Tag 41 & 42: Nationalpark & Denpasar

Noch de Vulkanwanderig ech am nöchschte Tag scho die nöchscht Aktivität agstande, nämlech en Bsuech im Taman Nasional Bali Barat Nationalpark. Das Naturschotzgebiet esch de letschti Ort, wo de Balistar no vorchond, de letschti Balinesisch Tiger esch do vor ca. 90 Johr gschosse worde. Weder eschs met 06:00 verhältnismässig früeh losgange. E chliini Verzögerig heds gäh, wel mer keis Moggeschotzmettel iipackt hend, de hed de Putu, üse Guide för dä Tag, schnell öppis gchauft. Soffell schmöckt definitiv besser als Anti-Brumm, aber scho währed em Iistriiche hemmer die erschte Stech iikassiert. Einigermasse gwappnet gäge die Bluetsuuger semmer döre Mangrovewald gloffe ond hend interessanti Sache erfahre öber die verschedene Pflanze ond Tier i dem Gebiet vom Park. De Putu hed üs sogar dezue ufgforderet, of de Mangroveworzle omezchlättere zom üs zeige wie starch die dönne Gebilde doch eigentlech send. Im Ufergebiet hemmer ganz vel Einsiedlerchräbse ond au es paar Schlammspringer gseh. S'Ushängeschild vom Park, de Balistar, hemmer chorz drufabe au no gseh, leider nor chorz. Aschliessend semmer landiiwärts ond bärguf gloffe, wo sech d'Flora grad weder völlig veränderet hed. D'Fauna in Form vo Mogge leider ned... mer hend glehrt, dass de Ficus (zu Deutsch: Würgefeige) zwor e schöni Pflanze esch, aber eigentlech rächt gemein esch. Lianeschwinge, Affe beobachte ond en Fischzucht send wiiteri Pönkt i dere coole Tour gsi. Verschwetzt ond verstoche (d'Jasi hed öppe nüün Stech am Födli gha. Det hed sie keis Moggemettel iigstreche gha...) semmer zrogg is Guesthouse, wo mer nömm vel gmacht hend.
Am nöchschte Tag semmer zrogg of Denpasar. Die fröschi Kakao- Frocht us Lombok no in Erinnerig, hemmer üse Fahrer bätte, onderwägs no en chorze Stopp binere Kakaoplantage iizlegge, demet mer nomol chli Kakaofrocht chönd schnause. Das muess en zemmlech ongwöhnlechi Bitt gsi sii, wel är gfrogt hed öb mer ned Kokosnoss oder Kafi meined. "Neinei, Kakao! Mer wend fröschi Kakaofrocht ässe." Är heds üs gliich ned glaubt ond üs zonere Kafiplantage brocht (siehe Usflog Uluwatu). D'Frau det esch ähnlech verwonderet gsi ab üsem Aliege, hed üs de aber nätterwiis es paar pflöckt ond mer send glöcklech gsi 😊 In Denpasar acho, hemmer weder es Zemmer im gliiche Floghafehotel bezoge, wo mer scho us Tag 28 - 31 könnt hend. Morn heissts nämlech "Sampai jumpa Bali" ond "Xin chao Hanoi".Read more