Tag 6: Voller Hochs und Tiefs ⛰️

Dä Morge het weder einisch meh mit emene wunderbare Zmorge ih eusem Hotel gstartet. Währendem hei mer sogar no Bsuech vomene chline Frächdachs becho 🥰.
Nachem ässe hei mer eusi 7 Sache packt und sih mit em Uber (aso do isch es Grab) richtig Süde. Mer hend richtig Boomermässig jetzt Uber (aso äbe Grab 😂) voll für eus entdeckt.
Euses Ziel: Turtle Conservation And Education Center (TCEC). Mer hei do e chlini Tour gha durs Center. Do hend sih verschideni Schildchrötli, vom Ei bis zu de usgwachsnige wo uf ergend en tragischi Art und Wis verletzt worde sih. Sig das dure Ghöder im Meer wie zum Bispiu Plastiksäck, oder dur Fischernetz, dur Schiffsschrubene, ilegali Jagt oder au durch zum Bispiu Haie. Mit viu Härzbluet wärde do di verletzte Schildchrötli weder ufpepplet damit si de hoffentlich weder cheu frei glo wärde. Zudäm deu sih död au d Eier usbrüete und me het när d Möglichkeit, bem frei lo vo de Babies mitzhälfe. Das isch es wunderschöns Erläbnis gsih. Het aber leider au en extrem Fade bihgschmack gha. De Grund isch, dass mer die wunderschöne Gschöpf frei glo hei aber halt leider rundume öberall dä Ghöder isch. By the way: in Bali gits 3 verschideni Arte vo Meeresschildchrötli 🐢🐢🐢.
Usserdäm hei mer grad no dörfe miterläbe, wie früschi Babies gschlüpft sih 🥰.

Nachdäm mer s Centrum verlo hend sih mer keni 10 Meter wit cho und mer isch e chline Strossewelpe umd Bei gschmichlet 🥺. Dä het so gjömmerlet und ich hät ihm so gärn wele hälfe. Aber ich ha nüt für ihn chöne mache und ich be ehrlich, do sih mer d Träne nur no abegloffe 😞.

Ufem Rückwäg hei mer no witeri extremi Usmass vom Abfallproblem ahtroffe. Mer hei e chline Teil vor Mülldeponie gseh. S Problem do isch de extremi Tourismus wo natürlich mega viu Abfall produziert. Dezue chunt das leider dih nötigi Infrastruktur für dih richtigi Entsorgig fählt. Und was es au ned besser macht: die extreme Naturphänomen wo mer jetzt au hutno hei dörfe miterläbe mit em Räge und de Überschwemmige. Das schwemmt de ganz Ghöder au no ah Strand ah wo de ebe viune Tier zum verhängnis wird.

Mit sehr gmischte Gfühl sih mer de weder retour zum Hotel. Zum das ganze chli z verdaue hei mer eus defür entschide, zersch mou en Mittagsschlof z mache. Mer sih richtig k.O. gsih.

Nachdäm mer verwachet sih hei mer afo öberlege uf was mer lust hei. Mer hend eus de defür entschide, nochli dur Ubud z schländere und echli go z lädele. Nachem lädele hets natürli no Hunger gä und mer hend im Restaurant Pistachio es super feins Znacht dörfe gniesse mit enere tolle Band.

Dä Tag hüt het eus weder einisch meh zeigt das Freud und Leid sehr nöch cheu benenand ligge. Mer sih dankbar für alles wo mer hend und ich glaube die Täg do in Bali gebe eus en nomol viu besserig wohrnähmig ufd Natur und zeigt eus eifach wie wichtig das es isch, dass mer alli meu Sorg träge zu eusere Natur. 🌳

Jetzt leu mer de obe uf eusem Balkon loh usklinge und luege was de morgig Tag für eus bereit het.✨Læs mere