• One Last Surf and Off to Beautiful Noosa!

    November 19 in Australia ☁️ 22 °C

    Hüt isch wieder en lange, aber richtig coole Tag gsi! Am 6:30i bini mit es paar Lüüt vom Hostel go jogge und nachher no schnell is Meer go schwümme. Denn häts scho gheisse: Zmorge esse, packe und uschecke.

    Bevor s wiitergange isch, hani nomal es Surfboard gmietet und mis Glück probiert. D Bedingige sind hüt allerdings ziemlich schwierig gsi. Vill Wind und Welle, wo direkt über mir broche sind. Aber Üebig macht de Meister! Und dSunnecreme (das mal au no mit Zink nahghulfe) hani hüt au grosszügiger uftreit, mit mässigem Erfolg..

    Zum Abschluss hani mir nomal en Smash Burger bi mim Lieblingsburgerlade gönnt. De Bsitzer hät mich sogar mit ere Umarmig verabschiedet und mir händ no es richtig cools Gespräch gha. So chlini Begegnige mached s Reise eifach speziell!

    Denn ischs mit em ganze Gepäck zur Bushaltestell und rund 45 Minute wiiter nach Noosa gange. Mis neus Hostel isch richtig cool und bis jetzt sogar eis vo mine Lieblingshostels!

    Obwohl ich komplett erledigt gsi bi, hani mich entschiede, am Abig trotzdem no Noosa Heads z erkunde. Und wow, was für en wunderschöne Ort! Traumhafti Stränd, schöni Hüüser, chlini Lädeli und überall richtig liebevoll gstalteti Plätzli. Kei Wunder wird da au so vill ghüratet!

    Amene chline See hani mi denn no zu es paar Fischer gsellt und mit ihne über s Fische und s Läbe da gschwätzt. Selber hani zwar nöd gfischet, aber es isch mega spannend gsi, eifach chli zuz’luege und mit de Lüüt is Gespräch z cho.

    Nachher no öppis fürs Znacht postet und zrug is Hostel. Jetzt bin ich aber definitiv parat fürs Bett!

    Morn staht mini nächschti Surfstund in ere Gruppe ah. Ich bi gspannt wi es i de Gruppe wird si und bin gspannt, wies mit mine Fortschritt wiitergaht!
    Read more