Tag 172 & 173: Cafayate

Vo Molinos eschs wiiter of de Ruta 40 of Cafayate gange. Of dem Wäg esch d'Quebrada de las Flechas, vo dere ned nor üsi Metreisende gschwärmt hend, sondern au de Globetrotter i sim Südamerikaprospekt. Die Begeischterig chömmer nor teile! Dör die bizarri Felslandschaft z'fahre esch wörklech speziell. Klar, dass mer all Nase lang weder hend mösse ahalte zom Fotene mache. Bemene Ussechtsponkt hemmer Mettagspause gmacht, wenig spöter hemmer scho weder aghalte, zom i de Ruine vonere Bodega chli of Entdeckigstour z'goh.
In Cafayate acho, hemmer festgstellt, dass de eint Hond wo üs onterwägs gjagt hed, tatsächlech is Auto bisse ond Bissspure henterlo hed.
Nochem Iichecke hemmer Cafayate no chli z'Fuess erkondet, bevor mer weder is Auto ghocket send. Of Facebook geds en Groppe met 60'000+ Franzose, wo alli ehri Reisetipps för Argentinie dönd teile (anschiinend geds sone Groppe zo jedem Land). D'Melissa (Französin) hed det vomene Agriturismo erfahre, wo Empanada-Körs abietet, mer wederom hend dä "Gheimtipp" vo ere becho. Das hemmer also före Obig plant gha.
Wel das aber erscht am sebni agfange hed, hemmer no en chorze Stopp benere Sanddüne gmacht, wo sowieso am Wäg gläge esch ond de semmer no paar km vo de Quebrada de las Conchas, de Muschelschlocht, gfahre. Dank de Sonneondergangsstemmig eschs mega schön gsi. Guet, fahremer öbermorn of dere Stross weder i Norde. Denn ändlech eschs Ziit gsi för Empanadas. De Hof esch zemmli abgläge, trotzdem hend sech det öppe 12 FranzösInne ond zwoi Franco-Kanadierinne iigfonde. Ond mer. Die meischte hend aber gärn met üs Änglisch gredt ond nochdem de Stromusfall ändlech behobe gsi esch, hemmer agfange: Üsi härzlech Gaschtgäberin hed (en español) üs Schrett för Schrett erklärt, wie mer Empanadas macht, agfange be de Föllig, aschliessend, wie mer sie faltet. Als wär en ganze Tesch met Vegi- ond Fleischempanadas ned scho gnueg, hed sie üs au no zeigt, wie mer Tortillas macht. S'esch vel glachet worde be de Zuebereitig ond wo die rohe Teigtäschene alli parat gsi send, hed üs d'Señora use zom Ofe gfüehrt, wo üsi Wärch bache worde send. Natürlech hemmer vel z'vel gha ond wo mer üs am halbi eis weder ofe Heiwäg gmacht hend, hemmer no paar Empanadas döffe metnäh.

Am nöchschte Tag hemmer usgschlofe. D'Provinz Salta, und do im Bsondere Cafayate ond sini Omgäbig, esch för ehri Wiiabautradition bekannt, drom hemmer en Bodega welle bsueche. Of arote vo de Hostelreceptionistin hii semmer aber zerscht no is Wiimuseum.
Chalti Empanadas send au fein ond so hemmer üs gstärcht i d'Wiiwält begäh. Det hemmer erfahre, dass s'Valles Calchaquíes gueti Abaubedingige hed, wils de Tag döre warm ond i de Nacht chüehl esch, wenig Niederschlag hed ond höch gläge esch. S'Museum esch wörklech guet gmacht gsi ond d'Möglechkeit, im Aschloss i de Museumsbar no zwoi Wii z'degustiere, hemmer grad gnötzt. Onmettelbar näbem Museum esch d'Bodega Domingo Hermanos, wos üs im Aschloss förne Degustation hii verschlage hed. 4 Wii ond e Chääsplatte för omgrächnet 8 CHF p.P. esch meh als fair ond wo mer fertig gsi send, hemmers scho rächt loschtig gha (Empanadas ond chli Chääs gänd jetz ned sooo vel Bode). De Powernap im Hostel (=Usnüechtere) hed üs guet toh ond am Obig semmer de no einisch i d'Stadt go ässe ond före Dani en Mate-Bächer go sueche.Read more