Tag 227 & 228: Uvita

Mer hätted in Uvita gärn no die vorläufig letscht Möglechkeit zom Tauche wohrgnoh. De Marino Ballena NP omfasst au d'Onderwasserwält vor de Küschte vo Uvita ond au d'Isla Caño wiiter südweschtlech esch för ehri schöne Tauchspots bekannt. Leider choschtet sone Tauchtag be allne Abieter, wo mer agluegt hend, mind. 200 USD pro Person. Das esch üs de doch z'vel gsi ond mer hend üs förs Surfe entschede. Det semmer au im Wasser ond wärded dezue no bruun (oder rot...). Bemene andere Parkiigang (in Uvita esch de ganz Strand Teil vom NP, drom zahlt mer emmer öppis zom a Strand z'goh) hemmer Boards gmietet ond hend üs zwoi Stond lang det ustobed, bevor mer üs i d'Sonne gleid hend. De Nomittag hemmer wägem Räge i üsem Containerzemmer verbrocht ond hend am Obig det no Chnoblispaghetti gchochet. S'Zemmer hed zwor före Räscht vom Obig noch Chnobli gschmöckt, aber s'Ässe esch fein gsi.

De nöchschti Tag hemmer zemmli ähnlech gstaltet, eifach met em Onderschied, dass mer vorem Goh üsi Sache packt hend ond met vollgladnem Auto a Strand send. De Wasserstand esch üs no chli z'tüüf gsi, drom semmer zerscht chli a Strand gläge ond hend gläse. Debii hemmer d'Bekanntschaft meteme Kokosnossverchäufer gmacht, wo luut eigeter Ussag zäh Johr lang Tennis gspelt hed, vo Yonex gsponseret worde seig ond sogar zwoi mol international gspelt heig, bes ehn e Chnüüverletzig ond sini Frau (dä Teil met de esposa hemmer ned ganz verstande...) zom Ufhöre zwonge heiged. Sis Schattetennis hed üs sehr fescht ane Bekannte vo üs erenneret... Mer hend ehm versproche, noch em surfe no e Kokosnoss be ehm z'chaufe, hend d'Boards gholt ond send is Wasser. Noch zwoi Stond hemmer d'Boards zrogg brocht ond üs scho of d'Pipas gfreut. Die hemmer au becho, leider aber zomene Sonderpriis: 4'000 wärs gsi, mer hend ehm 10'000 gäh, s'Omegäld, woner "imene Restaurant i de Nöchi" hed welle go hole, hemmer aber nie meh gseh. Ehn au ned. Debii hemmer üs so guet met ehm onderhalte! Wo mer das am Parkiigang amene Wärter verzellt hend, hed er ned sonderlech öberrascht gwörkt.
Grad vorem Parkiigang esch en Wohnwage / es Tiny House gstande, wo mer d'Garette vo dem Typ gseh hend. De Dani esch go chlopfe, d'Töre esch aber zue blobe. E Frau, wo üs gseh ond de gfrogt hed, was mer vom Bewohner weled, esch vo üsere Erzählig au ned bsomders öberrascht gsi... Zor Rache hätt d'Jasi dem Dieb welle d'Machete verstecke. De Dani, usnahmswiis mol de besonneneri vo üs, hed aber Nei gseid ond stattdesse zwoi Kokosnöss, wo mer jo zahlt hend, vo de Garette gnoh.
So hemmer üs vo Uvita verabschedet ond send of Quepos gfahre, vo wo us mer die nöchschte zwoi Täg de Manuel Antonio NP wend erkonde. Mer hend üs es riichaltigs z'Nacht zuebereitet ond weder hed s'Zemmer noch Chnobli gschmöckt.Leer más