Vo Canberra nach Long Beach

Hüt morgä bi Zytä si mir z Canberra abgfahrä richtig East Coast. Üsä 1. Punkt uf dr Listä wärä d Minnamurra Falls gsi. Nacherä aasträngendä u närvä ufriebendä fahrt überä Macquire Pass si mir äntlich dert aacho, nur um festzsteuä, dass mä genau hüt nid zu däm Wasserfau cha loufä wägem Rägä 🙁 Zum Glück hei mir aber ja nu ä angerä Wasserfau, Gerringong Falls, uf dr Listä, wo nid mau so wiit äwäg isch. Bim luegä wos dürä geit hei mir aber festgsteut, dass d Strass für dert härä gsperrt isch 🤦🏼‍♀️ U dr Umwäg wär über 1h gsi u da z Wätter eh nid so toll gsi isch, hei mir haut de dr nächscht Punkt uf üserer Listä aagstüüret.

Im Dorf Kiama isch z Wätter scho ziemlich besser gsi, äs het eifach extrem gwindet 😅 Entsprächend isch aber das Blowhole extremer gsi u zum Teil hets ziemlich Wasser usä usägsprützt.

Z Mollymook si mir hüt z'erschtä mau i denä Feriä chli am Strand gah spazierä. Schad isches nid ganz so warm gsi, süsch wärs mega schön gsi zum nu chli lenger si 🏖️ Nid wiit wäg isch z Dörfli Ulladulla cho wo mir nu si gsi gah aaluegä. Das het üs jetzt aber nid ganz so guet gfauä, äs het o extrem viu Verchehr gha.

Gägä Aabä si mir z Long Beach bi üserä hütigä Ungerkunft aacho. Hüt si mir bir Janine daheim, si vermietet äs paar Zimmer i ihrem Huus. Näbscht üs hets nu 2 angeri Parteiä u äs paar Camper rund um z Huus. U mega viu Kangaroo hets o um, dr Christian het sogar zwöinä chönnä bim kämpfä zuäluegä 🤨

Jetzt si mir nu am luegä wis morn wiiter geit 😊Read more