Naturspektakel Bolivien - Tag 3

Polques - Copa del Mundo - Camello Petrificado - Ciudad de Piedras - Laguna Negra - Cañón del Cóndor - Julaca - Puerto Chuvica - Hotel de Sal

Pönktlech zom Sonneufgang semmer am 5i ufgstande ond hend zerst mou 30min ufs zMorge gwartet, well d Chochi auä verschlofe hed.🙄 Gstärcht met Pancakes semmer abfahrbereit gse ond hend nomou 30min gwartet, well d Chochi üses zMettag no hed mösse vorbereite.🤷🏽‍♀️ So semmer met 1h Verspötig los ufne 2.5h Autofahrt zor Ciudad de Piedra. Die Felsformatione send zMetzt im Nirgendwo uftoucht, als hätt si öper det abgstellt. Onder anderem hemmer e Wältcup-Pokal, es Kamel, Aladin-Schueh, u.v.m. gse. 🏆🐫👢 Es hed ou no e chlini Chlättereinheit ufne Fels gä, womer zemli schwindelfrei hed mösse si, deför eschmer met de Ussecht belohnt worde. 🧗
Aschliessend semmer imene Dörfli bestehend us 2 Hüser go zMettag ässe. Diräkt hender de Verpflegigsstell, semmer zode Laguna Negra gloffe, wo ou de Kondor ide Vulkan-Felse heimisch esch. De Röckwäg esch wie usem Bilderbuech gse: d Lamas hend ufere grüene Wiise hendermne kristallblaue Teich friedlech graset ond üs in Rueh lo föteli mache.🦙🥰
Ufem Wäg zode Onterkonft semmer ane Nöieröffnig vonere Bar zMetzt im Nirgendwo (Julaca) iglade gse. Met bolivianischem Bier ond Latinomusig, hend alli Touris d Höfte gschwonge ond mer hend sogar no met de iheimische Chend töggelet.💃
Well de Sonneontergang i Näbel gheit esch, beziehmer diräkt üsi Onterkonft, wo komplett us Salz bestohd: Wänd, Tesch, Stüehl ond sogar s'Bett. 🌫️🧂 Met Speli ond feinem Ässe werd de letscht Obe met de Groppe im Cherzeschiin (Stromusfall) usklonge.🕯️Read more