Tag 183-184: Uyuni + Potosí

Nochem Zmorge am Sächsi eschs för üsi Wiiterreis noch Potosí a Busbahnhof gange. Det hemmer als erschts bim Abieter verbi welle, zom üs amälde, leider semmer det vor verschlossne Töre gstande. Im Gspröch metere hilfsbereite Passantin hemmer usegfonde, dass de Abieter "11 de Julio" i dem Busbahnhof zwoi Büro hed ond mer zom vordere müessed. Das hed denn au offe gha, mer hend s'Check-in gmacht ond send zom Bus gange. Ned grad de komfortabelscht ond vertrauenswördigscht Bus wo do of üs gwartet hed. D'Front esch schön verbüled gsi, was vermuete loh hed, dass de Bus scho mindestens ei Onfall hender sech hed.
Im Bus enn hemmer s'Glöck gha diräkt voremene Baby z'setze. D'Sicherheitsgort hemmer vergäbens gsuecht, de Jasi ehri Röggelähne hed sech au emmer weder sälbständig gmacht.
Die vierehalb Stond im Bus send aber abgseh defo zemli agnähm gsi ond mer send beid emmer weder igschlofe. Chorz vor Potosí esch denn en Kontrolleur igstege, wo ad Kontrolle aschliessend agfange hed dörnes Mikrofon z'rede. Mer hend beid ned werklech zueglost, bes dä Herr plötzlech im Dani es Päckli met Pulver id Hand dröckt hed. Denn hemmer gschnallt, dass do grad en Verkaufsshow à la "de bellig Jakob" im Gang esch ond är Quinoapulver verchaufe wott. Wenn mer sine Uussage Glaube schänke wott, esch das offebar s'Allheilmittel, wo d'Mönschheit set Anbeginn am sueche esch, helft das doch be Konzentrationsstörige, Schlofstörige, Läberbeschwärde, Impotenz, Frauebeschwärde ond wohrschiinlech au no gäge Chräbs. Ond enthaltet dezue no alli erdänkleche Vitamine ond meh.
I de med 4'090 m ü. M. höchschte Stadt vo de Wält acho hed denn öber vo üs gmeint es seig schlau, vollbepackt med läärem Mage (2 Toastbrot am sächsi) of 4'000 Meter öber Meer i de Mittagssonne 40 Minute zo üsem Hostel z'laufe.
Det acho hed de Honger üs zom nöchschte Restaurant gfüehrt ond aschliessend semmer rasch is Hostel go legge, wil d'Jasmin noch de chalte Täg in Uyuni ned sonderlech fit esch.
Betzli fitter semmer spöter denn dör d'Altstadt gschländeret, bis d'Jasi d'Symptom weder stärcher gspört hed. Si esch drom zrog id Onterkonft ond de Dani esch no rasch elei go Znacht ässe.
Dä Tag esch denn relativ früeh för üs z'Änd gange.

Plan före nöchschti Tag esch gsi: D'Stadt nomol chli go aluege, z'Nacht ässe ond de a Busbahnhof, wo mer met em Nachtbus of La Paz wärded fahre. Wo mer welle hend uschecke ond zahle esch no en wiitere Gascht bi de Reception verbi cho ond mer hend ehm de Vortrett glo, do sin Bus bereits inere Stond gfahre esch. Mer send denn Züge vonere heftige Usenandersetzig worde, wo de Bsitzer en Fantasiezahl för d'Omrächnig vo US-Dollar i Bolivianos verlangt hed (1 USD = 13 Bolivianos vs. 6.9, was de offizielli Kors wär). De ander hed das natürlech ned welle zahle ond beid send sichtlich agspannt gsi ond hend sech gägesiitig med de Polizei droht. Mer hend üs au emmer weder iibrocht ond de Bsitzer gfrogt, wie är of die Zahl chond. Är hed ergendöbis vo Kommissione verzellt, werkli drus cho semmer ned. De Gascht hed denn sin Betrag (gmäss aktuellem Kors) of de Tisch gleit ond esch devo gloffe.
So, ond de send mer dracho med zahle. Nochdem mer das ganze Theater als Zueschauer scho hend chönne beobachte, hemmer üs of en Usenandersetzig i de Hauptrolle gfasst gmacht, woner üs gseit hed, wie vel mer zahle müend. Vellecht hed er üs lieber gha als dese, vellecht hed er aber au kei Loscht meh gha ofene wiiteri Diskussion, of jede Fall hed er üs dä Betrag gnennt, met dem mer eh grächnet gha hend. Mer send zemli verwerrt gsi, hend zahlt, üsi Rocksäck deponiert ond send ines Kafi go z'Morge ässe.
De nöchscht Stopp esch d'Casa de la Moneda gsi, es Museum öber d'Silberverarbeitig in Potosí. Potosí hed im 17te Johrhondert zo de gröschte ond riichschte Städt vo de Wält ghört - wägem Silbervorkomme im Bärg Cerro Rico. Mer hend Glöck gha, wels gnueg Ned-Spanischsprächendi gha hed, esch för üs d'Füehrig of Änglisch gmacht worde. So hemmer vel Wössenswärts öber die vergangene Glanzziite vo dere Stadt glehrt ond au, wie das wärtvolle Metall im Lauf vo de Jahrhondert verarbeitet worde esch.
Nochem Zmittag hemmer üs noch paar chlinere Stopps zo de Iglesia de San Francisco ufgmacht ond det di nöchscht Tour buechet, dasmol esch si of Spanisch döregfüehrt worde. Wil de Guide aber so flott gsi esch ond langsam gred hed, glaubemer, s'meischte verstande z'ha. D'Highlights vo dere Tour send de Bsuech vo de Katakombe gsi ond de no de Zuetritt ofs Dach, vo wo us mer en super Bleck öber d'Stadt gha hed.
De Räscht vom Nomittag hemmer ofem Plaza 6 de Agosto verbrocht, wo mer i de letschte Sonnestrahle vom Tag no chli am Blog gschrebe hend. Wos sächsi gsi esch, hemmer üs zom userwählte Restaurant ufgmacht, wo denn hätt selle ufmache. Natürlech esch esch noni offe gsi, drom hemmer nomol en Ehrerondi dreit. Wo mer zroggcho send, hed das emmer noni offe gha! Erscht ofe dretti Alauf heds de klapped ond mer hend u.a. e feini Kalapurka-Soppe gässe. Wo mer üsi Rocksäck im Hotel gholt hend, hed üs de Sohn vom Bsetzer agsproche. "Super, dä wott jetz secher meh Gäld vo üs" hemmer dänkt, aber nei, sini Strategie esch en anderi gsi: Üsi Öbernachtig hed er of Booking storniert ond üs ufgforderet, die Stornierig entsprächend z'bestätige. So mönds a Booking natürlech kei Gebühre zahle. Bi so öbisem wemmer ned med mache, ond so hemmer dä Vorfall spöter gmolde.
Die aschliessend Taxifahrt zom Terminal esch au interessant gsi: S'Auto muess scho es paar tuusig km drof gha ha so wies usgseh hed ond erscht rächt, wies sech agfühlt hed. Setzpolschter döre, Dämpfer komplett döre, gschaltet heds au nömm so schön. Dezue esch ofem Biifahrersetz de (vermuetlech) Sohn vom Taxifahrer gsässe, es riesigs Stöck Torte ofem Schoss. Mer hend üs aber nätt onderhalte met em Fahrer ond noch 20 min Fahrt dör die höglig Stadt semmer de ändlech acho. I de Abfahrtshalle esch gschäftigs Triibe gsi, akustisch ondermolt vo luute Rüef vo de Billetverchäuferinne, wo ehri jewiilige Destinatione apriesed. Schliesslech hemmer de chönne iistiige ond send positiv öberrascht gsi, dass mer en sehr moderne Bus verwötscht hend, wo sogar no Sässel met Massagefunktion gha hend! Nice to have, zom schlofe bruucht mer das aber ned.Read more