Tag 176: San Pedro de Atacama

Nochdem üs d'Rachel, wo jo scho set es paar Täg do esch ond drom scho paar Sache ondernoh hed, geschter chli hed chönne berote in Sache "lohnenswärti Usflög", hemmer üs dezue entschlosse, am Morge zo de Laguna Baltinache usezfahre. Die Salzwasserlagune esch chli wiiter wäg vo San Pedro als z.B. d'Laguna Cejar, was theoretisch weniger Bsuecher bedüüte wörd.
Wär üse Plan so ufgange, wie mers üs vorgstellt hätted, wäremer vor de Tourbüssli dete gsi ond hätted de Ort för üs elei gha. Leider semmer be de Akonft vor verschlossne Schranke gstande (of Google-Öffnigsziite esch eifach kei Verlass) ond i dere halb Stond, wo mer hend mösse warte, send grad drüü so Büs cho. Ond en Camper. Wie Shoppingwüetigi i de USA am Morge vom Black Friday semmer losprescht, wo d'Schranke ändlech uf esch. Obwohl mer als erschts bem PP acho send, hed d'Ortskenntnis vo de Tourguides denn doch dezue gfüehrt, dass zwoi vo drüü Groppene vor üs d'Billettverchäufer hend chönne in Beschlag näh ond mer drom hend mösse warte. De Daniel hed sech grausam öber "die sch**** Groppene ond ehri Guides" ufgregt, döber, dass "mer wäge dene jetz voll i Stress chömed" ond au, dass die vom Ticketschalter so ineffiziänt gschaffet hend. Wel mer z'zwoite aber emmer no schneller send als e Groppe, hemmers trotz omzieh ond met strategischem Parke (PP2, wo nöcher esch bem Schwimmteich) no vor de Groppene is Salzwasser gschafft.
Wer scho mol im tote Meer gsi esch, könnts: Mühelose Uftrieb, absuufe onmöglech. Wie chliini Chend hemmer 20 min lang de Plausch gha i dem Wasser, bes mer gnueg gha hend ond die erscht Groppe uftaucht esch. De Räscht vo dem Lagunekomplex esch de gar nömm so spannend gsi ond so semmer üs üsi Salzchroschte go abdusche ond weder zrogg of San Pedro, wo mer met de Rachel abgmacht gha hend.
Nochem Bad im Salzwasser hemmer üs erneut met Salz bedeckt, indem mer Velos gmietet hend ond i de Mettagshetz is Valle de Marte gfahre send. Wedermol semmer dör spektakuläri Felsformatione gfahre, wo eim tatsächlech glaube lönd, mer seig ofem Mars. De Dani hed de no mösse probiere, wies esch, im tüüfe Sand Velo z'fahre. Fazit: Weniger loschtig als dänkt.
En Teil vom Wäg hemmer de no ohni Velo zrogg gleid, was üs zomene schöne Ussechtsponkt brocht hed. Noch dem Usflog hemmer d'Velos weder zrogg brocht ond hend üs no gmeinsam es Glace gönnt, bevor mer üs (vorläufig) zom letschte Mol vo de Rachel verabschiedet hend.
Im Hotel hemmer üs före dretti Programmponkt vo dem Tag parat gmacht: Stargazingtour. Mer hends leider wedermol gschafft, d'Tour inere ongönschtige Mondphase z'bueche, interessant esch es aber trotzdem gsi. Wels chli e Repetition gsi esch vo dem, was mer in Lake Tekapo scho gseh ond ghört gha hend, hemmer au meh chönne metnäh us de Usfüehrige. D'Jasi hed sech sogar Notize gmacht, die alt Streberin. Im Vergliich zo dene, wo mer in NZ gha hend, send d'Teleskop aber ned so guet gsi, was chli schad gsi esch. De Abschloss hed au do e gmüetlechi Rondi am Füür beldet, begleitet vo Snacks, Wii ond Pisco Sour.
All das hemmer i ei Tag packt, entsprächend müed semmer denn au gsi, wo mer denn ändlech is Bett send. Czytaj więcej