessmer eifach met de eigete Auge erläbt ha - onändlich vell Farbe ond e huufe Flamingos hend s Beld perfekt gmacht. 🦩 De Wäg hed üs wiiter zom Krater vom Vulkan gfüehrt, wo mir s'Broddle ond Rauche vode Geysir hend chönne beobachte - immer schön vorsichtig dasmer ned plötzli im 500° C heisse Magma landet. 🗻 De Honger stellemer bi üsere höttige Onterkonft, wo e atemberaubendi Ussicht ofe Salar de Chalviri bietet, ond gönd de rasch wiiter zode grüene ond wiise Lagune.🏞 Obwohl die beide Lagune ganz nöch binenand legget, esch die grüen Lagune voll mit Arsen ond dementsprächend geftig 🧪, deför esch die wiissi Lagune voll met Läbe 🐟. Grad pönktlich ofem Röckwäg schlots Wätter om ond so verbringemer de Obe im Schärme mit Wy ond Znacht bi spannende Gspröch zämme met üsere Groppe. 🍷 Ond wer häts dänkt, es hed sogar gschneit aber mir send jo schliesslich au uf 4730 m.ü.M. ❄️ De Schnee hed üs aber ned vomne obendliche Entspannigsbad ide Terme bi 37° C abghalte. 😊Read more