Reset search
4/7- Wältreis
  • Jasmin Steiner
  • Daniel Felder
Oct 2024 – Jun 2025

4/7- Wältreis

De Dani ond d'Jasi gönd mol go luege, wies a anderne Orte so esch. Read more
+5
FollowInsightsCalendarShareShareBucket list
Newest first
  • Trip start
    October 14, 2024
    4/7- Wältreis
    21

    1. & 2. Tag Luzern- Tokio

    October 14, 2024 in Switzerland ⋅ ☁️ 17 °C

    Noch zwoi problemlose Flög via Bangkok semmer am früehche Obig in Tokio acho. Problem met de eSIM, Kreditcharte ond ÖV hend förne holprige Start gsorgt, die hemmer de aber gröschteteils chönne löse. Nochdem mer üses chliine Zemmerli bezoge hend semmer met em Kevin om d'Hüüser zoge ond hend üs scho die erschte Ramen gönnt.Read more

    See translation
  • 4/7- Wältreis
    Üses z'Morge21

    3. Tag: Tokio

    October 16, 2024 in Japan ⋅ ☁️ 22 °C

    S'esch gar ned so eifach, es Ticket för d'Metro z'chaufe. Aber au die Ufgab hemmer gmeischteret, nochhär no es z'Morge gholt bevors de of Erkondigstour gange esch. Zerscht im Gebiet ome Kaiserpalascht, nochhär rechtig Akihabara, wo för sini Anime- Szene bekannt esch. Am Obig semmer im teamLabs Planet gsi, es Konschtmuseum met höchem Social media- Faktor :) De Dani hed det au ändlech gsecheret vegetarischi Ramen döffe gnüsse 🍲Read more

    See translation
  • 4/7- Wältreis
    Z'Morge im Zemmer
    FischmärtGolden-Gai

    4.&5. Tag: Tokio

    Oct 17–18, 2024 in Japan ⋅ ⛅ 22 °C

    Am Do semmer am Vormittag a zwoine Fischmärt gsi. De erscht esch sehr touristisch gsi, de zwoit sehr industriell. Det hät mer chönne be de Thunfischauktion zueluege, aber deför am Morge am vieri ufstoh hemmer de doch ned wellle... Am Nomittag semmer of Shibuya, was en zemmleche Kontrast zom Morge gsi esch: Vel Lüüt öberall ond i de Takeshida Street hesch gar ned gwösst wo döreluege, so vel heds vo allem gha (näbscht Honde- ond Chatzekafis au es Igel-Kafi...). Zwoi Siiteströssli wiiter hemmer aber no e gueti Bar/Mikrobraui gfonde wo läär gsi esch, de Dani ond de Kevin send somet glöcklech gsi.

    Am Friitig semmer be Nieselräge of Shinjuku, wo mer de Godzillachopf ond s'Golden-Gai gseh hend. Golden-Gai esch zemmli interessant, aber alles anderi als golden: Ofere Flächi vo vellecht 200×200m reiht sech ei Bar ane anderi, zwoistöckig ond jedi so chlii, dass wohrschiinlech ned meh als 3 Lüüt gliichziitig chönd denne sii. Am Nomittag/ Obig semmer no ofe Skytree, em dretthöchschte Gebäude of de Wält. Natürlech hemmers genau so preicht, dass die ober Ussechtsplattform i de Wolche gsi esch, aber cool eschs trotzdem gsi.

    Morn gohts för üs wiiter Rechtig Fuji ond de Matsumoto, de Kevin flüügt weder hei.    Read more

    See translation
  • 4/7- Wältreis
    Abfahrt vom Busterminal in Shinjuku
    1Morge am 06:30, s'esch no arschzapfechalt (fendt de Dani)Alles strömt noch Nagano wenn de Laub-Bericht (dä gets wörklech!) gueti Bedingige voruusseidBäre hemmer zwor keini gseh...... deför aber Affe. Fascht s'Gliiche (fendt d'Jasi).2

    6.&7. Tag: Fuji & Kamikochi

    October 19, 2024 in Japan ⋅ 🌫 14 °C

    Am Samschtig esch es met em Bus wiiter of Kawaguchiko gange. Det semmer zomene Ussechtsponkt ufe gloffe zom de Fuji i sinere volle Pracht chönne bestuune. Met em Wätter hemmer Glöck gha, en chliine Wolchehuet hed er aber trotzdem agha. Es Zeiche, dass es no chönnt cho rägne... spöter semmer de met Bus ond Zog wiiter of Matsumoto, womer no ganz schnell d'Borg send go aluege (be Räge) bevor mer wiiter zom Elia send, wo üs i sim schöne, traditionell iigrechtete Huus för d'Nacht beherbergt hed.

    Am hötige Sonntig semmer weder früeh ufgstande ond euse grossartig Gastgäber Elia hed eus a Bahnhof gfahre. Amene Sonntig am 6.37 esch de Zug au, wie vom Elia prophezeit, volle gsi. Anschiinend wennd all Japaner:inne di verwelkende Bäum i de Präfektur Nagano go aluege. Nochdem mer medem Zug ond Bus in Kamikochi acho send, hemmer eus uf de Wäg id Berghütte Yokoo Sanso gmacht. Am Afang semmer omgä vo Lüüt gsi, nach öbe 2/3 vom Wäg eschs denn ändli chli 'einsamer' worde. Höt öbernachtemer somet im japanische Pendant zom SAC. D'Wanderig esch sehr schön ond s'Ässe - wie emmer - sehr fein gsi.    Read more

    See translation
  • 4/7- Wältreis
    TakayamaShirakawa-GoFüürstell im Kenda House2Z'Nacht im HotelZ'Morge im Hotel. Ned ombedengt das, was mer üs so gwöhnt send...1Nächtliches Kyoto

    8. & 9. Tag: Shirakawa-Go und Reisetag

    October 20, 2024 in Japan ⋅ ☁️ 13 °C

    Mäntigmorge semmer weder früeh ufgstande, wel mer en straffe Ziitplan gha hend zom of Shirakawa-Go z'cho, üsem Tagesziel. Dank Power-Wandermodus semmer i zwoi Stond bem Busterminal gsi, wo mer de Bus of Takayama gnoh hend. Det hemmer no Ziit gha zom i de schöne Altstadt dörelaufe, d'Jasi hed sech debii no en Hida-Beef-Spiess gönnt. Wiiter eschs de met em Bus of Shirakawa-Go gange, es Dorf met historische Hüser im Gossho-Stil, vergliichbar met em Ballebärg Museum. Üses Hotel esch rächt speziell gsi: Es Onsen-Hotel, sehr traditionell ghalte. Mer hend bem Iichecke traditionelli Yukata ond Tabi-Socke becho, met dene esch mer denn au sälbstverständlech im Hotel omegloffe. S'Znacht esch fein gsi, meischtens semmer üs aber ned secher gsi, öb mer s'jewiilige Grecht wörklech so ässed wies dänkt gsi wär :) Nochhär hemmer no es Bad im private Onsen chönne gnüüsse, das esch noch de vergangene Wandertäg sehr agnähm gsi. S'Zmorge hed üs ähnlech öberforderet, d'Wiiterreis of Kyoto esch aber riibigslos gloffe.
    Am Tsiischtignomittag semmer in Kyoto acho ond send no am Nishiki-Market verbii, wos för d'Jasi Takoyaki ond före Dani Curryramen gäh hed. S'Geishaviertel Gion hed üs sehr guet gfalle, Geishas hemmer aber no keini gseh.    Read more

    See translation
  • 4/7- Wältreis
    1

    10. & 11. Tag: Kyoto

    October 23, 2024 in Japan ⋅ ☁️ 26 °C

    Am Mittwoch esch Touriprogramm agseid gsi: Zerscht semmer de Arashiyama Bambuswald go aluege. Wels det aber so vel Lüüt gha hed, semmer de relativ schnell wiiter zom goldige Kinkaku-Ji- Tempel, wos nor no meh Lüüt gha hed! Liecht gnärvt ab dene müehsame Touri-Groppene (ond einzelne Individualtouriste (mer zelled üs do sälber ned dezue, wel mer üs natürlech a d'Touriste-Etikette halted 😉)) semmer zrogg i d'Stadt ond send dör d'Strosse ond Parks gschlenderet bes es de Obig gsi esch ond mer i üse Ramen-Chochkors hend chönne goh. Es hed mega Spass gmacht, die eigete Nudle z'mache; öpper vo üs hed do wörklech au sehr grosse Iisatz zeigt bem Teig bearbeite. D'Ramen send fein gsi, mer möched die dehei de secher au mol.

    Usem gestrige Tag hemmer üsi Lehre zoge ond hend üs drom früeh ofe Wäg of Inari gmacht zom de berüehmti Fushimi Inari-Taisha Schrein aluege. Die tuusige orange "Torii" send sehr iidröcklech ond schön, wenn mer aber weiss, dass sie vo Familene ond Firmene gsponseret send ond entsprächend beschriftet send (japanischi Schriftzeiche gsähnd i üsne Auge halt schöner us als "Nippon Kosei Light Co., Ltd. 1-207"), verlüürts chli de Zauber... Spöter eschs denn no of Ninenzaka gange, en härzige Stadtteil met traditionelle Hüser ond ere füfstöckige Pagode i de Metti. Au es bekannts Fotimotiv. De Räscht vom Tag hemmer imene Park no gmüetlech loh usklenge ond am Obig semmer no fein go ässe, wo d'Jasi ehres neue japanische Lieblingsässe entdeckt hed: Okonomiyaki.    Read more

    See translation
  • 4/7- Wältreis
    Hend es zemmli interessants Okonomiaki-Resti gfonde, wo das Grecht au vegan zuebereitet1

    12. & 13. Tag: Osaka & Nara

    October 25, 2024 in Japan ⋅ ☁️ 21 °C

    Am 25. semmer wiiter of Osaka. Üse erschti Nomittagsspaziergang dör d'Stadt hed üs grad voll is Usgangsviertel Dotonbori gfüehrt. Liechter ond Reklametafele öberall, mer weiss gar ned, wo aneluege! Scho nocheme halbe Tag hemmer gmerkt, dass sech Osaka zemmli vo Tokyo ond erscht rächt vo Kyoto onderscheidet: Lüüter, wilder, dräckiger.
    Us dem Grond (ond wägem Wätter) hemmer üse Tagesusflog of Nara vorzoge ond send scho am nöchschte Tag die Stadt, wo för ehri Reh bekannt esch, go aluege. Natürlech heds au en Tämpel gha. I de Altstadt vo Nara hemmer d'Möglechkeit gha, ines 100-jöhrigs Huus inezluege ond hend üs sogar no as Kalligraphie-Zeichne gwogt. Dä Usflog hed üs wörklech Spass gmacht ond esch en willkommeni Abwächslig zom hektische Osaka gsi.    Read more

    See translation
  • 4/7- Wältreis
    1
    111Wo ist Walter?Wow, 3% Stiigig 😆Velofahrerschrein oder so

    14. & 15. Tag: Osaka & Shimanami Kaido

    October 27, 2024 in Japan ⋅ ☁️ 24 °C

    De zwoiti Tag in Osaka hemmer för Sightseeing gnötzt. Be Sonneschiin semmer Osaka Castle go aluege, e sehr imposanti Borg metere rächt wiitläufige Alag. Aschliessend semmer meh oder weniger ziellos dör d'Stadt gloffe, "getting lost", wie de moderni Reisendi seid 😉 Do debii semmer ane Pro-Trump-Demo änegloffe. Als Lozärnerin ben ech vom Wage met de Trumpfigur (met vel zgrosse Händ) beiidrockt gsi (natürlech nor vom handwärchleche Ponkt us gseh). Vom orange Grossmuul semmer zomene grüene Grossmuul wiiter, nämlech en Tämpel meteme riesige Leuechopf. S'Muul vo dem Leu dient normalerwiis als Böhni, leider semmer ned i Gnoss vonere Vorstellig cho.
    Am nöchschte Tag semmer met em Shinkansen wiiter of Onomichi, wo mer üse ursprönglech Plan vo Veloferie es Stöck wiit realisiert hend. Mer hend üs zwoi Velo gmietet, üsi schwäre Rocksäck amene Transportdienscht avertraut ond hend üs ofe Shimanami Kaido begäh, anere Veloroute, wo vo Onomichi of Imabari öber ei Fähri, füüf Insle ond sächs Brogge, total öppe 70km, füehrt. Am erschte Tag semmer 41km bes of Hakatacho Ikata gfahre, wo mer üses erschte Bad im Meer gnoh hend.    Read more

    See translation
  • 4/7- Wältreis
    Aktivi Kafipause1

    16. Tag: Shimanami Kaido & Mitsu

    October 28, 2024 in Japan ⋅ ☁️ 20 °C

    De zwoiti Tag vo eusere Velotour hed liecht rägnerisch gstartet (of de Nomi hed de Wätterbricht meh Räge agseit, drom semmer relativ glii los).
    Die letschte paar Kilometer hemmer denn bald hender üs gha, ohni dorchnässt z'wärde.
    Vo Imabari nach Matsuyama semmer aschliessend medem Zug greist ond hend de Stadtteil Mitsu ufgsuecht, en Hafebezirk, wo sech eusi Onderkonft befonde hed.
    Of de Suechi nocheme Restaurant semmer denn meh oder weniger zuefällig amene Bierautomat ond denn imene chline Guesthouse med eigeter Brauerei verbi cho. Met em Apèro intus semmer denn im Resti "Itosan" iigchehrt, wo en trinkfreudigi Vierergruppe am Trese näbe eus gsi esch. Die hend üs denn bald ines Gspröch met Händ ond Füess verwicklet ond mer send de restlich Obig med de Misuki, Kosue, medem Shou ond em Taim det verhocket. Mer hend kei Ahnig, wie mer d'Näme schriibt oder öb mer sie öberhaupt rechtig verstande hend, aber hends gliich cheibe loschtig gha metne.
    出合えてよかった (Deaete yokatta).    Read more

    See translation
  • 4/7- Wältreis
    Mer gfendt in Japan i jedere Stadt anderi Toledeckle1Wer treids besser? ;)2Hends ächt es Kafi welle oder eifach nor i Schärme?FluetEbbe

    17. - 19. Tag: Hiroshima

    October 30, 2024 in Japan ⋅ ☁️ 23 °C

    Am Mettwoch semmer med de Fähri of Hiroshima. Hongrig semmer go Udon Nudle ässe ond d'Stadt erkunde. Mer hend vel Ziit bim Friedenspark verbrocht, wo sech medem Abwurf vo de Atombombe usenand setzt. Scho bevor mer zo dem Park cho send, hemmers teilwiis bedröckend gfonde, dör die Strosse z'laufe ond debii z'wösse, dass vor gar ned mol so langer Ziit alles em Ärdbode gliich gmacht gsi esch. Vor allem de Genbaku Dome, s'einzige Gebäude, wo hött no vo dem 06. August 1945 züügt, esch iidröcklech. S'Znacht hemmer imene chinesische Restaurant gnosse.

    Am nöchschte Tag semmer Hiroshima Castle go aluege. Die usprönglech Borg hed d'Atombombe ned öberläbt ond was mer drom gsi send go aluege, esch en Nochbau. Obwohl mer doch einigi japanischi Borge gseh hend bes jetz, semmer no nie i einerer denne gsi, was jetz nochegholt worde esch. Of vier Stöck hemmer interessanti Sache öber d'Entstehig vo Hiroshima ond s'Samurai-Wäse erfahre. Dä Usflog hed üs de grad no zo üsem nöchschte Filmobig inspiriert: The last Samurai (schiinbar send alli Japanerinne i Tom Cruise verliebt gsi, wo dä Felm use cho esch). Am Obig eschs nomol ganz interessant worde, wel Halloween gsi esch ond Japaner sech bekanntlech gärn verchleidet. I de Hauptiichaufspassage esch mer sech vorcho wie a de Lozärner Fasnacht, das esch wörklech no ganz loschtig gsi.

    De Tag druf hemmer bi taifunbedingtem Räge uf de Insle Miyajima verbrocht. D'Insle esch wohl vor allem wägem riesige Torii, wo sech bi Fluet im Wasser ond bi Ebbe '"a Land" (= ofem Trochne) befindet, bekannt. Mer hend zuesätzlich no de Senjokaku Pavillion bsuecht, en Schrein, wo nie ganz fertig gstellt worde esch ond drom kei Wänd hed. Zom Glöck, muess mer säge, wel so hed mer en super Blick of d'Bäum ringsome ond ofs Meer. Am spötere Nomi semmer denn weder zrogg ond hend no en Bsuech imene Onsen gmacht.    Read more

    See translation
  • 4/7- Wältreis
    1
    Au in Japan fiired mer Wiehmachte. Oder hed eifach Freud a de Wiehnachtsdeko...Uftritt vonere japanische Girlband (oder so...)E Yamakasa-Tragi: Es 10m höchs japanischs Pendant zom Fasnachtswage

    20. & 21. Tag: Fukuoka

    November 2, 2024 in Japan ⋅ 🌧 20 °C

    Ond scho esches Ziit worde, dass mer eus zom letzte Ufenthaltsort vo eusere chorze Japanreis begäbid, nach Fukuoka. Das hed sech denn aber chli schweriger gstaltet als dänkt.
    Bem Zmorge hend plötzlich alli Handys im Zmorgeruum glüütet. Mer hend denn uf euses eigete gluegt ond feschtgstellt, dass en Onwätterwarnig usegä worde esch, beträffend Gebiet om Hiroshima, teilwiis met Evakuationsufforderig. Das esch denn au för die nöchscht Stond so wiitergange, Warnig a Warnig, set geschter heds au nie meh ufghört rägne. Veronsecheret semmer denn trotzdem a Bahnhof ond - Chaos! D'Hälfti vo de Zög usgfalle, die ander Hälfti massivi Verspötige. Dä Tag esch drom schnell verzellt: Räge, warte, Mönsche debii beobachte, wies sech verzwiiflet i scho öbervolli Zög quetsched, schliesslech de sälber no Zog fahre. In Fukuoka semmer denn eigentli nome no go Znacht ässe ond d'Stadt es betzli aluege.

    Das esch denn au s'Programm am kommende Morge gsi. Bimene Bsuech imene Huus, wo im Rahme vonere Expo i de 1910er Jahr im europäische Stil baut worde esch, hemmer anere Tee-Zeremonie, gleitet ond döregfüehrt vo Chend, teilgnoh. Als offesechtlechi Touris semmer chli ufgfalle ond die Jöngscht esch sechtlech närvös gsi 😊 D'Jasi hed am Obig no die letscht Chance gnötzt, es Stöck Wagyu Beef z'ässe. Morn gohts nämlech wiiter of Indonesie.    Read more

    See translation
  • 4/7- Wältreis
    1

    Tag 22, 23 & 24: Flug und Lombok

    November 4, 2024 in Indonesia ⋅ 🌩️ 29 °C

    De Flog vo Japan of Indonesie met Transfer in Seoul esch tiptop gange. Am spötere Obig semmer in Bali acho, bes mer denn aber us dem Floghafe dosse gsi send, eschs de doch no es Ziitli gange met Visum beaträge, Gsondheitsdeklaration ond Zolldeklaration usfölle. De erschti Schrett osserhalb vom Floghafegebäude hed üs schier hendeuse ghaue: Heiss ond e gfühlti Loftfüechtigkeit vo 98% (z'Nacht am 11:30 oder so) - noch 100m semmer scho nassgschwitzt gsi, zom Glöck hed sech s'Hotel in Gehdistanz befonde, de hemmer üs glii weder im liecht klimatisierte Zemmer chönne abchüehle ond dusche.
    Am nöchschte Tag esch es wiiter gange of Lombok. S'Speedboat hed üs de spöter als agseit ond drom pönktlech ofe Räge in Lombok abgsetzt. Üses Hotel hed üs glöcklecherwiis en Fahrer gscheckt gha, de semmer wenig spöter scho dete gsi ond hend de Räscht vom Tag met spaziere ond bade am Strand verbrocht.
    För de nöchscht Tag hemmer eus en Roller gmietet ond send d'Omgäbig go erkonde. Nach einige Kilometer hemmer denn de Nippah-Beach ufgsuecht, eus bim Ehsan, emene Warung-Inhaber ond Touri-Guide, Schnorchelusröschtig gmietet ond send med ehm go schnorchle. Är hed üs zerscht zomene Spot gfüehrt, wos rächt vel Schildchrotte gha hed (zäh Sechtige hed er üs versproche, zäh Scheldchrotte hemmer gseh 😄) ond nochär no zomene Riff wo mer Fesch hend chönne beobachte. Z'frede hemmer i sim Warung (chlises Reschti) z'Mettag gässe ond en fröschi Kokosnoss gschlörft. Am Nomi semmer denn no z'Zwoite nomol bem Riff go schnorchle.    Read more

    See translation
  • 4/7- Wältreis
    Of de Partymeile vo Gili TZ'Mettag of Gili MenoDe "chliini" WasserfallVogelschüüche Dani

    Tag 25, 26 & 27: Lombok

    November 7, 2024 in Indonesia ⋅ 🌩️ 29 °C

    Am 25. Tag vo üsere Reis hemmer en Tagesusflog of die berüehmte Gilis macht. Es hed sech usegstellt, dass de Ary, üse Guide, de Neffe vom Ehsan esch (wo mer jo geschter könneglehrt hend). Meteme Fischerboot semmer zerscht of Gili Trawangan, "d'Partyinsle", wo mer e Stond lang omegloffe send ond en chline Iidrock vo dere Insle becho hend (ämu vom touristische Teil). Nochere Schnorcheleinheit esch es wiiter gange of Gili Meno, wo grad düütlech ruhiger gsi esch. Z'letscht hemmer de no vor Gili Air Halt gmacht zom nomol go schnorchle. Dä Schnorcheltrip hed üs sogar no besser gfalle als dä geschter, wels eifach meh gäh hed zom gseh ond s'Wasser au sehr klar gsi esch (au wenn mer zwoi Schildchröt weniger gseh hend ;)). Weder zrogg im Hotel hemmer no be Cocktail ond Sonneondergang die nöchschte Täg plant. Am Obig semmer nomol zom Ehsan a Strand go z'Nacht ässe.
    Am nöchschte Tag hed de Ary üs metgnoh is Landesinneri, wo mer zerscht de Sendang Gile Wasserfall send go aluege. Dä esch scho sehr imposant gsi, aber üse Guide hed gmeint, das seig jetz erscht de chlii Wasserfall gsi. Scho zemmli nass semmer wiiter zom Tiu Kelep Wasserfall, wo tatsächlech nomol e Stufe iidröcklecher gsi esch. Es Bad im natürleche Pool onderem Wasserfall hed do natürlech ned döffe fähle. Ofem Röckwäg hed üs üse Guide no wössenswärts öber die lokali Flora verzellt ond vor allem au zeigt: Innerhalb vo 15' hemmer zwoi neui exotischi Fröcht probiert, nämlech s'Frochtfleisch vo de Kakao-Frocht (mega!) ond en Wasseröpfel (ganz ok). Spöter of de Heifahrt hed de Ary no en chorze Halt bemene Riisfäld gmacht ond de Dani hed sech det als Vogelverschüücher beliebt gmacht benere Riisbüürin :) . Sowohl of de Hii- als au Röckfahrt hemmer vom Ary osserdem no en intensive Indonesisch-Kors becho.
    A üsem letschte Tag of Lombok hemmer üs en Pause gönnt ond send nor am Pool gläge, bes de Räge üs is Hotelzemmer zwonge hed. Vorhär hemmer aber no de Handstand im Räge güebt. Am nöchschte Tag gohts wiiter of Flores. Oder öppe ned...?    Read more

    See translation
  • 4/7- Wältreis
    Exotischi Frocht Nr. 3: SchlangefrochtWöschtag. Bes d'Wösch fertig esch, chamer no es Korskapitel bearbeite.D'Jasi emmer no am lerne. De Dani esch scho lang fertig (deför med bedänkliche Wössenslöckene ;))1Loschtigi Getränk hemmer au usprobiert. De Dani hed sini Frisur äxta apasst.Luut Internet heds im Birds Nest Bestandteil vo Vogelnäscht ond -spucki denn.1D'Animatore im neue Hotel 🥰

    Tag 28, 29, 30 & 31: Denpasar

    November 10, 2024 in Indonesia ⋅ ☁️ 30 °C

    Noch em krasse Cliffhanger usem letschte Iitrag goht d'Gschecht jetz wiiter :) D'Öberfahrt vo Lombok of Bali esch guet gange ond d'Taxifahrt of Denpasar hemmer zomene bedüütend bessere Priis becho als ofem Hiiwäg. Sowiit so guet, doch plötzlech...
    ...hemmer es SMS becho, de Flog seig ofe nöchschti Tag verschobe worde ofgrond vom Usbroch vom Vulkan Lewotobi Laki-laki of Flores. Üsi Taxifahrerin hed üs drom statt am Floghafe bemene Hotel i de Nöchi vom Floghafe abgsetzt ond statt i Flüüger semmer a Pool ghocket ond hend üs em Online-Theorieteil för üse Tauchkors gwidmet. Üse Lernmarathon esch leider vomene Amerikaner onderbroche worde, wo üs e garantiert erfodni Gschecht (Gepäck verlore, usgraubt, Tinnitus, Rögge ond Panikattakene) verzellt hed. Loschtig, dass die einzig Person, wo üs in Indonesie abättlet hed, en Ami gsi esch...
    Füüf Minute noch em Check-out am nöchschte Tag esch es wiiters SMS inecho, de Flog esch abgseit worde.
    Do mer scho en Tauchkors of Flores bueched gha hend, hemmer üse ursprönglech Plan biibhalte ond hend nomol en Flog för i zwoi Täg bueched, i de Hoffnig, dass sech de Vulkan bes denn chli beruhigt ond d'Äsche sech gliechtet hed. Met jetz vel förig Ziit semmer weder a Pool ond hend üs erneut üsne Lernonderlage gwedmet. Am Di semmer no a Strand, hend üs ÄNDLECH en Schwimmbrölle gchauft (Linseträger wärded wösse, was das bedüütet) ond hend üs vorsechtig ofe nöchscht Tag gfreut wos ändlech wiiter goht. Leider hends d'Götter ned guet gmeint met üs ond de Flog esch weder gstreche worde. Üse Plan B esch also gsi: Fahrt of Nusa Dua, det de Tauchkors mache ond de luegemer wiiter.    Read more

    See translation
  • 4/7- Wältreis
    Canang Sari, die tägleche Opfergabe vo de Hindus, gsehd mer of Bali öberall.
    2. Tauchtag in Padang Bai3Moderni Politiker 🫰3Uluwatu BeachUluwatu- TämpelDe Kecak- Tanz verzellt d'Entfüehrig ond aschliessendi Rettig vonere Prinzässin2De heldehafti Retter esch en Aff (de Hanuman)1Salzwasser verdunschtet i de Trög, zrogg bliibt Salz.

    Tag 32, 33, 34 & 35: Nusa Dua

    November 14, 2024 in Indonesia ⋅ ☁️ 31 °C

    Am 13.11. semmer also of Nusa Dua ond send grad diräkt zo de Tauchschuel. Det hemmer de Made, üse Tauchlehrer, könneglehrt ond d'Usröschtig före nöchschti Tag aprobiert. Denn erscht semmer is Hotel go iichecke, ond hend en ruhige Obig gha.
    Tag 1 vo üsem PADI Open Water Kors: Gstartet hemmer imene Pool med diverse Üebige, womer i de Theorie dröber gläse hend. Am Nomittag semmer denn bereits medem Boot of s'Meer usegfahre ond hend det eusi erschte zwoi Tauchgäng im Meer (= open water) gmacht. Bi dene hemmer d'Üebige vom Vormittag inere Tüüfi vo 5-6 Meter wederholt. D'Tauchmaske im Salzwasser ab- ond weder azieh zom Biispel esch gar ned so eifach gsi. Üsi Naseschliimhüüt hend ämu vom Salzwasser nochhär chli brönnt... Abgseh vo üsne teilwiis onbeholfne Versüech heds onder Wasser noni vel z'gseh gäh. Am Obig hed sech de Dani vo sim Schnauz trennt, demet sini Brölle sech ned duurend med Wasser föllt.
    Tag 2 vo de Usbeldig hemmer in Padang Bai absolviert, rond 2 Autostonde nördlech vo Nusa Dua. Au det hemmer weder zwoi Tauchgäng gmacht, eine am Vormittag ond eine am Nomi. S'Riff esch det bedüütend schöner gsi als in Nusa Dua ond mer hend ganz vel Fisch ond au es paar Schildchrött gseh. De sogenannti Wall dive esch bsonders iidröcklech gsi, wel mer det anere Riffwand entlang schwimmt onds onder eim eifach i d'Tüüfi goht.
    Noch zwoi Täg esch eusi PADI-Usbeldig scho abgschlosse gsi, jetz döfemer bes of 18 Meter abe tauche, yay!
    Am folgende Tag hemmer mol en Tauchpause iigleit ond hend Südbali besechtiget. Üse Guide, de Ben, hed üs währed dem Tag begleitet ond a verschedeni Ort brocht. Gstartet hemmer inere Kafiplantage, wo mer 15 verschedni Tee- ond Kafisorte degustiert hend, de Dani hed sogar e Tasse vom "tüüre" (IDR 50'000= CHF 2.80) Luwak- Kafi gha. S'Bsondrige a dem Kafi send d'Bohne, wo vor em Röschte usem 💩 vom Luwak usegläse wärded. D'Verdauigsenzym gäbed dene Bohne en bsondrige Gout... Vo Kokoskafi öber rote Ingwertee bes pure Kakao - üs hend all gschmöckt, im Lädeli hemmer üs aber ned verleite loh ond us Röcksecht of üses Packvolume nome je e Packig Avocadokafi ond Pandan-Tee gchauft. Denn eschs wiiter gange Rechtig Padang Padang Beach, wo mer guet en Stond verbrocht hend, bevor mer send go ässe. Nochem Zmettag esches a Uluwatu-Strand wiitergange, au det semmer ongföhr en Stond gsi. Förs Obigprogramm semmer i Uluwatu-Tämpel, om üs de Kecak-Tanz azluege, en (sehr touristischi) Füür-Show. Bevor die gstartet hed, hemmer no de Tämpel ond die ganz Aalag bsuecht ond üs vor de Affe in Acht gno. Mer hend gseh, wie amene Touri s'Natel vomene Aff gchlaut worde esch (gezielt!). Schiinbar möched das d'Affe zom de gstohlni Gägestand gäge Fuetter chönne iitusche. De Ben hed üs zom Glöck vorhär no gwarnt gha, so hemmer ohni Verlöscht de Röckwäg noch Nusa Dua chönne aträtte.
    Am 34. Tag vo eusere Reis hemmer eus erneut üsem neue Hobby gwidmed. Weder eschs met em Made of Padang Bai gange, wo mer, womöglech dör üse neui Status als lizenzierti Taucher, meteme guete Gfühl vo Sälbschtsecherheit die Tauchgäng absolviert hend. Of de Heifahrt hed de Made no en Halt inere Salzmanufaktur gmacht, wo mer hend chönne luege, wie Salz usem Meer gwonne werd.    Read more

    See translation
  • 4/7- Wältreis
    Pura Ulun Danu Bratan Tämpel1Pura Ulun Danu Bratan TämpelPura Ulun Danu Bratan TämpelBadass JasminPura Dalem JagaragaDe einzig ander Bsuecher vom TämpelMarkt

    Tag 36 & 37: Reis uf Lovina ond Lovina

    November 18, 2024 in Indonesia ⋅ ☁️ 29 °C

    Vom Süde vo Bali hemmer eus Rechtig Lovina im Norde ufgmacht. Of eusem Wäg i Norde hemmer zwoi Stopps iigleit, de erscht bim Leke Leke Wasserfall ond de zwoit bim Pura Ulun Danu Bratan Tämpel.
    De Wäg zo de Wasserfäll esch en rond 30-minütige Spaziergang dör de Rägewald gsi. Det acho hemmer de Leke Leke zemli för eus elei gha ond hend d'Rueh, s'Wasser ond d'Atmosphäre gnosse.
    De Tämpel esch denn nome paar Fahrminute entfärnt ond sehr guet bsuecht gsi. Meh oder weniger haschtig semmer drom dör di gross ond schön aber au touristischi Alag gloffe ond send vo Teenagerinne us Java aghalte worde, wo es Föteli med de pretty Jasmin welle hend mache ("You are so pretty, where are you from?"). Gäg de Obig semmer noch heftige Rägefäll uf de Passstross vo Zentralbali in Lovina acho.
    För de nöchscht Tag hemmer eus en Roller gmietet. Zerscht semmer i Oschte gfahre ond hend zwoi Tämpel bsuecht. De erschti Tämpel hed Pura Dalem Jagaraga gheisse, wo eus zerscht ganz vel Schuelchend ond denn en sehr ufmerksame Balines empfange hend, wo eus vel öber de Hinduismus ond de Chrieg gäg d'Holländer verzellt hed. D'Holländer hend au de Wäg uf d'Tämpelmuure gfonde, wo si i Autos, Flogzüg ond ufem Velo dargstellt send.
    Vo det semmer wiiter zom Beji Tämpel. Au dä esch komplett läär gsi ond mer hend in Rueh - ganz andersch als am Vortag - de Tämpel besechtiget. Ofem Röckwäg hemmer no en Halt binere Märthalle gmacht, wos allerhand z'gseh gäh hed vom Goldchetteli öber Fröcht zo Poulet ond Fisch. Langsam hongrig semmer zrogg Rechtig Weschte a Lovina Beach gfahre ond hend chorz vorhär öbis gässe. Denn hemmer versuecht go bade. De Norde vo Bali esch wesentlich weniger touristisch als de Süde, osserdem heds aktuell weniger Tourischte, die chömid denn i de Wiehnachtsziit weder. Us dene Grönd esches för vel in Lovina aktuell en schwerigi Ziit zom öbis verdiene. Die ca. 40 m wiit Strecki vo de Stross zom Meer hed denn schlossändlich öbe 40' duuret ond eus en neui Hose, es Hömmli ond diversi Fröcht iibrocht.
    D'Fröcht hemmer denn am Obig am Strand gässe.    Read more

    See translation
  • 4/7- Wältreis
    Gmüetlechs z'Nacht vor de WanderigSchwäfel1Bleck of de KraterseeDe Dani probiert sech do als Schwäfelarbeiter. 1 Sack esch 40kg schwär...1Schwäfeldampf1Ferrari vs. LaborghiniEn Teil vom Erfan (Guide) sim Video - s'ganze gohd 3:18 😄

    Tag 38, 39, 40: Lovina, Gilimanuk, Ijen

    November 20, 2024 in Indonesia ⋅ ☁️ 32 °C

    Am Mittwoch semmer metere Groppe vor der Insle Menjangan go tauche. Menjangan als Tauchspot esch üs vo diverse Lüüt empfohle worde, wels imene Naturschotzgebiet esch ond det au Zwärgseepferdli vorchömed. Vo Lovina us semmer met Bus ond Boot Rechtig Menjangan gfahre, näb eusem Guide Ani send met üs no de Frédéric us Kanada ond de Anton, en düütsche Tauchlehrer us Griecheland, cho tauche. Im Gschpröch hemmer de Iidrock becho, dass de Frédéric s'erschte Mol vo de Schwiiz ghört hed XD
    Bim erschte Tauchgang hed de Dani praktisch nüd gseh, wil sech sini Tauchbrölle permanänt met Wasser gföllt hed. D'Jasi hed de Tauchgang gnosse ond hed sogar en Barrakuda gseh. Aschliessend hemmer of de Insle z'Mettag gässe, wobi mer müesse hed ufpasse, dass eim s'Zmettag ned vo de Reh wäggässe werd. En chlini Inselerkondig hemmer au no döregfüert, aber osser Schweissusbröch wäg de Hitz hed die ned vel brocht.
    Met neuer Tauchbrölle esch es de ofe zwoiti Tauchgang gange, wo mer üs anere grosse Riffwand entlang bewegt ond sogar no en chlini Höhli bsuecht hend. Dämol hed de Dani en Barrakuda gseh- 1:1.
    Ofem Röckwäg hemmer üs wiiter medem Anton agfröndet ond hätted gärn no üsi Kontaktdate met ehm ustuuscht zom för am Obig evtl abmache, ergendwie hemmer das aber nömme gschafft. D'Wält esch aber bekanntlech chlii ond so semmer am Obig, of de Suechi nocheme Resti, em Anton zuefällig weder öbere Wäg gloffe. Mer hend denn no en loschtige Obig met ehm zäme gha 🍻
    S'Ufstoh am nöchschte Morge esch drom es bezli schwieriger gsi als söscht (för de Anton aber wohl einiges meh als för eus). Wiiter esch es noch Gilimanuk gange, vo wo us mer i de Nacht hend welle starte ofene Sonneufgangswanderig ofe Vulkan Ijen. För of dä Vulkan bruuchts es Gsondheitsattest, so semmer also no i Gnoss vomene Spitalbsuech of Bali cho, wo mer üs för Vulkantauglech iigstuft hed. Met Schlof vorhole ond Zwipf iichaufe hemmer üs d'Ziit vertrebe, bes es ändlech Metternacht gsi esch. Ca. 2,5h spöter ond ei Ziitzone wiiter semmer am sehr chalte Startponkt gsi, wo de Erfan, üse Guide, üs met Atemschotzmaskene ond Schotzbrölle usgstatted hed. En liechte Schwäfelgroch esch denn scho i de Loft gsi, aber es sött no vel schlemmer wärde... Onderwägs heds emmer weder Iiheimischi gha, wo erschöpfti Wanderer i Wägeli (wahlwiis Ferrari oder Lamborghini 😂) de Bärg ufe gschobe/zoge hend. Ab denn hed d'Jasi kei Angscht meh gha, dass sies wägem Chnüü ned bes ufe schaffe chönnt. Chorz onderem Krater esch de Schwäfelgroch so starch worde, dass mer d'Maske agleid hend. Die früehmorgendlech Stemmig of dem Krater esch wörklech sehr schön gsi. D'Fahrt zrogg i d'Onderkonft esch rächt chorzwiilig gsi wel mer sie schlofend verbrocht hend.

    P.S. Wer vo de filmemacherische Fähigkeite vom Erfan beiidrockt esch, daf be üs gärn no via WA d'Vollversion beaträge. Zwoi Bonusfilme gets no gratis dezue 😉    Read more

    See translation
  • 4/7- Wältreis
    TarzanIm Würgegriff des Ficus11Fröschi Kakao

    Tag 41 & 42: Nationalpark & Denpasar

    November 23, 2024 in Indonesia ⋅ ☁️ 26 °C

    Noch de Vulkanwanderig ech am nöchschte Tag scho die nöchscht Aktivität agstande, nämlech en Bsuech im Taman Nasional Bali Barat Nationalpark. Das Naturschotzgebiet esch de letschti Ort, wo de Balistar no vorchond, de letschti Balinesisch Tiger esch do vor ca. 90 Johr gschosse worde. Weder eschs met 06:00 verhältnismässig früeh losgange. E chliini Verzögerig heds gäh, wel mer keis Moggeschotzmettel iipackt hend, de hed de Putu, üse Guide för dä Tag, schnell öppis gchauft. Soffell schmöckt definitiv besser als Anti-Brumm, aber scho währed em Iistriiche hemmer die erschte Stech iikassiert. Einigermasse gwappnet gäge die Bluetsuuger semmer döre Mangrovewald gloffe ond hend interessanti Sache erfahre öber die verschedene Pflanze ond Tier i dem Gebiet vom Park. De Putu hed üs sogar dezue ufgforderet, of de Mangroveworzle omezchlättere zom üs zeige wie starch die dönne Gebilde doch eigentlech send. Im Ufergebiet hemmer ganz vel Einsiedlerchräbse ond au es paar Schlammspringer gseh. S'Ushängeschild vom Park, de Balistar, hemmer chorz drufabe au no gseh, leider nor chorz. Aschliessend semmer landiiwärts ond bärguf gloffe, wo sech d'Flora grad weder völlig veränderet hed. D'Fauna in Form vo Mogge leider ned... mer hend glehrt, dass de Ficus (zu Deutsch: Würgefeige) zwor e schöni Pflanze esch, aber eigentlech rächt gemein esch. Lianeschwinge, Affe beobachte ond en Fischzucht send wiiteri Pönkt i dere coole Tour gsi. Verschwetzt ond verstoche (d'Jasi hed öppe nüün Stech am Födli gha. Det hed sie keis Moggemettel iigstreche gha...) semmer zrogg is Guesthouse, wo mer nömm vel gmacht hend.
    Am nöchschte Tag semmer zrogg of Denpasar. Die fröschi Kakao- Frocht us Lombok no in Erinnerig, hemmer üse Fahrer bätte, onderwägs no en chorze Stopp binere Kakaoplantage iizlegge, demet mer nomol chli Kakaofrocht chönd schnause. Das muess en zemmlech ongwöhnlechi Bitt gsi sii, wel är gfrogt hed öb mer ned Kokosnoss oder Kafi meined. "Neinei, Kakao! Mer wend fröschi Kakaofrocht ässe." Är heds üs gliich ned glaubt ond üs zonere Kafiplantage brocht (siehe Usflog Uluwatu). D'Frau det esch ähnlech verwonderet gsi ab üsem Aliege, hed üs de aber nätterwiis es paar pflöckt ond mer send glöcklech gsi 😊 In Denpasar acho, hemmer weder es Zemmer im gliiche Floghafehotel bezoge, wo mer scho us Tag 28 - 31 könnt hend. Morn heissts nämlech "Sampai jumpa Bali" ond "Xin chao Hanoi".    Read more

    See translation
  • 4/7- Wältreis
    Egg coffee. Schmöckt wienes Tiramisù 😋Nationalmuseum"Onkel Ho", wie de Ho Chi Minh au liebevoll gnennt werd.2

    Tag 43 - 46: Hanoi

    November 25, 2024 in Vietnam ⋅ ☁️ 23 °C

    Am 25.11. semmer of Hanoi gfloge. Do wie au in Indonesie schiints chli en Chrieg zwösche Taxiondernähme, Grab (= Uber) ond private Taxifahrer z'gäh, wobii die private rächt offensiv send. Mer send nämlech chuum zom Floghafegebäude us gsi, de hed üs scho eine agschproche: "Need a Grab?". Mer so "Yes", de hed er üs scho zomene Auto gschobe ond gmeint, mer seled det iistiige. Erscht denne hemmer de gschnallt, dass das keis Grab, sondern es privats Taxi gsi esch. Egal, mer send ämu wohlbehalte am Ziel acho 🙂 Mer send de nor no öppis go ässe ond dör d'Strosse vom nächtleche Hanoi (bunt, luut, gschäftig) gloffe, de semmer scho is Bett.
    Am nöchschte Tag esch Sightseeing agseid gsi. Als erschts semmer d'Train Street go aluege, wo de Zog sprechwörtlech det dör d'Hüüser fahrt. De arm Dani esch vom Bahnöbergangswärter halbe usem Wäg pröglet worde, wo de Zog in Amarsch gsi esch. Nochhär eschs wiiter zom Hoa Lo Gfängnis gange, wo mer öppe drüü Stond verbrocht hend ("chorze Museumsbsuech" chömmer leider ned). D'Temperature in Hanoi send düütlech tüüfer als no of Bali, das hed d'Jasi leider ergendwenn im Rache afo gspöre. Zom Glöck chond mer a jedem Egge es feins Pho öber, wo eim weder chli ufwärmt. Noch dem stränge Tag hemmer üs no e Massage gönnt. S'Bier am Obig esch fascht scho sälbschtverständlech ond werd drom in Zuekonft nömme explizit erwähnt.
    Am nöchschte Tag hemmer weder en Museumsbsuech plant, nämlech s'Ethnologische Museum. Be dere Glägeheit semmer au s'erscht mol Bus gfahre do, was au no loschtig gsi esch. Vietnam hed 54 verschedni Völker ond zo fascht jedem hed mer i dem Museum chli öppis erfahre. Spannend esch au de Osseteil gsi, wo verschedni Hüüser nochebaut worde send ond hend chönne begange wärde. Wel mer alles useme Museumsiitrett useholed, esch de Tag nochhär eigentlech au scho döre gsi.
    Als hättemer noni gnueg gha, eschs am Donnschtig weder ines Museum gange. Dämol hemmer chli öppis öber die vietnamesisch Gschecht welle erfahre. Z'gseh heds vell gäh i de Usstellig, z'läse leider weniger ond teilwiis chli met Lückene im chronologische Verlauf. Gschiider, aber ned vollgschiid semmer am Nomittag es üs no onbekannts Viertel go erkonde, bevor mer am Obig no is Wasserpoppetheater send.    Read more

    See translation
  • 4/7- Wältreis
    Insel 'Evil Face' (i de Metti)1Mer hend üs Veneers mache lo. Esch mega gönschtig do 😎1Sonneufgang chorz vorem Tai Chi1Insel 'the whale'1Wer findet Daniela? Tipp: Hier spielt sie sich nicht so in den Vordergrund.1Ändlech im Nachtbus. Be dem Discoliecht schlofemer secher guet!

    Tag 47 & 48: Bai Tu Long Bucht

    November 29, 2024 in Vietnam ⋅ ☁️ 22 °C

    Am Friitigmorge früeh semmer i üsem Hotel in Hanoi abgholt worde ond gmeinsam met wiitere Teilnähmende vom Boat Cruise ad Köschte gfahre. Gäg de Mettag hemmer d'Kabine ofem Scheff döffe bezieh ond met de Mie us Dänemark ond em Fernando us Portugal Zmettag gässe, währed s'Scheff via Halong Bay Rechtig Bai Tu Long Bay gfahre esch. I dere Bucht hemmer s'Scheff gäg es Kanu tüschlet ond so en chliine Teil erkondet. Denn heds en chorze Halt inere chline Höhli ond am benochbarte Sandstrand inklusive Bade gä. Vo det us semmer zrog ufs Scheff, wo mer üs nochem Znacht no erfolglos im Fische güebt hend.
    Es Sonneufgangs-Tai Chi hed üs entspannt i nöchscht Tag starte loh, wo mer nochem Zmorge en grösseri Höhli bsuecht hend. Wie währedem gsamte Usflog hed üs de Hung, de Reiseleiter, au i de Höhli med interessantem Wösse usgstattet. Begleitet worde send die Usfüehrige vonere Simultanöbersetzig is Italiänische vo de Daniela, anere Teilnähmerin, wo sech wohl als zwoite Guide verstande hed. Wechtigi Öbersetzige wie "rice vermicelli" zo "vermicelli di riso" hend ehri itliänischsprächende Metreisende is Beld gsetzt. Ergänzt worde esches vomene Echo a "Aah"s ond anere Wederholig vom jewiilige Wort... 😂🙄 Denn esch scho bald weder Ässe ofem Programm gstande: Sälber gmachti Summer Rolls gfolgt vo Brunch. Vollgässe esches denn weder retour noch Hanoi gange, wo mer am früehche Nomi acho send. Vel Ziit hemmer ned gha, wel de nöchschti Programmponkt - de Ha Giang Loop - am Obig scho gstartet hed. Demet mer of de bevorstehende Nachtbusfahrt ned hangry wärded (vor allem de Dani ;)), hemmer üs no verköschtigt, obwohl mer eigentlech no gar kei Honger gha hend. Zom zwoite Mol semmer in Hanoi also imene Michelin-Reschti glandet (zuefällig!)... Dasmol heds det zemmlech grosszögigi Portione gäh, ond so semmer öbersatt vomene "interessante" Shuttleservice a Busbahnhof brocht worde (en schreiende ond nonstop redende Indo-Brit ufem Biifahrersitz näbem Fahrer, wo zwor permanent glachet, aber ganz secher nüd verstande hed, ofem Röcksetz zämequetscht en verängschtigt werkende Singapurer, de Gabriel ond mer zwe), wo mer i Nachtbus gstege send, wo üs i Norde brocht hed. Do mer scho diversi Gschechte vo chaotische Transfers of Ha Giang ghört hend, semmer ganz froh gsi, dass s'Ufregendschte be üs d'Fahrt a Busbahnhof gsi esch ond mer ned z'metzt i de Nacht am Rand vonere Autobahn of en Aschlossbus hend mösse warte. Am Morge am vieri semmer in Ha Giang acho, womer no för paar Stond im Hostel hend chönne schlofe.    Read more

    See translation
  • 4/7- Wältreis
    đi thôi!
    Üsi Födli hend so Stosseabschnett am Obig chli gspört. Als Paar hemmer enand aber chönne massiere 😁Team Lee 🤩Z'Mettag. S'Ässe esch emmer fein gsi, aber leider ned sehr abwächligsriich.Es Hmong-Meitli (met Schläckzüüg...)1Vietnamesische Kafi ❤️Palast vomene Hmong-KönigZ'Nacht met Happy Water. De Gabriel esch rächt motiviert gsi 😄De Hauptgrond, werom mer glii is Bett send. WARNUNG: Lautstärke reduzieren

    Tag 49: Ha Giang Loop, Teil 1

    December 1, 2024 in Vietnam ⋅ ⛅ 26 °C

    Nocheme chorze Pfuis semmer früeh uf. Am Morge am sebni eschs i dem Hostel scho zue ond här gange wie imene Biendlistock wel sech ca. 40 Lüüt för die bevorstehende drüü Täg ofem Töff parat gmacht hend: Alegge, Reisetäsche packe, ässe, Guide sueche, nomol ompacke... De Lee, üse Guide, hed üsere 11-chöpfige Groppe - Lüüt us Norwege, UK/Irland, Singapur (de Gabriel usem Shuttle), Frankriich, Australie ond mer - d'Route vorgstellt, de eschs a d'Zueteilig vo de Fahrer gange. Do mer beidi wenig bes gar kei Erfahrig im Töfffahre hend, hemmer üs för d'Option meteme Fahrer entschede - esch eh secherer ond mer cha d'Landschaft besser gnüüsse. De Dani esch bem Tang hende drof gsi, d'Jasi hed met em Mung zäme de Bäsewage beldet.
    Im rasante Tempo eschs de losgange, de erschti längeri Halt esch Quan Ba ​​Heaven Gate gsi, en Passöbergang. Wiiter dör wonderschöni Gägende hemmer am Nomittag au no de Tham Ma Pass gmacht, s'Ushängescheld vo dere Tour, wo eim in Hanoi a jedem Egge abote werd ond drom au rächt beliebt be (v.a. jonge) Touris esch. D'Ussecht det esch schön gsi ond för s'Instafoti send au vel Chend vo de asässige Ethnie, de Hmong, det gsi. De Lee hed üs aber gseid, dass die Chend a dä Ussechtsponkt gönd, zom als Fotisujet sech Gäld oder Schläckzüüg verdiene ond drom oft ned i d'Schuel gienged. Är hed drom gmeint, Föteli mache seig ok, mer seled ehne aber nüüt gäh deför.
    S'Ziel vom erschte Tag esch Dong Van gsi. Üsi Groppe, inkl. Fahrer, esch zäme go z'Nacht ässe ond Happy Water (Maisschnaps) trenke. Am Nochbertesch esch no en anderi Touregroppe met trenkfreudige Spanier gsi, wo üs im Trenksprochlärme hend welle öberträffe. Mer send natürlech lüüter gsi 😎 (Achtong: sehr subjektivi Meinig). De Lee ond de Fahrer Tom hend do bewese, dass sie ned nor ofem Töff chönd Gas gäh. Noch de Karaokeperformance vom Lee hemmer üs ärnschthaft Sorge om sini Fahrtüchtigkeit am nöchschte Tag gmacht. Senge hed sech hött vo üsere Groppe no niemer traut ond so semmer noch dem Tag, wo üs met sine velne Iidröck ond holprige Strosse körperlech ond geischtig erschöpft hed, bald mol is Bett.    Read more

    See translation
  • 4/7- Wältreis
    1De Dani esch truurig, wel sin Fahrer ned so en Gspröchige esch.Team Bäsewage Jasi & Mung1Do semmer all scho zemmli döre. Lache goht aber no.21Üsi bede Fahrer

    Tag 50: Ha Giang Loop, Teil 2 & 3

    December 2, 2024 in Vietnam ⋅ 🌫 15 °C

    (Besser) Usgschlofe hed Tag zwoi gstartet. D'Karaokebar hed sech öber Nacht ines Kafi verwandlet ond mer hend det z'Mörgelet. Aschliessend hemmer üsi schmärzende Födli ofe Töff gschwonge ond send losgfahre. Zom Glöck hend sech üsi Beförchtige ned bewohrheitet ond d'Fahrer send topfit gsi (met drüü Johr Erfahrig met so Groppene ofem Loop weiss mer wohl langsam wevels mag liide). Wel d'Landschaft so atemberaubend esch, hemmer fliissig Fotistops iigleid, liechte Näbel ond einigi Wolche hend aber leider verhenderet, dass mer ofem Mã Pí Lèng Pass d'Gränze zwösche Vietnam ond China gseh hend. Im Gschpröch hemmer usegfonde, dass de Lee no nie im Nochberland gsi esch, obwohl jo eigentlech sehr nöch. Osser Hanoi ond de Region Ha Giang heder no nüüt bsuecht. China seig aber eis vo sine Reiseziel heder üs verrote, onder anderem, wel det d'Qualität vo de Ware besser seig als in Vietnam.
    Vom Pass semmer rond en Stond wiiter gfahre, vel bärgab, de Strossebelag esch leider au nömm so das gsi, was s'Födli ned so gschätzt hed. Es muess rächt loschtig azluege gsi sii, wie üsi Groppe noch dere Abfahrt ab de Töff gstege ond omegloffe esch... Deför heds jetz en Töffpause gä, wil mer ofs Scheff gwächslet hend. En chorze Usflog ofem Floss med Schieferversüech a Land ond weder zrogg - oh je! - ofe Töff. Inere Pause gäge Ändi vom Tag hed, ned ganz im Ärnscht, de Gabriel i sinere Verzwiiflig mol nochegluegt, wie d'Chance so stönd, sech es Grab (= Uber) as Ändi vo de Wält z'bstelle 😂 Es hät tatsächlech zemlech priiswärti Agebot gä.
    Osser a Schmärze ond atemberaubendi Landschafte chömmer üs nömm a vel erinnere vo dem Nomitag. Am Obig hemmer imene Homestay öbernachtet. Bade im chalte Pool, dusche, Apéro, z'Nacht met - natürlech - Happy Water gfolgt vo Karaoke esch s'wiitere Programm gsi. D'Jasi ond de Gabriel hend im Duett voller Inbronscht "I want it that way" vo de Backstreet Boys performt. Gfolgt vo standing ovations vo de Awäsende. Nicht.

    De nöchschti Tag hed met chli Wolche gstartet. Ofem Wäg zom erschte Programmponkt, emene Wasserfall met Bademöglechkeit, heds leider en chliine Onfall gäh. Inere Korve esch es Auto z'schnell cho ond hed nömm ganz chönne ahalte, de heds en Zömestoss metem Lee sim Töff gäh. Zom Glöck esch aber nüüt passiert ond so semmer alli onversehrt a Wasserfall, wo zwoi vo üsere Groppe de no send go bade. Wel mer be wiitem ned die einzige a dem schöne Wasserfall gsi send, hed de Räscht vo üsere Groppe ned so Loscht gha zom au no is Wasser goh. Im wiitere Verlauf vo de Strecki hed de Töffverchehr de düütlech zuegnoh, dass es eigentlech gar nömm so entspannt gsi esch of de Stross. Mer hend de no en chorze Halt gmacht benere chliine Imkerei, wo mer Wabe ond frösche Honig hend döffe probiere. D'Lüüt send ganz härzigi gsi ond hend Freud gha, dass mer ehre Honig so fein gfonde hend. Ofem letschte Abschnett hemmer noeinisch chönne de Fahrtwind ond d'Sonne im Gsecht gnüsse, bevor die cooli Tour bem Hostel z'Änd gange esch. De Abschied vo üsne Metreisende esch gstafflet gsi, wel alli a verschedeni Ort wiitergreist send. Wel mer no chli Ziit gha hend, semmer met em Gabriel ond de bede Norweger Sondre ond Casper no öppis go trenke, bevor mer ofe Sleeperbus gange send, wo üs of Ninh Binh brocht hed.    Read more

    See translation
  • 4/7- Wältreis
    Wasserbüffel bem Spa
    1Ofem Gepfel vom 1. Fels1Z'Morge im Nachtzog. Bald scho semmer in Hue.Vor de königliche ZitadelleEs vietnamesischs Einhorn (Qilin) med de Jasmin1Im RäucherstäblidorfGrabmal vom König Khai DinhAbandoned Waterpark

    Tag 52, 53, 54: Ninh Binh & Huế

    December 4, 2024 in Vietnam ⋅ ☁️ 27 °C

    De Bus us Ha Giang hed üs am früehche Morge gäg di vieri in Ninh Binh abgsetzt, denn semmer no för paar Stond is Hotel go schlofe. För Ninh Binh esch en Velotour ofem Programm gstande. Ned super clever noch drüü Täg ofem Töff... Aber es esch denn doch besser gange als erwartet ond hed ned sonderlich gschmärzt. Natürlech hemmer s'Velo bimene Vermieter gholt, wo au Trek im Agebot hed (d'Jasi wott schliesslech be ehrere gwohnte Marke bliibe) ond send denn los of üsi Rondi Rechtig königlichi Tempelalage. Hoa Lư i de Region Ninh Bình esch de Ort vo de erschte beide Königsdynastie in Vietnam ond Hauptstadt vo 968 bis 1009 gsi. Ofem Wäg det hii hemmer paar chorzi Stopps zom Fötele iigleit ond drom esch denn au scho Mettag (ond de Dani hongrig/hangry) gsi, wo mer det acho send. Dank Snacks im Rocksack vo de Jasmin hemmers halbwägs ohni Striit is Resti gschafft. Guet gluunt semmer weder ofs Velo gstege ond send Rechtig Hang Múa (Mua Caves) gradlet, wo mer zo üsere Öberraschig Parkgebühre ond Itrett zahlt hend. De Ort esch aber schön ufbereitet gsi ond en Lotusgarte met Holzstäg perfekt för social-media-affini Lüüt wie üs zwoi ond hed zom fliissige Föttele verleitet. Mer send weniger wäg dem Garte (wo mer gar nüd devo gwösst hend), sondern wäg de Mua Caves (= 2 Felse, kei Höhlene!) det hii, wo mer hed chönne ufelaufe. Veli hend sech vo de vele steile Stägestufe ned abschrecke loh ond so esch es v.a. ofem höhchere Gipfel zemmlech äng worde, zumals det mässig bis schlächt abgsecheret gsi esch ond mer of de Felsbröcke eigentlech omebalanciert esch. Nochhär hemmer d'Velos weder abgäh, send go ässe, im Hotel duusche (im Lobby-WC) ond ine Bar, zom d'Ziit bis zor Abfahrt vom Nachtzog totschloh ond paar Sache för die nöchschte Täg plane. Am zähni semmer de ofe Nachtzog, wo üs met düütlech meh Komfort als de Bus öber Nacht of Huế brocht hed. Dass mer am nöchschte Morge wiiter im Süde gsi send, hemmer a de Temperature düütlech gspört. Nochem z'Mittag semmer d'Zitadelle vo Huế go aluege. D'Aalag esch riesig ond mer hätted problemlos chönne bes Betriebsschloss det bliibe. "Leider" hemmer aber för am Obig e Foodtour bueched gha, wo mer im Cyclo s'nächtleche Huế könneglehrt ond diversi lokali Grecht probiert hend.
    Am nöchschte Tag semmer weder emol met em Töff onderwägs gsi ond zwor of Sightseeingtour i de Omgäbig. Agfange hed d'Tour be de Thien Mu Pagode, de eschs wiiter gange zomene Dorf, wos no in Handarbet Räucherstäbli härstelled. S'Grabmal vom König Tu Duc hed üs ned sehr beiidrockt im Gägesatz zo dem vom König Khai Dinh wo mer im Aschloss bsuecht hend. De Abschloss hed en verlassne Wasserpark bildet. S'Erkonde vo dem abbrochriife ond vo zahllose illegale Parties zeichnete Gebäude esch mega spannend ond gliichziitig au chli onheimlech gsi. De letscht Obig hemmer de eifach chli met Bummle dör d'Stadt verbrocht.    Read more

    See translation
  • 4/7- Wältreis
    12Glacé-Experiment 2: Durian. Fazit: 'stinkt', aber fein.1Hoi AnDe Dani probiert Durian. D'Jasi esch enttüscht vo de onspektakuläre Reaktion vom Dani of d'Frocht1Japanischi Brogg1

    Tag 55 & 56: Hoi An

    December 7, 2024 in Vietnam ⋅ ☁️ 24 °C

    D'Wiiterreis is ca. 120 km entfärnte Hoi An hemmer met üsem mettlerwiile liebschte Fortbewegigsmittel, emene Töff, of de "Panoramastrecki" absolviert. Onderwägs hemmer Stopps iigleid bemene Wasserfall, mehrere Ussechtspönkt ond be de Marble Mountains, wo mer eini vo drüü grosse Höhlene besichtiget hend. Obwohl die Höhli eigentlech diversi buddhistischi Schrein enthalte hed, hed ein Teil ehnder anere Geischterbahn gliche, met Figure vo Kannibale ond Mönsche, wo vo Tier gfrässe wärded... Zo de plante heds no ei onplante Stopp gäh, nämlech wo be eim Töff d'Chetti usegheit esch. Zom Glöck send üsi Fahrer au versierti Mechaniker ond de hemmer nochere chorze Pause am Strosserand weder chönne wiiter fahre. Do Hoi An för sini vele Schniidergschäft bekannt esch, esch de letschti Programmponkt vo de Fahrt en Halt benere Schniiderin gsi (ganz zuefällig esch sie d'Cousine vom einte Fahrer gsi ^^). Mer hend jo eigentlech ned no meh Chleider welle... Aber sie hend so vel schöni Sache gha, de semmer gliich schwach worde 😄
    Die nochhaltigschti Erinnerig vo dere Fahrt esch allerdings de öbertüürti Fisch gsi, wo sech d'Jasi imene Restaurant hed ufschwätze loh. Die 300k, wo sie för en grillierte Fisch met Salatblatt ond chli Tomate ond Gorke zahlt hed, hend sie no lang beschäftiget (zom Vergliich: Mer hend bishär meischtens zwösche 80-100k pro Person zahlt).
    Hoi An esch es härzigs Städtli met ere lange Latärnebautradition, was vor allem am Obig sehr schön sechtbar werd. Üses Obigprogramm esch en Show gsi öber d'Gschecht vo Hoi An. Vel Tanz, Musig ond Gsang - üs heds mega gfalle.
    De nöchschti Tag esch met Sightseeing gföllt worde. Do d'Altstadt vo Hoi An leider scho rächt öberloffe esch, versuecht mer, met (freiwillige) Iitrettsbillet chli Gäld z'verdiene, wo i d'Pfleg vo dene alte Kolonialgebäude fliesse söll. Met dem Billet hed mer Zuetrett zo verschedne alte Gebäude ond so hemmer es alts japanisch-vietnamesisch-chinesischs Huus, es Folkloremuseum ond diversi Tämpel agluegt. Nochdem mer so vel gloffe send, semmer förne Massage no ines Spa. Am Obig semmer no of Danang gfahre, wel mer am nöchschte Tag en Flog of Ho Chi Minh City gha hend. Mer hend üs echli schwär toh met de Entscheidig z'flüüge. D'Alternative wär aber en 18 stöndigi Busfahrt gsi. Das hätt üs en ganze Tag gchoschtet ond üsi alte Rögge hätted au ned so Freud gha. Drom werd also üse Fuessabdrock no chli vergrösseret.    Read more

    See translation
  • 4/7- Wältreis
    Ho-Chi-Minh-Stadt
    Sampanfahrt2Happy WaterLambroFischerboot mit Augen (um die Krokodile zu verscheuchen)Floating Market mit Boot, welches Yambohnen verkauft (sichtbar dank Stock mit Yambohne)Z'MorgeReisnudelfabrikReisnudelfabrikNed ganz Suva- Konform...

    Tag 57, 58 & 59: HCM & Mekong-Delta

    December 9, 2024 in Vietnam ⋅ 🌙 26 °C

    Mer send am Mäntignomittag in Ho-Chi-Minh-City (oder wie di kule sägid HCMC) acho ond hend üs chli dör d'Stadt g'arbeitet. I de letschte Täg hemmer sehr vel Programm gha, mer arme send emmer früeh ufgstande ond onglaublech vel onterwägs gsi, us dem Grond hemmer üs dezue entschede, das Ganze in HCMC chli gmüetlicher azgo. Osser Sightseeing, Ässe ond paar Iichäuf hemmer in HCMC a dem Tag nämlech ned gmacht. Am Zischtigmorge hemmer üs scho weder - vorerscht - us HCMC verabschedet, om en Tour im riesige Mekongdelta z'onternä. Wil mer devo usgange send, dass en Zwoitagestour weniger touristisch ond stressig esch als eini wo i eim Tag döregfüehrt werd, hemmer üs för ersteres entschede. Denkste.
    Währed mer am erschte Tag medem Bus i nördlich Usläufer vom Mekong gfahre send, hemmer vom Tien, em Reiseleiter, vel öber d'Kultur vo Vietnam erfahre. Denn esch de weniger entspannt Teil losgange: Mer send ofnes Boot Rechtig Chilin Insle (Unicorn Island) om det Honigtee ond wiiteri Produkt z'degustiere, wo mer eus denn au versuecht hed z'verchaufe. Noch wenige Minute esches denn medem Scheff ond ere Kokosnoss, wo mer schnell müesse hend abeschlörfe, of di benochbarti Insle wiitergange, wo mer üs imene Sampan dör en Kanal hend loh ruedere (okay, das esch gmüetlich ond schön gsi). Vo det hed denn scho die nöchst "Attraktion" of üs gwartet: Traditionelli Musig ond Degustation vo tropische Fröcht (Mango, Wassermelone, ändlech Jackfruit, Longan ond Guave med Chilisalz). Denn no chorz en Python hebe ond wiiter ine sogenannte Mekong Lamborghini (de Lambro), wo üs nochere holprige Zickzack-Fahrt vorere (Schau-)Kokosnossverarbeitigsstätte abgsetzt hed, zrogg zom Scheff of die drett Insle go z'Mettag ässe. Jawoll, rechtig gläse, z'Mettag. Das hends alles ine Morge inepackt. Mer muess jo d'Touris onterhalte.
    Ofem Wäg i südlich Teil, wo üs de Bus nochem Mittag brocht hed, heds no en Halt binere idröckliche buddhistische Tämpelalag gäh. Am spote Nomi semmer i de Stadt Cần Thơ acho, wo mer s'Nachtlager ufgschlage hend ond zom Glöck nüd meh ofem Programm gstande esch. Mer send drom nome no rasch use zom öbis go ässe. So vel zo üsem Plan, s'Ganze chli ruhiger azgo.
    De nöchscht Tag esch zo üsere grosse Öberraschig deför dütlech entspannter gsi. Do Vietnamese gmäss em Tien gärn täglich ichaufed ond das oft am Morge ofem Märt möched, hed de Tag am halbi sächsi gstartet. Als erschts semmer dör en Märt spaziert, wiiter ofnes Boot wo üs zom Cai Rang, emene schwömmende Märt, brocht hed. D'Zahl a schwömmende Märt nehmt - ned zletscht wäg de Pandemie - stetig ab. Dör das, dass mer sehr früeh gstartet hend, heds en öberschaubari Azahl anderi Touris gä. Mer send somet gmüetlich dör de Märt tuckeret, hend ofnes Marktschiff döffe wo gliichziitig drof gläbt ond Ananas verchauft werd ond hend bimene wiitere Schiff adockt, wo z'Morge verchauft hed. Nochere feine Nudelsuppe semmer weder retour a Land ond vo de Nudelsuppe zonere lokale Fabrik, wo Riisnudle härstellt.
    Ofem Rückwäg noch HCMC hemmer vorem Mettag no en chliine Velousflog (wo nömm ganz all Velos üsne Sicherheitsstandards entsproche hend, bim Dani sim esch de Rahme onderhalb vom Sattel broche gsi) gmacht. Weder bim Usgangsponkt aglangt hemmer sälber vietnamesischi Pancakes gmacht ond üs med wiiterem Ässe schmöcke loh. Das esch denn au de letscht Programmponkt gsi ond d'Groppe esch medem Bus noch HCMC gfahre.    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice