Bärgluft

In Da Lat faue zwöi Sache relativ schnäu uf. Erstens ischs tou cheuter und zwöitens isch aues Inszeniert aus wärsch ire Disneyland Stadt. Es het überau Skulpture u Fabelwäse, aues isch bunt agmale und du chasch überau uf irgendwelchi Bahne oder sonstigi Aktivitäte bueche. I ha am Morge im Hostel der Nils troffe. Är reist mitem Töff dür Vietnam u hetmi mitgno. Zeme simir d Region Da Lat abgfahre hei verschideni Tämple u Wasserfäu gsee, viiiiiu Kaffiplantagene, meh und weniger definierbari Wäse, si ga Rodle u hei es Kafi mitere wahnsinns Ussicht gnosse. Z eigentliche Highlight vo däm Tag si aber die kurfige Bärgstrasse mit beidruckende Ussichte u wunderschöne Landschafte gsi. O wemir beidi si froh gsi dasmir no hei e Jagge derbi gha simir am Abe zfride wider izz Hostel zrügg cho. Dert heimir üs när ir Restaurantuswahl la berate u si d Stadt z Fuess bi Nacht ga aluege. Nachemne sehr feine Znacht imene vietnamesische Restaurant simir no übere Nightmarket vo Da Lat gschländeret u wöunis der Tischgrill so het aglachet heimir nogad es zwöits mau Znacht gesse. Gägdie haubi10ni simir wider zrügg im Hostel gsi u zimmlich knüttlet izz Bett.Read more