Reset search
Vietnam
  • Wildflower

Vietnam

A 43-day adventure by Wildflower Read more
FollowInsightsCalendarShareShareBucket list
Newest first
  • WildflowerVietnamTraveler
    Der Affebärg het sim Name aui Ehr gmacht2Ganz ohni Chlätterpartie simir nid dürecho

    Bãi

    November 23, 2023 in Vietnam ⋅ ⛅ 28 °C

    Der Plan ischs gsi e Wanderig ufem sogenannte Affebärg zumene Ussichtspunkt z mache. Drum hei ig u der Pierre nachem Zmorge e Roller gmietet u si Richtig Hoger gfahre. Uf haubem Wäg heimir gmerkt dasmir hei vergesse z Tanke. Zum Glück no früeh gnue dases wider zrügg id Stadt het glängt. Schlussamänd simir de ca. am 1 bim Usgangspunkt vor Wanderig gsi u hei relativ schnäu gmerkt dasmir hie irgendwie nid erwünscht si. Mir hei verschideni Wäge probiert u überau si Securitys gsi wonis hei wäggschickt. Irgendwenn heimir usegfunde das der Bärg fürne Supperluxusresort meh oder weniger privatisiert isch worde u "Normalos" nümme erwünscht si hie. Chli frustriert simir zrügg dert häre womir üse Roller parkiert hei gha. Dert hez es par Stüeli gha und e Maa miteme Chüeuschrank wo übertüreti Getränk het verchouft. Mir si häreghocket u hei öppis trunke wo zwöi anderi Touriste usemne chline Wägli usem Urwald si usecho. I hase gfragt öbme da zum Strand abe chunnt u der eint het gmeint normalerwis ja aber wägem ville Räge u de Stürm sige Böim umgstürzt u der Wäg sig nümme passierbar. Mir hei beschlosse dasmirs glich probiere u womir scho fasch ufgeh hei, het der Pierre plötzlich es anders Wägli gfunde u mir hei ohni grösseri Chlätterilage bis a Strand abe chönne. Das isch äuä der schönst Strand gsi woni jeh ha gsee. Abgsee vo üs zwöi hez nume no e iheimische Fischer, es par Chrebse und Echse gha. Der Strand isch vo höche Klippe mit gfluetete Höline umgeh u witer usse hez offebar sehr schöni Riff. Leider heimir nüt zum Schnorchle derbi gha. Der Schwumm heimir glich sehr gnosse u d Sunnestrahle hei o sehr guet ta!
    Mir heinis när bi Zitte wider ufe Wäg zrügg nach Da Nang gmacht dasmir der Roller hei chönne zrügggeh und üses Gepäck im Hotel ga hole. Am 6i isches när ufe komfortabel Zug Richtig Hue gange.    Read more

    See translation
  • WildflowerVietnamTraveler
    121

    100'000 ₫

    November 24, 2023 in Vietnam ⋅ ☀️ 27 °C

    Nachdämmir gester Abe in Hue si acho heimir hüt wider e Roller gmietet für die verschidene Sehenswürdigkeite vo Hue ga azluege. Aus ersts simir zum Hồ Thủy Tiên gfahre. Das isch e Wasserpark wo 2004 het ufta und 2011 us finanzielle Gründ wider het müesse zuetue. Sit den isch nümme viu passiert dert. Är isch zrügggla worde u 2016 aus Lostplace bekannt worde. Es isch es spezieus Gfüeu gsi die Rutschine z gsee und ufder Tribüni z hocke und sich vorzsteue wies äch vor nonid so langer Zit het usgsee wo hie no Bsuecher si härechu cho zum Bade. Nachem Wasserpark heimir eigentlich die Berüemte Greber vode Kaiser vo früecher wöue ga aluege. Leider isch us auem e rise Touristeatraktion gmacht worde u mi mues für aues verhäutnissmässig viu Itrit zahle. Drum heimirs bir Besichtigung vo usse bela u si derfür mitde Roller uf Entdeckigstour. Underwägs heimir der Alex und der Dimitri wider ufgablet u mir si z viert am Parfümfluss gsi, über intresannti Houpersträssli gfahre u hei irgendwo am Strasserand Zmittag gesse.
    Der Abe heimir ire sacktüüre Bar verbracht. Derfür heimir e Platte Frücht übercho, jeh es Fläschli Wasser und immermau wider e Shot. Mir hei Billiard gspiut u si när gägdie 11i zrügg izz Hostel. Mir wärde irgendwie aui nid so würcklich warm mit dere Stadt. Drum fahremir morn am Morge früeh witer.    Read more

    See translation
  • WildflowerVietnamTraveler
    E riise Chiuche bi üsem Zwüschestop mitem Bus
    E verzwiflete Versuech es bitzeli z schlafe..het gloub nid würcklich funktioniertI chume süsch nid soviu zum Läse. Das hani gnosseD Snaks si nid aui glich gniessbar

    No Sleeper

    November 25, 2023 in Vietnam ⋅ ☁️ 25 °C

    Hüt am Morge isches mitem Bus vo Hue nach Phong NHA gange. Irgendwie heimir mitemne Schlafbus grächnet. Es hetsich aber de usegsteut dasmir die 4,5h imene Chline Van verbringe u dä mitem Schlafe isch chlei schwirig worde. Dämentsprächend grederet simir in Phong NHA acho. Hie isch die grössti Höli vor Wäut für die längt aber z Budget leider nid und usserdem si d Toure dert häre bis im Februar 2025 usbuechet. Es het aber no e Hufe anderi grossi Höline hie. Drum buechemir es Trecking für Morn u nämes gmüetlich der Räste vom Tag. Mir si z Fuess chli dürz Stedtli gschländeret, hei Snacks usprobiert u hei fesstgsteut das der ganz Ort vermuetlich nume wägede Höline isch boue worde. Es het nämlich abgsee vo übertürete Shops, Hotels u Restaurants absolut nüt hie.
    Am Abe sinis der Nils u der Moritz wider übere Wäg glüffe. Mir hei e lustige Abe gha u si bi Zite ga lige.    Read more

    See translation
  • WildflowerVietnamTraveler

    Höline, Dschungel und Bluetegel

    November 26, 2023 in Vietnam ⋅ 🌧 23 °C

    Am Morge am 8ti isches losgange. Mir si im Hostel abghout, zur Base bracht u brieft worde. Nachdäm aui iri Heume, Häntsche, Schueh u Ruckseck hei gfasst gha, isches i Dschungel. Die erste 20 Minute isches tou z Loch uf gange u wöus die ganzi Nacht het grägnet isches sehr gschlifrig gsi. När simir aber oscho bir erste Höli acho. D Elefantehöli het ihre Name de vile elefanteförmige Steine z verdanke. Si isch 60 Meter höch, 300 Meter läng und e sogenanti 'Trochehöli'. Heisst mi cha ine loufe/chlätere u mues nid schwümme, touche oder es Boot neh. Es heisst aber NID dasme troche blibt. Spetistens ab hie si d Schueh nämmlich zu Wasserwanderschueh umfunktioniert worde. Die Höli isch wahnsinnig imposannt gsi mit wunderschöne Felskonstelatione und Tropfsteine. Nach dere Höli simir ersch richtig i Dschungel. Mir si über schmali Pfade, dür diversi Flüss, über Feuse und umgstürzti Riseböim, hei gägä Mugge- und Bluetegelarmeeä kämpft, ufpasst dasmir vo kene Risedorne ufgspiesst wärde und keni giftige Pflanze berüere. Nach 1,5 h simir bim Ma Da See acho u heinis afamau vode Bluetegle befreit. När heimir Zit gha fürne churze Schwumm u vom 5,5m höche Feus i See z gumpe. Nachder Erfrüschig hez ungererä Plache gäge Räge, wo der ganz Tag het aghaute, Zmittag geh. När ischs nome 1,5h düre Dschungel bis zur Tra Ang Höli gange. Churz vorem Zieu heimir d Rute müesse apasse. Wöu der eint Fluss soviu Wasser het gha daser nid passierbar isch gsi, heimir überne Felsformation müesse übere chlättere. Das het nomau feiechli Närve und Trittsicherheit brucht. Ufder andere Sitte heimir üs när wider us üsne mit Schlamm tränkte Chleider gschäut u si mit Schwümmweste, Heum u Stirnlampe bewaffnet ca. 300m i die Höli ine gschwumme. Dinne heimir üsi Taschelampe abgsteut und e Dunkelheit erläbt winis nonie ha gsee. Es isch so fister gsi dasme die eigeti Hand vorem Gsicht nid het gsee. Eifach komplett schwarz. I dere Finsterniss heimirnis när vom Wasser wider richtig Tagesliechr la tribe. Das isch es sehr beidruckends Erläbniss gsi.
    Zrügg im Hostel heimirnis aui ufne Duschi und BBQ gfröit. Am abe am 9i isches när ufe Nachtbus gange.    Read more

    See translation
  • WildflowerVietnamTraveler
    14Elise(FR), Alex(FR), Pierre(FR), Andrew(AUS), Dimitri(IT), Moritz(DE), Niels(DE)

    Arrival 4:20am

    November 27, 2023 in Vietnam ⋅ 🌙 18 °C

    Nach 7h im Nachtbus simir am Morge am 4:20 in Tam Coc acho. Nachdäm mir üses Gepäck hei iz Hostel bracht u ar morgendliche Dämmerig hei zuegluegt simir am 6i izz erstbesste Restaurant ga Pho (viednamesischi Nudelsuppe) esse. När heimir üs mitde Töffe ufe Wäg id Stadt gmacht. Dert simir ga Gäut usela, zumene Handyshop wöu am Niels sis Handy kapput isch, zum Mech wöu am Moritz si Tacho bim Verlade i Nachtbus isch kapputgange, zum Coiffeur wonis nachem Haarschnitt zum traditionelle vietnamesische Tabak rouche het iglade, ga Käfele und im Markt ga Frücht probiere. När isch ca. 10ni gsi womir üs mit 5 Roller/Töffe ufe Wäg zum Hoa Lư Ancient Capital gmacht hei. Das isch leider abgsee vor Ussicht womir nach 300 Stägetritte hei gha nid bsundrigs sehenswärt gsi. Drum simir när witter Richtig Bai Dinh Pagoda und hei underwägs no Zmittag gesse. Bai Dinh isch e Alag wosich über 6 Kilometer erstreckt u under anderem z höchste religiöse Gebäude vo Asien druff steit. Das isch nach au dene Tämple und Pagodene woni izz scho ha gsee auso mit Abstand z Beidruckendste gsi. Mitemne Lift isches zum Abschluss bis z oberst ufe Turm gange wome e wahnsins Ussicht uf die Beidruckendi Landschaft het gha. Gägdie haubi6i simir när zrügg izz Hostel womir hei Icheckt u Duschet für när ir Stadt imene leider ungloublich schlächte Restaurant ga Znacht z esse. Es isch aber o chli glich gsi wöu mir si aui so düre gsi dasmir numeno izz Bett hei wöue.Read more

    See translation
  • WildflowerVietnamTraveler
    Der Dimitri und si nöi Fischerkolleg

    Nome Höline und es paar flügendi Gstaute

    November 28, 2023 in Vietnam ⋅ ⛅ 27 °C

    Nachdäm mir aui es Bett ohni Schüttel- und Hupieffekt hei gnosse, heimir üs ufteilt. Der Niels und der Moritz si mitde Töffe witer richtig Norde, ig bi mitem Andrew mitem Roller mit u die Andere si gane Bootstour mache. Mir si zum Bird Valley gfahre. Das isch es zimmlich witlöifigs Gebiet wo under Anderem 3 Höline, e Bluemegarte, E Geissebärg und es Vogelschutzgebiet beinhaltet. Das ganze isch nonid ganz fertig usboue aber der Bsuech hetsich glich glohnt. Mir hei ei Höli mitem Boot chönne ga aluege u die Anderi isch z Fuess begebahr gsi. Zum Vogelschutzgebiet heimir o mitemne Boot chönne. Das hetmi sehr a Tra Su Forrest im Mekongdelta erinneret. Glich isches nomau schön gsi soviu Vögu z gsee u vorauem z ghöre. Für die dritti Höli hez leider nümme glängt wöumir vorem Sunneundergang bir Mua Höli hei wöue si. Die isch imene Bärg wo über 500 Stägetritte z Fuess erreichbar isch. Vo dert obe heimir der Sunneundergang gluegt u d Flädermüs beobachtet. Wöus sehr viu Dunst ir Luft het isch d Sunne e fürige, orange Bau wome zimmlich diräkt cha aluege wöusi dür das garnid so häu isch. Es ish wunderschön zum aluege. Ufde Handyfotos isches leider sehr schwirig z zeige. Mir gfaut d Landschaft hie mit dene spezielle Bärge und Hügle sehr guet. Der Abe heimir hüt imene sehr viu bessere Restaurant aus Gester verbracht. Es het widermau Indisch geh u sogar der Siva (IND) het gmeint es sig auso sehr fein gsi.Read more

    See translation
  • WildflowerVietnamTraveler
    Mitem Bus ufd Fähri..i bi froh hani nid müesse fahre
    Es schwümmends Fischerdorf ir Ha Long Bucht11

    2'000 Insle

    November 29, 2023 in Vietnam ⋅ ☁️ 24 °C

    Hüt am Morge am 7ni simir ufe Bus Richtig Cat Ba. Das isch e Insle ir Ha Long Bucht. Nachdämmir mitsammt Bus ufd Fähri si simir ca. am 11:30 i üsem Hostel acho. Wöumir genau 6 Lüt si heimir e ganze Schlafsau für üs übercho fasch wines Privatzimmer.
    Ig u der Andrew heinis diräkt fürne Bootstour am Namitag agmoude wöumir Morn scho witer nach Ha Giang fahre.
    Mir si öppis vorde 3 abghout worde u när mitem Boot dürd Ha Long Bucht gfahre. Hie giz fasch 2'000 Insle. D Landschaft isch seehr beidruckdnd! Mir hei när chönne Kajak fahre und speter bimene wunderschöne Sunneundergang bade. Gägdie 7ni simir zrügg izz Hostel cho u heinis e gmüetliche Abe imene Restaurant gmacht.    Read more

    See translation
  • WildflowerVietnamTraveler
    1
    Schowider ufder Fähri

    Witsicht

    November 30, 2023 in Vietnam ⋅ ☁️ 25 °C

    Hüt hetsich üsi Gruppe trennt. Ig u der Andrew wärde am haubi4i abghout für mitem Nachtbus uf Ha Giang z fahre. Die Andere mache e Tagesbootstour u blibe no e Nacht lenger in Cat Ba. Nachdem mir üs verabschidet hei, simir mitem Roller i Nationalpark vo Cat Ba gfahre. Hie simir düre Dschungel zumene Ussichtspunkt gwanderet. O wes chli het grägnet isches eini vode schönste Ussichte gsi woni bis izz ha gsee! Leider ischnis nid sehr viu Zit blibe u mir si zrügg id Stadt dases no für Zmittag und e Duschi het glängt. Wie planet isches am haubi 4i losgange. Usder planete Akunft am 2 am Morge isch haubi4i worde. Mir hei när im Hostel nomau schnäu d Ouge zueta ir Hoffnig dasmir Morn müglichst usgruhit si füre Ha Giang Loop z starte.Read more

    See translation
  • WildflowerVietnamTraveler
    4

    BrummBrumm

    December 1, 2023 in Vietnam ⋅ ☁️ 19 °C

    Am 7ni isch tagwach gsi. Nach es paar Stund Schlaf im Nachtbus und no es paar im Hostel geiz nachem Zmorge los mitder Ifüerig, Materialverteilig und der Gruppeiteilig. I ha d Vanessa (DE) und d Leonie (AUT) scho bir Ifüerig troffe und wöumir aui säuber fahre simir sogar ir gliche Gruppe. Es git 9 Gruppe, 7 dervo fahre mit Easyrider, heisst si hocke hinger ufem Töff u hei e Fahrer, und 2 Gruppe fahre säuber.
    Der Ha Giang Loop isch die bekanntischdi Töffroute vo Vietnam und si säge o die schwirigsti. Si füert über 450km dürd Bärge ir Nöchi vor Gränze zu China.
    I fahre e haubautomatischi Honda Wafe.
    Ca. am haubi10ni isches los gange. Leider meints z Wätter nogad nid so guet mitnis. Es rägnet, d Strasse si rütschig und d Sicht isch ungloublich schlächt. Drum geiz nid lang bis z erste Bike abgleit isch. Bilanz nachem erste Tag i üsere Gruppe vo 13 Säuberfahrende: 9 Stürz. Abgsee vo es par Schürfige si aber aui unverletzt blibe. O mi hez einisch ufe Latz ghoue. Mir isch e Chue vore Töff. I ha zum Glück vorder Chue möge brämsä aber i bi dürd Voubrämsig izz Rütsche cho und ha när mitsammt Töff d Piruette dräit.
    Dür die vile Stürz simir när spät dranne gsi u hei der letst Pass bi chris dickem Näbu im Dunkle müesse abefahre. Gägdie haubi7 ni simir im Hostel acho. Mir si aui froh gsi u hoffe uf chli me Wätterglück die nächste 3 Täg.    Read more

    See translation
  • WildflowerVietnamTraveler
    1
    E atemberoubendi UssichtHallo Chinaz Eggcaffee isch es Dessert mit süessem, gschlagenem Ei und emene Espresso ungerinneZmittag

    Wätterglück

    December 2, 2023 in Vietnam ⋅ ☁️ 14 °C

    Ha Giang Loop Tag 2. Abgsee vo öpperem heimirs tatsächlich unfallfrei gschafft. Abgsee vo viu Töfffahre simir bi Bluememeitschi verbi cho wo üsi Haar hei wöue mache, si ufemne Ussichtsturm ohni Ussicht gsi, hei der Skywalk gmacht ou dä hättime e schöni Ussicht, si ar chinesische Gränze gsi und i ha äntlich z berüemte Eggcaffee chönne probiere.Read more

    See translation
  • WildflowerVietnamTraveler

    “Mot, Hai, Ba, YO!“

    December 3, 2023 in Vietnam ⋅ ☁️ 15 °C

    Hüt am Morge simir nach ca. ere Stund Bumpyroad fahre bim Nho Que Fluss acho. Hie heimir mit der ganze Gruppe e Bootstour gmacht. Und obwou z Wätter nach wie vor nid würcklich mitspiut heimir dert ungerde Wouche feiechli es schöns Usfährtli gha.
    Der Räste vom Tag simir viu uf unbefestigte Strasse gfahre, was vorauem wes no stotzig isch derzue zimmlich tricky isch, wöu aues pflotschnass isch. Mir chöme aber inzwüsche aui relativ guet z schlag mit üsne Bike u drum heimirs tatsächlich ohni Sturz bis zu üsem letste Homestay vo däm Loop gschafft. Am Abe hez traditionells Happy Water (Meisschnaps) geh und wie immer es guets Znacht.
    “Mot, Hai, Ba, YO!“
    (1,2,3, Cheers!)    Read more

    See translation
  • WildflowerVietnamTraveler
    1Das isch äuä die besti Ussicht vo 4 Tag Ha Giang Loop gsiLustigerwiis trifftmesich immer wider ohni öppis abzmacheIg u z Bike gsee beidi nümme so früsch us wie womir si gstartet.12

    FINISHER Ha Giang Loop

    December 4, 2023 in Vietnam ⋅ ☁️ 18 °C

    Der 4. und letst Tag von Ha Giang Loop startemir mitemne Sprung i Thâm Luông Wasserfall. So langsam simir aui chli düre aber d Erfrüschig hiuft füre Start i Tag. Zur Abwächslig rägnets Hüt mau. Derfür isches nid so näblig. Der Vorteil vo Räge isch das d Ussicht es bitzeli besser isch aus bi Näbu und wöumirs ir Gruppe so guet hei isch z schlächte Wätter irgendwie o garnid soo schlimm. Schlimm wirz nume denn we üsi Guides üs Biuder zeige wid d Ussicht wär we z Wätter guet wär. Nachdämmir churz vor Ha Giang plötzlich der Niels u der Moritz wider entgägeghupet si heimirs so umdie 5i gschafft. Mir si aui heil izz Ziel cho. Im Hostel heimir no duschet u Znacht gesse u si när aui ufe Nachtbus i verschideni Richtige witergreisst.Read more

    See translation
  • WildflowerVietnamTraveler

    food poisoning

    December 5, 2023 in Vietnam ⋅ ☁️ 17 °C

    I bi ca. am 2 am Morge in Sapa acho. Sapa isch e Ferieort ide Bärge. Vo däm gseeni izz aber no gad nid viu. I ha öppis verwütscht wo mi Mage nid so toll fingt u bi froh dasi d Busfahrt einigermasse überstah. Der erst Tag in Sapa verbringi houptsächlich im Bett. I has vo mim einte Hostel woni die haubi Nacht nachem Nachtbus no ha verbracht zumne andere gschafft, dert bini aber diräkt wider izz Bett. So gägdie 4i hanimi ufne churze Spaziergang gwagt. Bi aber nachemne früeche Znacht ure Massage am 8ti oschowider im Bett gläge. Speter hani erfahre dasi nid die einzigi bi gsi nachem Loop. Aber der Begriff "food poisoning" isch eine wome hie schono öppedie mau ghört. U scho fasch zur "experience" derzue ghört..Read more

    See translation
  • WildflowerVietnamTraveler
    2

    3'143 M. ü. M.

    December 6, 2023 in Vietnam ⋅ ☁️ 12 °C

    Nachdämi über 12h ha düregschlafe füelenimi hüt chli besser. Mir isch no chli flau im Mage aber i wot uf jedefau no öppis vo Sapa gsee. Drum hani e Roller gmietet u bi druflos gfahre. Die erste par Kilometer no im Räge aber a das binimi ja izz gwöhnt. Der erst Stop hani bim sogenannte "Silver Waterfall" gmacht. Hie chostet aues. Drum ou der Wasserfall aber die 20'000 VND (e knappe Franke) lige dinne. Nach däm Wasserfall bini witergfahre zum Nationalpark vor Region. Dä isch sehr naturbelasse gsi (z Pissoir isch da mit inbegriffe). Ou dert hez e Wasserfall gha. Für mi eine vode schönste woni bis izz uf dere Reis ha gsee. Bim Usgang vom Park hani när d Anne ufder Suechi nachder Talstation für ufe Funsipan troffe u churzerhand beschlosse mit ihre mit z ga. So hanis doch tatsächlich no bis zum höchsts Punkt vo Indochina (dadrin igschlosse o Vietnam) gschafft. Mir hei 2 Minute Wätterglück gha u beidruckendi Wouchespiu gsee. När hez leider gadwider komplett zuezoge. Aber die 2 Minute heimir gnosse. Speter hez no e Fuessmassage geh u es gmüetlichs Znacht ir Stadt.Read more

    See translation
  • WildflowerVietnamTraveler
    2
    132Schlafbus mit Massagefunktion

    Äntlich Sunne

    December 7, 2023 in Vietnam ⋅ ⛅ 15 °C

    Äntlich Sunne! I ha doch tatsächlich z Glück Sapa dochno sunnig u mit blauem Himmu z gsee. D Ussicht isch no viu schönner ausimirs ha vorgsteut. Ig u d Celeste si zeme ines Kafi womir isch empfole worde ga zmörgele u d Ussicht gniesse. När simir no chli dürd Stadt gschländeret, hei am See Zmittag gesse u si när beidi nachem Mittag mit verschidene Böse witer. Für mi geiz uf Hanoi. Die letsti Station vo mire Reis.Read more

    See translation
  • WildflowerVietnamTraveler
    2

    Lädele

    December 8, 2023 in Vietnam ⋅ ☀️ 27 °C

    Hüt isch Shopping agseit. Nachdämi mi die ganzi Reis ha zwunge nüt z choufe dasis nid mues mitschleipfe chani izz in Hanoi aues nachehole. I ha der ganz Morge dermit verbracht dür die unzählige Läde, Ständ u Lädeli vor Houptstadt vo Vietnam z ga, z verhandle und z luege. Am Namitag hani ir berüemte Trainstreet es Kokosnusskafi trunke und zmitzt ir Touristemasse probiert der verbifahrend Zug z verwütsche (mitder Kamera). Am Abe bini mitder Anne (woni in Sapa ha troffe), irere Kollegin und em Nemanja vo Serbie düre Nightmarket gschländeret. Dä isch leider chli entüschend gsi. Mir hei mit viu Ässe u verschidene bunde Ständ grächnet. Es het aber usschliesslich Chleiderständ gha und es isch o nid viu los gsi.Read more

    See translation
  • WildflowerVietnamTraveler
    3
    Bánh xèo - ä Art selfmade FrüeligsrolleBánh trôi tàu - Bäueli us Rispulfer gfüllt mit Sesam und grüene Bohne ire Honig-Ingwer Suppe (Süess)Bánh cuốn - Gedämpfti Riisröueli 1x Eifüllig & 1x Shrimpfüllig22Chả cá Thăng Long - Fisch Filet & Fisch Mage (Restaurant mit Michelin Stärn)Hoa Quả Dầm Hoa Béo - Mango mit Kokosnussglace & Sticky Rice mit Joghurt2

    Zwüsche Röicherstäbli & Notitzzetteli

    December 9, 2023 in Vietnam ⋅ ☁️ 29 °C

    I hami hüt mit 4 angerne Backpacker zemeta fürnes Taxi nach Quang Phu Cau. I däm Dorf wärde Röicherstäbli produziert und es wärde ganz viu Toure dahäre abote. Es ischnis aber empfole worde da säuber härezfahre wöume z gliche fürne töifere Pris überchunnt. Wöu der Vercher in Hanoi es bitzeli dicht isch heimir für die knappe 30km usder Stadt use gschlageni 1,5h gha. Im Dorf acho hetsich usegsteut dases abgsee vo dene Röicherstäblifäuder mit Fotostatione für Touriste i däm Dorf absolut garnüt git. Kei Füerig, kei Produktion wome chönnti zueluege oder Ständ wome öppis chönnti choufe. Und weme het wöue föttele het das 50'000 VND pro Person kostet. I ha mini Fötteli zum Glück scho gmacht gha bevorsinis si cho säge dases chostet. Am Schluss simir auso 3h im Taxi ghocket fürnes "gratis" Fötteli vo Röicherstäbli. Aber voila mir heis o so guet gha.
    Zrügg in Hanoi simir im berüemte Note Coffee es Egg Coffee ga trinke u hei säubstverständlich o e Notiz hinderla.
    Am Abe bini mitder Anne u der Mailin e Streetfood Walking Tour ga mache. Das isch es sehr cools Erläbniss gsi. Mir hei 3 Houptgäng und 2 Dessert chönne probiere. Aues isch typisches und/oder traditionells Esse vo Hanoi gsi und derzue heimir viu über z Läbe, z Ässe und d Kultur vo Hanoi erfahre.    Read more

    See translation
  • WildflowerVietnamTraveler

    Es letsts Mau

    December 10, 2023 in Vietnam ⋅ ☁️ 28 °C

    Die grösste Heruseforderige vo dere Reis bringt der letst Tag. Erstens: Packe. Da ig doch chli öppis ha kömerlet, isch mi Rucksack inzwüsche eher knapp vom Volume här. Nach ere guete Stund packe hanis aber tatsächlich gschafft aui mini Sache u Sächeli irgendwie uf Ufgabe- und Handgepäck z verteile. Nach Packe, Zmörgele u Uschecke bini zum Schnider mini Hose ga hole woni no ha la flicke und apasse und id Wöscherei mini Schue woni ha la reinige (die heis nötig gha). När hez no es letsts Eggcoffee gä, nomau zwöi verschideni Märkt (choufe hani aber nümme chönne wägem Gepäck), es vietnamesisches Zmittag, e nöiie Haarschnitt und e letsti Massage. Bim Zmittag hetmi übrigens e Vietnames gfragt wie lang dasi scho in Vietnam bi wöu ig ässi wie e Local..öb das positiv isch oder eher nid weisi izz o nid so genau..am Abe bini när mitder Anne no öppis ga trinke und ha ihre mini vietnamesischi SIM-Charte vermacht. I ha när mis Gepäck ghout u bi mitem Taxi richtig Flughafehotel.
    Zwöiti Heruseforderig: Bir Adresse vo Booking isch aber leider kes Hotel gsi. Mi hetmir d Verwirrig äuä agsee und e Local hetmir när erklärt, dass das Hotel der Name heigi gänderet. Dert acho ischmir erklärt worde dases das Hotel woni ha buechet nümme git. Es sig aber kes Problem si heige glich es Zimmer fürmi es sig eifach türer und ohni Fänster und z Zmorge sig o nid inbegriffe. Nachdämi däm fründliche Herr ar Rezeption (isch übrigens inzwüsche scho der Cheffcheff gsi) mitem nötige Nachdruck ha erklärt dasi weder me wirde zahle no uf mis Zmorge verzichte und dases nid mis Problem isch wesi ires Hotel uf Booking fausch usschribe hani doch tatsächlich mis Zimmer zum ursprüngliche Pris übercho u z Zmorge weisi mir morn Morge am 4:30 ufz Zimmer bringe.
    Dadermit es letstsmau..guet Nacht Vietnam...    Read more

    See translation
  • WildflowerVietnamTraveler
    2Es letsts Zmorge in Vietnam
    Es bitzeli zuegleit heimir aber es het aues platzGuangzhou vo obeAmsterdam vo obe

    Tschüss, merci, schön ischs gsi!

    December 11, 2023 in Vietnam ⋅ ☁️ 23 °C

    Pünktlich 4:30 hez ar Zimmertür klopfet u mis Zmorge isch cho. När isches oscho ab a Flughafe. Vo Hanoi uf Guangzhou (China), vo Guangzhou uf Amsterdam u vo Amsterdam uf Züri. Nach guet 20h Reisezit, über 6'500 Flugmeile und X Sicherheitskontrolle bini am 22:30 z Züri glandet. Jede Flug isch ruhig und ufd Minute pünktlich gsi und sogar mis Gepäck hez bis Züri gschafft. Z Züri am Flughafe hani dank em Marco numeni müesse izz Outo hocke u bi diräkt uf Thun chauffiert worde. Merci viu Mau! Und merci Vietnam für die unvergässlichi, spannendi und idrücklichi Zit! I pfuuse izz afamau e Rundi...Read more

    See translation
    Trip end
    December 11, 2023
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice