Tag 107 & 108: Franz Josef & Punakaiki

Am 28.01. semmer am Morge weder ziitig uf, wel mer d'Parkplatzsituation vom Roys Peak no im Henderchopf gha hend. Nochere halb Stond Fahrt semmer am Alex Knob Parkplatz acho ond hend tatsächlech no de letscht Platz verwötscht. S'Zmorge, wo mer us Ziitspargrönd ufgschobe hend, hemmer jetz no gnoh, bevors denn ofe Roberts Point Track gange esch. S'Ziel vo üsere hötige Wanderig esch en Ussichtsplattform, vo wo us mer de Franz Josef Gletscher relativ guet sött chönne gseh. De Afang esch dör, för üs mettlerwiile zwor nömm neu, aber emmer no faszinierende Wald gange, bevor mer vomene Schild iidrenglech of d'Gföhrlechkeit vo dere Wanderig hiigwese worde send. Liecht veronsecheret semmer trotzdem wiiter. S'Wätter esch zwor guet gsi aber wer weiss, was de Räge vo de letschte Täg chönnt agrechtet ha of dem Wanderwäg? Öber vel Stöck ond no meh Stei esch es emmer wiiter talufwärts gange, emmer em Verlauf vom Waiho River folgend. De Wäg esch öber mehreri Hängebrogge gange ond a einere Stell hed mer mösse chlättere. En Autobahn, wie mers vo velne vo de bishärige Wanderige könnt hend, esch das definitiv ned gsi, aber grad Angscht om üses Läbe hemmer nie mösse ha.
Plötzlech hemmer Vogelluut ghört, wo mer usem Kiwi Park in Queenstown no in Erennerig gha hend - Keas! Amüsiert hemmer dene loschtige Papageie debii zuegluegt, wies Blueme ond Blätter zerropft ond spelerisch metenand kämpft hend. Wo sech zo dem Vogelzirkus denn au no es Gämschi dezue gsellt hed, esch s'Wildtiererläbnis fascht zu perfekt gsi.
De Gletscher esch trotz drüüstöndiger Wanderig vo de Plattform us no wiit wäg gsi. D'Mönsche, wo i de Helis ständig öber üs gfloge send, hend secher die schöner Ussecht ofe Gletscher gha, aber mer hend üs dänkt, dass mer z'Fuess em Gletscher de grösser Gfalle mached. Glii semmer nömm die Einzige gsi of dere Plattform ond wo denn eini ehri Insta-Biiträg hed afo schniide, semmer gange.
Wel mer scho so früeh los send, semmer am zwoi scho weder bem Parkplatz gsi ond send no wiiter Rechtig Norde gfahre. Als Öbernachtigsort hemmer of de Campermate-App en onbediente Campingplatz am Lake Ianthe gfonde, was also s'Ziel gsi esch. Vorhär hemmer aber no amene andere See Halt gmacht, wo mer hend welle go bade. Ond do esch es passiert: Bem Röckwärtsfahre hed XY en Stei ned gseh ond esch schön driigfahre. Zom Glöck esch üses Büssli aber scho so verbüült, dass en allfälligi wiiteri Delle gar ned uffallt. Aber mer sed halt ned müed Auto fahre.
Am Lake Ianthe aglangt, heds en Apèro gäh met aschliessendem Powernap. Mer hend üs scho gfreut, dass mer so en tolle Öbernachtigsplatz gfonde hend, wos cho send: Sandflies! Met ehne send au no ehri ähnlech onbeliebte Frönde, d'Mogge, cho ond hend üs dezue zwonge, üses Curry (scho weder! 🙈) im Büssli zuezbereite. Paar hends leider zo üs ine gschafft ond hend üs e onruhigi Nacht bereitet.

S'Grüüsch vo de Rägetröpfe ofem Dach hed üs gweckt. S'Wätter hed üse Tatedrang chli brämst, mer send drom erscht noch de Zähne weder onderwägs gsi. In Hokitika hemmer chorz Halt gmacht zom iichaufe ond hend no wägeme Campingchocher gluegt. För üsi bevorstehend Drüütageswanderig hemmer zwor ganz vel gfrüürtröchneti Campingnahrig gha, e Lösig, wie mer zom heisse Wasser för die Mahlziite chömed, aber ned wörklech. Imene Lade heds paar Optione gäh, d'Jasi esch aber noni öberzüügt gsi. I de nöchschtgrössere Ortschaft Greymouth heds aber no e Filiale vom gliiche Gschäft gha, das hed ehre denn glöcklecherwiis d'Möglechkeit gäh, nomol 30 Minuter öber dere Entscheidig z'brüete. 35 Minute spöter semmer meteme Gaschocher ond emene Wasserfilter usem Gschäft in Greymouth usegloffe ond glaubed, s'Rechtige gchauft z'ha.
Emmer no be Räge semmer wiiter gfahre zo de Pancake Rocks. Det acho, hemmer wohrschiinlech s'einzige trochne Ziitfänschter a dem Tag verwötscht ond hend die uffallende Steiformatione guet chönne go aluege.
S'Camping esch denn nor no paar Meter wiiter gsi. S'Check-In esch chli kompliziert gsi, wel mer zwor vier Nächt buechet hend, aber eigentlech nor zwoi defo tatsächlech ofem Platz send. Aber au das Dörenand hed sech klärt ond wo mer nochem z'Nacht abgwäsche hend, hed d'Jasi no es erfreulechs Telefon becho: Sie esch Gotti worde 😊Läs mer