Tag 205 - 207: Santa Teresa

Am Ziischtig hed üs de Dennis of die 07:30 zo sech i d'Surfschuel bstellt. Die esch z'Fuess ca. 30 min wäg gsi, was mer förne schöne früehmorgendleche Strandspaziergang gnötzt hend. Sini Schuel esch grad am Playa Santa Teresa gläge, wo d'Grössi vo de Wälle üs scho zemmli Respäkt iigflösst hend. Zom Glöck hed er aber gmeint, dass mer ane andere Strand gienged, wo d'Wälle chli afängerfröndlecher seiged. Of de Hiifahrt hemmer grad no döffe zueluege, wiene Nasebär öberfahre worde esch...
In Manzanillo acho heds zwor ruhiger usgseh, d'Jasi esch aber im Gägesatz zom Dani noni so öberzüügt gsi, öb sie wörklech is Line up use wel. Allfälligi Zwiifel send denn aber abegschlöckt worde, met ehne leider au vel Salzwasser. Während d'Jasi no demet z'kämpfe gha hed öberhaupt us de sogenannte Impact Zone, wo d'Wälle bräched, usezcho, hed de Dani bereits sin erscht Versuech i de grüene Wälle erfolgriich gmeischteret. Ändlech im Line up acho, hed de Dennis d'Jasi nochere chorze Verschnuufpause i ehri erscht Wälle gscheckt, was aber nor paar Sekonde lang guet gange esch. Nochem Storz is Wasser hed de ganzi Chrampf vom "us de Impact Zone use cho" weder agfange. Am Ändi vo de Surfsession send üsi Meinige öber s'Surfe diametral usenand gange: De Dani heds abgfiired, d'Jasi hed scho halbe as Ufhöre dänkt.
Beidi semmer aber total müed vo dere Session gsi ond send is Hotel go schlofe. De Nomittag hemmer zerscht zom Plane im Co-Working Space vom Hotel verbrocht, aschliessend semmer a Strand. En chorze Stopp bemene Autovermieter hed üs zo de Idee verleitet, das Ganze doch online abzwickle, wel vermeindlech gönschtiger. Wir werden sehen...

Neuer Tag, neues Glück. D'Jasi hed es grössers Board becho ond hed sech zerscht mol im Wiisswasser as neue Board gwöhnt ond neus Sälbstvertraue gholt. Ergendwenn hed sie sech denn weder use traut und siehe da: Erschti Wälle grad verwötscht ond bes a Strand gsurft. A dem Morge eschs för üs beidi guet gloffe ond d'Kokosnoss, wo üs de Dennis jewiils nochem Surfe spendiert, hed beidne gschmöckt.
Wel d'Johresziit (Räge!) ond de generelli Strossezuestand üs chli veronsecheret hend, hemmer em Dennis sini Meinig welle wösse. Subaru Crosstrek vs. Toyota RAV4? Obwohl de Toyota ehnder en Stadt-SUV esch, esch das sin klari Favorit gsi. Met dere Empfählig semmer is Hotel zrogg, hend zomene verdächtig guete Priis online de Subaru (sorry, Dennis) gmietet ond 30' spöter feschtgstellt, dass im Versecherigsvertrag Costa Rica als Wohnsitzland agäh gsi esch, was jo ned stemmt ond d'Versecherig drom ongöltig. Ond do hend d'Problem agfange: Chondedienscht via Chat ond Mail versuecht z'erreiche, ned gange, telefoniere hemmer ned (nonig) welle. Wel mer no en Tag de Ziit gha hend, hemmer no abgwarted.

Am nöchschte Tag weder go surfe, d'Erfolgsquote esch be beidne gfühlt ca. 70 % gsi, was jo ned so schlächt esch.
Wel sech s'Mietautoproblem noni glöst gha hed, hemmer zrogg is Hotel pressiert ond hend zom Telefon greffe. Noch 40 Minute Warteschleife, wiitergleitet wärde, us de Leitig gheie ond weder warte, esch üs als Lösig abote worde: Neui Buechig via VPN mache ond de met de neue Buechigsnommere nomol alüüte, demets die alt Buechig gebührefrei chönd storniere (dezue muess mer säge, dass es gar ned üse Fähler gsi esch, sondern s'Buechigssystem - wohl wäg de IP-Adrässi - eifach automatisch Costa Rica als Wohnsitzland agnoh hed, was üs ned azeigt worde esch ond mer somet ned chönne hend ändere). Wo mer gseh hend, wie vel tüürer s'Mietauto met Schwiizer VPN esch, hemmer d'Stornierigsgebühr in Chauf gnoh ond das Ganze abbroche.
Also nomol persönlech bem Autovermieter verbii. Das esch wenigschtens schnell ond onkompliziert gange, wenn au tüürer als ursprönglech erhofft. Do jetz d'Autofrog klärt gsi esch, hemmer aber de Grillobig met Jean, Andrina, Silvan und Meli chönne gnüsse.

Was mer beshär nie erwähnt hend, aber was üse Alltag in Santa Teresa ab ond zue chli beiiflosst hed, send d'Stromusfäll. Kei Tag ohni, meischtens nor chorz, vereinzelt länger, was müehsam esch. Einisch i de Nacht sogar on-off, was üsi Klimaalag ständig meteme Piepston vermäldet ond üs so stöndlech gweckt hed.Læs mere