Tag 187 & 188: Puno & Cusco

Pönktlech am sebni semmer för üsi Tour ofe Titicacasee abgholt worde. D'Frau, wo üs abgholt hed, hed chli en gstresste Iidrock gmacht ond wo mer sie de gfrogt hend, wevel Lüüt denn a dere Tour teilnähmed (indiräkt: Wie gross die Abholrondi werd), meint sie: "72". Jo, det esch üs bewosst worde, of was mer üs do iigloh hend... Mer hend jo gwösst, dasses of de Uros-Insle touristisch esch, aber das hed üs denn doch öberrascht.
D'Hoffnig, dass sech die 72 Lüüt vellecht spöter i chliineri Groppene wörded uflöse, hed sech ned bewohrheitet, im Gägeteil! Am Hafe esch eis Usflogsboot näbem andere atäut gsi, dezue no wiiteri Touregroppene vo üsere Grössi (dezue mues mer aber no säge, dass mer zemmli secher ned so vel gsi send, ehnder 40 oder so, d'Groppe esch glaub öbe halbiert worde).
Mer also üses Boot bestege, wo üs als erschts zo de schwömmende Insle vo Uros brocht hed. Im Boot hemmer zerscht anere musikalische Darbietig glauscht bevor de Giovanni, üse Reiseleiter, üs paar wössenswärti Sache öbere See, d'Religion ond Uros metteilt hed, wie z.B. dass Titicaca obersetzt "graue Puma" bedüüted, wel de See ofem Chopf betrachtet d'Omriss vomene Puma hed. Öber Uros hemmer erfahre, dass es us rond 120 schwimmende Insle bestoht, wo us Schilf härgstellt wärded ond jewiils vo öppe 4-5 Familiene bewohnt wärded. Es gäb Schuele ond au wiiteri Iirechtige. Ond mer bechämed jetz die einzigartig Chance, dene Lüüt be ehrem tägleche Läbe döffe zuezluege! Üses Boot hed üs be sonere Insle usegloh, wo de Giovanni üs no aschaulech zeigt hed, wie die Schilfinsle härgstellt wärded. Noch sine Usfüehrige hend denn die vier Familieoberhäupterinne (d'Manne send ergendwie niene gsi) vo de Insle äxtra för üs, ehri liebe Tourischtefrönde, gsonge. Währenddesse hend sech paar vo üsere Groppe nömme gschpört ond hend onabrochti Fotene met de Locals ond ehrne Chend gmacht. Noch de Gsangsiilag hed üs d'Amalia zo sech i ehres dehei iiglade. Det hed sie üs ond paar anderne vo ehrem Alltag verzellt. Nochdem das ganze Empfangsprozedere abgschlosse gsi esch, hed d'Verchaufsshow agfange. Mer hend üs schliesslech zom Chauf vo zwoi Sache entschede (wobii mer üs oneinig dröber send, öb die wörklech nötig send), leider aber be de Falsche. D'Amalia hed üs nochhär nämlech druf ufmerksam gmacht, dass mer doch EHRI amigos suizos seiged ond mer doch bitte ehri Sache au söled cho aluege. Jo, de hemmer halt no öppis be ehre gchauft... Es hed sech alles so falsch agfühlt, gliichziitig hemmer üs als Tourischte sehr onder Drock gfühlt gha, det (vel) Gäld uszgäh. Wenn mer d'Möglechkeit gha hätted, wäremer scho lang weder gange, stattdesse esch jetzt s'nöchschte Highlight cho, nämlech d'Fahrt ofemene traditionelle Schilfboot, natürlech doppelstöckig, demet au alli Touris drof Platz gfendet, wo üs ofene anderi Schilfinsle brocht hed. Dämol send d'Chend för die musikalisch Onderhaltig zueständig gsi, was no onagnähmer gsi esch. Zom Glöck hemmer kei Mönz gha wo mer ehne hätted chönne gäh. Die Öberfahrt esch natürlech ned gratis gsi ond of üses Omegäld wartemer höt no.
Nochemene chorze Zwöschehalt of dere Insle met Verpflegigs- ond wiitere Souveniriichaufsmöglechkeite eschs weder of üses Usflogsboot gange, wo üs ofem höchschtglägnige schiffbare See vo de Wält of die natürlech Insle Taquile brocht hed met ehrne rond 2800 Iiwohner.
Au die hend sech fescht öbere höchi Bsuech gfreut ond grad en Tanz ufgfüehrt, wo schliesslech es paar us üsere Groppe metgmacht hend. Bsonders ei älteri Dame esch debii met ehrem Selfietanz onagnähm ufgfalle. De Fruscht öber dä bishär misslongni Tag hed üs zemmli of d'Luune dröckt, was mer enand leider chli hend loh gschpöre. Nochhär heds z'Mettag gäh, im Aschloss hemmer no chli Ziit gha, d'Omgäbig of eigeti Fuuscht chönne z'erkonde. D'Insle sälber esch sehr schön ond vom Dorfplatz us, wo zemmli ofem Bärg obe esch (ond en entsprächend asträngende Astieg bedingt), hed mer en schöne Blick ofe See. Nochhär semmer weder ofs Boot, wo üs noch Puno brocht hed. Mer send de no go z'Nacht ässe ond nochdem de Dani es Oatmeal Breakfast Stout gha hed, esch d'Wält weder in Ornig gsi.

De nöchscht Tag esch schnell verzellt: Met em Bus eschs dör die schön högelig peruanisch Landschaft vo Puno noch Cusco gange, det semmer gäg die drü acho. Met emene rassige Taxifahrer semmer zo üsem Hostel, wo mer zerscht ned gfonde hend, wil das niene agschrebe gsi esch. Loschtigerwiis esch ei Tag spöter s'Scheld weder dosse ghanget.
Mer send denn no chli dör Cusco gschlenderet, hend zwoi Toureabieter, wo mer vorgängig recherchiert hend, ufgsuecht ond denn bimene dritte per WhatsApp zwoi Toure buecht, währed mer es feins z'Nacht gnosse hend. Aschliessend hemmer d'Altstadt vo Cusco chli wiiter inspiziert. Per Zuefall semmer denn bi de Bar vo de Brauerei 7 Vidas verbi cho, wo mer de Rescht vom Obig verbrocht ond met de Brauerei bi Live-Musig ehre erschti Gebortstag gfiiret hend.Read more